Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Каçĕ çăлтăрлă, тӳлек.

Уйăх кантăкран

Шурă-шурă конверт пек

Кĕчĕ ăнсăртран.

Выртрĕ сăрлă урайне

Çутă тăваткал.

Хăйĕн ăшă сăмахне

Ячĕ-ши такам?

Çухалмарĕ ирчченех

Çӳл тӳпе алки.

Вуламан çыру пекех

Уйăх пайăрки.

Çĕрлехи пахча шăп-шăпăрт,

хуп-хура çĕртме.

Сивĕ çумăр шăпăр-шăпăр

чалăшшăн иртмест.

Хушăран çеç чăштăр-чăштăр

çулçă тăкăнать.

«Ан васка каймашкăн, кăшт тăр», —

тем мана тытать.

Ялкăшса çунать кăвайтăм —

типĕ пуленке.

Пĕчченех эп чӳк тăватăп,

тулăх кĕреке.

Мăнтăр çĕрĕн пархатарĕ

ӳтĕме кĕрет.

Ĕçлесен сад çимĕç парĕ

килес çул тепре.

Çĕр куçне хупать мăраннăн,

çулçăпа витет.

Ман кăвайт ăна ăнланнăн

ерипен сӳнет.

Илтĕнмест чакак сасси те

чăрăш тăрринчен.

Кĕр мана калас пек:

«Çитĕ, кан çурхи кунччен».

Ан сивле тĕнчене:

Кăмăлу лĕнчĕр-лĕнчĕр...

Лар та пуйăс çине —

Станцисем черетленччĕр.

Эс тарман телейрен,

Шыраман инкек çулĕ.

Тăван ен теекен

Çĕршыву хыçа юлĕ.

Пĕтĕмпех кулăшла,

(Инкекӳ-телейӳ те!)

Ним çинчен шухăшла

Купери кантăк витĕр.

Хуларан хулана

Сĕтĕрнет тăлăх пуйăс,

Вăл ниçта та каймасть,

Çутăсем сана — суйрĕç.

Е эсĕ çак тĕнчерен ĕмĕрлĕхех уйрăлса каясран хăратăн? Çĕмрен пек е хĕсĕнсе те пулин çын чунне кĕретĕн. Ултав. Эсĕ миçе çыннăн куççульне тăкман пулĕ? Эсĕ ырра, юратăва туймастăн, ăна уру айĕнче таптатăн. Мĕншĕн çав териех сĕмсĕрленетĕн-ха эсĕ? Епле пулсан та, парăнмастăп эпĕ сана. Чĕре тапнă чухне йышăнмастăп.

Сап-сарă янтарь — авалхи хыр куççулĕ,

Мĕльюн çул хушши чулланса

Çемçе дюнăсен айĕнче выртнă пулĕ,

Халь акă тухать вутланса.

Вăл тĕлĕрнĕ ĕнтĕ нимскер те туймасăр,

Хăйне тупасса та шанман.

Ӳпри, ăшĕнче ик куçне чăлт хупмасăр,

Пĕр кун та пĕр каç çывăрман.

Тинех тĕнчене тепĕр хут ӳпре курчĕ,

Янтарь те вут-хĕмлĕн сунать.

Вĕçсе çĕкленме ун хăвачĕ те пурччĕ,

Анмах... илем пулнă çунат.

Кашнин пирĕн пурăнăç — сухăр тумламĕ,

Эпир те çаплах вĕçсĕр мар.

Каяс мар тесен те, никам та юлаймĕ —

Кашни пирĕн пурнăç — янтарь.

Тухайĕç кайран ĕмĕрсен çитти витĕр

Хальхи чăн сапайлă сăнсем.

Куçсен тепĕр хут уçăлма вăхăт çитĕ,

Куçсем — эпир тунă ĕçсем.

Сана ылханмастăп, пĕрре килен ĕмĕр:

Кунсем хуçлатсан çуната,

Çавах эпĕ калăп, янтарлă тĕнчемĕр:

Пĕрре çуталнишĕн те тав.

