Утӑ уйӑхӗн 29-мӗшӗнче, ҫил-тӑвӑл вӑхӑтӗнче, Атӑлта путнӑ катер хуҫине, 34 ҫулти арҫынна, тупнӑ. Унӑн вилли инкек пулнӑ вырӑнтан инҫех мар ҫыран хӗрринче пулнӑ. Ӑна беспилотник пулӑшнипе асӑрханӑ.
Аса илтерер: ӗнер ҫил-тӑвӑл вӑхӑтӗнче путнӑ 8 ҫулти ача виллине тупнӑ. Ӑна темиҫе ҫухрӑмра ҫыран хӗрринче асӑрханӑ.
Аса илтерсе хӑварар: Амоксар утравӗ ҫинчен таврӑннӑ катерта 10 ҫын пулнӑ. 6 уйӑхри ача виллине тӳрех тупнӑ. Ыттисем чӗрӗ юлнӑ.
Утӑ уйӑхӗн 29-мӗшӗнче Амоксар утравӗ ҫинчен килме тухнӑ катер ҫил-тӑвӑл вӑхӑтӗнче ҫаврӑнса ӳкни пирки хыпарланаччӗ. Инкекре 10 ҫын шар курнӑ. Шел те, 6 уйӑхри ача путнӑ, виллине тӳрех тупнӑ. 34 ҫулти кимӗ хуҫине тата 8 ҫулти арҫын ачана ҫӑлавҫӑсем шыранӑ.
Паян инкек пулнӑ вырӑнтан темиҫе ҫухрӑмра 8-ти ачан виллине тупнӑ. 34 ҫулти арҫынна халӗ те шыраҫҫӗ. Ку ӗҫе 8 ҫӑлавҫӑ, 4 техника хутшӑнаҫҫӗ. Кунсӑр пуҫне беспилотник пулӑшать.
Пушкӑрт Республикинчи Хушӑлка ялӗнчи ачасем «Суккӑр така» тата «Ларать, ларать, Миша ларать» чӑваш вӑййисене вылянӑ. Кун пирки Пушкӑртстанӑн Пишпӳлек районӗнче тухакан «Ҫутӑ ҫул» хаҫат хыпарлать.
«Ачасем сиккеленӗ, чупнӑ, кулнӑ. Вӑхӑта питӗ савӑнӑҫлӑ ирттернӗ», — пӗлтернӗ вырӑнтисем. Хушӑлка ачисем те ахаль выляман — вӑйӑсем хыҫҫӑн вӗсене пылак парнесем лекнӗ.
Ку вӑйӑсене «Культура шӑматкунӗ. Раҫҫей халӑхӗсен вӑййисем» мероприяти шайӗнче ирттернӗ.
Утӑ уйӑхӗн 29-мӗшӗнче, ҫил-тӑвӑл алхаснӑ вӑхӑтра, Атӑлта катер ҫаврӑнса ӳкни пирки, унта 10 пассажир пулни ҫинчен пӗлтернӗччӗ. Аса илтерер: ҫӑлав жилечӗсем пиллӗкӗшӗн кӑна пулнӑ. Ҫӑлавҫӑсем 7 чӗрӗ пассажира тата вилнӗ ҫур ҫулти ачана тупнӑ. 8 ҫулти арҫын ачана тата 34 ҫулти катер хуҫине халӗ те шыраҫҫӗ.
Мӗн пулса иртнӗ-ха ҫав кун? Виҫӗ арҫын катерпа Амоксар утравӗ ҫине канма кайнӑ. Вӗсем патне икӗ хӗрарӑм 6 ачапа пынӑ та ҫыран хӗррине леҫсе яма ыйтнӑ. Катер ҫине 10 ҫын ларнӑ. Анчах ҫул ҫинче мотор ӗҫлеме пӑрахнӑ, катера пысӑк хум ҫавӑрса ҫапнӑ.
Ҫӗнӗ Шупашкарти Строительсен урамӗнче пӗр ача выляма тухсан аманнӑ.
Унта баскетбол вылямалли лапам пур иккен. Анчах унӑн тавра карта тытса ҫавӑрман.
Ӗнер, утӑ уйӑхӗн 30-мӗшӗнче, баскетбол вылякансен мечӗкӗ айккинелле сирпӗнсе кайса 3 ҫулхи хӗрачана пуҫӗнчен пырса лекнӗ. Ача персе аннӑ, вӑл велосипед ҫине ӳкнӗ. Ача темиҫе хутчен суранланнӑ: баскетбол мечӗкӗ хытӑ лекнипе, велосипед ҫине персе аннипе.
