Трейдерсем Нью-йоркри фонд биржинче. Нарӑс, 24, 2020

Тӗнчери чи пуян темиҫе ҫын пӗр кунта, тунтикун, 139 миллиард доллар ҫухатнӑ. Коронавирус тӗнче экономикине витӗм кӳрет тесе ҫапла ҫухату тӳснӗ вӗсем. Вӗсем фонд рынокӗнче укҫасӑр юлнӑ. Кун пирки «Новости» Раҫҫей информаци агентстви «Boomberg» агентство хыпарлани тӑрӑх пӗлтернӗ.

Финанс рынокне профессилле хутшӑнакансене финанс информацийӗпе тивӗҫтерекен асӑннӑ агентство сӑнанӑ тӑрӑх, кун пек пысӑк ҫухатӑва юлашки ҫулсенче тӳсекен пулман.

LVMH компанийӗсен ушкӑнӗн гендиректорӗ Бернар Арно тата Amazon пуҫлӑхӗ Джефф Безос 4,8 миллиард долларшар ытла пӗтернӗ. Zara хуҫи Амансио Отрега 4 миллиард доллар ҫухатнӑ, Марк Цукерберг — 3,48 миллиард доллар. Ытти миллиардерсем 2,3 миллиардшар доллар ҫухатнӑ.

Шупашкарти «Газировка» каҫхи клуба ӗҫлемешкӗн вӑхӑтлӑха чарнӑ. Ҫакӑн пирки республикӑн прокуратурин пресс-служби паян пӗлтернӗ.

Асӑннӑ клубра саккуна пӑсма пултарни ҫинчен массӑллӑ информаци хатӗрӗсенче хыпарланӑран та тӗрӗслев пуҫарнӑ надзор органӗ. Иккӗмӗш каналпа кӑтартакан, Андрей Малахов ертсе пыракан «Прямой эфир» (чӑв. Тӳрӗ эфир) кӑларӑмра кӑтартнӑ ҫарамсланса ташланӑ хӗр, сӑмах май каласан, шӑпах ҫав каҫхи клубра савӑннӑ.

Тӗрӗслевҫӗсем каҫхи клубра пушар хӑрушсӑрлӑхне, санитарипе эпидемиологи саккунне пӑснине тупса палӑртнӑ. Кӑмӑл-сипет тӗлӗшӗнчен йӗркене пӑсма май паракан самантсене те асӑрханӑ.

Тӗрӗслев малалла пырать. Тупса палӑртнӑ кӑлтӑксене пӗтериччен каҫхи клуба ӗҫлемешкӗн чарма йышӑннӑ.

Пӗтӗм Раҫейри халӑх фрончӗн Чаваш Енри уйрӑмӗн пресс-служби ярса панӑ сӑнӳкерчӗксем

Пӗтӗм Раҫҫейри халӑх фрончӗн Чӑваш Енри уйрӑмӗн хастарӗсем Ҫӗмӗрлери тӳре-шарана ачасене шкула каймалли ҫул ҫинчи пушӑ ҫурт-йӗре пӗтерме хушнӑ.

Халӑх фрончӗн пресс-службинче пӗлтернӗ тӑрӑх, хастарсем вырӑнти тӳре-шарапа пӗрле тӗрӗслев ирттернӗ. Вӗсем «Рябинушка» ача пахчи патне пымалли ҫул йӗркесӗррине палӑртнӑ. Унпа ҫуркуннепе кӗркунне ҫеҫ мар, хӗлле те иртме ҫук.

7-мӗш шкул пулнӑ ҫурт паян чӳречесӗр-кантӑксӑр ларать. Унӑн ҫивиттийӗ икӗ пушарта ҫурри таран ҫунса кайнӑ. Ҫав ҫурт патӗнче ачасем 2-мӗш шкула иртсе ҫӳреҫҫӗ. Коммуналлӑ парӑма пула ҫурта энергетика компанийӗ салука илнӗ. 3-мӗш шкул ҫывӑхӗнче вара тепӗр ҫурт хӑтсӑр ларать. Ӑна ача-пӑча пульници тесе тума пуҫланӑ та ӗҫ чарӑнса ларнӑ.

Спорт гимнастики енӗпе иртекен кӑҫалхи Тӗнче кубокӗн пӗрремӗш тапхӑрне Чӑваш Ен спортсменӗ те хутшӑнасси пирки Чӑваш халӑх сайчӗ пӗлтернӗччӗ-ха. Аса илтерер: ӑмӑртӑва кайма Шупашкарти олимп резервӗллӗ 6-мӗш спорт шкулӗнчи Владислав Поляшов тивӗҫнӗччӗ.

Раҫҫейӗн тӗнче класлӑ спорт мастерӗ Австралири ҫав ӑмӑртура ылтӑн медале ҫӗнсе илнӗ.

