t.me/mintrans21 сӑнӳкерчӗкӗ

Иртнӗ эрнере Шупашкарти троллейбуссенче «мулкачсене» шыранӑ. Аса илтерер: общество транспортӗнче билетсӑр ҫӳрекенсене ҫапла калаҫҫӗ. Ҫула билетсӑр тухакансене 500 тенкӗ штраф тӳлеттереҫҫӗ.

Тӗрӗслевҫӗсем 1-мӗш тата 17-мӗш маршрутпа ҫула тухнӑ троллейбуссенче пулнӑ. Контролёрсем — Чӑваш транспорт управленийӗн ӗҫченӗсем.

Чӑваш Енӗн Транспорт министерствинче пӗлтернӗ тӑрӑх. билетсӑр пассажирсем тупӑнман.

"Автодор" сӑнӳкерчӗкӗ

Ҫил-тӑмана пула паян ирхи 5 сехетрен Чӑваш Енре, Тутарстанра тата Мари Элте федераци трассисенче йывӑр тиевлӗ машинӑсене, автобуссене ытлашши ҫӳреме чарнӑ. Ку «Атӑл» М-7,«Ҫӗрпӳ - Чӗмпӗр» А-151, «Вятка» Р-176 ҫулсене пырса тивет.

Кунсӑр пуҫне «Восток» М-12 ҫулӑн пӗр пайне, Канашран Шали таран, хупнӑ.

"Автодор" сӑнӳкерчӗкӗ

Ҫил-тӑмана пула тӳлевлӗ М-12 ҫула вӑхӑлӑха хупнӑ. Анчах веҫех мар.

Паян ирхине «Автодор» хыпарланӑ тӑрӑх, М-12 ҫинче Тутарстан еннелле каякан ҫула хупнӑ.

«684-836-мӗш ҫухрӑмсенче (Канаш - Шали) машинӑсене яман», - ҫапла пӗлтернӗ «Автодор» пресс-служби.

forum.zarulem.ws сӑнӳкерчӗкӗ

Патшалӑхӑн ҫул-йӗр хӑрушсӑрлӑхӗн инспекторӗсем Шупашкар ҫыннисене машинӑпа инҫе ҫула тухма сӗнмеҫҫӗ. Ялан мар-ха. Паян. Ҫил-тӑман вӗҫтернӗрен ҫулсем ҫинче 10 баллӑ пӑкӑ пулса тӑнӑ.

Инспекторсем ҫул ҫинче питех та асӑрхануллӑ пулма, ҫул-йӗр правилисене ҫирӗп пӑхӑнма сӗннӗ.

Хула урамӗсем тасатса тӑракан «Дорэкс» организаци кӑнтӑрла 96 ҫул-йӗр рабочийӗ тата 110 техника, унсӑр пуҫне субпорядчиксен техники ӗҫленине пӗлтернӗ. Каҫхине тата ҫӗрле урамсене 60-а яхӑн техника тасатса тӑрӗ.

turvopros.com сӑнӳкерчӗкӗ

Кӑрлач уйӑхӗн 12-мӗшӗнче Шупашкартан Мускава каҫхи авиарейспа вӗҫсе кайма ӗмӗтленнӗ пассажирсен тепӗр ирччен кӗтме тивнӗ.

Асӑннӑ рейспа хутлакан «Победа» авиакомпанин самолёчӗ ҫула 10 сехет те 30 минут кая юлса хускалнӑ.

Шупашкара Мускавран вӗҫсе килнӗ самолёт анса ларнӑ хыҫҫӑн унӑн тӗп шассинче пушар пирки систерекен тытӑм ӗҫлесе кайнӑ. Ҫавӑн хыҫҫӑн пилотсем «Тревога» сигнал панӑ. Инкекпе ҫӑлав расчечӗсем ҫийӗнчех ура ҫине тӑнӑ.

Телее, ним те ҫунма пуҫламан. Самолёта ятарлӑ вырӑна туртса илсе кайса лартнӑ.

ШӖМ видеовӗнчен илнӗ сӑнӳкерчӗк

Паян ирпе Шупашкарта икӗ троллейбус ҫапӑннӑ. Вӗсем 5-мӗш тата 9-мӗш маршрутпа ҫӳрекенскерсем. Пӑтӑрмах ирхи 7 сехетре пулса иртнӗ.

