Никита Тӗнче (хушаматне улӑштариччен Васильев пулнӑ) пӗр вӗҫӗм ҫулҫӳревре. Нумаях пулмасть вӑл Мари Республикине ҫитсе килнӗ. Анчах Никита унта нумай вӑхӑт пулайман, мӗншӗн тесен мӑшӑрӗшӗн, пӗчӗк хӗрӗшӗн тунсӑхланӑ.

Ҫамрӑк ашшӗ кӳршӗ республикӑра пӗр эрне пурӑннӑ. Никита ку таранччен Атӑл тӑрӑхӗнче, Алтайра, Инҫет Хӗвелтухӑҫӗнче, Ҫӗпӗрте, Китайра, Монголире, Казахстанра пулса курнӑ. Анчах кӳршӗ республикӑна велосипедпа кайни уншӑн чи йывӑрри пулнӑ.

«Ӳлӗмрен пӗччен ниҫта та каймӑп, ҫемьепе пӗрле кӑна ҫула тухӑп. Мари Республикине кайни маншӑн чи йывӑрри пулчӗ – хамӑннисемшӗн питӗ тунсӑхларӑм. Ҫавӑнпа киле часрах таврӑнас тесе маршрута кӑштах кӗскетрӗм», - тенӗ Никита Тӗнче.

Аса илтерер: кӑҫал ҫӗртме уйӑхӗнче Никитӑпа Анастасия Тӗнчесен Аяран ятлӑ хӗрача ҫуралнӑ. Кӑҫал кӗркунне вӗсем ҫемйипе ҫула тухма палӑртнӑччӗ, анчах плансене улӑштарнӑ. «Пирӗн йӑлтах хатӗр мар-ха, ҫавӑнпа ҫулҫӳреве тепӗр ҫул ҫуркунне кайӑпӑр. Ая та ун чухне кӑштах ӳсӗ», - тенӗ Никита.

Федерацин Атӑлҫи округӗнчи кадет корпусӗн строительстви пирки хӑш-пӗр массӑллӑ информаци хатӗрӗнче тӗрлӗрен сӑмах-юмах ҫӳрерӗ.

Палӑртнӑ вӑхӑта, авӑн уйӑхӗн 1-мӗшӗ тӗлне, ӑна туса пӗтереймеҫҫӗ тесе те калаҫрӗҫ. Строительство пынӑ вӑхӑтра объектра водитель вилни те пуплеттерчӗ. Сӑмах май, ку фактапа РФ Следстви комитечӗн Чӑваш Енри управленийӗ пуҫиле ӗҫ пуҫарчӗ.

Кадет корпусӗпе ун ҫывӑхӗнчи парка хӑтлӑх кӗртме ашшӗ-амӑшӗ, хысна учрежденийӗсенче ӗҫлекенсем тата ытти организацирен пырса нимелле кайса пулӑшрӗҫ.

Корпуса Пӗлӳ кунӗнче савӑнӑҫлӑ лару-тӑрура уҫрӗҫ. Паян Чӑваш Ен Элтеперӗ Михаил Игнатьев кадет корпусӗпе ҫыхӑннӑ ыйтупа канашлу ирттернӗ. Унта строительствӑра палӑрнисене чысламаллине палӑртнӑ.

Комсомольски районӗнче пурӑнакан хӗрарӑм кредит илнӗ те вӑхӑтра тӳлемен пулмалла: кридиторсем ӑна тапӑнма пуҫланӑ. Шӑнкӑравласа сӑмахпа ӑнлантарнипе ҫырлахман вӗсем – сывлӑхне тата пурнӑҫне сиен кӳрессипе хӑратса СМС-ҫырусем те ҫырнӑ.

Хӗрарӑм вара саккуна лайӑх пӗлет: кредиторсен унашкал хӑтланма юрамасть. Хайхискер финанс организацине суда панӑ.

Материалсене суда памашкӑн ҫителӗклӗ пухнӑ. Хӗрарӑм микрокредит организацийӗ парӑма шыраса илнӗ чухне саккуна пӑснине судьяна ӗнентернӗ. Приговорпа килӗшӳллӗн, Чулхулари кредит организацийӗн штраф тӳлемелле.

