Ҫурла уйӑхӗн 14-мӗшӗнче 12 сехет те 30 минутра Вӑрнар районӗнче, «Никольски-Етӗрне-Нурӑс» ҫул ҫинче, «Киа-Спектра» автомашина хирӗҫ килмелли ҫул ҫине сиксе тухнӑ. Руль умӗнче Нурӑс ялӗнче пурӑнакан 32 ҫулти арҫын пулнӑ.
Ҫулпа ҫав тӑрӑхра пурӑнакан хӗрарӑм «Калина» машинӑпа пынӑ. Вӑл кӗтмен ҫӗртен сиксе тухнӑ транспортран пӑрӑнас тесе руле пӑрнӑ, анчах ӗлкӗреймен. Нурӑс арҫыннин автомобилӗ ӑна пырса ҫапнӑ. Ҫамрӑк хӗрарӑм инкек вырӑнӗнчех вилнӗ. Ют ҫӗршывра туса кӑларнӑ машинӑн водителӗпе машинӑри 51 ҫулти хӗрарӑм суранланнӑ. Вӗсене районти пульницӑна илсе кайнӑ.
Ҫул-йӗр инспекторӗсем шухӑшланӑ тӑрӑх, «Киа» машина ҫумӑр ҫунине пӑхмасӑрах хӑвӑрт кайнӑ тата унӑн урапин резини икӗ тӗрлӗ пулнӑ.
Ҫурла уйӑхӗн 16-мӗшӗнче Муркаш районӗнче ирхи 2 сехетре икӗ ҫӑмӑл машина ҫапӑннӑ. Вӗсенчен пӗрин водителӗ тата унӑн хӗрӗ вилнӗ.
«Мускав-Ӗпхӳ» трассӑпа пыракан Мускав ҫынни «Volvo S60» автомашинӑпа Чулхула енне кайнӑ. Вӑл хӑй умӗнче пыракан «LADA GRANTA» автомобиль ҫине пырса кӗнӗ. Иккӗшӗ те ҫул айккине тухса кайнӑ. Хамӑр ҫӗршывра туса кӑларнӑ машинӑра Курган облаҫӗнчи ҫынсем пулнӑ. 47 ҫулти водитель тата унӑн хыҫалти ларкӑч ҫинчи ларса пынӑ 23 ҫулти хӗрӗ вырӑнтах вилнӗ. Арҫыннӑн мӑшӑрӗпе вӗсен 10 ҫулти ывӑлӗ аманнӑ. Вӗсене пульницӑна ӑсатнӑ.
Ют ҫӗршывра туса кӑларнӑ машинӑн водителӗ ӳсӗр пулнӑ.
| ҪУР | 16 |
Паян, ҫурла уйӑхӗн 16-мӗшӗнче, Шупашкарти Ленин проспектӗнче ҫӑмӑл машина инкеке лекнӗ. Пӑтӑрмах ирхи 5 сехет те 25 минутра Тӗп почтамт умӗнче пулса иртнӗ. Машина юпа ҫине пырса тӑрӑннӑ.
Шалти ӗҫсен министерстви Инстаграмра пӗлтернӗ тӑрӑх, руль умӗнче Муркаш районӗнчи 27 ҫулти ҫамрӑк арҫын пулнӑ. Инкекре Шупашкарти 29 ҫулти хӗрарӑмпа 28 ҫулти арҫын аманнӑ.
Сарӑмсӑрлӑх сӑлтавне тӗпчевҫӗсем палӑртӗҫ.
Чӑваш Енре кӑшӑлвирусран пӗр талӑкра 197 ҫын сывалнӑ. Ҫав шутра – килте сипленнисем те.
Кӑшӑлвирус пандемийӗ пуҫланнӑранпа пирӗн республикӑра ҫӗнӗ йышши вируспа 5311 ҫын чирлесе сывалнӑ, 68 ҫын вилнӗ.
COVID-19 вирусран ҫак талӑкра никам та вилмен. Ҫӗнӗрен чирленисене тепӗр 32 ҫынна шута илнӗ. Эпидемиологи тапхӑрӗ пуҫланнӑранпа ҫӗнӗ йышши кӑшӑлвирус 7279 ҫынна ернӗ.
Кӗркунне пирӗн ҫӗршывра халӑха кӑшӑлвирусран вакцинацилеме пуҫласшӑн.
Чӑваш Енре тепӗр икӗ ҫын кӑшӑлвирусран вилнӗ. Ҫапла майпа инфекцие пула пурнӑҫран уйрӑлнисен йышӗ 68 ҫынна ҫитнӗ. Кун пирки федераци информаци центрӗ пӗлтерет.
Ӗнер те, паян та кӑшӑлвируспа пӗр талӑкра 34 ҫын чирленӗ. Пӗтӗмпе ку хисеп республикӑра 7247-е ҫитнӗ. Вӗсенчен 5114-шӗ сывалнӑ. Хальхи вӑхӑтра 2065 ҫын сипленет.
Паян валли тепӗр 183 ҫын кӑшӑлвирусран сывалнӑ. Палӑртмалла: кӑшӑлвирус сарӑлнин индексӗ халӗ те 1-рен пысӑкрах-ха.
Чӑваш Енре вертолет лапамӗсем тӑвассине тата вертолетсем ҫӳретме тытӑнассине эпир маларах пӗлтернӗччӗ. Аса илтерер: 2024 ҫул тӗлне Чӑваш Енре 30-тан кая мар пациента пульницӑна вертолетпа илсе ҫитерӗҫ.
Патшалӑх закупкисен сайтӗнче хыпарланӑ тӑрӑх, транспорт хатӗрӗ икӗ региона: Чӑваш Ене тата Мари Эла – тивӗҫтерӗ. Вӑл кирек хӑҫан та ҫула тухма хатӗр пулмалла. Хӗллехи вӑхӑтра заявка хыҫҫӑн – 60 минутра, ытти чухне – 30 минутра. Борт ҫине хӗрлӗ хӗрес ӳкернӗ ҫак транспортӑн икӗ пилот пулмалла, унта икӗ тухтӑртан кая мар лармалӑх вырӑн пӑхса хӑвармалла. Выртакан ҫын валли пӗр вырӑнтан кая мар кирлӗ. Унсӑр пуҫне чирлипе пӗрле ҫула тухниэӑ ҫынна та лартмалла.
Вертолета пӗр сехет арендӑна илни 231 пин те 066 тенкӗрен кая мар ларӗ. Чӑваш Ен вертолетпа 108 сехете яхӑн (25 миллион тенкӗ) усӑ курма палӑртать, Мари Эл — 65 сехете яхӑн (15 млн тенкӗ).
Кӑшӑлвирусран каллех тепӗр ҫын вилнӗ. Вируса пула республикӑра пӗтӗмпе 66 ҫыннӑн пурнӑҫӗ татӑлнӑ.
Инфекциленнисен йышӗ 7179 ҫынна ҫитнӗ, вӗсенчен 4745-шӗ сывалнӑ. 2368 ҫын сипленет.
Юлашки вӑхӑтра пӗр талӑкра кӑшӑлвируспа чирлекенсен йышӗ чакса пырать. Паян ку йыша 35 ҫын хушӑннӑ. Паян сывалакансен йышӗ самаях пулнӑ: 172 ҫын инфекцие парӑнтарнӑ.
Республикӑра кӑшӑлвирус сарӑлнин индексӗ 1,08-па танлашать.
Юлашки талӑкра кӑшӑлвирусран тепӗр пӗр ҫын вилнӗ. Ҫапла майпа ку таранччен каварлӑ инфекци 65 ҫыннӑн пурнӑҫне татнӑ.
Паянхи кун тӗлне 7144 ҫын инфекциленнӗ. Вӗсенчен 4573-шӗ сывалнӑ. Юлашки талӑкра 123 ҫын чире парӑнтарнӑ.
Юлашки кунсенче кӑшӑлвируспа чирлекенсен йышӗ сахалланса пырать. Паян ку списока 36 ҫын хутшӑннӑ. Хальхи вӑхӑтра кӑшӑлвирусран 2505 ҫын сипленет. Сӑмах май, кӑшӑлвирус сарӑлассин индексӗ 1,03-е ҫитнӗ.
Ҫурла уйӑхӗн 11-мӗшӗ тӗлне илсен пирӗн республикӑра кӑшӑлвируспа чирлисене пӗр талӑкра тата тепӗр 34 тӗслӗх тупса палӑртнӑ. Ҫулталӑк пуҫланнӑранпа ку амакпа 7 108 ҫын чирленӗ. Сывалнисем – 4 450 ҫын, вӗсенчен 71-шӗ юлашки талӑкра сывалнӑ.
Хальхи вӑхӑтра пирӗн республикӑра кӑшӑлвируспа 2 594 ҫын чирлет. Чир сарӑлнин индексӗ – 0,96.
Пирӗн ҫӗршывра кӑшӑлвируса хирӗҫ вакцинӑна регистрациленине Чӑваш халӑх сайчӗ пӗлтернӗччӗ. Аса илтерер: вакцина пирки ҫӗршыв ертӳҫи Владимир Путин ертсе пынипе паян ирттернӗ канашлура калаҫу пуҫарнӑ. Препарата «Гамалеи» центрта тата «Биннофарм» предприятире туса кӑларӗҫ. Ҫывӑх вӑхӑтра халӑха вакцинацилеме тытӑнӗҫ.
Раҫҫейри специалистсем шухӑшласа кӑларнӑ кӑшӑлвируса хирӗҫ вакцинӑна регистрациленӗ. Ку вӑл — тӗнчере халиччен пулман япала. Вакцина пирки паян ҫӗршыв ертӳҫи Владимир Путин ертсе пынипе ирттернӗ канашлура калаҫнӑ.
«Вакцина питӗ тухӑҫлӑ тата сиен кӳмест. Хӑйсен кӑмӑлӗпе ӑна тутарнисене сӑнанӑ тӑрӑх», — ӗнентернӗ ҫӗршывӑн сывлӑх сыхлав министрӗ Михаил Мурашко.
Кӑшӑлвируса хирӗҫ вакцинӑна Гамалеи центрта тата «Биннофарм» предприятире туса кӑларӗҫ. Ҫывӑх вӑхӑтра вакцинаци ирттерме тытӑнӗҫ.
+11.3 °C