cap.ru сайтри сӑн ӳкерчӗк

Ӗнер Йӗпреҫ районӗнче вӑрман ҫуннӑ. «Вӑрман хуралӗ» патшалӑх учрежденине пушар тухни пирки 14 сехет те 56 минутра пӗлтернӗ.

Специалистсем Ҫӗнӗ Выҫли вӑрман участокне хӑвӑртах ҫитнӗ. Пушара вӗсем 14 минутран сӳнтернӗ.

Ҫулӑм 0,1 гектар ҫӗр ҫинче алхаснине палӑртнӑ. Юрать-ха, пушар вӑрман хыснине тӑкак кӳмен.

Инкеклӗ лару-тӑру министерстви тунӑ сӑн

Сӗнтӗрвӑрри районӗнчи Кайри Шӗнерпуҫ ялӗнче ӗнер 15 сехет хыҫҫӑн ҫурт ҫуннӑ. Ҫӑлавҫӑсем пушара 19 минутран сӳнтернӗ.

Анчах ҫулӑм кӳршӗ ҫуртӑн ҫиелти сийне те шар кӑтартнӑ. 63 ҫулти кил хуҫи пӳртне ҫулӑм ярса ан илтӗр тесе пушарнӑйсем киличчен хӑйех тӑрӑшнӑ. Ҫавӑн чухне вӑл пиҫсе кайнӑ.

Арҫынна пульницӑна илсе ҫитернӗ. Тухтӑрсем палӑртнӑ тӑрӑх, унӑн ӳчӗ самаях пиҫсе кайнӑ.

t.me/mchs_chuvashia каналтан илнӗ сӑнӳкерчӗк

Шупашкар районӗнчи Лапсарта вырнаҫнӑ «Юрма» агрофирмӑра ӗнер, ҫӗртме уйӑхӗн 23-мӗшӗнче, пушар тухнӑ.

Пушар сӳнтерекенсем патне усал хыпара 22 сехет те 16 минутра ҫитернӗ. Ҫӑлавҫӑсем вырӑна пырса ҫитнӗ вӑхӑтра тимӗр ангар ҫуннӑ. Вӑл кайӑк-кӗшӗк ӗрчетмелли цех пулнӑ, анчах хальхи вӑхӑтра унпа усӑ курман, вӑл пушах пулнӑ. Малтанласа палӑртнӑ тӑрӑх, пушар 400 тӑваткал метр лаптӑк ҫинче алхаснӑ.

Вут-ҫулӑма сӳнтерме 10 техника тата 30 ҫӑлавҫа хутшӑннӑ. 23 сехет те 15 минутра пушара лӑплантарнӑ, уҫҫӑн ҫуннине 23 сехет те 48 минутра сӳнтерсе пӗтернӗ.

Чӑваш Енри ШӖМ сайтӗнчи сӑнӳкерчӗксем

Чӑваш Енре мотоциклистсем пӗр кунта виҫӗ хутчен аварие лекнӗ, вӗсенче ҫул ҫитмен виҫӗ ҫамрӑк аманнӑ.

Пӗрремӗш инкек ҫӗртме уйӑхӗн 23-мӗшӗнче ҫурҫӗр иртсен Йӗпреҫ районӗнчи Анатриял ялӗнче пулса иртнӗ. 17 ҫулти яш мопедпа пынӑ чухне ҫул айккине кӗрсе ӳкнӗ. Аманнӑскере Шупашкарти пульницӑна илсе кайнӑ.

Ирхи пилӗк сехет тӗлӗнче Комсомольски районӗнчи Йӑлмахва ялӗнче 15 ҫулти каччӑ мотоциклпа ҫул айккине кӗрсе ӳкнӗ. Ӑна тата мотоцикл ҫинче ларса пынӑ 16 ҫулти яша пульницӑна ӑсатнӑ.

21.mchs.gov.ru сайтри сӑн

Шупашкарта пурӑнакан 63 ҫулти арҫын пирус туртса янӑ та… Ҫапла пушар тухнӑ. Унта вӑл хӑй те шар курнӑ. Арҫынна васкавлӑ медпулӑшу машинипе пульницӑна илсе ҫитернӗ. Унӑн урисем пиҫсе кайнӑ.

Пушарнӑйсене ывӑлӗ чӗннӗ. Вӑлах ашшӗне ҫунакан ҫуртран урама илсе тухнӑ.

Пушарнӑйсем ҫулӑма 20 минутран сӳнтернӗ. Вӗсем тӑрӑшнипе ҫулӑм кӳршӗ ҫуртсем ҫине куҫман.

btv.online сайтри сӑн

Патӑрьелте ача-пӑча лапамӗнче 9 ҫулти ача шар курнӑ. Унӑн пӳрни хӗсӗнсе ларнӑ. Шел те, пӗр пайӗ татӑлса ӳкнӗ.

