Ӗнер каҫхине, 21:20 сехетре, Канаш округӗнче авари пулнӑ. Унта 3 ҫын вилнӗ, ҫав шутра – 7 уйӑхри ача.
Малтанлӑха палӑртнӑ тӑрӑх, правасӑр юлнӑ 50-ри арҫын «Киа» машинӑпа хирӗҫ ҫул ҫине тухса «Фордпа» ҫапӑннӑ. «Форд» машинӑра 5 пассажир пулнӑ, ҫав шутра 2 ача (вӗсене ятарлӑ ларкӑча лартман). Водитель, 37-ри арҫын (вӑл Владимир облаҫӗнчен), тата амӑшӗн алли ҫинче пулнӑ 7 уйӑхри ача вилнӗ. «Киа» водителӗ хӑй те, 50-ри арҫын, васкавлӑ медпулӑшу киличчен пурнӑҫран уйрӑлнӑ. Аварире 4 ҫын аманнӑ, ҫав шутра 6-ри ача.
Халӗ ку ӗҫ тӗлӗшпе тӗрӗслев пырать.
Чӑваш Енре кӑҫал чи пӗрремӗш арҫын ача ҫуралнӑ. Кун пирки ЧР сывлӑх сыхлавӗн министрӗ Лариса Тарасова пӗлтернӗ.
Вӑл Канашра ҫур ҫӗр иртни 22 минутра ҫут тӗнчене килнӗ. Чӑн-чӑн пӑхаттир пекех: 4066 грамм йывӑрӑш таять, 54 сантиметр ҫӳллӗш.
Шупашкарта шкул ачи ултавҫӑсен аллине лексе амӑшӗн ылтӑн алки-эрешне парса янӑ. Пӗтӗмпе – 500 пине яхӑн тенкӗлӗх.
Раштавӑн 25-мӗшӗнче ун патне арҫын шӑнкӑравланӑ, вӑл маркетплейс ӗҫченӗ-мӗн. Хайхискер ача патне посылка килнине пӗлтернӗ, паспорт даннӑйӗсене тата СМС-ҫырупа килнӗ кода ыйтнӑ. Арҫын ача йӑлтах каланӑ.
Кун хыҫҫӑн ун патне палламан ҫынсем шӑнкӑравлама тытӑннӑ. Вӗсем ачана явап тыттарассипе хӑратнӑ, видеоҫыхӑну урлӑ хваттере кӑтартма ыйтнӑ. Алка-эрешсене курсан вӗсене «тӗрӗслемешкӗн» памалла тесе ӗнентернӗ.
Ача эрешсене курьера парса янӑ. Телефонра палламан ҫынсемпе ҫырӑнни хуралсан тин вӑл хӑйне улталанине ӑнланнӑ.
Ҫӗнӗ ҫул умӗн ҫӗршывра ҫулсерен «Ҫӗнӗ ҫул ёлки» акци ирттереҫҫӗ. Унта тӳре-шара ҫеҫ мар, уҫӑ кӑмӑллӑ кирек епле ҫын та хутшӑнма пултарать.
Канашра пурӑнакан 8 ҫулти Семён Чарланов коньки пирки ӗмӗтленнӗ. Ҫулла ача футбол выляма юратать. Кӑҫал вара арҫын ача хоккей выляс ӗмӗтпе ҫунатланма пуҫланӑ.
Раҫҫейӗн Шалти ӗҫсен министерствин официаллӑ элчи Ирина Волк Чӑваш Енри ачан ӗмӗтне пурнӑҫа кӗртме пулӑшас тенӗ. Ӑна вӑл конькисӗр пуҫне хӳтлӗх экипировки те туянса пама кӑмӑл тунӑ. Ырӑ хыпара ачана Чӑваш Енӗн ШӖМ ӗҫченӗсем пӗлтернӗ.
Шупашкарти «Ҫӗнӗ хула» микрорайонта 340 вырӑнлӑх ача пахчи уҫӑлнӑ. Ӑна чӑвашла ят панӑ — «Асам».
Ача пахчин дизайнӗ хӑйне евӗр – унта кӗтессем ҫук. Ку ачасемшӗн питӗ меллӗ тата хӑрушсӑр. Унта 15 ушкӑн пулӗ, вӗсен йышӗн иккӗшӗ — сусӑр ачасем валли. Кашни ушкӑна кӗмелли уйрӑм алӑк пур.
Кунсӑр пуҫне «Асам» педагогсемшӗн республикӑри компетенци центрӗ пулӗ. Ку Чӑваш Енри шкул умӗнхи вӗренӗве аталантарма пулӑшӗ.
Етӗрнере улма-ҫырла сутуҫин ачасене зеленкӑпа ҫӑвӑнтарнӑшӑн явап тыттарнӑ. Суд ӑна 2,5 ҫуллӑха ҫирӗп режимлӑ колоние ӑсатма йышӑннӑ.
