Чӑваш наци музейӗ эндаумент-фонд йӗркелеме палӑртса хунӑ.
Пирӗн ҫӗршыври чылай музее патшалӑх тытса тӑрать. Асӑннӑ учрежденисем тӗрлӗ проект валли грантсем ҫӗнсе илме ӑнтӑлҫҫӗ, меценантсем шыраҫҫӗ. Анчах ку вӑл — яланхи тупӑш мар. Эндаумент текен япала вара ялан тупӑш илсе тӑма май парать иккен.
«Музейра эндаумент-фонд йӗркелесси – калӑпӑшлӑ тӗллев. Унпа маларах «Эрмитаж», Вырӑс музейӗ, Третьяков галерейи йышши паллӑ музейсем ҫеҫ ӗҫленӗ. Регионсенчисенчен эндаумента тӑватӑ регионта ҫеҫ, вӗсем пурте Урал леш енче, йӗркеленӗ: Омскра, Томска, Красноярскра, Владивостокра. Раҫҫейӗн Европа пайӗнчи регионсенчен эпир пӗрремӗш пулӑпӑр, краеведени музейӗсенчен ҫӗршывра — иккӗмӗш», – тенӗ музей директорӗ Ирина Меньшикова.
Чӑваш Енре «Ӑшӑпа тивӗҫтерессин диспетчер служби» информаци тытӑмӗ ӗҫлесе кайнӑ. Асӑннӑ программа сетьсенче тата объектсенче сиксе тухакан инкеклӗ лару-тӑрӑва сӑнаса тата тӗрӗслесе тӑма май парать.
Республика Элтеперӗн Администрацийӗн пресс-служби пӗлтернӗ тӑрӑх, ҫӗнӗ служба ресурссемпе тивӗҫтернин тухӑҫлӑхне ӳстерме пулӑшӗ.
2023 ҫулӑн иккӗмӗш ҫур ҫулӗнче диспетчер тытӑмӗпе ӑшӑ энергийӗн 520 ҫӑлкуҫне тата потребительне ҫыхӑнтарса пӗтересшӗн. Паянхи куна диспетчер служби 130 объекта тӗрӗслесе тӑрать.
Шупашкартан Ҫӗнӗ Шупашкара тата Кӳкеҫе ҫӳрекен маршруткӑсен маршручӗсен схеми улшӑннӑ. Ку хыпара республикӑн Транспорт тата ҫул-йӗр хуҫалӑхӗн министерстви пӗлтернӗ.
Муниципалитетсен хушшинчи 234-мӗш маршрут пассажирсене «Шупашкар-Ҫӗнӗ Шупашкар-Шупашкар» ҫулпа турттарать. Республикӑн тӗп хулинчи В.И. Чапаев ячӗллӗ производство пӗрлешӗвне кайнӑ чухне вӑл Энтузиастсен, Грасис, Граждан тата Социалистически урамсем тӑрӑх кайма тытӑннӑ; каялла ҫаврӑнса килнӗ чухне — Социалистически, Граждан, Эльмень тата Энтузиастсен урамӗсемпе.
Шупашкартан Кӳкеҫе хутлакан 325-мӗш маршрут «Хлеб» (чӑв. Ҫӑкӑр) общество патне ҫитет.
Улшӑну ҫурла уйӑхӗн 13-мӗшӗнчен вӑя кӗнӗ.
Федерацин налук службин Чӑваш Енри управленийӗн ӗҫченӗсем ҫывӑх вӑхӑтра ҫынсене пропискӑна пӑхмасӑрах йышӑнма тытӑнӗҫ. Ҫӗнӗ йӗрке кӑҫалхи ҫурла уйӑхӗн 29-мӗшӗ хыҫҫӑн вӑя кӗрӗ.
Хальхи вӑхӑтри налукҫӑсен регионсенчи уйрӑмӗсем ҫынсене регистрацие кура йышӑнаҫҫӗ. Малалла вӗсем икӗ шайлӑ управлени тытӑмӗпе ӗҫлеме пуҫлӗҫ. Федерацин налук службин тытӑмне пур ҫӗрте те улӑштарса пыраҫҫӗ.