Чӑваш Енӗн Шалти ӗҫсен минисерствин пресс-службинче хыпарланӑ тӑрӑх, «Николаев урамӗ» чарӑнӑва ҫитнӗ чухне 5-мӗш троллейбус водителӗ 9-мӗш маршрутпа ҫӳрекеннипе пырса ҫапӑннӑ. Малтанласа шухӑшланӑ тӑрӑх, пӑтӑрмах транспорт пӗр-пӗр хушшинче пулмалли инҫӗше пӑхӑнманнипе ҫыхӑннӑ.

Троллейбуссенчен пӗрин водительне, 25 ҫулти каччӑна, тата пилӗк пассажира тухтӑр пулӑшӑвӗ кирлӗ пулса тухнӑ.

Тӗнче тетлӗнче тӗрлӗ ҫӑлкуҫ пӗлтернӗ тӑрӑх, тӳлевлӗ М-12 ҫул ҫинчи заправкӑсем патӗнче черетсем пулнӑ. Ҫавна май «Автодор» унта ҫӗнӗ заправкӑсем тӑвас ӗҫе хӑвӑртлатма шантарнӑ.

«Автодор» пӗлтернӗ тӑрӑх, хальлӗхе унта 18 заправка тата 4 контейнерлӑ АЗС ӗҫлет. Пӗтӗмпе – 22 заправка. Ҫӗнӗ ҫул хыҫҫӑнхи каникулта ытларах Муром тата Арзамас патӗнче, Мускава кӗнӗ ҫӗрте черетсем пулнӑ.

Сӑмах май, унччен влаҫ М-12 ҫул ҫинче кашни 50 ҫухрӑмра заправка пулассине пӗлтернӗ. Тӳрех – икӗ енчен.

forum.na-svyazi.ru сӑнӳкерчӗкӗ

Виҫӗ уйӑхра Чӑваш Енри тата Мари Элти пуйӑссемпе самолётсем ҫинчен ӳсӗр 100 ытла ҫынна антарса хӑварнӑ. Транспортра эрех ӗҫме тата ӳсӗр пуҫа ларма юрамасть. Ун пеккисене административлӑ майпа явап тыттараҫҫӗ.

Транспорт полицейскийӗсем пӗлтӗрхи юпа-раштав уйӑхӗсенче 118 ҫынна явап тыттарнӑ — 500 тенкӗрен пуҫласа 1500 тенкӗ таран штраф хурса панӑ. Унсӑр пуҫне ӳсӗрсене 1 талӑкран пуҫласа 15 талӑк таран хупса хума та пултараҫҫӗ.

sdelanounas.ru сайтри сӑн

Паян М-12 тӳлевлӗ автоҫулӑн Хусана илсе ҫитерекен пайӗ уҫӑлнӑ. Ку мероприятие РФ Президенчӗ Владимир Путин видеоҫыхӑну урлӑ хутшӑннӑ.

Халӗ Мускавран хулана хӑвӑртах ҫитме пулать. Аса илтерер: кӑшт маларах Арзамаса илсе ҫитерекен ҫул уҫӑлнӑччӗ.

М-12 ҫул Хусана илсе ҫитерекенни кӑна пулмӗ. Тӳлевлӗ, пысӑк хӑвартлӑхлӑ ҫула Екатеринбурга, унтан Тюмене ҫити тӑсӗҫ.

21.мвд.рф сӑнӳкерчӗкӗ

Ӗнер, раштав уйӑхӗн 18-мӗшӗнче, «Атӑл» автомобиль ҫулӗ ҫинчи инкекре виҫҫӗн аманнӑ.

Ирхи 4 сехет те 30 минутра пулса иртнӗ инкекре «Киа Рио» машина водителӗ хирӗҫ килекен ҫул ҫине тухса кайса «КамАЗ» фурӑпа ҫапӑннӑ.

Иномарка рулӗ умӗнчи 57 ҫулти водителе больницӑна илсе кайнӑ, ҫывӑх вӑхӑтра вӑл унта сыватӗҫ. Машинӑри икӗ пассажир килте сипленӗҫ.