Эстонире пурӑнакан Дина Гаврилова ҫыравҫӑ Тартури фестивале хутшӑннӑ. Писатель пӗлтернӗ тӑрӑх, Жуковский ячӗллӗ литература фестивальне Людмила Казарян ҫыравҫӑ йӗркеленӗ.

«Тартура виҫӗ кун сисӗнмесӗр иртрӗ. Каяс-и, каяс мар-и тесе нумай шухӑшларӑм. Ҫапах та кайрӑм. Юкка Маллинен финн поэчӗпе, эссеистпа, славистпа, вырӑс литературине финн чӗлхине куҫараканпа паллашни маншӑн кӗтменлӗх пулчӗ», – тесе ҫырнӑ Дина Гаврилова Фейсбукра.

Аса илтерер: Пушкӑртстанри Пишпӳлек районӗнчи Мелеспуҫ Ялтӑра чӑваш ялӗнче 1962 ҫулта ҫуралнӑ Дина Гаврилован чӑн ячӗ — Надежда Григоренко. Политехника техникумӗнче, каярах Ленинградри политехника институтӗнче вӗреннӗскер 1985 ҫултанпа Эстонире пурӑнать.

Ҫиччӗре чухне вырӑс интернатне лекнӗ пулин те тӑван чӗлхене манман. Кӗнекисене те ентешӗсем ҫинчен ҫырать. Хӑй калашле, малашне те пултарулӑхне вӗсене халалласшӑн.

Паян пирӗн республикӑра Чӑваш Ен Элтеперӗн тата вырӑнти хӑй тытӑмлӑх органӗсене депутатсем суйламалли сасӑлав малалла пырать. Пӗрлехи суйлав кунне авӑн уйӑхӗн 13-мӗшӗнче тесе палӑртнӑччӗ. Кӑшӑлвирусран асӑрханас тӗллевпе сасӑлав виҫӗ куна пырать. Суйлавҫӑсенчен хӑшӗсем ӗнер тата виҫӗмкунах сасӑларӗҫ.

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев суйлава паян кайнӑ. Вӑл Шупашкар районӗнчи Ҫӗктер поселокӗнче сасӑланӑ. Олег Алексеевич суйлав участокне мӑшӑрӗпе Наталья Алексеевнӑпа кайнӑ.

Сӑмах май каласан, паян ирхи 10 сехет тӗлне пирӗн республикӑри суйлавҫӑсенчен 40 проценчӗ сасӑланӑ.

bbc.com/russian сайтри сӑн

Республикӑра кӑшӑлвируспа чирлесе вилнисен йышӗ 77 ҫынна ҫитнӗ. Паян тепӗр ҫыннӑн пурнӑҫӗ каварлӑ вируса пула татӑлни пирки пӗлтернӗ. Палӑртмалла: юлашки кунсенче кӑшӑлвируса вилнисем ҫине-ҫинех пулчӗҫ.

Паянхи кун тӗлне Чӑваш Енре 8121 ҫын инфекциленнӗ. Вӗсенчен 6844-шӗ сывалнӑ. Юлашки талӑкра 37 ҫын чире парӑнтарнӑ. Пӗр талӑкра чирлисен йышне 25 ҫын хушӑннӑ.

Паянхи кун тӗлне 1200 ҫын пульницӑра тата килте кӑшӑлвирусран сипленет.

"Про Город" сайтри сӑн

Паян, авӑн уйӑхӗн 12-мӗшӗнче, Шупашкарти 9-мӗш Пилӗкҫуллӑх проспектӗнчи 15-меш ҫуртӑн 1-мӗш корпусӗн 5-мӗш хутӗнчен хӗрарӑм ӳкнӗ. Вӑл, шел те, ҫавӑнтах вилнӗ.

Ку инкек паян кӑнтӑрла, 12 сехет ҫурӑра, пулнӑ. Вырӑна полици, судмедэкспертсем ҫитнӗ. Ҫынсем каланӑ тӑрӑх, ҫав хӗрарӑм 40 ҫултан аслӑрах курӑнман.

Аса илтерер: нумаях пулмасть Улатӑрта чиркӳ тӑрринчен хӗрарӑм ӳксе вилнӗ. Вӑл кунти ҫын пулман, Казахстанра ҫуралса ӳснӗ.

Тӗмен тӑрӑхӗнчи «Таван» издательство вӑл енчи чӑвашсен «Тӑван» асооциацийӗпе пӗрле «Чуваши на земле тюменской» (чӑв. Тӗмен ҫӗрӗ ҫинчи чӑвашсем) проект хатӗрленӗ. Ӑна асӑннӑ тӑрӑхри чӑвашсен ассоциацине йӗркеленӗренпе 30 ҫул ҫитнине халалланӑ. Кӑларӑм икӗ чӗлхепе: чӑвашла тата вырӑсла – пичетленӗ.

Хальхи вӑхӑтра хастар чӑвашсем, тӑван халӑхӑмӑрпа ҫыхӑннӑ кӑсӑклӑ пулӑмсем ҫинчен хыпар пухаҫҫӗ. Проекта пурнӑҫа кӗртессипе паянхи кун тӗлне 30 ҫын тӑрӑшать. Пулӑшас кӑмӑл пулсан никама та хирӗҫлемӗҫ.

Евгений Ерагин

Чӑваш автономи облаҫне туса хунӑранпа 100 ҫул ҫитнӗ ятпа кӑларнӑ медальпе паян черетлӗ йыша чыслама палӑртнӑ. Хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ.