Федерацин налук службин Чӑваш Енри управленийӗн пӗрлештернӗ подразделенийӗсен йышне 9 налук инспекцине кӗртнӗ. Хальхи вӑхӑтра ӗҫлекен Йӗпреҫри, Куславккари, Муркашри пайсем юлмӗҫ.
ИНН свидетельствине хальхи вӑхӑтрал онлайн мелпе илме пулать. Тепӗр майлӑ каласан, асӑннӑ хут кирлисен Налук инспекцине кайса ҫӳремесен те.
Шупашкар хулинче пурӑнакансем ҫӗнӗлӗхпе хастар усӑ кураҫҫӗ. Кӑҫалхи ҫур ҫулта ҫеҫ хулари 4,5 пин ытла ҫын ИНН свидетельствине илме кӑмӑл тунӑ, вӗсенчен 598-шӗ — налук органне каймасӑр.
Онлайн-пулӑшупа усӑ курас тесен Раҫҫейӗн Налук службин сайтне кӗмелле те «Личный кабинет налогоплательщика для физических лиц» (чӑв. Уйрӑм ҫынсем валли налук тӳлекенсен уйрӑм пӳлӗмӗ) сервиса суйламалла. Унта ИНН тӳлевсӗр уҫласа илме май пур. ИНН илес тесен заявление ҫырма «Жизненные ситуации» (чӑв. Пурнӑҫри лару-тӑру) ярӑма кӗмелле.
Шупашкарти инженерсем сасӑсӑр тата ҫутҫанталӑка сиенлӗ витӗм кӳмен трактор шухӑшласа кӑларнӑ. Электричество хӑвачӗпе ҫӳрекен техникӑна Шупашкарти силовой агрегатсен заводӗнче шухӑшласа тупнӑ.
Ҫӗнӗ техника теплицӑсем, зоопарксем, ҫутҫанталӑк заповедникӗсем валли аван, мӗншӗн тесен унта дизель аналогсен сасси вырӑнлӑ мар. Трактор хускалнӑ тата ҫӳренӗ чухне сасси илтӗнмест те темелле тесе ӗнентереҫҫӗ заводра.
Техника валли кирлӗ тимӗр комплектсене йӑлтах заводра кӑлараҫҫӗ. Гидроцилиндрсемпе гидравлика — хамӑр ҫӗршыврисем. Электромоторсемпе редукторсене те заводрах туса кӑларма йышӑннӑ. Ҫавна май ҫитес ҫул вӑл трактора йӑлтах хамӑр ҫӗршыври компонентсемпе туса кӑларма тытӑнасшӑн.
Чӑваш Енри музейсене, вулавӑшсене тата архивсене те QR-кодсӑр е ятарлӑ справкӑсӑр кӗртмӗҫ. Ҫапла хушӑва республика Элтеперӗ ӗнер алӑ пуснӑ.
Асӑннӑ учрежденисене кӗрес тесен е ковидран вакцинациленнине ҫирӗплетсе памалла, е кӑшӑлвируспа чирленӗренпе ҫур ҫул иртменнине кӑтартса паракан справка кирлӗ пулӗ, е ковид ерменнине ӗнентерекен ПЦР-тест ыйтӗҫ.
Хальлӗхе ун пек документсене кафесемпе ресторансенче, бассейнсемпе мунчасенче тата ытти ҫавӑн пек организацисенче ыйтма тивӗҫ.
Хушнине итлеменнисене штрафлама юрать. Уйрӑм ҫынсене — 1 пинрен пуҫласа 30 пин тенкӗ таран, должноҫри ҫынсене — 10 пинрен 50 пин тенкӗ таран, усламҫӑсене — 30 пинрен 50 пин тенкӗ таран, предприяти-организацисене — 100 пинрен 300 пин тенкӗ таран.
