cap.ru сӑнӳкерчӗкӗ

Ҫӗрпӳ муниципаллӑ округӗнчи Михайлавка тата Ҫӗньял ялӗсенче пурӑнакансем валли савӑнӑҫлӑ хыпар пӗлтереҫҫӗ. Ҫак тӑрӑхссенче кӗҫех фельдшерпа акушер пункчӗсем пулӗҫ.

Вӗсене тума хыснаран 17,5 миллион тенке яхӑн уйӑрма палӑртнӑ. Ку укҫана ЧР Министрсен Кабинечӗн резерв фондӗнчен уйӑрса парӗҫ. Документа алӑ пуснӑ ӗнтӗ.

"Контактри" сӑн

Шупашкарта пурӑнакан пӗчӗк Аделина Ертмакова ҫӗнӗрен ҫуралнӑ темелле. Остеопетрозпа чирлӗ ачана ака уйӑхӗн 25-мӗшӗнче Израильти тухтӑрсем операци тунӑ, шӑмӑ мимине куҫарса ларнӑ.

Паллах, операци тӳлевсӗр. Ертмаковсене ырӑ ҫынсем пулӑшнӑ. Ҫапла операци валли 23 миллион тенкӗ пухнӑ.

«Ҫӗнӗ клеткӑсем хӑвӑрт вӑй илессе, Адель сывӑ пуласса шанапӑр. Тавах сире хавхалантарнӑшӑн, пулӑшнӑшӑн», -тенӗ Аделинӑн амӑшӗ.

Ҫак операци ачана малалла тулли пурнӑҫпа пурӑнма май парать. Халӗ малта - нумая тӑсӑлакан реабилитаци.

t.me/chuvashenkalasat сӑнӳкерчӗкӗ

Чӑваш Енре кӑҫал ир вӑраннӑ ҫӗленсем ҫынсене сӑхма та ӗлкӗрнӗ. Кун пирки Телеграмри «Чӑваш Ен калаҫать» каналта пӗлтернӗ.

Инкек Йӑлӑмра пулнӑ. Арҫын пахчара шӑлса тасатнӑ чухне ҫӳп-ҫап пуҫтарма пӗшкӗнсен ӑна хура ҫӗлен сӑхнӑ.

Шар курни велосипед ҫине ларса больницӑна васканӑ. Ҫул ҫинче пичӗ-куҫӗ, ӳт-кӗлетки шыҫӑнма пуҫланӑ. Юн пусӑмне анса ларма пуҫланӑ, ӑшӗ пӑтраннӑ. Тухтӑрсем ӑна пулӑшнӑ.

pravdapfo.ru сӑнӳкерчӗкӗ

Шупашкар муниципалллӑ округӗнчи Ишлейри пульницӑна тӗпрен юсасшӑн.

Район пульницин тӗп корпусне тӗплӗн юсакан палӑртма аукцион ирттерессине пӗлтернӗ. Контрактӑн пуҫламӑш хакӗ — 123,3 млн тенкӗ. Ҫӗнтерӳҫӗне ака уйӑхӗн 25-мӗшӗнче палӑртмалла.

Медицина учрежденийӗн ҫурчӗ Ишлейри Совет урамӗнчи 31-мӗш ҫуртра вырнаҫнӑ. Тӗплӗ юсав ирттернӗ май ҫутӑ пӑралукне, шыв тата тытӑмне, вентиляцие улӑштармалла.

Подрядчикӑн пульницӑна чӳк уйӑхӗн вӗҫӗччен юсаса пӗтермелле.

Вера Иванова сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта «Хӑвна шан» тренировка хваттерӗ ӗҫлет. Унта тӗрлӗ чир-чӗре пула алли-ури питех итлемен (чылай чухне — инсульта пула) ҫынсем сывлӑха ҫирӗплетеҫҫӗ. Ку енӗпе вӗсене социаллӑ реабилитологсем пулӑшаҫҫӗ.

Йӑлари ӗҫе пурнӑҫласси тӗпелтен пуҫланать тесен те хытах йӑнӑшмӑпӑр. Сусӑр ҫынна хӑйне валли апат пӗҫерсе ҫиесси те йывӑр. Ҫав ӗҫсене тренировка хваттерӗнчи кухньӑра хӑнӑхтараҫҫӗ. Ун валли ятарлӑ оборудовани (мультиварка, тостер, блендер, чашӑк-тирӗк ҫӑвакан машина, холодильникпа морозильник, чейник, кирлӗ савӑт-сапа таранах) туяннӑ. Сусӑр алӑллӑ ҫынна тытма меллӗ кашӑк-ҫӗҫӗ таранах пур.

Тренировка хваттерӗ Шупашкарти Стрелоксен 324-мӗш дивизийӗнчи 21А ҫуртра вырнаҫнӑ.

Ҫу уйӑхӗнчен пуҫласа санавиаци вертолечӗ пациентсене илсе ҫӳреме пуҫлӗ. Контрактпа килӗшӳллӗн, вӑл ҫу уйӑхӗн 1-мӗшӗнчен вӗҫме тытӑнӗ.

Санавиаци раштав уйӑхӗн 1-мӗшӗччен ӗҫлӗ. Контракта 35 миллион та 943 пин те 131,1 тенкӗлӗх алӑ пуснӑ. Организаци пӗр ҫуллахи сехете 223,1 пин тенкӗпе вӗҫме килӗшнӗ. Пӗлтӗр пӗр сехет 219 пин тенкӗ тӑнӑ.