Асӑннӑ пӑтӑрмах пирки Телеграмри каналсенчен пӗринче хыпарланӑ. Вӑйӑ лапамӗнче карта та тытса ҫавӑрман иккен, ӳксен аманасран резина сий те пӑхса хӑварман-мӗн.
Ӗнер ҫил-тӑвӑл вӑхӑтӗнче Мари Элте Таир тата Яльчик пӗвисен хӗрринче инкек пулнӑ. Шӑрӑх ҫанталӑкра унта чылай ҫын канма пухӑннӑ. Анчах ҫумӑр ҫума, ҫил алхасма пуҫланӑ.
Йывӑҫсем палаткӑсем ҫине ӳкнӗ. 29 ҫын шар курнӑ. 8 ҫын вилнӗ, вӗсенчен виҫҫӗшӗ - ачасем. РИА Новости пӗлтернӗ тӑрӑх, 10 ҫынна пульницӑна илсе кайнӑ. Вӗсенчен иккӗшӗн сывлӑхӗ йывӑр.
Вырӑна ҫӑлавҫӑсем ҫитсе пулӑшу кӳнӗ. Ӳкнӗ йывӑҫсене тасатаҫҫӗ.
Ӗнер, утӑ уйӑхӗн 29-мӗшӗнче, каҫхине Атӑлта, Виҫӗ юман тӑрӑхӗнче, тимӗр кимӗ ҫаврӑнса ӳкнӗ. Ку ҫил-тӑвӑл алхаснӑ вӑхӑтра пулнӑ.
Кимӗ утрав енчен ҫыран хӗррине таврӑннӑ. Унта 10 ҫын пулнӑ.
Шел те, ку пысӑк инкекпе вӗҫленнӗ. Кимӗ ҫинче пулнӑ 4 ҫын шар курнӑ. 6 уйӑхри ача вилнӗ. 9 ҫулти ачана ҫӑлавҫӑсем шыраҫҫӗ.
Шкулта вӗренекен пултаруллӑ ачасене Чӑваш Ен Элтеперӗн стипендийӗпе хавхалантараҫҫӗ. Унӑн виҫи ку таранччен 400 тенкӗпе танлашнӑ.
Халӗ пултаруллӑ ачасем уйӑхсерен ытларах стипенди илӗҫ. Унӑн виҫине 150 тенкӗ пысӑклатма йышӑннӑ. Ҫапла вӑл 550 тенкӗпе танлашать.
Палӑртмалла: стипендие вӗренӳре палӑрнӑшӑн, тӗнче, ҫӗршыв, регион шайӗнчи олимпиадӑсенче ҫӗнтернӗшӗн параҫҫӗ
Куславкка хулинче ачана йытӑ ҫыртнӑ. Куншӑн район администрацийӗнчен 70 пин тенкӗ шыраса илесшӗн.
Шӑпӑрлан ача-пӑча лапамӗнче пулнӑ. Ҫав вӑхӑтра ӑна килсӗр-ҫуртсӑр йытӑ тапӑннӑ та пуҫӗ тӗлӗнчен ҫыртнӑ. Ачана пульницӑна медпулӑшу пама илсе кайнӑ. Тухтӑрсем ӑна кӳнӗ суран йывӑрах пулманнине палӑртнӑ. Ҫапах ӑна урнӑ чиртен вакцинаци тӑваҫҫӗ. Ҫавна май прокуратура кӑмӑл-сипет тӗлӗшӗнчен сиен кӳнӗшӗн 70 пин шыраса илме суда тавӑҫ тӑратнӑ.
Улатӑрти Киров урамӗнчи 36, 38 тата 60-мӗш, Ленин урамӗнчи 43-мӗш ҫуртра пурӑнакансем видео ӳкерсе Чӑваш Ен влаҫӗнчен пулӑшу ыйтнӑ. 2 ҫул каялла вӗсем хӑйсем укҫа пухса ачасем валли вылямалли лапам тунӑ, тӑвайкки вырнаҫтарнӑ. Ӑна хӑйсем пӑхса тӑраҫҫӗ, унта чечексем лартаҫҫӗ.
Анчах ҫак илем ҫывӑхра пурӑнакан пӗр хӗрарӑма чӑрмантарать. Ачасем шавлаҫҫӗ-мӗн. Ҫавӑнпа вӑл прокуратурӑна заявлени ҫырнӑ. Ведомство вара суда тавӑҫ тӑратнӑ.
Ҫынсем ача-пача лапамне пӑстарасшӑн мар, ҫавӑнпа пулӑшу ыйтаҫҫӗ те. Унта ытти микрорайонти ачасем те выляма килеҫҫӗ.
+0.3 °C