ШӖМ тунӑ сӑн

Владимир облаҫӗнче хӑрушӑ авари пулнӑ. Унта пирӗн ентеш ҫакланнӑ. Ӑна ҫӑлавҫӑсем пулӑшнӑ.

Паян ҫур ҫӗр иртни 52 минутра М-7 ҫулӑн 297-мӗш ҫухрӑмӗнче йывӑр тиевлӗ икӗ машина ҫапӑннӑ. ГАЗель водителӗ Чӑваш Енри ҫын пулнӑ. 46 ҫулти арҫынна арканса пӗтнӗ кабинӑран ҫӑлавҫӑсем кӑларнӑ.

Авари вырӑнӗнче 12 ҫын 4 техника ӗҫленӗ. Ҫав шутра Инкеклӗ лару-тӑру министерствинче ӗҫлекен 7 ҫын, 2 техника пулнӑ.

Паян ирхи 4 сехет ҫурӑра Улатӑрти Белинский урамӗнчи 11-мӗш ҫуртра пушар тухнӑ. Шел те, унта ҫыннӑн пурнӑҫӗ татӑлнӑ — 61 ҫулти кил хуҫи вилнӗ.

Икӗ сехетрен Ҫӗрпӳ районӗнчи Лапра ялӗнче пушар алхаснӑ. Унта 53 ҫулти арҫыннӑн кил-ҫурчӗ кӗле ҫаврӑннӑ. Хӑй те суранланнӑ, ӳчӗн 30 проценчӗ пиҫсе кайнӑ. Ӑна Шупашкара пульницӑна илсе ҫитернӗ.

Сӑмах май, ҫулталӑк пуҫланнӑранпа республикӑра 184 пушар пулнӑ, унта 63 ҫын вилнӗ, 53-ӗн суранланнӑ, 127 ҫынна ҫӑлнӑ.

Ҫак уйӑхӑн пуҫламӑшӗнче пирӗн ҫӗршывра «Пушкин картти» проект вӑя кӗнине эпир унччен темиҫе хутчен те пӗлтернӗччӗ.

Проекта пирӗн республикӑри 15 культура учрежденийӗ хутшӑнӗ. Вӗсем ҫамрӑк куракансене авӑн-юпа уйӑхӗсенче кӑна 180-а яхӑн экскурсипе куравпа, ӑсталӑх сехечӗсемпе, концертсемпе спектакльсемпе савӑнтарӗҫ.

Авӑн уйӑхӗн икӗ эрнинче «Пушкин картти» проектпа килӗшӳллӗн 1100 ытла билет илнӗ те.

Ҫӗнӗлӗхпе ытларах ҫынна паллаштарас тата усӑ куртарас тесе Шупашкарти чарӑнусенче стендсем вырнаҫтарма тытӑннӑ.

Проекта хутшӑнакан пулӑмсемпе организацисен списокӗпе ЧР Культура министерствин сайтӗнчи ятарлӑ баннерта паллашма май килӗ.

Нелли Смородинова (Аникина). culture.cap.ru сӑнӳкерчӗкӗ

Авӑн уйӑхӗн 13-мӗшӗнче Чӑваш Республикин тава тивӗҫлӗ артистки, чӑваш халӑх артистки Нелли Смородинова пурнӑҫран уйрӑлса кайнӑ. Хурлӑхлӑ хыпара Чӑваш Республикин Театр ӗҫченӗсен союзӗ Фейсбукра пӗлтернӗ.

Нинелия Смородинова (качча кайсан вӑл упӑшкин хушаматне илсе Аникина пулса тӑнӑ) Муркаш районӗнчи Чуманкасси ялӗнче 1938 ҫулхи ака уйӑхӗн 28-мӗшӗнче ҫуралнӑ. 1961 ҫулта Мускаври ГИТИСри чӑваш студийӗнчен вӗренсе тухнӑ. 1961–2004 ҫулсенче Нинелия Семёновна Чӑваш патшалӑх академи драма театрӗнче ӗҫленӗ.

