Кӑшӑлвирус алхасма тытӑнсан чикӗ леш енчен килекенсене икӗ эрне карантинта лармалли хушу тухрӗ. Палӑртар: каярах пӗр регионтан тепӗр региона каякансен те ик эрне ниҫта тухмасӑр лармалла теме тытӑнчӗҫ. Ку йӗркене пурте пӑхӑннипе пӑхӑнманни пирки ҫирӗплетсе калаймӑпӑр-ха (вӑл урӑх тема тейӗпӗр). Халӗ вара ҫӗршыв шайӗнче ҫӗнӗ йышӑну кӑларнӑ.

Ют ҫӗршывран килекенсен хӑйсем кӑшӑлвируспа чирлеменнине е вӗсем чирлесе сывалнине ҫирӗплетекен справка пулмалла. Ӑна вӗсен чикӗ урлӑ каҫиччен виҫӗ кун маларах илмелле. Ун пек справка ҫуккисен чикӗ урлӑ каҫсан виҫӗ кунта анализ памалла. Чирлӗ пулсан килте сипленмелле, сывӑ ҫынсемпе ҫав вӑхӑтра хутшӑнма юрамӗ.

Ӗнер Ҫӗрпӳ хулинчи П. Иванов урамӗнчи 7-мӗш ҫуртра Олег Николаевӑн халӑх штабӗ уҫӑлнӑ. Ку хыпара Ҫӗрпӳ район администрацийӗн пуҫлӑхӗ Сергей Беккер Фейсбукра пӗлтернӗ.

Аса илтерер: кӑҫалхи авӑн уйӑхӗн 13-мӗшӗнче Чӑваш Ен Элтеперӗн суйлавӗ иртӗ. Республика ертӳҫин тивӗҫӗсене вӑхӑтлӑх пурнӑҫлакан Олег Николаев суйлава хутшӑнма хӑйӗн докуменчӗсене Чӑваш Ен Тӗп суйлав комиссине чи малтан тӑратрӗ. Унтан тата тепӗр тӑхӑр кандидат суйлава хутшӑнма кӑмӑл турӗ. Вӗсем те суйлав умӗнхи мероприятисене пуҫӑнчӗҫ: хӑйсен кадидатуришӗн сасӑ пухаҫҫӗ, хӑйсен партийӗсен районсенчи уйрӑмӗсен пайташӗсемпе тата Депутатсен пухӑвӗсен депутачӗсемпе тӗлпулусем ирттереҫҫӗ.

tverlife.ru сайтри сӑн

Ку талӑкра 56 ҫын кӑшӑлвируспа чирленӗ. Пӗтӗмпе ку таранччен 5886 ҫын инфекциленнӗ.

3205 ҫын кӑшӑлвируса парӑнтарнӑ, юлашки талӑкра 21 ҫын сывалнӑ. Ҫак куна илес тӗк, 2635 ҫын ҫак вирусран сипленет.

Ку таранччен 46 ҫын кӑшӑлвируса пула вилнӗ. Юлашки талӑкра пурнӑҫран уйрӑлнӑ тӗслӗх пулман.

Республикӑра кӑшӑлвирус сарӑлнин индексӗ 1-рен пӗчӗкрех. Халӗ ку хисеп 0,85-пе танлашнӑ. Чарусене пӑрахӑҫламалли иккӗмӗш тапхӑра кӗме ку кӑтарту 0,8-тан пысӑкрах пулмалла мар.

ШӖМ тунӑ сӑн

Шупашкарта пурӑнакан арҫын икӗ велосипед вӑрланӑ. Пӗрне вӑл хӗрне ҫуралнӑ кунпа парнеленӗ, теприне ломбарда панӑ.

Ҫак арҫын унччен те хваттер ҫаратнӑшӑн айӑпланнӑ. Хальхинче те ун тӗлӗшпе пуҫиле ӗҫ пуҫарнӑ.

