Чӑваш Енре пурӑнакансем кӑшӑлвируспа ҫыхӑннӑ лару-тӑру лайӑхланасса тем пекех кӗтеҫҫӗ. Ҫӗртме уйӑхӗн 3-мӗшӗнче республикӑри район-хуласене ятарлӑ ушкӑнсем тухса кайӗҫ. Вӗсем кӑшӑлвирус тӑрӑмне, ӑна хирӗҫ епле мерӑсем йышӑннине вырӑна тухса тӗрӗслӗҫ. Кун пирки республикӑн Элтеперӗн тивӗҫӗсене вӑхӑтлӑх пурнӑҫлакан Олег Николаев паян пӗлтернӗ. Тӗрӗслеве вӑл депутатсене, прокуратурӑра, ШӖМ тата Роспотребнадзор тытӑмӗнче ӗҫлекенсене хутшӑнма чӗнсе каланӑ.
Каланине итлесен, кирлӗ мерӑсене пӑхӑнсан ҫитес эрнерен чарусене пӑрахӑҫлас шанчӑк пур.
Аса илтерер: Ҫимӗкре ҫӑва ҫине кайма чарӗҫ, чиркӳсене те ҫав вӑхӑтра кайма юрамӗ.
Паянхи кун тӗлне Чӑваш Енре 2973 ҫын кӑшӑлвируспа чирленӗ. Ӗнертенпе ку йыша тепӗр 88 ҫын хушӑннӑ.
Ку таранччен 1272 ҫын сывалнӑ, паян пульницӑран 30 ҫын тухнӑ. Эппин, кӑшӑлвиурсран сипленекенсем паян – 1687 ҫын. Вилнисен йыше майӗпен пысӑкланса пырать – 14 ҫынна ҫитнӗ.
Чӑваш Енре кӑшӑлвирус сарӑлнин индексӗ 1,03-пе танлашнӑ. Эппин, хальлӗхе республикӑра йышӑннӑ мерӑсене пӑрахӑҫламӗҫ-ха.
Паян Шупашкар тата Чӑваш Ен митрополичӗ Варнава вилнӗ. Вӑл 89 ҫулта пулнӑ. Унӑн ӳпки икӗ енӗпе шыҫнӑ. Вӑл пульницӑра выртнӑ.
Варнава хӑйӗн ӗмӗрӗн пысӑк пайне, 43 ҫулне, Чӑваш Енре ирттернӗ. Ӑна Чӑваш автономи облаҫне йӗркеленӗренпе 100 ҫул ҫитнине халалласа кӑларнӑ медальпе чысланӑччӗ. Ҫавӑн чухне Варнава Чӑваш Ене питӗ юратнине, кунтах куҫне ӗмӗрлӗхе хупассине каланӑччӗ.
Варнава (Владимир Кедров) 1931 ҫулхи ака уйӑхӗн 21-мӗшӗнче Рязань облаҫӗнчи Высокое ялӗнче чиркӳ ҫыннисен ҫемйинче ҫуралнӑ. 1976 ҫултанпа вӑл – Шупашкар тата Чӑваш митрополичӗ.
Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев митрополита пытарма ятарлӑ ушкӑн йӗркелеме хушнӑ.
Чӑваш Ен вӗренӳ министрӗ Сергей Яковлев ачасен сывлӑхне ҫирӗплетмелли ҫуллахи кампани епле ӗҫлесси пирки Роспотребнадзор ӑнлантарни тӑрӑх уҫӑмлатнӑ.
«Уйлӑхсене вӑл е ку хатӗрсемпе тивӗҫтермелли пирки уҫӑмлӑ каланӑ. Ҫав шутра – пӳлӗмсенче сывлӑша сиенсӗрлетмелли хатӗрсем кирли ҫинчен те. Кашни уйлӑхра икӗ медӗҫченрен кая мар пулмалла. Кашни отрядра ятарлӑ термометрсем кирлӗ. Уйлӑхсенче ачасен йышӗ проектпа пӑхнин 50% иртмелле мар», — тенӗ министр.