Сумлӑ йышра Чӑваш халӑх академикӗсем: Евгений Ерагин тата Иван Дубанов – та пур. Унсӑр пуҫне Чӑваш наци конгресӗн вице-президентне Владимир Тяпкина та хисеп тунӑ.

Маларах Чӑваш Республикин тава тивӗҫлӗ художникне Николай Балтаева (ӑна Палтай Микуҫӗ тенипе те пӗлеҫҫӗ) та ҫав медальпе чыслама йышӑннӑччӗ.

fkr45.ru сайтри сӑн

Чӑваш Енре ӗҫе тӳрӗ кӑмӑлпа пурнӑҫламан подрядчиксен реестрне тӑвӗҫ. Ҫакна ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев сӗннӗ.

Кӑҫал «Хулана хӑтлӑх кӗртесси» регионти проектпа килӗшӳллӗн, ҫуртсен картишӗсене, общество вырӑнӗсене хӑтлӑлатма 362,3 миллион тенкӗ уйӑрнӑ. Анчах 47,6 миллион тенкипе ҫеҫ усӑ курнӑ. 340 объектран 103-шӗнче ҫеҫ ӗҫсем вӗҫленнӗ. Кая юлакансен йышӗнче – Ҫӗрпӳ, Елчӗк, Хӗрлӗ Чутай районӗсем. Ку подрядчиксем хӑйсен ӗҫне тивӗҫлипе пурнӑҫламаннипе ҫыхӑннӑ.

Халӑх ҫакнашкал пӗлтерӗшлӗ ӗҫсем мӗншӗн вӑхӑтра пурнӑҫланманнинне пӗлтӗр тесе тӳрӗ кӑмӑлпа ӗҫлемен подрядчиксен реестрне тӑвӗҫ. Ҫитес вӑхӑтра ӑна пурте кӗрсе пӑхма пултарӗҫ.

Иркутск тӑрӑхӗнчи йӑхташӑмӑрсем тӑван халӑхӑмӑрӑн апат-ҫимӗҫне хатӗрлеме вӗрентнӗ. Унта наци апат-ҫимӗҫне хатӗрлессипе ӑсталӑх сехечӗ ирттернӗ. Иркутск тӑрӑхӗнчи чӑвашсен наципе культура автономийӗн ертӳҫи Вероника Тимофеева Фейсбукра пӗлтернӗ тӑрӑх, пирӗннисем пылпа салат туса кӑтартнӑ.

«Диалог культур «Вкус Байкала» (чӑв. «Байкал тути» культурӑсен диалогӗ) наци культурисен фестивалне Иркутскри тата Иркутск облаҫӗнчи вунӑ ытла наципе культура пӗрлешӗвӗ хутшӑннӑ.

Азербайджансем иҫӗм ҫулҫи ярса долма хатӗрленӗ, эрменсем — лаваш, бурятсем — буузы, беларуҫсем — калдун, казахсем – тулӑ ҫӑнӑхӗнчен ҫӑкӑр, корей ҫыннисем — ролла, поляксем – бигус, таджиксем — плов, тутарсем — бэлиш т.ыт.те.

beta.nv86.ru сайтри сӑн

Синоптиксем пӗлтернӗ тӑрӑх, канмалли кунсенче хӗвеллӗ ҫанталӑк пулӗ. Ыран 12-17 градус ӑшӑ тӑрӑ, ҫӗрле – 10 градус ҫеҫ. Вырсарникун та ҫумӑр ҫумӗ, 16-21 градус таран ӑшӑтӗ.

Тунтикун ҫанталӑк пӑсӑлать, ҫумӑр ҫӑвӗ, тӑрук сивӗтсе пӑрахӗ, ҫил вӑйланӗ. Ҫитес эрнере кӗҫнерникун тата эрнекун кӑштах ӑшӑтӗ, канмалли кунсенче вара ҫумӑрпа пӗрле юр ҫӑвас хӑрушлӑх пур.

Синоптиксем пӗлтернӗ тӑрӑх, ҫанталӑк малашне питех ӑшӑтмӗ. Ҫапах авӑн уйӑхӗнче сывлӑш температури климат нормипе килӗшсе тӑрӗ.

Паян, авӑн уйӑхӗн 11-мӗшӗнче, Шупашкарти 22-мӗш номерлӗ автобус Миттов бульварне ҫити ҫӳреме тытӑннӑ. Вӑл Граждан урамӗнчи 131-мӗш ҫуртран пуҫласа 101Б ҫурт патне хутлама пӑрахнӑ.

Маршрут схемине ылмаштарассипе ҫыхӑннӑ ыйтӑва хула ҫыннисемпе утӑ уйӑхӗнче «Открытый город» (чӑв. Уҫӑ хула) порталта сасӑлав ирттерсе сӳтсе явнӑ. Маршрут схемине ҫӗнетме хула ҫыннисем сӗннӗ.

Шупашкар хула администрацийӗн ҫурт-йӗрпе коммуналлӑ хуҫалӑх, энергетика, транспорт тата ҫыхӑну управленийӗнче пӗлтернӗ тӑрӑх, ҫӗнӗ маршрутпа ҫӳрекен 22-мӗш номерлӗ автобус малашне Миттов бульварӗнчи 35-мӗш тата 7/1 ҫуртсем тӗлӗнче чарӑнӗ.