Улатӑр районӗнчи Ҫӗнӗ Эйпеҫ ялӗнче пурӑнакан нумай ачаллӑ икӗ ҫемьен пысӑк савӑнӑҫ пулнӑ. Вӗсене патшалӑх тӳлевсӗрех ҫурт туса панӑ. Кун пирки Улатӑр район администрацийӗн пресс-служби пӗлтерет.
Ҫемьесем валли республикӑри «Ҫурт-йӗр хутшӑнӑвӗсене йӗркелесси пирки» саккунпа килӗшӳллӗн туса панӑ. Ҫӗнӗ Эйпеҫ ялӗнче пурӑнакан 7 ачаллӑ ҫемье валли ҫурт тумашкӑн республика хыснинчен 1 миллион та 29 пин те 476 тенкӗ уйӑрнӑ. 6 ачаллӑ ҫемье валли вара 1 миллион та 343 пин те 581 тенкӗ уйӑрса панӑ.
Аса илтерер: нумаях пулмасть Пӑрачкав ялӗнче пурӑнакан 7 ачаллӑ ҫемьене те патшалӑх ҫурт туса пани пирки хыпарланӑччӗ.
Никита Тӗнчен ҫемйи мӗнле пурӑнать? Ӑҫта ҫитнӗ вӗсем? Кун пирки сайтра ҫак кунсенче ҫырман. Апла, Тӗнчесен ҫулҫӳревне пӑхса тухар.
Тӗнчесем Европӑна ҫул тухни пирки пӗлтернӗччӗ. Халӗ Никитӑпа Настя тата вӗсен пӗчӗк хӗрӗ Аяран Европӑран урӑх ҫӗрелле ҫул тытнӑ – вӗсем Африкӑна, Мароккӑна, каяҫҫӗ.
Пирӗн паталла хӗл ҫывхарать, Тӗнчесем вара ҫулталӑкӗпех ҫулла хуҫаланакан ҫӗршыва каяҫҫӗ. «Африкӑн ҫурҫӗр енче пулӑпӑр, питӗ интереслӗ, мӗн унта?» - ҫырнӑ Никита.
Тӗнчесен виза пӗтнӗ-мӗн, ҫавӑнпа Испанирен тухма тивнӗ.
Пӑрачкавра пурӑнакан пӗр ҫемье ҫичӗ ачана воспитани парать. Вӗсем пилӗк ывӑлпа икӗ хӗре ура ҫине тӑратаҫҫӗ. Нумай ачаллӑскерсем пурӑнмалли условисене лайӑхлатас тесе 2013 ҫулта черете тӑнӑ. Ҫак кунсенче вӗсен килне савӑнӑҫ ҫитнӗ – ҫемьене ҫурт парнеленӗ.
Ӗнер, юпа уйӑхӗн 2-мӗшӗнче, нумай ачаллӑ ҫемьене ҫӗнӗ пӳртӗн уҫҫине панӑ. Унта йӑлтах пур: газ, ҫутӑ, шыв. Пӗтӗмпе – 174,7 тӑваткал метр. Ҫурта Пӑрачкав ял тӑрӑхӗн администрацийӗ 4,2 миллион тенкӗпе хута янӑ.
«Пирӗншӗн, нумай ачаллӑ ҫемьешӗн, кун пек ҫурта тивӗҫни – пысӑк телей», - тенӗ ҫемье вучахӗн управҫи.
ТАСС пӗлтернӗ тӑрӑх, ялта пурӑнакан ҫамрӑк специалистсемпе ҫемьесене ипотека кредитне 3 процентпа пама тытӑнасшӑн. Ку условисем ялсене комплекслӑ аталантармалли ҫӗнӗ патшалӑх программипе килӗшӳллӗн пулӗҫ.
Кун пирки РФ ял хуҫалӑх министрӗн ҫумӗ Иван Лебедев СФ комитечӗн тухса ҫӳрекен канашлу лапамӗнче каланӑ. Халӗ РФ Ял хуҫалӑх министерствинче ҫӑмӑллӑхлӑ ипотека кредичӗ илмелли условисене пӑхса тухаҫҫӗ.
