Чӑваш Енрен Краснодар тӑрӑхӗнчи Сочи хулине канма кайнӑ арҫын унти 10 машина чӳречине ватса пӗтернӗ. Пуҫтаха вырӑнти патрульпе пост службин ӗҫченӗсем тытса чарнӑ.
Чӑваш Енри 51 ҫулти арҫын Дагомысск урамри 10 машина кантӑкне ватнӑ. Ҫав вӑхӑтра вӑл ӳсӗр пулнӑ иккен..
Арҫын тӗлӗшпе административлӑ ӗҫ пуҫарнӑ.
Шупашкар хулинче сӗмсӗр водитель шар курнӑ. Хӑй мар-ха. Машини сиенленнӗ.
Инкек Шупашкарти Машина тӑвакансен урамӗнче пулса иртнӗ. Пӑтӑрмах видеорегистратор ҫине ӳкнӗ.
Ҫул ҫинчи инкекре Chevrolet Niva тата Toyota Camry автомобильсем шар курнӑ. «Тойота» ҫулӑн сылтӑм енӗпе пынӑ чухне кӗтмен ҫӗртен сулахай енне пӑрӑнса кӗнӗ. Ҫав самантра «Нива» ун ҫине пырса кӗнӗ.
Шупашкарта пурӑнакан 52 ҫулти строитель ултавҫӑсен капкӑнне пиллӗкмӗш хутчен ҫакланнӑ.
Хальхинче ӑна ултавҫӑсем инвестицие укҫа хывса тупӑш курма сӗннӗ. Телефонпа шӑнкӑравлакан ҫынсене строитель ӗненнипе арҫын телефонта ятарлӑ приложени вырнаҫтарнӑ, QR-код урлӑ укҫа куҫарса янӑ. Ултавҫӑсене куҫарса пана укҫана каялла илме май килменнине ӑнланса илне хыҫҫӑн вӑл хӑйне шӑнман пӑрпа лартса янине ӑнланса илнӗ.
Шупашкарта пурӑнакан 63 ҫулти арҫын хӗрарӑмпа киленес тесе укҫасӑр юлнӑ. Ҫавӑн пирки пенсири ҫын йӗрке хуралҫисене пӗлтернӗ.
Тӗнче тетелӗнче вӑл интимлӑ пулӑшу кӳрекен хӗре чӗнсе илме май пурри пирки пӗлтерӳ курнӑ. Унта кӑтартнӑ номерпе шӑнкӑравласан менеджер текен ҫын телефона тытнӑ, укҫана тӳрех тӳлесе хумаллине пӗлтернӗ. Ӳсӗр арҫын укҫана куҫарса панӑ, кайран менеджер текен ҫын патне хӗр хӑҫан килет тесе ҫине-ҫине шӑнкӑравлама тапранса кайнӑ. Лешсем кашнинче укҫа куҫарма ыйтнӑ. Ҫапла пенсионер 48 пин тенкӗ куҫарса панӑ. Тата куҫаратчӗ пулӗ те, килне арӑмӗ пырса кӗнӗ.
Ҫу уйӑхӗн 5-мӗшӗнче кӑнтӑрла Ҫӗрпӳ округӗнчи Елаш ялӗнче йывӑҫ ҫурт ҫуннӑ. Ҫулӑм пӳртри урая сиенлетнӗ. Анчах, шел те, кил хуҫи ҫӑлӑнса юлайман – пушара сӳнтерсен унӑн виллине тупнӑ.
Пушарнӑйсем ҫитнӗ тӗле пӳртре 2 тӑваткал метр лаптӑк ҫуннӑ. Ҫак ҫуртра пурӑннӑ 58 ҫулти арҫын урама тухса ӗлкӗреймен.
Халӗ пуша мӗнрен тухнине тӗпчеҫҫӗ.
Чӑваш Енри пӗр ҫын масар ҫинчи картана вӑрланӑ.
Чӑваш Енӗн Шалти ӗҫсен министерствинче пӗлтернӗ тӑрӑх, ӑна пӗри вил тӑпри ҫине тимӗр карта тытма ыйтнӑ. Лешӗ тепӗр вил тӑпри ҫинчен куҫарса кайнӑ.
Пӑтӑрмах пирки ака уйӑхӗн вӗҫӗнче 61 ҫулти хӗрарӑм пӗлтернӗ.