Чӑваш Ен Спорт министерствин пресс-службинче пӗлтернӗ тӑрӑх, пирӗ ентешӗн ҫапла майпа 2020 сӳлхи Олимп вӑййине хутшӑнас шанчӑк таа пысӑкланнӑ. Унта хутшӑнакансене тӗнче шайӗнчи ӑмӑртусенче епле тупашнине кура палӑртаҫҫӗ те. Спорстменӑн умӗнче — тепӗр икӗ старт. Тӑватӑ ҫулта пӗрре иртекен ӑмӑртӑва кам хутшӑнасси шӑпах ҫавсем хыҫҫӑн паллӑ пулӗ те.

2020 ҫулхи нарӑсӑн 27-мӗшӗнче Яндекс.Тӑлмач сервиса чӑваш чӗлхине кӗртнине халалласа «Чӑваш чӗлхи — тӗнче уҫҫи» хӑтлав иртӗ. Хӑтлав Чӑваш Республикин наци вулавӑшӗн 1-мӗш хутри акт залӗнче пулӗ, пуҫламӑшӗ — 11 сехетре.

Хӑтлава ӑслӑлӑх, вӗренӳ, культура, хаҫат-журнал ӗҫченӗсене, общество хастарӗсене, чӑваш чӗлхе пӗлӗвӗн ыйтӑвӗсемпе кӑсӑкланакансене йыхравлатпӑр. Наци вулавӑшӗн адресӗ: Шупашкар, Ленин проспекчӗ, 15 ҫурт.

Пӗлме: Яндекс.Тӑлмачра чӑваш чӗлхине нарӑсӑн 1-мӗшӗнче хушнӑ. Ку ӗҫе пурнӑҫлама «Яндекс» компанин куҫару пайӗ, «Чӑваш чӗлхи лабораторийӗ» ушкӑн, Чӑваш Республикин наци библиотеки, Чӑваш Республикин цифра аталанӑвӗпе информаци политикин тата массӑллӑ коммуникацисен министерстви, «Хавал» пуҫару ушкӑнӗ тата ыттисем хутшӑннӑ. Яндекс.Тӑлмач урлӑ хальхи вӑхӑтра чӑвашларан 100 яхӑн чӗлхене куҫарма пулать, ҫӗре яхӑн чӗлхерен — чӑвашла.

«Чӑваш чӗлхи лабораторийӗн» ушкӑнне кӗрекенсем: Николай Плотников, Александр Антонов, Светлана Трофимова, Алина Иванова, Эрбина Портнова, Оксана Антонова тата ытти пулӑшуҫӑсем.

Отепя. A-viptravel.ru сӑнӳкерчӗкӗ

Раҫҫей биатлонистсен союзӗ Европа чемпионатне каякан биатлонистсен списокне ҫирӗплетнӗ. Ӑмӑрту Минскра нарӑс уйӑхӗн 26-мӗшӗнчен пуҫласа пуш уйӑхӗн 1-мӗшӗччен пырӗ.

Пирӗн ҫӗршывӑн арҫынсен командине Эдуард Латыпов, Саид Каримулла Халили, Василий Томшин, Кирилл Стрельцов, Дмитрий Иванов, Матвей Елисеев тата Никита Поршнев кӗнӗ, хӗрарӑмсенне — Виктория Сливко, Анастасия Поршнева, Евгения Павлова, Ульяна Кайшева, Валерия Васнецова, Екатерина Глазырина тата Кристина Резцова.

Ӑмӑрту программинче — суперспринт, супермикст, хутӑш эстафета, хӑваласа ҫитмелле тупӑшу тата спринт.

Европа чемпионатне малтан Эстонири Отепя хулинче ирттерме палӑртнӑ. Юр сахаллине кура ӑмӑртӑва Минска (Беларуҫ Республики) куҫарнӑ.

Италири Антхольцера иртнӗ Тӗнче чемпионатӗнче Александр Логинов ылтӑн тата бронза медальсене тивӗҫрӗ. Шел те, чемпионат вӑхӑтӗнчех ун патне вырӑнти полицейскисем шырав ирттерме пырса кӗнӗччӗ. Пӗтӗм тӗнчери биатлонистсен союзӗн пайташӗсем пирӗн ҫӗршыв командин лидерне допингпа усӑ курнӑ тесе шанмаҫҫӗ иккен.

Японире Ҫӗр ҫинчи чи ватӑ арҫын пурнӑҫран уйрӑлнӑ. Титэцу Ватанабэ ятлӑ ҫав ҫынна Ҫӗр ҫинчи чи аслӑ арҫын тесе виҫӗ эрне каялла официаллӑ йышӑннӑ. Вӑл 112 ҫулта пулнине ТАСС информаци агентстви Киодо агентство хыпарланӑ тӑрӑх паян ирпе пӗлтернӗ.

Ниигата префектурӑра пурӑннӑ арҫын 1907 ҫулхи пуш уйӑхӗн 5-мӗшӗнче ҫуралнӑ.

Японире пурӑннӑ вӑрӑм ӗмӗрлӗ арҫын нарӑс уйӑхӗн 23-мӗшӗнче куҫне хупнӑ.

Ҫӗр ҫинчи чи вӑрӑм ӗмӗрлӗ арҫын унччен шутланнӑ ҫын та Японирен пулнӑ. 113 ҫулти Масадзо Нонака пӗлтӗрхи кӑрлачӑн 20-мӗшӗнче вилнӗ.

