Чӑваш Енре кӑшӑлвируспа чирлисен йышӗ кунсерен чакса пырать. Паян вӗсен списокне тепӗр 55 ҫын кӗнӗ, ӗнер 58 ҫынччӗ.
Республикӑра кӑшӑлвируспа чирлисен йышӗ 5 пине кӑшт ҫеҫ ҫитеймен – 4915 ҫын инфекциленнӗ. Вӗсенчен 2830-шӗ сывалнӑ. Юлашки талӑкра 23 ҫын инфекцие парӑнтарнӑ тесе палӑртнӑ.
Вилнисен йышӗ ҫавӑн пекех: 28 ҫын пурнӑҫран уйрӑлнӑ. Аса илтерер: ӗнер кӑшӑлвирусран виҫӗ ҫын вилнине пӗлтернӗччӗ.
Хӑҫан уҫӑласси паллӑ терӗмӗр те, анчах ӑна татсах каламан-ха. Малтанласа палӑртнӑ тӑрӑх, ҫуллахи уйлӑхсем ҫитес уйӑхӑн 15-мӗшӗнче уҫӑлма пултараҫҫӗ. Ҫакӑн пирки паян сӑмах хускатнӑ.
Кӑшӑлвирус сарӑлнине хирӗҫ ӗҫлекен оперативлӑ штаб паян черетлӗ ларӑва пуҫтарӑннӑ. Унта республикӑн вӗренӳ тата ҫамрӑксен политикин министрӗ Сергей Яковлев ашшӗ-амӑшӗн заявкине утӑ уйӑхӗн 27 тата 28-мӗшӗсенче, ҫавӑн пекех утӑ уйӑхӗн 4 тата 5-мӗшӗсенче йышӑнассине пӗлтернӗ.
Чӑваш Енре кӑшӑлвируспа ҫыхӑннӑ чару мерисене халӗ пӗрремӗш тапхӑр шайӗнче ҫемҫетнӗ. Ача-пӑча уйлӑхӗсене вара Роспотребнадзор виҫҫӗмӗш тапхӑрсӑр уҫма сӗнмест. Апла пулсан, йӑлтах лару-тӑру епле пулнинчен килӗ.
Чӑваш Енре кӑшӑлвирус парӑнмасть-ха. Пӗр талӑкра унпа чирлӗ 62 ҫынна тупса палӑртнӑ.
Вӑл чир алхасма пуҫлансанах пӗр ҫын тупӑннине те тем пулнӑ пек хыпарлатчӗҫ, йышӑнатчӗҫ. Ӑҫтан, кам вӑл тесе шавлама тытӑнатчӗҫ. Халӗ асӑнакан цифрӑсене ҫынсем хӑнӑхса ҫитрӗҫ пулӗ ӗнтӗ. Кӑшӑлвируспа чирлисене ҫав тапхӑрта пирӗн республикӑра пурӗ 4802 ҫынна тупса палӑртнӑ. Ку цифрӑна стопкоронавирус.рф сайтра пӗлтернӗ. Вӗсенчен хӑшӗсем (пурӗ 2767) сывалнӑ ӗнтӗ.
Халӗ кӑшӑлвируспа пирӗн тӑрӑхра 2010 ҫын чирлет. Юлашки талӑкра пульницӑран 50 ҫынна кӑларнӑ. Усал вирус алхасма тытӑннӑранпа кӑшӑлвирус диагнозӗллӗ 25 ҫын вилнӗ.
Ҫав вӑхӑтрах республикӑра чару мерисене кӑштах ҫемӗҫтерчӗҫ. Маска тӑхӑнма, социаллӑ инҫӗше пӗрех пӑхӑнма хушаҫҫӗ.
Ӗнер Чӑваш автономи облаҫне йӗркеленӗренпе 100 ҫул ҫитрӗ. Шел те, ӑна халӑхпа савӑнӑҫлӑн палӑртма май килмерӗ.
Уява Хӗрлӗ Чутай районӗнче тата Шупашкарта палӑртнине шута илсе унта та, кунта та хӑш-пӗр кану объектне уҫрӗҫ-ха. Анчах халӑхпа мар. Тӳре-шарапа журналистсем ҫеҫ хутшӑнчӗҫ. Ҫакӑ кӑшӑлвирус лӑпланса пӗтменнипе ҫыхӑннӑ. Ӗнерех Шупашкарта Чӑваш Ен аталанӑвӗн стратегине тишкерчӗҫ.
Мероприятисене Чӑваш Ен Наци телекуравӗ тӳрӗ эфирта кӑтартрӗ. Уява хутшӑннӑ тӳре-шара маскӑсӑр пулнине чылайӑшӗ асӑрхарех ӗнтӗ. Социаллӑ инҫӗше пӑхӑнмалла тенине те вӗсем ӑша хывман. Юнашар утрӗҫ, ҫуммӑн тӑрса калаҫрӗҫ. Тӳре-шара та, вӗсен мӑшӑрӗсем те, депутатсем те, журналистсем те. «Правда ПФО» ҫырнӑ тӑрӑх, самай пысӑк вырӑн йышӑнакансем хушшинчех ҫав вӑхӑтра чирлекенсем пур.
Чӑваш Енре тепӗр ҫын кӑшӑлвирусран вилнӗ. Хальлӗхе ҫав ҫын миҫере тата мӗнлерех пулни паллӑ мар-ха, кун пирки тӗплӗн пӗлтермен. Ҫапла майпа 25 пациент пурнӑҫпа сывпуллашнӑ.
