Республикӑри онкологи диспансерӗнче меланомӑна тупса палӑртас тӗллевпе акци ирттернӗ. Шупашкар ҫыннисем тур паллине ӳкернӗ сӑнсене ярса панӑ, специалистсем патне приёма килнӗ.
Ҫав кун специалистсенчен 138 ҫын пулӑшу ыйтнӑ. Вӗсенчен 4-шӗн усал шыҫӑ пулма пултарать. 9-шӗ тӗлӗшпе иккӗленнӗ. Специалистсем электронлӑ почтӑпа ярса панӑ тур паллин ӳкерчӗкӗсене те тишкернӗ. Вӗсем 164 анкета пӑхса тухнӑ. 40 ҫыннӑн меланома пулма пултарассине пӗлтернӗ. Вӗсене приема килме йыхрав янӑ.
Ку ыйту питӗ ҫивӗч пулнӑран акцие тӑсма палӑртнӑ. Онкологсем хӗвел ҫинче сахалрах пулма, унран хӳтӗлекен кремпа усӑ курма, соляри пирки манма сӗнеҫҫӗ.
Ҫу уйӑхӗн 17-мӗшӗ Меланомӑпа кӗрешмелли пӗтӗм тӗнчери кун шутланать. Ҫавна май Республикӑри онкологи диспансерӗ тур паллине ӳкерсе илнӗ сӑнӳкерчӗклӗ анкетӑсене radi_ghizni@mail.ru электрон пуштӑпа йышӑнать. Май килсен тата ӳркенменнисем Шупашкарти ҫав пульницӑна (вӑл Гладков урамӗнчи 31-мӗш ҫуртра вырнаҫнӑ, 1-мӗш хута кӗмелле) ҫитерсе пама пултараҫҫӗ. Сӑнӳкерчӗк тӑрӑх палӑртма йывӑртарах пулсан, ҫынна йышӑнӑва электрон пуштӑпа е телефонпа шӑнкӑравласа чӗнӗҫ.
Ыйтса пӗлмелли телефон номерӗ — (8352) 21-70-24 (ирхи 8 сехетрен пуҫласа 16 сехетчен).
Пӗтӗм тӗнчери сывлӑх сыхлав организацийӗ пӗлтернӗ тӑрӑх, меланомӑпа (ӳт ракӗпе) чирлисене ҫулсерен тӗнчере 132 пине тӗслӗх тупса палӑртаҫҫӗ, ҫав шутран ҫуррийӗ вилӗмпе вӗҫленет. Меланома — ӳтӗн усал шыҫҫи. Вӑл ӳт тӗсне палӑртакан мелонинтан пуҫланса каять. Шел пулин те, ку чир усаллисен тата йывӑррӑн сипленекеннисен шутне кӗрет. Вӑл ҫула пӑхса килмест. Ӑна ир палӑртсан сиплеме пулать тесе шантараҫҫӗ онкологсем.
Ӑнсан — суранланса, ӑнмасан — вилсе. Чӑнах-чӑнах.
Ака уйӑхӗн 28-мӗшӗнче Пӗтӗм тӗнчери ӗҫ сыхлавӗн кунне палӑртаҫҫӗ. Пӗтӗм тӗнчери ӗҫ сыхлавӗ пуҫарнипе ҫирӗплетнӗ ҫак кун тӗлне РФ Следстви комитечӗн Чӑваш Енри управленийӗ республикӑра ку енӗпе лару-тӑру еплереххине тишкернӗ.
Производствӑра суранланнипе ҫыхӑннӑ пӑтӑрмахсемпе ҫыхӑннӑ кӑлтӑксемшӗн пуҫиле ӗҫе ытларах чухне РФ Пуҫиле кодексӗн 143-мӗш статйипе (ӗҫ сыхлавӗн правилине пӑснине пула ҫынна йывӑр суранлатнӑшӑн е ҫынна вӗлернӗшӗн), 216-мӗш статйипе (хӑрушсӑрлӑх правилине пӑснине пула ҫын сывлӑхне йывӑр сиен кӳнишӗн е пысӑк тӑкак кӑтартнишӗн, е ҫын вилнишӗн) тата 109-мӗш статьяпа (асӑрханманнине пула вилӗм кӳнишӗн) ӗҫ пуҫарнине пӗлтерет асӑннӑ управленин пуҫлӑхӗн пулӑшуҫи Олег Дмитриев.
Кӑҫалхи ҫак тапхӑрта кӑна пуҫиле виҫӗ ӗҫ пуҫарнӑ. Пӗлтӗрхипе танлаштарсан, ку вӑл пӗр тӗслӗх сахалтарахне пӗлтерет-ха. Ҫын вилнӗ фактсем икӗ хутчен пулнӑ.