Япони ҫыннисем Ҫӗр ҫинчи чи вӑрӑм ӗмӗрлӗ ҫынсен танлаштарӑмӗнче ҫӳлти йӗркесене йышӑнаҫҫӗ. Японири чи вӑрӑм ӗмӗрлӗ хӗрарӑм Фукуока префектурӑра пурӑнать. Канэ Танака ятлӑскер 117 ҫулта.

Раҫҫей Сывлӑх сыхлав министерствин пӗрремӗш медицинӑпа санитари пулӑшӑвӗ парасси ҫинчен калакан ҫӗнӗ приказӗ нарӑсӑн 15-мӗшӗнчен вӑя кӗнӗ. Поликлиникӑсенче епле пӳлӗмсем пуласси вӗсен ҫумне миҫе ҫынна ҫирӗплетнипе ҫыхӑнӗ.

Шанчӑк пӳлӗмӗсем, ҫутӑ пайӑркин диагностикин, туртма пӑрахтармалли, стоматолог пӳлӗмӗсем пулмасан юрать. Медучрежденисен штатӗнчен психолог штатне кӑларӗҫ. Ультрасасӑ диагностикин, эндоскоп диагностикин, рентгенодиагностика, прививка пӳлӗмӗсем вара пулмаллах.

30 пин таран ҫын ҫирӗплетнӗ поликлиникӑсенче медицина профилактикин, функци диагностикин, УЗИ, рентген, флюорографи, маммографи пӳлӗмӗсем, клиникӑпа биологи тата биохими лабораторийӗсем пулмалла. Врачсенчен — кардиолог, уролог, ЛОР, офтальмолог, фтизиатр, эндокринолог, хирург, невролог, травматолог, ортопед тата инфекционист.

50 пин ҫын тараннисенче онкологпа эндоскоп диагностикин пӳлӗмӗ пулмалла. 50 пин ытла ҫынлисенче ревматолог, гастроэнтеролог, пульмонолог, нефролог, колонопроктолог и гериатр йышӑнмалла. Вӗсенче медицина реабилитацийӗн, паллиативлӑ пулӑшу тата МРТ пӳлӗмӗсене пӑхса хӑвармалла.

Малалла...

Кӑҫалхи ака уйӑхӗн вӗҫӗнче Крыма ҫӗршывӑн тӗрлӗ хулинчен пуйӑспа ҫитме май килӗ. Маларах «Санкт-Петербург - Севастополь» тата «Мускав - Симферополь» маршрутсемпе пуйӑссем ҫӳреме тытӑннӑччӗ. «Таврия» пуйӑссемпе хальлӗхе 130 пин ҫын усӑ курнӑ та. Ҫӗнӗ направление пассажирсем кӑмӑлласа йышӑннине кура «Гранд Сервис Экспресс» компани ҫӗнӗ маршрутсем уҫма йышӑннӑ. «Таврия» пуйӑспа Симферополе Кисловодскран, Екатеринбургран тата Мурманскран ҫитме май килӗ.

«Екатеринбург - Симферополь» пуйӑс эрнере темиҫе хут ҫӳрӗ. Анчах кашнинче тӗрлӗ ҫулпа: ҫурҫӗр (Хусан, Канаш, Саранск, Пенза урлӑ — ҫул ҫинче 64 сехет те 15 минут иртӗ) тата кӑнтӑр (Челепир, Ӗпхӳ, Самар, Сарту тата Волгоград урлӑ — ҫул ҫинче 67 сехет те 35 минут иртӗ) маршрутпа. Пӗрремӗш состав ака уйӑхӗн 25-мӗшӗнче 22 сехет те 35 минутра Екатеринбургран (Самар урлӑ) ҫула тухӗ.

Шупашкар хула администрацийӗ бюджета налук пухмалли мӗнпур майпа туллин усӑ курма тӑрӑшать. Маларах унтисем хваттер тара паракансене палӑртассипе рейдсем ирттеретчӗҫ. Халӗ те хваттерсем тӑрӑх ҫӳреҫҫӗ-ха. Анчах хальхин тӗллевӗ урӑхларах.

Шупашкар хулин Мускав районӗнче ӗҫ килӗшӗвӗсӗр ӗҫлекенсене палӑртассипе рейда тухнӑ. Специалистсем нумай хваттерлӗ ҫуртсем тӑрӑх ҫӳресе хваттер юсакансене тӗрӗсленӗ.

Шупашкар хулин Мускав район администрацийӗнче пӗлтернӗ тӑрӑх, унта ӗҫлекенсем участковӑйпа пӗрле Афанасьев урамӗнчи 180 хваттерте пулнӑ. Вӗсенчен 123 хваттер алӑкне уҫакан пулман, 57-шӗнче харпӑрлӑхҫӑсем пурӑннӑ. 4 хваттерте юсав ӗҫӗсем пынӑ. Вӗсенчен пӗринче маҫтӑи ӗҫ килӗшӗвӗсӗр ӗҫленине тупса палӑртнӑ.