Вӑрнар районӗн больницине ҫамрӑк специалистсем ӗҫлеме килнӗ. Вӗсем хирургра вӑй хурӗҫ.

Ҫак ҫамрӑк специалистсем — Руслан Халековпа Анас Сулейман. Хӑйсем каланӑ тӑрӑх, вӗсем шавлӑ хулара мар, ялта пурӑнасшӑн.

Руслан – И.Н.Ульянов ячӗллӗ Чӑваш патшалӑх университетӗнчен вӗренсе тухнӑ. Анас вара Мари патшалӑх университетӗнче диплом илнӗ. Вӗсем иккӗшӗ те ординатурӑра хирурги енӗпе пӗлӗвне тарӑнлатнӑ.

Ҫамрӑк специалистсем ҫак кунсенче больницӑра хирурги уйрӑмӗнче ӗҫлеме тытӑннӑ.

"Контактри" сӑн

12-ри арҫын ача чупнӑ чухне ӳкнӗ те суранланнӑ. Анчах вӑйлӑ ыратнипе тепӗр кунхине кӑна ӑна пульницӑна илме кайнӑ. Унӑн янах шӑмми хуҫӑлнӑ иккен.

Республикӑри ача-пӑча клиника пульницин тухтӑрӗсем ҫӑварӗ урлӑ ӑна операци тунӑ. Уйӑхран сиплев пуҫланнӑ. Ҫур ҫултан вара пластинӑна илнӗ – шӑмӑ сыпӑннӑ. Пичӗ ҫинче нимӗнле суран йӗрӗ те юлман.

Халӗ арҫын ача унчченхи пурнӑҫ патне майӗпен таврӑнать. Тухтӑрсем вӑл каллех йӑл кулма пултарасса шантараҫҫӗ.

chuvashia.sledcom.ru сӑнӳкерчӗкӗ

Шупашкар районӗнчи Мӑн Карачура ялӗнче 54 ҫулхи уйрӑм усламҫӑ килӗнче ӗҫленӗ чухне вилмеллех аманнӑ.

Инкек утӑ уйӑхӗн 22-мӗшӗнче пулса иртнӗ. Вӑл хӑйӗн хуҫалӑхӗнче йывӑс ҫурнӑ. Вута ҫурмалли станокпа ӗҫленӗ чухне асӑрханса ҫитереймен вӑл. Аманса пӗтнӗскер инкек вырӑнӗнчех вилсе кайнӑ.

forum.zarulem.ws сайтран илнӗ сӑнӳкерчӗк

Ӗнер, утӑ уйӑхӗн 24-мӗшӗнче, Канашра икӗ ача маршрутка урапи айне пулнӑ.

Улттӑмӗш класра вӗренекен икӗ арҫын ача ҫуран ҫӳрекенсене касмалли вырӑнтан, анчах светофор ҫук ҫӗртен, каҫма тӑнӑ. Ачасем электросамокатпа пулнӑ. Вӗсем маршрутка урапи айне лекнӗ.

Арҫын ачасенчен пӗри суранланнӑ, тепри урине хуҫнӑ.

Инекек вӑхӑтӗнче маршруткӑра ҫынсем пулман. Транспорт техникӑна юсаттарма кайма тухнӑскер пулнӑ.

Республикӑри офтальмологи больницин сӑнӳкерчӗкӗ

Йӗпреҫ районӗнчи Алшик ялӗнче пурӑнакан 99 ҫулти ватта операци тума хатӗрленеҫҫӗ. Василий Иванов вӑрҫӑ ветеранӗн икӗ куҫӗ те япӑхнӑ. Унӑн катаракта пулнине палӑртна.

Республикӑри офтальмологи больницинчи тухтӑрсем катарактӑна тасатса ятарлӑ линза лартса янӑ хыҫҫӑн мучи унчченхинчен лайӑхрах курма пуҫланӑ. Унӑн куҫ чире тата пулнине кура ҫамрӑк чухнехи пек витӗр курма пуҫламан-ха, анчах унччен 8 процент ҫеҫ курна пулсан, хале 20 процент курать. Ҫавна май ватӑ ҫын тепӗр куҫне те операци тутарасшӑн. Тухтӑрсем вара хирӗҫ мар.

"Контактри" сӑн

Шупашкарти пульницӑра 35 ҫулти арҫынна инсульт хыҫҫӑн каялла йӗркеллӗ пурнӑҫа таврӑнма пулӑшаҫҫӗ.