ТАСС министр ҫумӗн сӑмахӗсене илсе кӑтартнӑ: «Ялти ҫамрӑк специалистсемпе ҫемьесене ҫӑмӑллӑхлӑ ипотекӑпа пулӑшни – ҫӗнӗ пуҫару тата революциллӗ йышӑну – 3 процентран пуҫласа регионсен софинансированине шута исле 0,1 процент таран чакармалли».
Чӑваш Енри 2-мӗш следстви изоляторӗнче хӗрпе каччӑ пӗрлешнӗ. Кун пирки Айӑплава пурнӑҫлакан федераци службин Чӑваш Енри управленийӗ пӗлтерет.
Хӗр савни патне кӗске вӑхӑтлӑ тӗлпулӑва килнӗ. Ҫавӑн чухне вӗсем пӗр-пӗрне ылтӑн ҫӗрӗ тӑхӑнтартнӑ, мӑшӑрланнине ҫирӗплетсе алӑ пуснӑ. Каччӑ следстви изоляторне лекнӗ пулин те ку уншӑн нумай кӗтнӗ савӑнӑҫ пулнӑ.
Ҫӳлерех асӑннӑ ведомство ӗҫченӗсем пӗлтернӗ тӑрӑх, кунашкал учрежденисенче мӑшӑрланни час-часах тӗл пулать. Нумаях пулмасть юсанмалли колонире тӑватӑ мӑшӑр ҫемье ҫавӑрни пирки хыпарланӑччӗ.
Саранск хулинче «Атӑл тӑрӑхӗнче ӑнӑҫлӑ ҫемье» конкурс фестиваль иртнӗ. Унта Атӑл тӑрӑхӗнчи пур регионтан та хутшӑннӑ – пӗтӗмпе нумай ачаллӑ 14 ҫемье.
Чӑваш Ен чысне Элӗк районӗнчи Тӑвӑш Юнтапа ялӗнче пурӑнакан Александровсем хӳтӗленӗ. Вӗсем хӑйсен виҫӗ пепкине тата опекӑна илнӗ ултӑ ачине воспитани параҫҫӗ, ура ҫине тӑратаҫҫӗ. Вӗсем ҫемье пирки чӑваш наци костюмне тӑхӑнса каласа кӑтартнӑ, пушӑ вӑхӑтра мӗн тума юратни ҫинчен те пӗлтернӗ. Ҫемье ачисене ӗҫе мӗн ачаран хӑнӑхтарать, алисене хисеплеме вӗрентет.
Палӑртма кӑмӑллӑ: Александровсем «Ӗҫ династийӗ» номинацире ҫӗнтернӗ.
Елчӗк районӗнчи Кипеҫ ялӗнче туслӑ ҫемье пурӑнать. Галина тата Петр опекӑна илнӗ 8 ачана ҫитӗнтереҫҫӗ. Хӑйсен вара – виҫӗ ача. Анчах хуйхӑ вӗсен алӑкӗнчен шакканӑ – ывӑлӗ сарӑмсӑр вилнӗ. Кун хыҫҫӑн вӗсем ача ҫуртӗнчен шӑпӑрлан илнӗ. Андрей ун чухне 8 ҫулта пулнӑ.
Унтан ҫемьене Кемӗр облаҫӗнче ҫуралнӑ 14 ҫулти Владислава илнӗ. Халӗ вӑл ҫара кайса килнӗ ӗнтӗ. Кайран мӑшӑр Кристинӑна, Анастасийӑна, Ангелинӑна тата Аринӑна ӑшӑлӑх парнеленӗ. Кун хыҫҫӑн Алексейпе Сергея опекӑна илнӗ.
Ачасене ӗҫпе пиҫӗхтерсе ӳстереҫҫӗ. Анчах малтанах ҫӑмӑл килмен. Асли, тӗслӗхрен, содержани те каласа кӑтартайман. Ашшӗ-амӑшӗ унпа ҫур ҫӗр иртни 2 сехетчен урок тунӑ. Халӗ вӑл лайӑх паллӑсемпе вӗренет.
Галинӑпа Петр тӑлӑхсене чун ӑшшине парнелеме хӗрхенмеҫҫӗ. Вӗсем тата та ача илме хирӗҫ мар.
Шупашкарта пурӑнакан пӗр амӑшӗ патне опека органӗсем тӗрӗслевпе ҫитнӗ. Хӗрарӑм ачисене пӑхманни, хӑй сиенлӗ йӑласемпе тусли пирки кӳршисем ҫӑхавланӑ-мