Паян Шупашкарта ӑшӑ шыв пӑрӑхӗ ҫинче инкек пулса иртнӗ. Ҫавна май ирхи 9 сехетре «Т Плюс» организаци юсав ӗҫне пуҫӑннине пӗлтернӗ.
Пӑтӑрмах Максим Горький проспектӗнчи 51-мӗш ҫурт патӗнче пулса иртнӗ. Ҫавна май Шупашкарӑн Ҫурҫӗр-Хӗвеланӑҫ районӗнчи ҫак ҫуртсенче вӗри шыв ҫук:
Талвир урамӗнчи 4, 6, 8, 10, 12, 14, 16, 20, 22, 28, 30, 32-мӗш ҫуртсем;
Сверчков урамкӗнчи а, 2, 4, 6, 8, 15-мӗш ҫуртсем;
Ахазов урамӗнчи 1, 3, 5, 7, 9, 11, 13-мӗш ҫуртсем;
Максим Горький проспктӗнчи 37, 36/1, 38/2, 39, 40/1, 41, 43, 45, 47, 49, 51-мӗш ҫуртсем;
Элкер урамӗнчи 13, 17, 19-мӗш ҫуртсем; ҫав шутра — 117-мӗш ача пахчи;
Игнатьев урамӗнчи 4-мӗш ҫурт.
Унсӑр пуҫне вӗри шыв Ахазов урамӗнчи ача-пӑча пульницинчи педиатри уйрӑмӗнче тата 116-мӗш ача пахчинче ҫук.
Шупашкар хулинче пурӑнакан пӗр каччӑ кафене кайни пӑтӑрмахпа вӗҫленнӗ.
Пӑтӑрмах ҫурла уйӑхӗн 14-мӗшӗнче, ирхи пӗр сехетре, пулса иртнӗ. Хулари «Перекресток» суту-илӳ ҫуртӗнчи виҫҫӗмӗш хутра вырнаҫнӑ кафере ҫав каччӑ хӑйне килӗшӳсӗр тытнӑ-мӗн. Вӑл унта канма пынисене тата клубра ӗҫлекенсене кансӗрленӗ. Администраторпа официант ӑна клубра кайма ыйтсан каччӑ вӗсене хӗнесе пӗтернӗ.
Инкек пирки клуб ӗҫченӗсем пакунлӑ йӗрке хуралҫисене пульт пусса систернӗ. Вӗсем пӑтӑрмах вырӑнне васкавлӑн пырса ҫитнӗ.
Ведомствӑлла мар хурал ӗҫченӗсем 21 ҫулти каччӑна полицие илсе кайнӑ. Пакунлисем пӑтӑрмаха тӗпчӗҫ. Халӗ, тен, каччӑ кулянать пулӗ те, чавса ҫывӑх та ҫыртма ҫук тесе ваттисем ахальтен каламан пуль ҫав.
Чӑваш Енри пӗр арҫын ӑнсартран шал протезне ҫӑтса янӑ.
Арҫын шӑл протезне астумасӑр ҫӑтса янӑ хыҫҫӑн тӳрех больницӑна васкаман-ха — вӑл сахалтан та ҫавӑн пек пӗр 10 кун пурӑннӑ. Тата ниҫта та каймастчӗ пуль-ха: сӑлтавсӑрах ӳслӗк тапӑнни канӑҫсӑрлантарнӑ. Вара вӑл тухтӑрсем патне кайса пӑхас тенӗ.
Васкавлӑ медицина пулӑшӑвӗн больницинчи тухтӑрсем арҫынӑн бронхӗнче темӗскер пуррине асӑрханӑ. Малтан вӗсем томографи туса тӗрӗсленӗ, кайран — рентген. Ҫавӑн чухне вӗсем 5 шӑлтан тӑракан протез ӳпкере ларнине асӑрханӑ.
Протеза арҫын ӳсӗрсе ҫӳреме пуҫличчен кӑшт маларах ҫухатнӑ иккен. Епле ҫӑтса янине хӑй те сисмен, протез ҫухалнине асӑрхасан та ним пулман пекех пурӑннӑ.
Тухтӑрсем 55 ҫулти арҫыннӑн протезне туртса кӑларма пултарнӑ.
Муркаш районӗнчи пӗр килте вӗлле ҫунса кайнӑ. Пурӗ 20 штук. Инкек Куҫкин ялӗнче ҫурла уйӑхӗн 14-мӗшӗнче ирхи 5 сехетре пулса иртнӗ.
Ҫӑлавҫӑсем патне кӳршӗсем шӑнкӑравласа систернӗ. Шӑпах вӗсем пускилӗсен хуралтисем ҫунма пуҫланине асӑрханӑ.
Вырӑна 4 техника тата Инкеклӗ ӗҫсен министерствин 8 ӗҫченӗ пырса ҫитнӗ. Вӗсем пӳрте пушартан ҫӑлса хӑварма пултарнӑ, анчах хуралтӑсем вутпа кӗлленнӗ. Ҫав шутра — 20 вӗлле. Йывӑҫ пӳртӗн хыҫалти пайӗ те сиенленнӗ.
Пушар сӑлтавне специалистсем палӑртӗҫ.
Ҫав кунах Канаш районӗнчи Ҫӗнӗ Пӗршенер ялӗнче 38 ҫулти кил хуҫин мунчи хыпса илнӗ. Вут-ҫулӑма ҫӑлавҫӑсем пырса сӳнтернӗ.
Ҫӗмӗрлере вара Мир урамӗнчи 40-мӗш ҫуртра пӗр хваттерте кухньӑра пушар тухнӑ.
«Лиза Алерт» шыравпа ҫӑлав отрячӗ 56 ҫулти хӗрарӑма шырать.
Лилия Сергеевна Шуленина (Старицина) килтен ҫурла уйӑхӗн 1-мӗшӗнче тухса кайнӑ. Унтанпа вӑл ӑҫтине пӗлмеҫҫӗ иккен.
Шырав отрядне хӗрарӑмӑн ҫывӑх ҫыннисем пӗлтернӗ тӑрӑх, вӑл е Шупашкарта пулма пултарать, е Мускав облаҫӗнчи Бронницы хулинче.
56 ҫулти хӗрарӑм икӗ туя ҫине таянса утать иккен. Вӑл 160 сантиметр ҫӳллӗш, вӑтам пӳ-силлӗ, тӗксӗм ҫырӑ тӗслӗ ҫӳҫӗ кӑштах кӑвакарнӑ, куҫӗ кӑвак тӗслӗ.
Тухса кайса ҫухалнӑ чухне вӑл симӗс тӗслӗ платье, хӗрлӗ кофта, шурӑ сандали тӑхӑннӑ.
Пӗлекенсене, курнисене «Лиза Алерт» шырав отрядне 8-800- телефон номерӗпе шӑнкӑравласа пӗлтерме ыйтаҫҫӗ. Е йӗрке хуралҫисем патне шӑнкӑравласа та калама пулать.
Паян ҫӗрле, ҫур ҫӗр иртни 12 сехет те 44 минутра Шупашкар хулинче Мускав кӗперӗ ҫинче 47 ҫулти хӗрарӑма машина ҫапса кайнӑ. Шел те, вӑл васкавлӑ медпулӑшу киличчен вырӑнтах вилнӗ.
«Лада Гранта» машина рулӗ умӗнче 18 ҫулти каччӑ пулнӑ. Хӗрарӑм ҫул ҫинчех утса пынӑ. Мӗншӗн унта утнӑ вӑл – паллӑ мар.
Ҫакӑ паллӑ: ҫамрӑк водитель пысӑк хӑвӑртлӑхпа пынӑ, «Элара» савут патӗнчех машинӑсенчен хӑваласа иртсе кайнӑ, «шашкӑлла» вылянӑн пынӑ. Хӗрарӑма таптаса кайнӑ хыҫҫӑн вӑл 100 метртран кӑна чарӑннӑ. Хӗрарӑм вара айккинелле вӑркӑннӑ.
Палӑртмалла: ҫав вырӑнта сехетре 40 ҫухрӑм хӑвӑртлӑхпа ҫӳреме юранине кӑтартакан паллӑ ларать. Водитель медосвидетельствовани витӗр тухнӑ: вӑл урӑ пулнӑ.
Кӑмакана бензин сапса чӗртни пысӑк инкекпе вӗҫленнӗ: пушар тухнӑ, кил хуҫи хӗрарӑмӗ вилнӗ.
Кун пек инкек кӑҫал кӑрлач уйӑхӗн 4-мӗшӗнче Красноармейски округӗнчи Карай ялӗнче пулнӑ. Ӳсӗр арҫын кӑмака хутма шухӑшланӑ та унта бензин сапнӑ, шӑрпӑк чӗртнӗ. Ҫунакан шӗвек часах хыпса илнӗ, кӑмака умӗнчи тивсе илекен япаласем ҫине куҫнӑ, унтан пӳрчӗпех сарӑлнӑ.
Ҫав самантра пӳлӗмре унӑн арӑмӗ ҫывӑрнӑ. Вӑл та ӳсӗр пулнӑ. Шел те, хӗрарӑм пушартан тухайман, сӗрӗмпе наркӑмӑшланса вилнӗ.