Нелли Смородинова 100 ытла сӑнар калӑпланӑ. Теле- тата радиоспектакльсенче, кинофильмсенче ӳкерӗннӗ, концертсене хутшӑннӑ, вырӑсларан чӑвашла куҫарнӑ фильмсенче сӑнарсене чӑвашла калаҫтарнӑ.

Чӑваш патшалӑх академи драма театрӗнче пӗлтернӗ тӑрӑх, артисткӑна паян, авӑн уйӑхӗн 15-мӗшӗнче, юлашки ҫула ӑсатӗҫ. Унпа

Шупашкарти Граждан урамӗнчи 19-мӗш ҫуртра 12 сехетрен пуҫласа 12 сехет те 45 минутчен сывпуллашӗҫ, 13 сехетрен пуҫласа 13 сехет те 30 минутчен — Шупашкарти Хӗрлӗ лапамри 7-мӗш ҫурт (унта Чӑваш патшалӑх академи драма театрӗ вырнаҫнӑ) умӗнче.

Чӑваш Енри шкулсенче «Виҫӗ хӗвел» (вырӑсла — Три солнца) ятлӑ кӗске метрлӑ фильма кӑтартаҫҫӗ. Ӑна шкул ачисем хут пухса тунӑ укҫапа ӳкернӗ.

«Вести.Чувашия» телекурав пӗлтернӗ тӑрӑх, макулатура пуҫтарма 286 шкул хутшӑннӑ.

Фильма Шупашкарта, Шупашкар районӗнчи «Ясна» этнокомплексра тата Канаш районӗнчи Ҫӗнӗ Мами ялӗнче ӳкернӗ.

Кӗске метрлӑ кинолента чӑваш халапӗсемпе тата йӑли-йӗркипе паллаштарать, ҫынсене юратма вӗрентет теҫҫӗ ӑна ӳкернисем.

Фильм сценарисчӗ тата режиссёрӗ – Елена Дубровская. Вӑл каланӑ тӑрӑх, кинолентӑна «Киноуроки» (чӑв. Киноуроксем) проекта пурнӑҫа кӗртнӗ май ӳкернӗ. Асӑннӑ проектпа килӗшӳллӗн 37 кинолента ӳкернӗ, пӗтӗмпе 99 фильм ӳкерме тӗллев лартнӑ.

«Виҫӗ хӗвел» фильма Раҫҫейри мӗнпур шкулта класс сехечӗсен вӑхӑтӗнче кӑтартӗҫ.

Сӑмах май каласан, виҫӗ хӗвел пирки юмах-халап ытти хӑш-пӗр халӑхӑн фольклорӗнче те тӗл пулать.

ixbt.com сайтри сӑн

Шупашкарта пурӑнакан 63 ҫулти хӗрарӑм ултавҫӑ аллине лексе пысӑк укҫасӑр тӑрса юлнӑ.

Авӑн уйӑхӗн 10-мӗшӗнче вӑл полици уйрӑмне пырса каласа кӑтартнӑ. Ун патне палламан ҫын шӑнкӑравланӑ, вӑл банк ӗҫченӗ имӗш. Хӗрарӑм ячӗпе такам 1 миллион тенкӗ кредит илесшӗн-мӗн. Ҫак ӗҫе ан туччӑр тесен кирек мӗн чухлӗ кредит илмелле имӗш, ӑна счет ҫине куҫармалла. Кун пирки никама та калама хушман, унсӑрӑн уголовлӑ майпа явап тыттараҫҫӗ-мӗн.

Анчах хӗрарӑма банк кредит пама хирӗҫленӗ. Ҫапла вӑл хӑйӗн акцийӗсене 2 миллион те 140 пин тенкӗлӗх сутнӑ. Укҫана палламан ҫын каланӑ счет ҫине куҫарнӑ.

Ку кӑна мар, хӗрарӑм укҫа куҫармалли программа вырнаҫтарас тесе смартфон та туяннӑ.

Чӑваш Енре «Сывлӑх хумӗ» теплоход чарӑнасси пирки пӗлтернӗччӗ. Тухтӑрсем 200-е яхӑн ачан сывлӑхне тӗрӗсленӗ.

Аса илетер: теплоход Шупашкарта авӑн уйӑхӗн 12-мӗшӗнче чарӑннӑ. Йывӑр диагнозлӑ ачасем пысӑк квалификациллӗ тухтӑрсем патӗнче тӗрӗсленме пултарнӑ.

Йошкар-Олара пурӑнакан Виктория амӑшӗпе пӗрле ятарласа ҫитнӗ. Чӑваш Енри офтальмологсем ачан куҫне операци тунӑ, халӗ унӑн малалла сипленмелле.

Теплоход Шупашкарта 6 сехет тӑнӑ. Ҫак вӑхӑтра Мускавран килнӗ тухтӑрсем 200-е яхӑн пӗчӗк пациента йышӑннӑ. Вӗсенчен 56-шне федераци клиникине тӗрӗсленме йыхравланӑ.

Ачасен ашшӗ

Шупашкарти Калинин районӗнчи ЗАГС пайӗн ӗҫченӗсем пӗлтернӗ тӑрӑх, ҫамрӑк ҫемьере йӗкӗреш ҫуралнӑ. Вӗсем – хӗрачасем.

Ашшӗ-амӑшӗ ачасем валли илемлӗ ят суйлама тӑрӑшнӑ. Пӗрне Ангелина тесе ят хунӑ. Теприн вара ячӗ питӗ хӑйне евӗр. Вӑл «Сумерки» фильмри тӗп сӑнарӑн ячӗ пекрех янӑрать: Рэнэсмэ.

Сӑмах май, «Сумерки» фильмри тӗп сӑнарсен Эдвардпа Бэлла Калленӑн хӗрӗ Ренесми ятлӑ.

ШӖМ тунӑ сӑн

Пӗлтӗр ҫӗртме уйӑхӗнче пӗр арҫын Чӑваш Енри икӗ ҫын патне шӑнкӑравланӑ. Вӑл Шупашкар-Чӑваш Ен епархийӗн ертӳҫи-мӗн. Хайхискер аварие ҫакланнӑ тӗн ҫыннине сипленмешкӗн укҫа куҫарса пама ыйтнӑ. Шӑп ҫав вӑхӑтра республикӑн митрополичӗ вырӑнта пулман. Варнава владыка ҫӗртме уйӑхӗн 1-мӗшӗнче пурнӑҫран уйрӑлнӑ.

34 ҫулти арҫын тата 48-ти хӗрарӑм ӑна ӗненмен, полицие пӗлтернӗ. Ултавҫӑ вӗсенчен 40 пине яхӑн тенкӗ сӑптӑрма шутланӑ.

ЧР ШӖМӗн уголовлӑ шырав ӗҫченӗсем ҫак ӗҫе 33 ҫулти арҫын тума пултарнине палӑртнӑ. Вӑл – Кемӗр облаҫӗнчен, унччен те судпа айӑпланнӑскер.

И.Н.Ульянов ячӗллӗ ЧПУн тинех бассейн уҫӑлӗ. Вӑл ҫӗнӗ корпус ҫывӑхӗнче, Университет урамӗнчи 38-мӗш ҫурт патӗнче, вырнаҫнӑ. Адресӗ те унӑн ҫавнашкалах пулӗ.

Бассейна 2019 ҫулхи ҫурла уйӑхӗнче тума тытӑннӑ. Ӑна 2020 ҫулӑн виҫҫӗмӗш кварталӗнче хута яма палӑртнӑ. Анчах ӗҫ-пуҫ вӑраха тӑсӑлса кайнӑ.

Подрядчик ҫӗнӗ бассейна утӑ уйӑхӗн 12-мӗшӗнче шыв тултарнӑ, кун хыҫҫӑн ҫитменлӗхсене пӗтернӗ. Авӑн уйӑхӗн 10-мӗшӗнче ЧПУ Ростехнадзорӑн Атӑлҫи тӑрӑхӗнчи управленийӗн пӗтӗмлетӗвне илнӗ. Эппин, бассейн хатӗр. Ӑна ыран савӑнӑҫлӑ лару-тӑрура уҫма палӑртнӑ.