Палӑртмалла: 2020 ҫултанпа санавиаци вертолечӗпе 325 пациента пульницӑна илсе ҫитернӗ. Хальхи вӑхӑтра республикӑра вертолет анса лармалли ултӑ лапам пур.

medicin.cap.ru сӑнӳкерчӗкӗ

Чӑваш Енре пурӑнакансем ҫак кунсенче тонометрсене тӳлевсӗр тӗрӗслеттерееҫҫӗ. Акци Шупашкарпа Ҫӗнӗ Шупашкарта ака уйӑхӗн 7-мӗшӗнче пуҫланӑ, ака уйӑхӗн 9-мӗшӗччен пырать. Ӑна ӗнер иртнӗ Пӗтӗм тӗнчери сывлӑх кунне халалланӑ.

Акци тӗллевӗ – йӑлари тонометрсене вӑхӑтра тӗрӗслени юн тымарӗсемпе чӗре чирӗсемпе кӗрешесси ҫинчен аса илтересси.

Росстандартӑн Чӑваш Енри специалисчӗсем 2023 ҫулта виҫӗ кунта 1057 тонометр тӗрӗсленӗ, вӗсенчен 91-шӗ (е 9 проценчӗ) усӑ курма юрӑхсӑррине палӑртнӑ.

Тонометрсене паян тата ыран ҫак адреспа йышӑнаҫҫӗ: Шупашкар хули, Энтузиастсен урамӗ, 42-мӗш ҫурт, ирхи 8-тан пуҫласа 14 сехетчен. Ыран — Ҫӗнӗ Шупашкарти медицина центрӗнче (Винокуров урамӗ, 68-мӗш ҫурт) 9 сехет те 30 минутран пуҫласа 14 сехет те 30 минутчен.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти социаллӑ мобильлӗ бригада пӗччен ватӑсене тата сусӑрсене машина уйӑрса пулӑшать.

«Бригада тивӗҫӗ — вӑхӑтра тата васкавлӑ пулӑшу кӳресси. Кӑҫалхи пӗрремӗш кварталта 85 ҫынна пулӑшнӑ, 72 хутчен ятарлӑ автомашина уйӑрса панӑ», — каласа кӑтартнӑ центрӑн социаллӑ реабилитаци пайӗн заведующийӗ Марина Васильева.

Ятарлӑ ҫар операцине хутшӑнаканӑн арӑмне нумаях пулмасть Хусана тухтӑрсем патне илсе кайса килнӗ. Сусӑр кӳмипе ҫӳрекен хӗрарӑма унта хӑй тӗллӗн ҫитсе килме калама ҫук йывӑрри каламасӑрах паллӑ.

Тепӗр тӗслӗхре пӗччен пурӑнакан хӗрарӑм инсульт пирки васкавлӑ пулӑшу машинипе лекнӗ. Каялла тухма унӑн ӑшӑ ҫипуҫ та пулман. Социаллӑ учрежденин ятарлӑ машини хӗрарӑма пульницӑран килне ҫитерсе янӑ ҫеҫ мар, инсульт хыҫҫӑн тумалли хӑнӑхтарусене вӗрентсе хӑварнӑ, социаллӑ ӗҫчен пулӑшма пултарни пирки каласа ӑнлантарнӑ.

cap.ru сӑнӳкерчӗкӗ

Нумаях пулмасть Кӳкеҫре пурӑнакан хӗрарӑм васкавлӑ медпулӑшӑва шӑнкӑравланӑ. Вӑл каланӑ тӑрӑх, 67 ҫулти аппӑшӗ кафере апатланнӑ хыҫҫӑн, аш ҫисен, кӑвакарма, сывлӑш ҫитменнипе аптӑрама пуҫланӑ.

Васкавлӑ медпулӑшу бригади вырӑна 5 минутран ҫитнӗ. Ҫав вӑхӑталла ватӑ хӗрарӑм урайӗнче тӑнсӑр выртнӑ. Тухтӑрсем ҫӑварне, пырне пӑхсан нимӗн те тупайман. Вӗсем Геймлих мелӗпе усӑ курса пациенткӑн сывлав ҫулӗ ҫинче кӗрсе ларнӑ какай татӑкне кӑларнӑ. Ҫапла пулӑшнӑ хӗрарӑма Елена Ивановӑпа Елена Юркина фельдшерсем.

cap.ru сӑнӳкерчӗкӗ

Ака уйӑхӗнче Хулари 1-мӗш клиника тухтӑрӗсем Тӑван ҫӗршывӑн Аслӑ вӑрҫин ветеранӗсем тата ҫавнашкал ҫӑмӑллӑха тивӗҫнӗ ҫынсем патне киле ҫитсе вӗсен сывлӑхне тӗрӗслӗҫ, диспансеризаци ирттерӗҫ. Шурӑ халатлисем сывлӑхне кура килтен тухса ҫӳрейменнисем патне ҫитӗҫ.

Вырӑна тухса ҫӳрекен тухтӑрсен йышӗнче тӗрлӗ специалист пулӗ: терапевт, офтальмолог, невролог, хирург... Специалистсем юн анализне илӗҫ, ЭКГ тӑвӗҫ, куҫри юн пусӑмне тӗрӗслӗҫ.

Тухтӑрсем ҫар ӗҫӗсен ветеранӗсем патне те ҫитӗҫ.