Паянхи кун тӗлне тепӗр 62 ҫын кӑшӑлвируспа чирленӗ. Пӗтӗмпе республикӑра 4740 ҫын инфекциленнӗ. Вӗсенчен ҫурри ытларахӑшӗ, 2717 ҫын, сывалнӑ. Юлашки талӑкра 112 ҫын сывалнӑ.
Аса илетер: республика кӑшӑлвируса пула йышӑннӑ чарусене пӑрахӑҫламалли пӗрремӗш тапхӑра кӗнӗ.
Ҫӗртме уйӑхӗн 19-мӗшӗнче Раҫҫейре Пирогов орденне ҫирӗплетнӗ. Медицина ӗҫченӗсен кунӗнче унпа тухтӑрсене чысланӑ.
Ҫак ордена Ҫӗнӗ Шупашкар хула пульницин тӗп тухтӑрӗн ҫумӗ Вера Алексеева тата Шупашкарти васкавлӑ медпулӑшу пульницин инфекци уйрӑмӗн заведующийӗ Сергей Ефимов тивӗҫнӗ.
Сергей Ефимов асӑннӑ пульницӑра 35 ҫул ӗҫлет, инфекци уйрӑмне 19 ҫул ертсе пырать. Вера Алексеева тӑрӑшнипе пульницӑра кӑшӑлвируспа чирлӗ ҫынсем валли 75 койка хатӗрленӗ. Вӑл унти тухтӑрсене пандеми вӑхӑтӗнче ӗҫлеме вӗрентнӗ.
Чӑваш Енре кӑшӑлвирусран тепӗр ҫын вилнӗ. Унччен 2 ҫын инфекцие парӑнтарайманни пирки пӗлтернӗччӗ.
ЧР Сывлӑх сыхлавӗн министерстви пӗлтернӗ тӑрӑх, юлашкинчен вилнӗ пациент, арҫын, 34 ҫулта ҫеҫ пулнӑ. Вӑл – Чӑваш Енре кӑшӑлвирусран вилнӗ чи ҫамрӑк пациент. Унччен маларах вилнӗ икӗ пациент 45-ре тата 86 ҫулта пулнӑ.
Юлашки талӑкра республикӑра 71 ҫын кӑшӑлвируспа чирленӗ. Пӗтӗмпе 4612 ҫын инфекциленнӗ. Вӗсенчен 2030-шӗ сипленеҫҫӗ, 2558-шӗ сывалнӑ.
Паянхи кун тӗлне Чӑваш Енре тепӗр 69 ҫын кӑшӑлвируспа чирленӗ. Ку таранччен руспубликӑра 4541 ҫын инфекциленнӗ. 23 ҫын кӑшӑлвируса пула вилнӗ. 2538 ҫын сывалнӑ. Юлкашки талӑкра 32 ҫын сывалнӑ тесе палӑртнӑ. Эппин, Чӑваш Енре кӑшӑлвируспа чирлисен йышӗ майӗпен чакса пырать теме пулать.
Раҫҫейре те ку кӑтарту майӗпен пӗчӗкленет. Юлашки талӑкра 7728 ҫын инфекциленнине палӑртнӑ. Аса илтерер: Чӑваш Енре кӑшӑлвируса пула йышӑннӑ чарусене пӑрахӑҫламалли пӗрремӗш тапхӑра кӗме палӑртнӑ. Кӗҫех хӑш-пӗр лавкка, кафе уҫалӗ.
Паян, ҫӗртме уйӑхӗн 21-мӗшӗнче, Чӑваш Ен республикӑна 10 ҫула яхӑн ертсе пынӑ Михаил Игнатьевпа сывпуллашнӑ. Ӑна Шупашкарти Богдан Хмельницкий урамӗнчи масарта пытарнӑ.
Михаил Васильевичпа сывпуллашма республикӑн тӗп хулинчи «Шупашкар-Арена» пӑр керменне пуҫтарӑннӑ. Михаил Игнатьева юлашки ҫула ӑсатма республикӑн Элтеперӗн тивӗҫӗсене вӑхӑтлӑх пурнӑҫлакан Олег Николаев, правительство пайташӗсем, хуласемпе районсен администрацийӗсенче ӗҫлекенсем, республикӑра пурӑнакансем пуҫтарӑннӑ. Михаил Игнатьева КПСС оЧӑваш обкомӗн пӗрремӗш секретарӗн вил тӑприпе юнашар пытарнӑ.
Михаил Игнатьев чӗре чирне пула пурнӑҫран уйрӑлнӑ. Кӑшӑлвирус тесе хӑшӗсем сӑмах сарни ҫирӗпленмен – ҫавна ятарлӑ анализ кӑтартнӑ.
...Мӗнех, йывӑр тӑпру ҫӑмӑл пултӑр, Михаил Васильевич...
Чӑваш Енре тепӗр икӗ пациент кӑшӑлвируса пула вилнӗ. Халӗ официаллӑ даннӑй ҫапларах: ку таранччен инфекцие парӑнтараймасӑр 23 ҫын пурнӑҫран уйрӑлнӑ.
Юлашки талӑкра республикӑра 71 ҫын кӑшӑлвируспа чирленине палӑртнӑ. Чирлисен йышӗ 4472 ҫынна ҫитнӗ.
Федераци информцентрӗ пӗлтернӗ тӑрӑх, ку талӑкра килте сипленекен 82 ҫын сывалнӑ. Ҫулталӑк пуҫланнӑранпа кӑшӑлвирусран 2506 ҫын сывалнӑ.
+12.5 °C