Апат хатӗрлекен блоксемпе апат турттаракан автомобильсем тӗлӗшпе те ятарлӑ требованисем пулӗҫ. Уйлӑхсене маскӑсемпе, перчеткесемпе, дезинфекци хатӗрӗсемпе тивӗҫтерӗҫ.
Уйлӑхсенче ӗҫлекенсене смена вӑхӑтӗнче территорирен тухма чарӗҫ, ашшӗ-амӑшӗн ачисем патне кайма юрамӗ.
ЧР Элтеперӗ пулнӑ Михаил Игнатьев Питӗрти пульницӑра выртни пирки сайтра хыпарланӑччӗ. Аса илтерер: ун чухне унӑн ӳпки шыҫни, кӑшӑлвирус пулма пултарни пирки пӗлтернӗччӗ.
Хыпарсен федераци агентстви пӗлтернӗ тӑрӑх, кӑшӑлвирус анализне хальлехе кӗтеҫҫӗ, вӑл паллӑ мар-ха. Михаил Игнатьев Питӗрти Алмазов центрне ҫу уйӑхӗн пуҫламӑшӗнче лекнӗ. Кӑларӑм пӗлтернӗ тӑрӑх, экс-Элтепер чӗрепе чирленӗ, халӗ вара йывӑртарах-мӗн. «Сывлӑхӗ йывӑр, ӳт температури – 37,5. Кӑшӑлвирус пирки хальлӗхе паллӑ мар», - ҫырнӑ агентство.
Пандемие пула медцентр карантинра, ҫавна май чирлисем патне тӑванӗсене кӗртмеҫҫӗ, апат-ҫимӗҫ илсе юлмаҫҫӗ, пульницӑри апата ҫеҫ ҫитереҫҫӗ. Агентство пӗлтернӗ тӑрӑх, Михаил Игнатьева нимӗн те кирлӗ мар.
Роспотребнадзорӑн республикӑри управленийӗ Чӑваш Енри ача пахчисене халех уҫма чарать. Ҫак ыйтӑва кӑшӑлвирус инфекцийӗ сарӑлнине хирӗҫ ӗҫлекен оперативлӑ штабӑн черетлӗ ларӑвӗнче сӳтсе явнӑ.
Чӑваш Енӗн тӗп санитари врачӗ Надежда Луговская каланӑ тӑрӑх, ҫак кунсенче ача пахчисенче дежурство ушкӑнӗсене ӗҫлеттерни ҫителӗклӗ. Шкул ҫулне ҫитменнисен учрежденийӗсене уҫма хальлӗхе тӑхтамалла.
«Кирлех пулсан дежурство ушкӑнӗсен йышне уҫмалла. Унта ашшӗ те, амӑшӗ те ӗҫлекеннисен ачисене йышӑнмалла. Сывлӑх сыхлав министерствипе пӗрле ятарлӑ приказ хатӗрленӗ. Унта ачасене шкул ҫулне ҫитменнисен учрежденине йышӑнас йӗркене палӑртнӑ», – тенӗ Надежда Луговская.
Ача пахчине ҫӳрекенсен кӑшӑлвируспа чирлӗ ҫынсемпе ҫыхӑнура пулманнине ҫирӗплетекен справка кирлӗ пулӗ.
Хальлӗхе Чӑваш Енре кӑшӑлвируспа чирлекенсен йышӗ чакса пымасть. Ҫу уйӑхӗн 30-мӗшӗ тӗлне республикӑра тепӗр 87 ҫын инфекциленнӗ. Ҫав вӑхӑтрах 30 ҫын сывалнӑ.
Ҫапла майпа Чӑваш Енре кӑшӑлвируспа чирлисен йышӗн 2885 ҫынна ҫитнӗ. Вӗсенчен 1242-шӗ сывалнӑ. Ку таранччен 14 ҫын каварлӑ инфекцие парӑнтараймасӑр вилнӗ.