Утӑ уйӑхӗн пуҫламӑшӗнче 37 ҫулти хӗрарӑм 8-мӗш хутра хваттер умӗнче хӑварнӑ велосипечӗ ҫухалнине пӗлтернӗ. Оперативлӑ шырав мероприятийӗсем ирттерсен ӑна 36-ри арҫын вӑрлани палӑрнӑ. Ӑна вӑл хӗрне ҫуралнӑ кунпа парнеленӗ.

Хайхи арҫын ҫав ҫуртрах тепӗр велосипед вӑрлани тӑрӑ шыв ҫине тухнӑ.

Улатӑр районӗнче нумай ачаллӑ ҫемье валли патшалӑх ҫурт туса парать. ҫурт Атрать ялӗнче пулӗ.

Халӗ никӗс ярса стенисене хӑпартнӑ ӗнтӗ. Тӑррине тума тытӑннӑ. Район администрацийӗ пӗлтернӗ тӑрӑх, ӗҫсем план календарӗпе килӗшӳллӗн пыраҫҫӗ. Ҫурта ҫурла уйӑхӗн 15-мӗшӗччен туса пӗтермелле.

Атратьри нумай ачаллӑ ҫемьене ҫурт туса памашкӑн хыснаран 2727348 тенкӗ уйӑрнӑ. Ӑна социаллӑ найм договорӗпе килӗшӳллӗн хӑпартаҫҫӗ

Дмитрий Галкин архивӗнчи сӑн

«Хӗрачана ҫӑлӑр, вӑл шыв айне каять!» - Ҫӗмӗрлере Сар юханшывӗ хӗрринче канакансем ҫапла кӑшкӑрнине илтнӗ. Дмитрий Галкин тӳрех сиксе тӑнӑ та шыва чӑмнӑ.

Сӑрта юхӑм вӑйлӑ, ачана шалалла та шалалла илсе кайнӑ. Хӗрачана ҫӑлма амӑшӗ, асламӑшӗ те ишнӗ. Анчах вӗсем ӗлкӗреймесен те пултарнӑ. Дима ача патне ишсе пынӑ, вӑл вӑхӑталла пӗчӗкскер шыв айне кайнӑ. Каччӑ ӑна хыпашласа тупнӑ та ҫыран хӗррине илсе тухнӑ. Юрать, хӗрача шыв ҫӑтса ӗлкӗреймен.

Кирлӗ пулсан Дмитрий ӑна пӗрремӗш медпулӑшу парӗччӗ, мӗншӗн тесен вӑл – пулас онколог. Телее, ачана пулӑшу кирлӗ пулман. Амӑшӗпе асламӑшӗ ачана ҫӑлнӑшӑн каччӑна тав тунӑ.

Паян Дима ҫуралнӑ кунне паллӑ тӑвать, 21 ҫулти каччӑна хула администрацийӗ Тав хучӗ панӑ.

Етӗрнери спирт савучӗ «100 лет Чебоксарская водка» ятпа шурӑ эрех кӑларни, ҫакӑ конкуренцие хӳтӗлесси ҫинчен калакан федераци саккунне пӑснине Чӑваш халӑх сайчӗ /news/23729.htmlпӗлтернӗччӗ.Хӑйсен ячӗллӗ эрех кӑларнине Шупашкарти ликерпа водка савучӗ асӑрханӑ. Ҫавӑн хыҫҫӑн вӑл Федерацин монополипе кӗрешекен службин Чӑваш Енри управленине евитленӗ.

Надзор ведомстви Етӗрнери спирт савутне 1 миллион та 327 пин те 691 тенкӗ те 4 пуслӑх штрафлама йышӑннӑ.

Монополипе кӗрешекенсем ӗҫе тӗпчеме тытӑнсан 2019 ҫулхи авӑн уйӑхӗнче Етӗрнери савут «100 лет Чебоксарская» ятлӑ эрех кӑларма пӑрахнӑ. Апла пулин те ӑна 1,3 миллион тенкӗлӗх штрафланӑ.