Ку ӗнер Киров урамӗнчи 33-мӗш ҫурт ҫывӑхӗнче пулнӑ. Ача тӑвайккинчен ярӑннӑ. Ҫавӑн чухне пӳрни хушӑка хӗсеннӗ. Палӑртмалла: тӑвайкки ҫӗнӗ. Ҫынсем халӑх тетелӗнче каланӑ тӑрӑх, вӑл вырнаҫтарсанах авӑннӑ, хушӑк курӑнма пуҫланӑ.

chgtrk.ru сайтран илнӗ сӑнӳкерчӗк

Куславкка хула администрацийӗн экс-пуҫлӑхӗ тӗлӗшпе пуҫиле ӗҫ пуҫарнӑ.

Чӑваш Енӗн прокуратурин пресс-службинче пӗлтернӗ тӑрӑх, 2022 ҫулхи раштав уйӑхӗн 1-мӗшӗнче ҫав ҫын Куславккари «Геометрика» паркра автостоянка валли асфальт сарма контракт алӑ пуснӑ. Ӗҫе пӗлтӗрхи раштав уйӑхӗн 25-мӗшӗ тӗлне вӗҫлемелле пулнӑ. Ӗҫе вӗҫлемен пулин те тӳре-шара 600 пине яхӑн тенкӗ куҫарса панӑ.

Пӑтӑрмаха прокуратура тӗрӗслевӗ вӑхӑтӗнче тупса палӑртнӑ. Материалсене РФ Следстви комитетне ярса панӑ хыҫҫӑн пуҫиле ӗҫ пуҫарнӑ.

Сӑмах май каласан, паркра асфальта халӗ те сарса пӗтермен иккен.

zhukvesti.ru сайтри сӑн

Шупашкарта газ организацйӗнче ӗҫлекен арҫынна судпа айӑпланӑ. Суд палӑртнӑ тӑрӑх, вӑл хӑрушсӑрлӑх требованийӗсене пӑхӑнмасӑр пулӑшу кӳнӗ хыҫҫӑн икӗ ҫын пурнӑҫӗ татӑлнӑ.

2020 ҫулхи нарӑс уйӑхӗнче 22-ри каччӑ тата 20 ҫулти хӗр тара илнӗ хваттерӗнче ваннӑйӗнче газ сӗрӗмӗпе наркӑмӑшланса вилнӗ. Следстви палӑртнӑ тӑрӑх, шыв ӑшӑтакан кӑмака йӗркеллӗ ӗҫлемен. 2018 ҫулхи чӳк уйӑхӗнче газ организацийӗн ӗҫченӗ кӑмакана тӗтӗм тухмалли пӑрӑхпа тӗрӗс мар сыпӑнтарнӑ. Ҫапла газ сӗрӗмӗ ваннӑйӗнче пухӑннӑ.

Суд слесарь айӑплӑ тесе йышӑннӑ. Ӑна тӗрмене хупмасӑр 5 ҫуллӑха айӑпланӑ.

Инкеклӗ лару-тӑру министерстви тунӑ сӑн

Патӑрьел районӗнчи Сӑкӑт ялӗнче паян ирхи 6 сехетре пушар пулнӑ. Шел те, унта ҫыннӑн пурнӑҫӗ татӑлнӑ.

Пушар 63 ҫулти арҫын кил хуҫалӑхӗнче тухнӑ. Пушарнӑйсем ҫулӑма сӳнтерсен унӑн виллине тупнӑ.

Инкеклӗ лару-тӑру министерстви пӗлтернӗ тӑрӑх, пушар асӑрханмасӑр пирус туртнӑран тухнӑ.

Алькеш посёлокӗпе Шупашкар районӗнчи Вӑрманкас ялӗ хушшинче халӑх тӗнӗн керемне (храмне) 2016 ҫулхи кӗркунне тӳре-шарапах уҫнине Чӑваш халӑх сайчӗ хӑй вӑхӑтӗнче пӗлтернӗччӗ-ха. Унччен ҫав вырӑнта юпа вырнаҫтарнӑ. Анчах ҫав юпана хӑй вӑхӑтӗнче такамсем тӳнтерме хӑтланни пирки те Чӑваш халӑх сайчӗ ҫырнӑччӗ.

Шар курнӑ юпа вырӑнӗнче халӑх тӗнӗн керемне (храмне) уҫнӑ. Аса илтерер: тӳнтерме пуҫланӑ юпана тӳрлетсе лартса ун тавра тимӗртен ҫӳллӗ хӳшӗ йӗркеленӗччӗ. Юпана ҫавӑн пекех тимӗр карта тытса ҫавӑрнӑччӗ. Парне тумалли вырӑна та манманччӗ. Юпана сӑрланӑ. Маларах ӑна ҫул хӗрринчен асӑрхама йывӑр пулнӑ пулсан вӑл кайран аякранах курӑнса тӑма пуҫланӑ.

Паян вара Федор Мадуровӑн ҫав юпине такамсем ҫунтарса янине пӗлтӗмӗр.