Ҫӗнӗ Шупашкарти 9-мӗш шкулта вӗренекен ачасем мода кӑтартнӑ. Вӗсем сцена ҫине чӑваш наци тумӗсемпе тухнӑ.
Ачасем куракансене тӗрлӗ тумпа паллаштарнӑ. Вӗсен йышӗнче хальхи модӑпа килӗшсе тӑракан тумтир те пулнӑ.
Пневмони сарӑлнӑран Шупашкарти 59-мӗш шкул карантина кайнӑ. Унти ачасем, малтанлӑха палӑртнӑ тӑрӑх, раштав уйӑхӗн 8-мӗшӗччен дистанци мелӗпе вӗренӗҫ. Унччен унта хӑш-пӗр класс кӑна карантинра пулнӑ.
Ачасем килте вӗреннӗ май учительпе «Сферум» платформа урлӑ ҫыхӑнаҫҫӗ.
Тӗрлӗ ҫӑлкуҫ пӗлтернӗ тӑрӑх, хулари 40-мӗш шкул та карантинра. Хӑш-пӗр шкулта классем карантина кайнӑ.
Кӳкеҫри ача-пӑча интернат шкулӗнче ӑс пухакан Владислав Разводов вӗтӗ шӑрҫапа чӑваш ялавне тӗрленӗ. Вӑл ку ӗҫпе темиҫе ҫул ӗнтӗ аппаланать.
Владислав куравсемпе конкурссене хутшӑнать, ытти ӑстапа опытпа пайланать. «Ку ӗҫ интереслӗ кӑна мар, ун валли тимлӗх, чӑтӑмлӑх нумай кирлӗ. Мана хамӑн алӑпа мӗнле те пулин хӑйне евӗр япала тума, чӑваш тӗррин историпе йӑли-йӗркине пуҫӗпех путма килӗшет», – тенӗ ӑста арҫын ача.
Ҫӗрле Росгварди ӗҫченӗсем Ҫӗнӗ Лапсарта икӗ арҫын ачана шыранӑ. Ку чӳк уйӑхӗн 20-мӗшӗнче пулнӑ.
10-ри арҫын ача каҫхине урама тухнӑ та таврӑнман. Ку хыпар Росгварди ӗҫченӗсем патне ҫур ҫӗр иртни 1 сехетре ҫитнӗ. Пӗр тӑхтамасӑр шырама тытӑннӑ.
Кӑштахран тепӗр арҫын ача та ҫухални пирки пӗлтернӗ. Вӑл – унӑҫ тусӗ.
Ирхи 7 сехет тӗлне хӑраса ӳкнӗ арҫын ачана Совхоз урамӗнчи 18-мӗш ҫурт умӗнче тупнӑ. Тусӗ темиҫе минут каялла киле кайнӑ-мӗн. Росгварди ӗҫченӗсем килне кайса унпа йӑлтах йӗркеллӗ пулнине хӑйсем ӗнӗннӗ.
Красноармейски округӗнче ЗАГС ӗҫченӗсес хӑйне евӗрлӗ ят регистрациленӗ: Каллиста. Хӗр пӗрчи чӳк уйӑхӗн 13-мӗшӗнче ҫут тӗнчене килнӗ.
Каллиста Пикшик ял тӑрӑхӗнче пурӑнакан Елисейпа Светлана Филипповсен ҫемйинче ҫуралнӑ. Ҫак ят амӑшне тӗлӗкре тӗлленнӗ-мӗн.
Каллиста авалхи грек чӗлхинчен куҫарсан «чи хитри» тесе куҫать.
Паян Шупашкарти Алькеш микрорайонти Роза Люксембург урамӗнчи 63-мӗш шкулта пӑтӑрмах пулса иртнӗ. Столовӑйӗнче 12-ри арҫын ача алла ҫӗҫӗ ярса илсе унпа ытти ачана тата педагогсене тапӑнма тӑнӑ.
Инкек пирки пӗлтерекен ҫӑлкуҫсем хыпарланӑ тӑрӑх, никам та шар курман. Ҫӗҫҫе ача килӗнчен илсе пыман иккен. Ӑна вӑл столовӑйӗнче асӑрханӑ. Ҫӗҫҫе хуралҫӑ туртса илнӗ.