Ҫанталӑк шӑрӑх тӑнине кура ҫак кунсенче Чӑваш Енре те шыва кӗме аван. Шел те, путса вилекенсен йышӗ ӳссех пырать. РФ Инкеклӗ ӗҫсен министерствин Чӑваш Енри управленийӗнче пӗлтернӗ тӑрӑх, иртсе кайнӑ канмалли кунсенче пирӗн тӑрӑхри тӑватӑ ҫын пурнӑҫӗ татӑлнӑ. Ҫапла вара шыва путса вилекенсен йышӗ кӑҫал 17 ҫынна ҫитнӗ.

Эрнекун каҫхине Муркаш районӗнчи Шупуҫӗнче 74 ҫулти арҫын пӗвере путнӑ. Арҫын ҫипуҫне ачасем асӑрхасан аслисене пӗлтернӗ. Вилене шывран ял ҫыннисем кӑларнӑ. Малтанласа шухӑшланӑ тӑрӑх, арҫын эрех ӗҫнӗ пулнӑ.

Утӑ уйӑхӗн 11-мӗшӗнче Ҫӗнӗ Шупашкарти хула пляжӗнчен инҫех мар вырӑнта, Атӑлта, 19 ҫулти каччӑ виллине тупнӑ.

Ҫав кунах Вӑрмар районӗнчи «Тарӑн ҫырма» коллективлӑ пахча патӗнчи пӗвере 43 ҫулти хӗрарӑм путнӑ. Вӑл Кавал ялӗнче пурӑннӑ.

Шӑматкун Муркаш районӗнчи Ильинка ялӗ тӗлӗнче, Атӑлта, 55 ҫулти арҫын шыва путнӑ.

Шупашкарти «Ҫеҫпӗл» кинотеатр» чарӑну ятне ылмаштарасшӑн. Ку сӗнӳпе яваплисем патне Ҫеҫпӗл Мишши ячӗллӗ Чӑваш патшалӑх ҫамрӑксен театрӗ ҫитнӗ. Тата тӗрӗсрех каласан, театрӑн директорӗ Елена Николаева чарӑнӑва «Ҫамрӑксен театрӗ» ят пама ыйтнӑ. Асӑннӑ ыйтӑва Ят парас енӗпе ӗҫлекен комиссире сӳтсе явмалла.

Аса илтерер: «Ҫеҫпӗл» кинотеатр 2014 ҫулхи ҫулла ӗҫлеме пӑрахрӗ. 2016 ҫул вӗҫӗнче унта Чӑваш патшалӑх ҫамрӑксен театрӗ куҫса кайрӗ. Ҫав пулӑма культура учрежденийӗн коллективӗ кӑмӑлласа йышӑнчӗ. Театрӑн хӑйӗн ҫурчӗ пулманран вӑл пӗр вырӑнтан тепӗр ҫӗре куҫса ҫӳрерӗ. Юлашки ҫулсенче Шупашкарти Трактор тӑвакансен культура керменӗнче тӗпленнӗччӗ.

Улатӑр хули пуҫлӑхсӑр тӑрса юлнӑ. Муниципалитетӑн сити-менеджерӗ Владимир Степанов ҫулталӑк ӗҫленӗ хыҫҫӑн ҫемҫе пукана хӑй кӑмӑлӗпе пушатнӑ. Владимир Степанов ӗҫрен кайма ҫырса панӑ заявление вырӑнти Депутатсен пухӑвӗн утӑ уйӑхӗн 10-мӗшӗнче иртнӗ ларӑвӗнче пӑхса тухнӑ. Сӑмах май, Владимир Степанова 2019 ҫулхи утӑ уйӑхӗнче пуҫлӑха лартнӑ.

Хальхи вӑхӑтра Улатӑр хула администрацийӗн пуҫлӑхӗн тивӗҫне пурнӑҫлама сити-менеджерӑн пӗрремӗш ҫумӗ – архитектура, хула строительстви, транспорт, ҫутҫанталӑкпа усӑ курас тата ҫурт-йӗрпе коммуналлӑ хуҫалӑх пайӗн пуҫлӑхӗ Марина Фёдоровӑна шаннӑ.