"Контактри" сӑн

Ӗнер ирхи 6 сехетре Патӑрьел округӗнчи Кивӗ Катек ялӗнче пушар тухнӑ. 70 ҫулти хӗрарӑмӑн килӗнче душ пӳлӗмне ҫулӑм ярса илнӗ.

Пушар 7 тӑваткал метр лаптӑк ҫинче алхаснӑ. Малтанлӑха пӗлтернӗ тӑрӑх, пушар юсавсӑр кӗпе-йӗм ҫумалли машинӑна пула тухнӑ. Ҫулӑм алхасма пуҫланӑ вӑхӑтра килте хӗрарӑмӑн хӗрӗ пулнӑ. Вӑл кӳршисем пулӑшнипе пушара ҫӑлавҫӑсем киличченех сӳнтернӗ. Ҫулӑм душ пӳлӗмне, котельнӑя, кухньӑна сиенлетнӗ.

forum.na-svyazi.ru сӑнӳкерчӗкӗ

Чӑваш Ен прокуратури республикӑра тума пуҫланӑ шкулсен строительстви епле пынине тӗрӗсленӗ.

Вӗренӳ объекчӗсенчен чылайӑшне графикпа килӗшӳллӗн хӑпартаҫҫӗ-мӗн, апла пулин те хӑш-пӗр ҫӗрте ӗҫ кая юлса пырать.

Сӑмахран, Шупашкарти Хӗвеллӗ микрорайонта шкул строительствине 50 процента яхӑн пурнӑҫланӑ, шучӗпе ҫак цифра 70 процент пулмалла-мӗн. Ку вӑл — ҫӗртме уйӑхӗн 14-мӗшӗ илсен.

Ҫӗнӗ Шупашкарти Воин интернационалистсен урамӗнче те шкул строительстви кая юлса пырать.

Кӳкеҫри шкула Чӑваш Республикин ипотека корпорацийӗ хӑпартать. Ӗҫе кӑҫалхи чӳк уйӑхӗн 29-мӗшӗ тӗлне вӗҫлемелле. Ҫӗртме уйӑхӗн 14-мӗшӗ тӗлне илсен ӗҫе 60 процент чухлӗ пурнӑҫланӑ, шучӗпе 69 процент таран пулмалла.

cap.ru сайтри сӑн

Красноармейски округӗнчи Ҫӗньял Чуракассинче 59 ҫулти арҫын 3 кун каялла ҫухалнӑ. Ӑна тупнӑ. Тӗрӗсрех каласан, унӑн виллине тупнӑ. Ҫӗртме уйӑхӗн 26-мӗшӗнче 14 сехетре Ҫӗньял Чуракасси ҫывӑхӗнчи пӗверен унӑн виллине ҫыран хӗррине кӑларнӑ.

Аса илтерер: ҫӗртмен 21-мӗшӗнче Комсомольски округӗнчи Асанкасси ялӗнче 52 ҫулти арҫын путса вилнӗ. Унӑн виллине ҫӑлавҫӑсем тупнӑ.

Ҫулталӑк пуҫланнӑранпа республикӑра 15 ҫын путса вилнӗ, ҫав йышран 13-шӗ – ҫӗртме уйӑхӗнче. Вӗсен йышӗнче – 3 ача.

Кандинский нейросеть сӑнӳкерчӗкӗ

Шупашкар муниципаллӑ округӗнчи Колешша ялӗнче пурӑнакан ҫынна кӳршине кӳрентерсе пӗтернӗшӗн явап тыттарнӑ. Ӑна суд штрафланӑ.

Ял ҫынни пӑтӑрмах пирки прокуратурӑна ҫӑхавланӑ хыҫҫӑн унтисем тӗрӗслев ирттернӗ. Колешша ялӗнче пурӑнакан арҫын пӗр ирхине, чӑн та, хӑйӗн кӳршине килӗшӳсӗр сӑмахпа кӳрентерсе пӗтернине палӑртнӑ. Лешӗ ҫавна телефон камери ҫине ӳкерсе илнӗ.

Чӗлхене ирӗке янӑшӑн арҫынна суд административлӑ майпа явап тыттарса 3 пин тенкӗ штраф тӳлеттерме йышӑннӑ.

21.rosguard.gov.ru сӑнӳкерчӗкӗ

Чӑваш Енри пӗр ялта пурӑнакан арҫын утӑ ҫулма тухса граната курнӑ. Вӑрнар муниципаллӑ округӗнчи Кульцав ялӗнче пурӑнакан ҫын хӑй асӑрханӑ япала пирки тӳрех йӗрке хуралҫисене пӗлтернӗ.

Вырӑна Росгвардин ОМОН ӗҫченӗсем пырса ҫитнӗ. Граната вӗренмеллискер пулнӑ иккен.

Граната хӑҫантанпа унта выртнине калама йывӑр, вӑл тутӑхма ӗлкӗрнӗ.