Ачан аталанса пырассипе кӑлтӑк пур-мӗн. Вал шкулта учетра тӑнӑ-мӗн.
Ҫӗмӗрлере чӳк уйӑхӗн 15-мӗшӗнче йытӑ икӗ хӗрачана тапӑннӑ. Пӗрине вӑл ҫыртнӑ, тумне ҫӗтнӗ. Тепринне кутамккине ҫурса тӑкнӑ. Юрать, хӗрарӑм пулӑшнӑ. Вӑл ачасем кӑшкӑрнине илтсе пулӑшма васканӑ. Вӑлах васкавлӑ медпулӑшу чӗннӗ. Вӑл ҫапкаланчӑк йытӑ пулман. Ӑна хуҫи урама уҫӑлма кӑларнӑ-мӗн.
Ку кӑнтӑрла 12 сехет иртсен Банк тӑкӑрлӑкӗнчи 6-мӗш ҫурт ҫывӑхӗнче пулнӑ. 12-ри хӗрачасем шкултан таврӑннӑ. Пӗрне пульницӑна илсе кайнӑ, йытӑ ӑна пӗҫҫинчен ҫыртнӑ.
Ачасен амӑшӗсем прокуратурӑран пулӑшу ыйтасшӑн.
Регионсен хушшинчи «Танцы с ДЕТKIDS» ача-пӑча конкурс фестивалӗнче Етӗрнери «Жемчужинка» ушкӑн 1-мӗш вырӑн йышӑннӑ. Вӗсем хӑйсен ӳсӗм категорийӗнче ҫӗнтернӗ.
Пирӗн ентешсем «Халӑх ташши» номинацире тупӑшнӑ, куракансене «Раҫҫей – Ҫӗр-аннемӗр» номерпе паллаштарнӑ. Палӑртмалла: ушкӑн ертӳҫи – Ирина Богданова. Ушкӑн 10 ҫул ытла каялла Етӗрнери ача-пӑча пултарулӑхӗн ҫуртӗнче йӗркеленнӗ.
Ҫӗнӗ Шупашкарти 4-мӗш шкулта нумай ача апатпа наркӑмӑшланнӑ. Пульницӑна пулӑшу ыйтма 20 ҫын пынӑ, вӗсенчен 19-шӗ – ачасем.
Виҫҫӗшне инфекци уйрӑмне вырттарнӑ. Ыттисене медпулӑшу панӑ хыҫҫӑн киле сипленме янӑ. Пульницӑна пынӑ пӗтӗм ҫыннӑн пӗр пек чир паллисем пулнӑ: вӗсем апатпа ҫыхӑннӑ.
Прокуратура тата Следстви комитечӗн Чӑваш Енри Следстви управленийӗ тӗрӗслев пуҫарнӑ. Ҫакӑ паллӑ: ҫак шкулта апатланӑва йӗркелекенни – Шупашкарти 2-мӗш ҫӑкӑр савучӗ.
Шупашкарти Уруков урамӗнче вырнаҫнӑ Патшалӑх истори архивӗнче «Минуты счастья в четыре руки» курав уҫӑлнӑ.
Унӑн авторӗсем — пултаруллӑ та ҫамрӑк Мария Евишева тата ӑна пулӑшса пыракан художникӗ-живописҫи, педагогӗ, Ҫӗнӗ Шупашкарти Ӳнер музейӗн ӑслӑлӑх ӗҫченӗ Наталия Нагорнова.
Куравра Машӑн тӗрлӗ техникӑпа тата стильпе пурнӑҫланӑ ӗҫӗсен коллекцийӗпе паллашма пулать.
Архив директорӗ Галина Ертмакова хӗрачана пулӑшса пынӑшӑн Наталия Юрьевнӑпа Владимир Порфирьевич Нагорновсене тав тунӑ.
Сусӑр ачасене пулӑшса пыракансене ырласа ыттисем те сӑмах каланӑ.
-23.7 °C