Андрей Шишкинӑн ишеми инсульчӗ пулнӑ. Тухтӑрсенчен вӑхӑтра пулӑшу ыйтнипе вӑл часах реабилитаци тухма тытӑннӑ. Халӗ вӑл мультидисциплинарлӑ бригада сӑнаса тӑнипе комплекслӑ сиплев витӗр тухать: физиосиплев, массаж, сиплев физкультури, медикаментозлӑ терапи. Тухтӑрсем унӑн сывлӑхӗнче лайӑх улшӑнусем пулнине палӑртаҫҫӗ.

«Тухтӑрсем патне килнӗшӗн ӳкӗнмерӗм. Кунта мана пулӑшаҫҫӗ, ӑнланаҫҫӗ», – ҫапла палӑртнӑ Андрей.

cap.ru сайтри сӑн

4 ҫулти арҫын ача сӑмсине батарейка чиксе янӑ. Ашшӗ-амӑшӗ ӑна хӑйсем тӗллӗн кӑларма хӑтланнӑ, анчах лару-тӑрӑва пушшех те кӑткӑслатнӑ — батарейка тата шаларах кӗрсе кайӑ. Тухтӑрсенчен пулӑшу ыйтма тивнӗ.

Республикӑри ача-пӑча клиникин хирургӗсем ачана наркоз витӗмӗпе эндоскопи операцийӗ тунӑ, сӑмсинчи батарейкӑна кӑларнӑ.

cap.ru сӑнӳкерчӗкӗ

Лайӑх хыпар: Чӑваш Енри 7 тухтӑр Раҫҫей шайӗнчи конкурсра палӑрнӑ

Пӗрремӗш вырӑна «Чи лайӑх терапевт» номинацире — ЧР сывлӑх сыхлавӗн ҫӗнӗ министрӗ Лариса Тарасова, «Чи лайӑх хирург» номинацире Валентин Ворончихин мала тухнӑ.

Иккӗмӗш вырӑна анестезиолог-реаниматологсенчен — Дмитрий Лукоянов, стоматологсенчен — Любовь Гаврилова, виҫҫӗмӗш вырӑна травматолог-ортопедсенчен Юрий Лемаев йышӑннӑ.

Республикӑри онкодиспансерӑн тӗп тухтӑрӗпе Светлана Орловӑпа унӑн ҫумӗ Сергей Алексеев вара ятарлӑ премие тивӗҫ пулнӑ

«Контактри» сӑн

Республикӑри кардиологи диспансерӗн виҫӗ кардиологӗ Эльбрус ҫине хӑпарнӑ.

Тухтӑрсем ҫӳллӗ тӑва пилӗк кун хушшинче парӑнтарнӑ: малтан климата хӑнӑхнӑ, кайран маршрутпа кайнӑ та финал тапхӑрне хатӗрленнӗ.

Пиллӗкмӗш кунхине вара вӗсем тинӗс шайӗнчен 5642 метр ҫӳллӗшне парӑнтарнӑ. ЧР Сывлӑх сыхлавӗн чӗрепе юн тымарӗсен тӗп хирургӗ Николай Трофимов каланӑ тӑрӑх, ҫулҫӳрев питӗ кӑсӑклӑ иртнӗ.

cap.ru сӑнӳкерчӗкӗ

Хальхи вӑхӑтри технологисем пурнӑҫа ҫӑмӑллатнине эпир хӑнӑхрӑмӑр ӗнтӗ. Тухтӑрсем те пурнӑҫпа тан пыраҫҫӗ. Телемедицина пулӑшнипе вӗсем пысӑкрах шайри клиникӑсенче ӗҫлекен пултаруллӑрах специалистсемпе канашлаҫҫӗ. Кун пек ҫыхӑну кардиологинче уйрӑмах пӗлтерешлӗ, чӗрепе чирлӗ ҫын пурнӑҫне ҫӑлса хӑварассинче кашни минучӗ пӗлтерӗшлӗ тесе пӗлтерет республикӑн Сывлӑх сыхлав министерстви.

Республикӑн кардиологи диспансерӗн спцеиалисчӗсем кӑҫалхи ултӑ уйӑхра регионти медицина организаицийӗсене сӗнӳ-канашпа 2455 хутчен пулӑшнӑ. Ку вӑл пӗлтӗрхи ҫав тапхӑртинчен 26 процент нумайрах. Чылай чухне вырӑнти тухтӑрсем васкавлӑ пулӑшу кирлӗ самантсенче канашлаҫҫӗ. Мӗнпур консультацирен шӑпах ҫурри - ун пекки.

«Телемедицина – ҫӗнӗ тренд ҫеҫ мар, вӑл ҫын пурнӑҫне чӑннипех те ҫӑлса хӑварма пултаракан инструмент», - палӑртнӑ Республикӑн кардиодиспансерӗн тӗп врачӗн ҫумӗ Александра Дубова.