Роспотребнадзорӑн Чӑваш Енри управленийӗ ҫӗнӗ йышӑну хатӗрленӗ. Юпа уйӑхӗн 11-мӗшӗнчен тытӑнса патшалӑх тата муницпалитет слущащийӗсен, вӗренӳ, сывлӑх сыхлав, соцаллӑ хӳтлӗх кӳрекен тата халӑха тивӗҫтерекен сферӑра ӗҫлекенсен кӑшӑлвирусран прививка тутармалла.
Такси водителӗсен, общество апатланӑвӗн предприятийӗсенче, илем салонӗсенче, мунчасемпе саунӑсенче, физкультурӑпа сывлӑх комплексӗсенче, фитнес-клубсенче, бассейнсенче, музейсенче, вулавӑшсенче, кинотеатрсенче тата ытти ҫавӑн пек вырӑнта ӗҫлекенсен вакцинациленмелле.
Вакцинаци тутарманнисене чӳк уйӑхӗн 1-мӗшӗнчен тытӑнса е ӗҫрен хӑтарӗҫ, е инҫет ҫыхӑну мелӗпе ӗҫлеттермелле тӑвӗҫ. Профилактика прививкине тума тухтӑрсем хушманнисене ҫеҫ «тӗкӗнмӗҫ».
Чӑваш Енре хӑш-пӗр учреждение юпа уйӑхӗн 11-мӗшӗнчен QR-кодпа кӗртме тытӑнассине Чӑваш халӑх сайчӗ унччен темиҫе хутчен те пӗлтернӗччӗ-ха. Халӗ пирӗн республикӑра асӑннӑ кода тӗрӗслеме май паракан ресурса хатӗрлесе ҫитернӗ.
Ҫынсене ҫӗнӗ йӗркепе йышӑнма тивӗҫ организацисен qr.cap.ru сайта кӗрсе регистрациленмелле. Унта ятарлӑ мобильлӗ приложение уҫласа илмелли каҫӑ пур тата епле ӗҫлемеллине вӗрентнӗ.
Ҫӗнӗлӗхпе ҫыхӑннӑ мӗнпур ыйтӑва 122 телефон номерӗпе йышӑнаҫҫӗ. Техника енчен пулӑшакансем патне 8 сехетрен пуҫласа 20 сехетчен шӑнкӑравлама май пур.
Кӑшӑлвирусран иммунитет пуррине тӗрӗслесе кӗртме тивӗҫ организацисем шутне ҫаксем кӗреҫҫӗ:
— кинотеатрсем (кинозалсем), театрсем, театрпа концерт учрежденийӗсем, культурӑпа кану учрежденийӗсем, ҫавӑн йышши ытти организаци;
— СПА-салонсем, массаж салонӗсем, солярисем;
— мунчасем, саунӑсем, ҫавӑн йышши пулӑшу кӳрекен ытти объект;
— шыва кӗмелли бассейнсем, фитнес-центрсем, физкультурӑпа спортӑн ытти объекчӗ;
— ресторансем, кафесем, столовӑйсем, буфетсем, барсем, хупахсемпе общество апатланӑвӗн ытти предприятийӗ.
Раҫҫейӗн чукун ҫулӗсем 053/054-мӗш номерлӗ «Чувашия» (чӑв. Чӑваш Ен) фирма пуйӑсне икӗ хутлӑ вакунсенчен йӗркелесшӗн. Кун пирки хальлӗхе официаллӑ пӗлтермен-ха, анчха ун пек сӑмах-юмах тухнӑ.
Кӑҫалхи ҫу уйӑхӗн 8-мӗшӗнчен 071/072-мӗш номерлӗ «Чебоксары-Москва» (чӑв. Шупашкар-Мускав) пуйӑс икӗ хутлӑ вакунсем ҫине куҫрӗ.
Раҫҫейӗн чукун ҫулӗсем пӗлтернӗ тӑрӑх, 2019 ҫулхи кӑрлач-ҫӗртме уйӑхсемпе танлаштарсан кӑҫалхи ҫур ҫулта икӗ хутлӑ вакунсем 1,5 хут нумайрах пассажира турттарнӑ.
+5.3 °C