Палӑка уҫнӑ самант

Канаш районӗнчи Кайӑкъяль ялӗнче Тӑван ҫӗршывӑн Аслӑ вӑрҫине хутшӑннӑ салтаксене халалласа лартнӑ палӑка йӑвантарса янӑ. Ҫакӑ вырӑнти халӑха самаях пӑшӑрхантарнӑ. Пӗлсе ҫитер: тен, вандалсем вӗсем патне те ҫитнӗ?

Ку пӑтӑрмаха РОВД уҫӑмлатма пуҫланӑ. Канаш район администрацийӗ пӗлтернӗ тӑрӑх, вандализм пирки калама иртерех-ха. Палӑка ҫӗмӗрмен, плитана йӑвантарса янӑ кӑна. Палӑк патӗнче арҫын ачасем вылянӑ-мӗн. Ҫапла пӗлтернӗ вырӑнти администраци ертӳҫи.

Район администрацийӗ палӑка юсамашкӑн специалистсене чӗннине пӗлтернӗ. Ҫитес вӑхӑтра ку ӗҫе вӗҫлӗҫ. Эппин, ҫынсен пӑшӑрханма кирлӗ мар.

Каласа хӑвармалла: ку палӑка пӗлтӗр кӑна уҫнӑ. Ӑна тумашкӑн ял халӑхӗнчен укҫа пухнӑ. Спонсорсем те тупӑннӑ.

Дмитрий Марков

«Чӑваш Енри тухтӑр Мускав облаҫӗнче пысӑк пукана йышӑннӑ. Дмитрий Марков халӗ Мускав облаҫӗнчи сывлӑх сыхлавӗн министрӗн тивӗҫӗсене пурнӑҫлать», — хыпарланӑччӗ Чӑваш халӑх сайчӗн авторӗсенчен пӗри, Софья Совнеш, 2016 ҫулхи чӳк уйӑхӗнче. Дмитрий Марков текех министр мар. Ӗҫри вӑхӑчӗ иртнӗ тесе унӑн контрактне тӑсман.

Марков 1970 ҫулхи кӑрлачӑн 31-мӗшӗнче Шупашкарта ҫуралнӑ. И.Н. Ульянов ячӗллӗ ЧПУра сиплев ӗҫне алла илнӗ. Пульницӑра тата университетра ӗҫленӗ. Шупашкар хула администрацийӗнче сывлӑх сыхлав управленийӗн пуҫлӑхӗ пулнӑ. 2013 ҫулта Дмитрий Маркова Мускав облаҫӗнче сывлӑх сыхлав министрӗн пӗрремӗш ҫумӗ пулма шаннӑ, 2016 ҫулхи кӗркунне министр тилхепине тыттарнӑ.

Раҫҫей футболисчӗ Артем Дзюба

Кӑҫал ҫулла футбол енӗпе иртнӗ тӗнче чемпионатӗнче Раҫҫей команди Испание ҫӗнтерсе чӗрӗк финала тухнӑ хыҫҫӑн футболистсене кашниех килӗштерме пуҫларӗ. Раҫҫейӗн пӗрлештернӗ ушкӑнӗнче чӑваш юнӗллӗ футболистсем пуррине эпир пӗлтернӗччӗ.

Аса илтерер, Сергей Игнашевич тата Артем Дзюба амӑшӗсем – чӑвашсем. Дзюба маларах Ҫӗрпӗве канма килсе ҫӳренӗ, унта футболистӑн тӑванӗсем пур иккен. Игнашевич Хӗрлӗ Чутай районӗнчи спорт шкулне бутсы ярса панӑ-мӗн. Александр Головинӑн аслашшӗ Елчӗк районӗнче ҫуралнӑ, Кемӗр облаҫне ӗҫлеме тухса кайса тӗпленнӗ.

Авӑн уйӑхӗн ҫурринче Шупашкарти Дзюба хушаматлӑ ҫамрӑк ҫемьере ывӑл ҫуралнӑ. Ӑна ашшӗ-амӑшӗ Артем ят хунӑ. Ҫакӑн пирки Шупашкар хулин Калинин район администрацийӗнче пӗлтернӗ.

Тунтикун, юпа уйӑхӗн 1-мӗшӗнче, сирена янӑраса кайсан хӑраса ан ӳкӗр. Ку – вӗренмелли тревога кӑна.