Производствӑра суранланнӑ тӗслӗхсем пӗлтӗр Шупашкарпа Ҫӗнӗ Шупашкар хулисенче, Вӑрнар, Красноармейски, Муркаш, Ҫӗрпӳ, Шупашкар, Етӗрне районӗсенче сиксе тухнӑ.
Роспотребнадзоран Чӑваш Енри управленийӗ Ҫӗрпӳри тӗп пульницӑра тӗрӗслев ирттернӗ. Кун хыҫҫӑн тӗп тухтӑр тӗлӗшпе протокол ҫырнӑ.
Пульница уйрӑмӗнче юсав пулманни пирки ҫынсем нумай хутчен ҫӑхавланӑ-мӗн. Ҫӗрпӳри пульницӑри инфекци уйрӑмӗнче юсав ҫукран Роспотребнадзора ҫӑхав ҫырнине Дмитрий Семенов пӗлтернӗ.
Ведомство ӗҫченӗсем уйрӑма ака уйӑхӗн 13-мӗшӗнче тӗрӗсленӗ. Вӗсем ҫурт тӑррине ҫӗнетмеллине, умне, пӳлӗмсене юсамаллине палӑртнӑ.
Управленире палӑртнӑ тӑрӑх, 1,3,5-мӗш палатӑсенче юсав ирттернӗ, пластик чӳрече лартнӑ. 1, 2, 4-мӗш палатӑсенче, ваннӑйра, туалетра, пациентсене йышӑнмалли пӳлӗмре юсав тумалла.
Тӗп тухтӑр Ольга Ермакова палӑртнӑ тӑрӑх, ЧР сывлӑх сыхлавӗн министерстви пульницӑна юсамашкӑн ҫулсерен 5 миллион тенкӗ уйӑрать. Анчах кӑҫал йывӑр лару-тӑрӑва пула укҫа-тенкӗ уйӑрман.
Пациентсенчен ыйтса пӗлнӗ чухне палатӑсенче кӑткӑсем, сӑвӑссем пурри ҫирӗпленмен.
Хальлӗхе. Вӑхӑтлӑха. Кайран ӑна ваттисен ҫуртне куҫарӗҫ.
Шупашкар районӗнчи Хыркассинче пурӑнакан ҫулӗпе ватах та мар хӗрарӑм иккӗмӗш ушкӑн инваличӗ шутланать. Сахар диабечӗпе чирлекенскер нумаях пулмасть инсульт тӳссе ирттернӗ. Унсӑр пуҫне унӑн хӑрах урине татнӑ. Шупашкар районӗнчи халӑхӑн социаллӑ ыйтӑвӗсене тивӗҫтерекен уйрӑмӗн участокри социаллӑ служби нумаях пулмасть ҫав хӗрарӑмпа тӗл пулнӑ. Ҫийӗнчех ӑна район пульницинчи тухтӑрсем патне илсе кайнӑ та медицина тӗрӗслевӗ витӗр кӑларнӑ.
Пулӑшу кирлӗ хӗрарӑма малтанласа социаллӑ ӗҫчен пӑхса тӑрӗ. Инвалида пурӑнма килӗнче хӑтлӑ условисем ҫуккине кура ҫывӑх вӑхӑтра ӑна стационарлӑ учреждение, тепӗр майлӑ каласан ваттисен ҫуртне, вырнаҫтарма палӑртаҫҫӗ.
Раҫҫейре кӗҫех васкавлӑ медпулӑшу бригадисене пырса тивекен ҫӗнӗ правилӑсем йӗркене кӗрӗҫ. Ку 2,5 уйӑхран пулӗ. Документра шурӑ халатлисен пациент патне миҫе минутра ҫитмеллине палӑртнӑ. Кун пирки «Раҫҫей хаҫачӗ» пӗлтерет.
Ҫӗнӗлӗх утӑ уйӑхӗн 1-мӗшӗнчен вӑя кӗрӗ. Наци Медицинин палатин съездӗнче васкавлӑ медпулӑшу парасси пирки калаҫнӑ. Ертӳҫӗсен ассоциацийӗн пуҫлӑхӗ Алексей Бойков каланӑ тӑрӑх, васкавлӑ пулӑшу хӑш вӑхӑтра ҫитмеллине пӗрремӗш хут документра палӑртнӑ. Ку вӑхӑт 20 минутран ытларах пулмалла мар.
Ҫавӑн пекех водитель фельдшер тата водитель санитар пулмасть. Ун вырӑнне медицина сестри пулӗ.
Пирус тӗтӗм-сӗрӗмне сывлани туртман ҫыншӑн тата та сиенлӗрех теҫҫӗ тухтӑрсем. Вӑл вара ачасене те, яшшисене те, ваттисене те шеллемест. Ӗнер, ака уйӑхӗн 13-мӗшӗнче Чӑваш Енӗн сывлӑх сыхлав министрӗ Алла Самойлова «Об установлении дополнительных ограничений курения табака в отдельных общественных местах и в помещениях» (чӑв. Обществӑлла хӑш-пӗр вырӑнта табак туртмаллине хушма чарусем ҫирӗплетесси ҫинчен) саккун проекчӗпе паллаштарнӑ.