Улатӑрти 33 ҫулти арҫынна пӗрисем тимӗр карта тытма пӗлтӗрхи ҫурла уйӑхӗнче ыйтнӑ. Унччен судпа айӑпланнӑ арҫын тепӗр ҫӗртен куҫарса кайса вырнаҫтарнӑ.
Украинӑри Днепропетровск облаҫӗнче ҫуралнӑ арҫын 2017 ҫулхи кӑрлач уйӑхӗнче Раҫҫей гражданинӗ пулса тӑнӑ. Вӑл Шупашкарта тӗпленнӗ, кунта регистрациленнӗ.
Кӑҫалхи ҫуркунне Раҫҫейӗн Федеарцин хӑрушсӑрлӑх службин ӗҫченӗсем 34-ри ҫӑв арҫын ҫӗршыва хирӗҫле ӗҫ тунине пӗлтернӗ. Ҫавна май унӑн Раҫҫей гражданствине, унӑн пирӗн ҫӗршывра тата ют ҫӗршывра уса курма май паракан паспорчӗсене пӑрахӑҫланӑ. Кунсӑр пуҫне ӑна Шупашкарти пропискӑсӑр та хӑварӗҫ.
Вӑрмар районӗнчи Хӗрлӗҫыр ялӗнче 43 ҫулти арҫын пушарта вилнӗ.
Чӑваш Енӗн Инкеклӗ ӗҫсен министерствинче пӗлтернӗ тӑрӑх, йывӑҫ пӳрт кил хуҫисен 43-ри ывӑлӗ пирус туртнӑ чухне тимсӗр пулнӑран тухма пултарнӑ. Вут-ҫулӑма сӳнтерес тесе 8 ҫӑлавҫӑпа 2 техника ӗҫленӗ. Пушар 90 тӑваткал метр лаптӑк ҫинче алхаснӑ.
Инкекре кил хуҫисен ывӑлӗн пурнӑҫӗ татӑлнӑ тата йывӑҫ пӳрт ҫунса кайнӑ.
Ака уйӑхӗн 30-мӗшӗнче ирхине йӗрке хуралҫисем кроссовера асӑрханӑ. Калинин урамӗнче «Audi Q5» автомобиль ҫул ҫинче йӗркеллӗ пыманнине сиснӗрен ӑна чарас тенӗ.
Пакунлисем водитель ӳсӗррине сиснӗ. «Город грехов Чебоксары» проект пӗлтернӗ тӑрӑх, водитель хӑйӗн пӗлӗш-тусӗпе хӑратма хӑтланнӑ, унта-кунта шӑнкӑравланӑ. Пакунлисем пӗрех кирлӗ хутсене шӑрҫаланӑ.
Кроссовер водителӗ патшалӑхӑн влаҫ органӗсенче ӗҫлекенсен профсоюзӗн председателӗ Василий Харитонов пулнӑ.
Ултавҫӑсене 215 пин тенкӗ куҫарса панӑ, вӗсен умӗнче ҫаппа-ҫарамас калаҫнӑ, килти чӳрече каррисене ҫунтарса янӑ. Ҫакӑ йӑлтах Шупашкарта вӗренекен студенкӑпа пулса иртнӗ.
Вӑл палламан ҫын шӑнкӑравласан ярса панӑ каҫӑ ҫине пусса «Госуслуги» портала кӗнӗ. Палламан ҫын ҫыхӑнурах пулнӑ. Хӗр «Украина» сӑмаха илтсен хӑраса кайнӑ та телефона сӳнтернӗ.
Кайран ун патне смс килнӗ: ун ячӗпе портала кӗреҫҫӗ-мӗн, «техпулӑшу» номерӗсене те ярса панӑ. Вӑл пӗринпе шӑнкӑравланӑ. Палламан ҫын, банк ӗҫченӗ тенӗскер, хӗре хӑратса пӗтернӗ: урӑх ҫӗршыва укҫа куҫарнӑшӑн ӑна тӗрмене нумай ҫуллӑха хупаҫҫӗ-мӗн. Студентка пухнӑ укҫине тата кредит илсе палламан ҫынна куҫарса панӑ. Кайран ӑна верификаци тума хушнӑ. Кун валли хывӑнмалла-мӗн, видеоҫыхӑнупа калаҫса сӑвӑ вуламалла. Тӗрӗслеве вӗҫлеме хваттерти чӳрече каррисене чӗртсе яма хушнӑ. Ҫулӑм тухсан тин вӑл тӑна кӗнӗ, пушара сӳнтерсе полицие кайнӑ.
+22.3 °C