Чӑваш Енӗн ҫут ӗҫ министерстви пӗлтернӗ тӑрӑх паянхи куна «Чӑваш чӗкеҫӗ» конкурса 5 пин ытла ача хутшӑнасшӑн. Хутшӑнас килсен ачасен ун ҫинчен кӑрлачӑн 20-мӗшӗччен пӗлтермелле. Ҫавӑн пекех Тутарстанран 224 ача, Пушкӑртстанран 221 ача хутшӑнасшӑнни пирки пӗлтернӗ.
Хӑй конкурсӗ нарӑсӑн 8-мӗшӗнче иртӗ. Конкурса 3-11 класр ачасем хутшӑнма пултараҫҫӗ. Вӗсен пӗр сехет те вунпиллӗк минут хушшинче конкурс валли ятарласа хатӗрленӗ 30 ыйту ҫине хуравламалла. Хуравланӑ чухне пилӗк тӗсрен пӗрине ҫеҫ суйламалла.
Кашни хутшӑнакан сертификат илӗ, хӑйсене чи лайӑх кӑтартнӑскерсем — парнесене тивӗҫӗҫ.
Конкурса Чӑваш патшалӑх университечӗ, «Хӗрарӑмсем ӑслӑлӑхпа ҫутлӑх ӗҫӗнче» обществӑллӑ организацийӗн чӑваш уйрӑмӗ, Чӑваш Енӗн ҫут ӗҫ Министерстви ирттереҫҫӗ.
Сӑмах май каласан, 2006 ҫулта ку конкурса Чӑваш Енрен 8674 ача, Тутарстанран — 221, Пушкӑртстанран — 494, Чӗмпӗр облаҫӗнчен 80 ача хутшӑннӑ.
Тутарстанра 2006 ҫула литературӑпа ӳнер ҫулӗ ячӗпе «Сувар» хаҫат информаци енӗпе пулӑшнипе Хусанти «Сувар» ҫамрӑксен пӗрлешӗвӗ Тутарстанри чӑваш юрӑҫисен «Акатуй» ятлӑ пӗрремӗш аудио альбомне кӑларнӑ.
Альбома Хусанти, Чаллӑ, Анат Кама хулисен тата Элмет, Чистай, Теччӗ, Аксу, Пӑва районӗнчи юрӑҫӑсен пултарулӑхӗ кӗнӗ. Ытларах енӗпе унта 30 ҫула ҫитменнисен юррисене кӗртнӗ. Сӑмахран, чи ҫамрӑк юрӑҫа, Сергей Платонова, 18 ҫул кӑна. Юрӑсен сӑввисене те Тутарстанри авторсем ҫырнӑ.
Пуш уйӑхӗн 18 Хусанти МВД КЦ-ӗнче ку прокта хутшӑннӑ юрӑҫӑсен концерчӗ иртӗ. 2006 ҫулхи ҫу пуҫламӑшӗ валли пӗрлешӳ иккӗмӗш альбома кӑларасшӑн.
Эпир ҫамрӑқ юрӑҫӑсене ҫитӗнӳсем сунатпӑр, итлекенсем альбома лайӑх йышӑнасса шанатпӑр!
+26.3 °C