Саккуна йышӑнсан общество транспорчӗн чарӑнӑвӗсенче тата вӗсенчен 15 метртан ҫывӑхарах тата, паллах, подъездсенче пирус мӑкӑрлантарма юрамӗ. Нумай хваттерлӗ ҫурта кӗрекен вырӑнтан 15 метр ҫывӑхӗнче туртни те йӗркене пӑсни шутланӗ. Халӑхпа мероприяти ирттерекен кунсенче урамсенче, лапамсенче тата ытти ҫав вырӑнсенче те туртма чарӗҫ. Ҫуран ҫӳрекенсем ҫул ҫийӗн е ҫул айӗпе каҫса ҫӳрекен вырӑнсем, скверсем, парксем те пирус туртма юраман вырӑнсен шутне лекӗҫ.
Ака уйӑхӗн 2-мӗшӗнче аутизм пирки информаци сармалли пӗтӗм тӗнчери куна паллӑ тӑваҫҫӗ. Чӑваш Республикинче «Манӑн хӑйне евӗр ача» проект виҫҫӗмӗш ҫул пурнӑҫланать. Вӑл аутизмпа чирлӗ ачасене тата вӗсен ашшӗ-амӑшне пулӑшать.
2016 ҫул тӗлне республикӑра аутизмпа чирлӗ 146 ача пурӑннине шута илнӗ. Вӗсенчен 119-шне сусӑр тесе йышӑннӑ. Ака уйӑхӗн 1-мешӗнче ку чир-чӗре ҫавра сӗтелре сӳтсе явнӑ.
Ҫавра сӗтелре кунашкал ачасене сиплемелли, вӗрентмелле, социализацилемелли ыйтусене сӳтсе явнӑ. Кунашкал ачасене пукане спектаклӗсене явӑҫтарас ӗҫе те ҫӗкленӗ. Аутизмпа чирлӗ ашшӗ-амӑшӗн ушкӑнне йӗркелеме йышӑннӑ. Вӑл тухтӑрсене, педагогсене, психологсене пӗр тӗвве пухма пулӑшать.
Шупашкара «Лаборатори диагностики» ятлӑ ҫӗнӗ икӗ урапа ҫитнӗ. Вӗсем Шупашкарти медицина организацийӗсенчен Хулари 1-мӗш клиника пульницин клиникӑпа диагностика лабораторине биоматериалсене илсе ҫитерӗҫ.
Чӑваш Енре тӗп лаборатори служби виҫӗ ҫул каяллах ӗҫлеме тытӑннӑ. Хулари 1-мӗш клиника пульници ҫумне Шупашкарти сипленмелли 16 организацие ҫирӗплетнӗ. Юна штрих-кодлӑ ятарлӑ пробиркӑна илеҫҫӗ. Унта пациент тата сипленмелли учреждени пирки информаци пур. Пробиркӑсене контейнер-сивӗтӗшсене вырнаҫтарса лабораторие ӑсатаҫҫӗ.
Пӗлтӗр Хулари 1-мӗш клиника пульницин лабораторийӗнче 9,5 миллиона яхӑн тӗпчев ирттернӗ. Лаборатори диагностики сывлӑх сыхлавӗ валли объективлӗ диагностикӑн 80 процентне парать.
«Чӑваш Ен» ПТРК тата Русфонд Шупашкарта пурӑнакан 6-ри Ксюша Игнатьевӑна пулӑшасшӑн. Ӑна хаклӑ операци тумалла.
Ашшӗ-амӑшӗ ун чухлӗ укҫа пухаймасть. Вӑл чӗре чирӗпе аптӑрать. Ҫынсем вара 5542 номер ҫине «ДЕТИ» сӑмах ҫырса ярса ӑна пулӑшма пултараҫҫӗ.
Ксюшӑна чӗри кашни кунах аптӑратать пулин те вӑл аслисене ҫитӗнӗвӗсемпе савӑнтарать. Вӑл пултаруллӑ: ӳкерет, тӑмран ӑсталать, юрлать.
Ксюша кардиоцентра ҫуралсан иккӗмӗш эрнеренех лекнӗ. Малтан тухтӑрсем операци тума васкаман, тӳрленессе шаннӑ. Анчах халӗ тӗрӗсленӗ хыҫҫӑн чӗри ҫинче тепӗр шӑтӑк пулнине ҫирӗплетнӗ.
Операци тумашкӑн 411 пин тенкӗ те 702 тенкӗ кирлӗ. «Коммерсант» хаҫат вулаканӗсем тата Русфонд 369 пин тенкӗ пухӗҫ. 42 пин тенкӗ ҫитмест. Ксюшӑна кашниех пулӑшма пултарӗҫ.
+3.3 °C