Хула сана хăй сунтăхне

Чиксе хурать те — шăшилле

Кăштăртатса эс антăхни,

Чăнах та, кулăш-путишле

Курнать пуль сунтăх умĕнче

Тăраканнишĕн. Кам-ши вăл?

Пĕлместĕн эс, пĕлмест тĕнче:

Мĕнле хăват, асамлă вăй.

Сана çак сунтăха чиксе

Картун-картун курупка пек

Кварталсенче пĕчĕклетсе

Чуптарчĕ кунĕ-кунĕпех...

...Çĕрле эс тĕлĕке путан.

Сĕме пуçхĕрлĕн чăмнăскер

Шыв тĕпĕ мар, тӳпе тупан —

Тĕлĕкре çеç — ирĕклĕскер.

Чупса эс пырăн та — карта,

Утса эс пырăн та — карта,

Шуса эс пырăн та — карта.

Тинех ăнланăн — эс шалта.

Тулта — шевле йăл-ял çиçет,

Тулта — пĕлмен, курман тĕнче,

Тулта — чĕнен, туртан инçет.

Карта — шалта юлма хистет.

Эс никама та ан ылхан

Мăн тĕнчене тухаймасан.

Эс ху — имшер, эс ху — ырхан,

Ху тытнă картуна. Вăл — сан.

Кам çӳл тӳпепе пуплет,

Эп — çĕртипе.

Кур-ха, кăпшанкă йĕрлет —

Хăй çулĕпе.

Тупсăмĕ пурпĕр пулать:

Хăйĕн — хăйне.

Курăк шăтать те тухать

Пĕр ирхине.

Канăçăн — канăç екки:

Вăл хускалмасть.

Çĕрĕн пулмасть ун пекки:

Вăл — чарăнмасть.

Кам çӳл тӳпепе пуплет,

Эп — çĕртипе.

Пурнăç пурне те пиллет

Çĕр те тӳпе.

Сана халалласа миçе поэт юрă хывман пулĕ. Сана мĕнпе кăна танлаштарман пулĕ. Иксĕлми вăй-хăват паракан, çунат хушакан юрату. Эсĕ пуррипе эпĕ ирĕккĕн сывлатăп, эсĕ пуррипе эпĕ юрă юрлатăп, эсĕ пуррипе эпĕ ташша яратăп, эсĕ пуррипе эпĕ тăвăр пӳлĕмре те хама ирĕккĕн туятăп. Эсĕ пуррипе манăн хĕрсем ӳсеççĕ. Эсĕ пуррипе эпĕ телейлĕ. Ĕмĕр пурăн, юрату!

Кервен утпа çӳрет сентябрь çилĕ,

Çĕр кăкăрне лăпкать ăш кăмăлпа.

Йăсăрланать шур тĕтĕм ана çийĕн,

Хир йыхравларĕ тутлă шăршăпа.

Тусанлă сăн-питсем, ӳт-пӳ ĕшенчĕк,

Çут ялкăшу çапах кашни куçра:

Яланхилле кăçал та ĕçлĕ Елчĕк —

Çуралнă енĕм юлмĕ парăмра.

Хирти кăвайт, тен, ăшă килтинчен те:

Вуншар çынна вăл пухнă пĕр тĕле,

Улма аврин кăварсăр кĕлĕнче те

Улми кĕрпеклĕ — шалт тĕлĕнмелле.

Çу каçипе хĕвел хĕмне вăл пухнă,

Тăватă уйăх тулнă тăпрара.

Ак халĕ хĕрлĕ куçлăскерсем тухнă

Вĕрин сикмешкĕн кушнă алăра.

Тăван уй-хир, пире çапла хăналăн,

Çитес кĕрччен пулаймĕ ун пекки.

Пĕлет кашни ĕçре хуралнă алă:

Кĕр кĕреки вăл — хирĕн кĕреки.