Юпан 1-мӗшӗнче Чӑваш Енре халӑха пӗлтермелли системӑна планпа килӗшӳллӗн тӗрӗслӗҫ. Ҫак кун республикӑри кашни район-хуларах сирена кӑшкӑрса ярӗ, громкоговорительсем янӑрӗҫ.

РФ МЧСӗн Чӑваш Енри тӗп управленийӗ пӗлтернӗ тӑрӑх, «Внимание всем!» сигнал икӗ хутчен янӑрӗ: 10-ра тата 10 сехет ҫурӑра. Ку вӗренӳ тревоги кӑна пулнӑ май ҫӑлавҫӑсем пурне те хӑйсен вырӑнӗнчех пулма, малалла ӗҫлеме ыйтаҫҫӗ.

«Внимание всем!» сигнал – граждан хӳтӗлевӗн асӑрхаттармалли палли. Ҫапла майпа халӑха авари, катастрофа, тӑшман тапӑнни пирки пӗлтереҫҫӗ.

Комсомольски районӗнче сиенлӗ ҫӳп-ҫап куписене тупнӑ. Вӗсене Халӑх фрончӗн хастарӗсем Кӗҫӗн Каҫал ҫывӑхӗнче асӑрханӑ. Кун пирки ҫынсем хӑйсемех интерактивлӑ ресурса хыпар ярса панӑ.

Пӗр ҫӳп-ҫап купинче – пластик канистрсем, вӗсенче вара – тӗттӗм шӗвек. Чылай савӑт ҫине бор йӳҫекӗн формулине ҫырнӑ. Иккӗмӗш купара вара – фармацевтика препарачӗсен картон курупкисем. Унта ҫавӑн пекех хими элементне ҫырнӑ савӑтсем те пур.

Экспертсем палӑртнӑ тӑрӑх, ҫак ҫӳп-ҫап тавралӑхшӑн хӑрушлӑх кӑларса тӑратать, вырӑнти халӑхӑн сывлӑхне сенлетме пултарать.

Ҫак ҫӗр лаптӑкӗ - вырӑнти сахӑр савучӗн. Халӑх фрончӗн хастарӗсем вырӑнти тӳре-шарана ҫӳп-ҫапа пӗтерме, территорие карта тытса ятарлӑ паллӑсем лартма хушнӑ.

Кӑҫал ҫурла уйӑхӗн 2-мӗшӗнче Ҫӗмӗрле районӗнчи Уйпуҫ Ялтӑра ялӗ ҫывӑхӗнче арҫын виллине тупнӑ. Вӑл кам пулнине халӗ те палӑртман. Кун пирки РФ Следстви комитечӗн Чӑваш Енри следстви управленийӗ пӗлтерет.

Вилене Уйпуҫ Ялӑра ялӗнчен ҫурҫӗр еннелле 3 ҫухрӑмра тупнӑ. Ун ҫинче спорт костюмӗ (50-мӗш калӑпӑшли), кӑвак-шурӑ йӑрӑмлӑ тельняшка, хура труҫҫи, хура носки пулнӑ.

Хӑй 51-65 ҫулсенчи пек курӑнать, 156-176 сантиметр ҫӳллӗш, сӑмси сылтӑм еннелле кӑшт кукӑр.

Пуҫ купташкине кура унӑн реконструкцине хатӗрленӗ. Вӑл – сӑнӳкерчӗкре.

ҪҪХПИ тунӑ сӑн

Авӑн уйӑхӗн 24-мӗшӗнче 16 сехетре «Вӑрнар – Нурӑс» ҫул ҫинче хӗрачана ҫапса хӑварнӑ. Лешӗ ҫул хӗрринче тӑнӑ, машинӑсем ҫӳрекен вырӑна тухман.

ҪҪХПИ пӗлтернӗ тӑрӑх, «Лада» водителӗ малтан транспорт хирӗҫ килекен ҫул ҫине тухнӑ, кайран ҫул хӗрринче тӑракан хӗрачана ҫапса кайнӑ.

Хӗрача 14 ҫулта кӑна, 8-мӗш класра вӗренет. Вӑл самаях суранланнӑ: унӑн шӑмми хуҫӑлнӑ, ытти суран та пулнӑ. Ӑна пульницӑна илсе кайнӑ.

Руль умӗнче вара 1969 ҫулта ҫуралнӑ арҫын ларнӑ.