Суд палӑртнӑ тӑрӑх, арҫын бензин хӑрушӑ пулнине пӗлнӗ, анчах ҫӑмӑлттайла хӑтланнӑ. Суд ҫулталӑк ҫурӑлӑха унӑн ирӗкне чикӗлеме йышӑннӑ. Приговор вӑя кӗмен-ха.
Чӑваш Енри туберкулеза сиплекен дсипансерӑн ҫивиттине Мускав облаҫӗнче регистрациленнӗ организаци юсамалла пулнӑ. Вӑл кивӗ ҫивиттие сӳтсе хунӑ, ун вырӑнне пленка сарса хунӑ, вӑл ҫилпе вӗҫсе каясран ун ҫине кирпӗч тата кӗреҫе хурса тухнӑ. Анчах кун пек технологи ҫумӑртан сыхласа хӑварайман, шыв пӗрех кайнӑ.
Ҫивиттие юсама «СП «Гранит» общество килӗшнӗ. Унӑн диспансерӑн столовӑйӗн ҫивиттине ҫӗнетмелле, ӗҫе кӑҫалхи утӑ уйӑхӗн 15-мӗшӗ тӗлне вӗҫлемелле пулнӑ. Анчах вӑл вӑхӑта илсен палӑртнин 10 процентне ҫеҫ пурнӑҫланӑ. Унсӑр пуҫне диспансер пурлӑхне утӑ уйӑхӗн 6, 7, 14-мӗшӗсенче ҫунӑ вӑйлӑ ҫумӑр сиен кӳнӗ.
Яваплӑ органсем объекта ҫӗртме уйӑхӗн 24-мӗшӗнче тепре тӗрӗсленӗ те унта никам та нимӗн те ӗҫлеменнине хӑйсен куҫӗпе курса ӗненнӗ. Ҫавна май подрядчикпа контракта пӑрахӑҫлама йышӑннӑ.
Ятарласа мар пулӗ-ха, анчах хитре мар пулса тухнӑ.
Шӑмӑршӑ районӗнчи Пӑчӑрлӑ Пашъел ялӗнче масара йӗркене кӗртме шухӑш тытнӑ. Ун валли ятарлӑ ҫынна, пӗр усламҫӑна, тупнӑ. Анчах хайхискер йывӑҫ касма тӑрсан вӗсене виле пытарнӑ вырӑн тавра тытнӑ картасем ҫине тӳнтерсе ярса пӗтернӗ.
Халӗ усламҫӑран ҫынсене кӑмӑл-сипет тӗлӗшӗнчен сиен кӳнӗшӗн укҫа шыраса илесшӗн.
Масар ҫинче ӗҫлекен усламҫӑ мӗн хӑтланнине вырӑнти прокуратура тӗрӗсленӗ. Ун хыҫҫӑн надзор органӗ подрядчика сиенленӗ объектсене (официаллӑ чӗлхерен этем чӗлхи ҫине куҫарсан карта тата палӑк тенине пӗлтерет ӗнтӗ) йӗркене кӗртме хушса хут ҫырса панӑ. Унсӑр пуҫне ҫынсене кӑмӑл-сипет тӗлӗшӗнчен сиен кӳнине саплаштарма ыйтса суда тавӑҫпа тухнӑ.
Чӑваш Енре суд шкул ачи валли 1 миллион тенкӗ шыраса илме йышӑннӑ.
Пӑтӑрмах кӑҫалхи нарӑс уйӑхӗн 18-мӗшӗнче пулса иртнӗ.
16 ҫулти хӗрача физкультура урокӗнче йӗлтӗрпе ярӑннӑ. Ҫав вӑхӑтра шкула апат-ҫимӗҫ турттарса пынӑ ГАЗель хыҫалалла чакарнӑ чух хӗрачана таптаса кайнӑ. Пӗрре ҫеҫ те мар, малалла кайнӑ чух тепре каҫса кайнӑ.
Инкек Вӑрмарти Е.Г. Егоров ячӗллӗ вӑтам шкулта пулса иртнӗ.
53 ҫулти водителе суд айӑплӑ тесе йышӑннӑ. Ҫын сывлӑхне йывӑр сиен кӳнӗшӗн ҫулталӑк ҫурӑлӑха ирӗкрен хӑтарма йышӑннӑ.
Хӗрачана хӳтӗлесе прокуратура суда тухнӑ. Вӑл хӗрача вӗренекен шкултан тата ГАЗель водителӗ ӗҫленӗ организацирен 1 миллион тенкӗ шыраса илме ыйтнӑ. Суд прокуратура тавӑҫне тивӗҫтерме йышӑннӑ.
+8.3 °C