Юлашки талӑкра Раҫҫейре те ытти кунхинчен ытларах кӑшӑлвируспа чирленӗ. Пӗр талӑкра 9268 ҫыннӑн кӑшӑлвирус пулни палӑрнӑ.
Чӑваш Енре ҫу уйӑхӗн 29-мӗшӗ тӗлне кӑшӑлвируспа чирлисен йышӗ татах хушӑннӑ. Паянхи кун тӗлне тепӗр 83 ҫын вируспа инфекциленнӗ. Ҫапла майпа республикӑра ку таранччен 2709 ҫын кӑшӑлвируспа чирленӗ.
Вилекенсен йышӗ ӗнер ӳсмен – унчченхи пекех 12 ҫын. Улатӑрта чирлекенсем те тӑрук нумайланнӑ. Унта 33 тухтӑр кӑшалвируспа инфекциленнӗ.
Раҫҫейре лару-тӑру лайӑх енне улшӑнма пуҫланӑ. Пӗр талӑкра 8572 ҫын чирленӗ. Ку таранччен 387623 ҫын инфекциленнӗ, вӗсенчен 4374-шӗ пурнӑҫран уйрӑлнӑ.
Улатӑр районӗнче пурӗ 59 ҫын, ҫав шутра 33 тухтӑр, кӑшӑлвируспа чирленӗ. Апла пулин те хальлӗхе унта Етӗрне районӗнчи пек ҫирӗп мерӑсем йышӑнмӗҫ, вируспа кӗрешес ӗҫе вӑйлатнипех ҫырлахӗҫ.
Аса илтерер: асӑннӑ районти 44 ҫулти медсестра (унӑн кӑшӑлвирус диагнозне тухтӑрсем ҫирӗплетнӗ ӗнтӗ) пурнӑҫран уйрӑлнӑччӗ. Ӳпки икӗ енчен шыҫнӑскере малтан вырӑнта сиплеме пӑхнӑ, каяран Шупашкара илсе килме тӑрсан хӗрарӑм ҫул ҫинче вилсе кайнине Чӑваш халӑх сайчӗ пӗлтернӗччӗ. Хӗрарӑмӑн ытти чир пулнӑ: гипертони, чӗре чирӗ, сахӑр диабечӗ. Ҫитменнине, вӑл самӑр пулнӑ.
Ӗнер Улатӑр районӗнӗнче кӑшӑлвируспа ӗҫлекен оперштабӑн ӗҫ ушкӑнӗ (йышра Алла Салаева вице-премьер, сывлӑх сыхлав министрӗ Владимир Степанов пулнӑ) лару ирттернӗ.
Улатӑрти ача ҫуратмалли уйрӑмра ковид центрӗ туса хунине те хыпарланӑччӗ.
Чӑваш Ен Элтеперӗ пулнӑ Михаил Игнатьев пирки Раҫҫейри МИХсем ҫак кунсенче тепӗр хутчен ӑмӑртмалла тенӗ пек ҫырма пуҫларӗҫ. Ку вӑл, вӑрттӑнлӑх мар ӗнтӗ, экc-Элтепер хӑйне Владимир Путин Президент отставкӑна яни тӗрӗс маррине ҫирӗплетме Аслӑ суда тавӑҫ тӑратнӑ хыҫҫӑн пуҫланса кайрӗ. Кун пирки Чӑваш халӑх сайчӗ хыпарланӑччӗ.
Михаил Игнатьев ӗҫлӗх центрӗ урлӑ ӗҫ шырать текенсем те тупӑннӑ. Анчах ку хыпара Михаил Васильевичӑн пресс-секретарӗ пулнӑ Михаил Вансяцкий йышӑнман.
«Михаил Васильевич пирки халӗ темле сӑмах та сараҫҫӗ. Ку вӑл — ниме тӑман япала. Вӑл Питӗрте нарӑс уйӑхӗнчепе сипленет, ун апла япаласемпе хӑтланма вӑхӑт ҫук», — тенӗ «Коммерсант» журналиста Михаил Вансяцкий.
+12.5 °C