Ку пӑтӑрмах кӑҫал утӑ уйӑхӗн 30-мӗшӗнче пулнӑ. Суту-илӳ вырӑнӗ тытса тӑракан арҫын хӑйӗн патӗнче ӗҫлекен сутуҫӑран ҫакна пӗлнӗ: 12-ри тата 13-ри ачасем сентре ҫинчен мандарин вӑрлама хӑтланнӑ иккен. Арҫын вӗсене вӗрентме шухӑшланӑ: ачасене хӑйӗн машинине лартнӑ та вӑрмана илсе кайнӑ, унта ачасене питне зеленкӑпа ҫума хушнӑ. Ҫакна арҫыннӑн хӗрӗ телефон ҫине ӳкернӗ. Кайран вӗсем ачасене ҫавӑнтах хӑварса хӑйсем таврӑннӑ. Пӗртӑвансен каялла хӑйсен тӗллӗн таврӑнма тивнӗ.
Арҫынна 2 эрнерен кӑна тытса чарнӑ. Ҫав вӑхӑт тӗлне вӑл республикӑран кайма ӗлкӗрнӗ. Ҫакна та палӑртмалла: суд унран ачасем валли 440 пин тенкӗ шыраса илме те йышӑннӑ.
Пӑрачкав округӗнче аслӑ класра вӗренекен шкул ачи ултавҫӑсене 300 пин тенкӗ куҫарса панӑ.
Палламан ҫынсем ун патне темиҫе кун шӑнкӑравласа пуҫне ҫавӑрнӑ. Йӗркеллӗ ҫывӑрма та паман. Вӑл кода пӗлтернӗ хыҫҫӑн преступниксем унӑн ҫемйи ячӗпе кредитсем илсе тултарнӑ, укҫана Украинӑна куҫарнӑ тесе хӑратса пӗтернӗ
Юлашкинчен вӗсем ӑна ашшӗ ячӗпе кредит илме ӳкӗте кӗртнӗ. Кун хыҫҫӑн каччӑ ҫӗрле такси тытса кӳршӗ яла кайнӑ та укҫана банкомат урлӑ куҫарнӑ.
Ирхине ашшӗ ывӑлӗ ҫуккине асӑрханӑ. Ӑна шыраса тупса киле илсе килнӗ.
ЧР Элтеперӗ Олег Николаев Пӗтӗм Раҫҫейри «Ӗмӗтсен ёлки» акцие хутшӑннӑ. Вӑл чӑрӑш ҫинчен виҫӗ тетте илнӗ, вӗсенче – ачасен ӗмӗчӗсем.
Олег Алексеевич 13 ҫулти Федора телескоп парнелӗ, Аринӑна – балансборд. 15 ҫулти Никитӑна вара кӗтмен парнепе савӑнтарӗ.
Чӑваш Енри хӗрарӑмсен пӗрлӗхӗн председателӗ Наталья Николаева Шупашкарти 5-ри Ульянӑн, Ҫӗнӗ Шупашкарти Кирӑн тата Шупашкар округӗнчи Чӗркаш ялӗнчи Дарьйӑн ӗмӗчӗсене пурнӑҫлӗ.
Килес ҫул пирӗн ҫӗршывра юлашки шӑнкӑрав тата шкулсенчи уйрӑлу каҫӗ хӑҫан иртесси паллӑ.
Юлашки шӑнкӑрав кунне ҫу уйӑхӗн 26-мӗшӗнче ирттерме палӑртнӑ. Шкулпа сывпуллашмалли каҫ вара тепӗр уйӑхран, ҫӗртме уйӑхӗн 27-мӗшӗнче, пулӗ. Ҫав уявсене патриотизм темипе тата ҫемьене хаклассипе ҫыхӑнтарма сӗннӗ.
Чӑваш Ене Раҫҫейри паллӑ актер Влад Канопка килесси пирки сайтра унччен пӗлтернӗччӗ. Вӑл Ҫӗмӗрлери шкул ачисем тӗл пулнӑ.
Влад Канопкӑна ытларах «Молодежка» сериал тӑрӑх пӗлеҫҫӗ. Унта ӳкерӗнсе чапа тухнӑ актер ачасене мӗнле кӗнекесем вулама кӑмӑлланине каласа кӑтартнӑ.
Ку тӗлпулу «Знание» обществӑн проекчӗпе килӗшӳллӗн иртнӗ. Влад ачасене хӑй мӗнле кӗнекесем кӑмӑлланине пӗлтернӗ: Федор Достоевскин, Лев Толстойӑн тата Александр Пушкинӑн хайлавӗсене вулама юратать вӑл. Ҫавӑн пекех вӑл ӑсталӑх класӗ йӗркеленӗ.
-22.7 °C