Йӗрке хуралҫисем ун пек япалана курсан тӳрех хӑйсене систерме сӗнеҫҫӗ.

Инкеклӗ лару-тӑру министерстви тунӑ сӑн

Ӗнер кӑнтӑрла Шупашкарти Алькеш поселокӗнче харпӑр ҫурт ҫуннӑ. Ҫулӑм хуралтӑ таврашне тӗп тунӑ, ҫуртӑн шалти отделкине, гаража сиенлетнӗ.

Пушарта 1993 ҫулта ҫуралнӑ арҫыннӑн ӳчӗ самаях пиҫсе кайнӑ. Ӑна пульницӑна илсе кайнӑ. Анчах, шел те, тухтӑрсем унӑн пурнӑҫне ҫӑлайман.

Палӑртмалла: ҫулталӑк пуҫланнӑранпа 689 пушар пулнӑ. Вӗсенче 35 ҫын вилнӗ, 37 ҫын суранланнӑ. 94 ҫынна ҫӑлма ӗлкӗрнӗ.

Кандинский нейросеть сӑнӳкерчӗкӗ

Кӑҫалхи ака уйӑхӗнче «Хусан — Канаш» пуйӑсра Тутарстанри пӗр хӗрарӑм пуҫтахланма тапранса кайнӑ.

Вӑл эрех ӗҫсе ӳсӗрӗлнӗ те пассажирсем ҫумне ҫулӑхнӑ. Билет кассирӗ ӑна лӑплантарма тӑрӑшнӑ, анчах май килмен. Унран та ытларах: ӳсӗр хӗрарӑм кассир ҫине алӑ ҫӗкленӗ.

Кибеч станцийӗнче хӗрарӑм стоп-крана туртса антарнӑ.

Чӑркӑш хӗрарӑма транспорт полицейскийӗсем тытса чарнӑ. 47 ҫулти хӗрарӑма ҫывӑх вӑхӑтра суд тӑвӗҫ.

Инкеклӗ лару-тӑру министерстви тунӑ сӑн

Ҫӗртме уйӑхӗн 22-мӗшӗнче Канаш округӗнчи Вырӑскас Пикших ялӗнчи пушарта 37 ҫулти арҫын вилнӗ. Унта йывӑҫ ҫурт каҫхи 5 сехетре ҫунма тытӑннӑ. Пушара сӳнтерсен 1987 ҫулта ҫуралнӑ арҫын виллине тупнӑ. Ҫулӑм мӗнрен тухни хальлӗхе паллӑ мар.

Палӑртмалла: ҫулталӑк пуҫланнӑранпа республикӑра 686 пушар тухнӑ. Ҫав пушарсенче 34 ҫын вилнӗ, 37 ҫын суранланнӑ. Ҫулӑмран 93 ҫынна ҫӑлма май килсен.

Инкеклӗ лару-тӑру министерстви тунӑ сӑн

Комсомольски округӗнчи Асанкасси ялӗнче арҫын путса вилнӗ. Ку инкек иртнӗ эрнере пулнӑ.

Эрнекун, ҫӗртме уйӑхӗн 21-мӗшӗнче, 52 ҫулти арҫын пӗвере шыва кӗнӗ те путнӑ. Унӑн виллине ҫӑлав службин ӗҫченӗсем кӑларнӑ. Палӑртмалла: арҫын ятарласа хатӗрлемен выранта шыва кӗнӗ.

Сӑмах май, ҫулталӑк пуҫланнӑранпа республикӑра 14 ҫын путса вилнӗ. Ҫав йышра – 3 ача. Чылай чухне ҫынсем юраман вырӑнта тата ӳсӗрле шыва кӗрсе путнӑ.

Кандинский нейросеть сӑнӳкерчӗкӗ

Шупашкарта пурӑнакан 36 ҫулти хӑйӗн кушакне Архангельск облаҫне ӑсатасшӑн пулнӑ. Ун пек пулӑшма килӗшекене вӑл халӑх тетелӗсенчен пӗринче тупнӑ.

Кушак аҫине ӑсатма килӗшекене вӑл 5 пин тенке яхӑн укҫа куҫарса панӑ. Ҫавӑн хыҫҫӑн тӗнче тетелӗнчи ҫав ҫын ҫухалнӑ.

Пӑтӑрмах хыҫҫӑн кушак аҫин хуҫи пакунлисенчен пулӑшу ыйтнӑ. Улталаканни Ставрополь крайӗнчи 25 ҫулти ҫамрӑк пулнӑ. Ӑна пирӗн патри йӗрке хуралҫисем вырӑна тухса кайса тытса чарнӑ. Анчах ӑна хупса хуман. Следстви пынӑ вӑхӑтра хайне йӗркеллӗ тытмалли, таҫта тухса кайма юраманни ҫинчен асӑрхаттарнӑ.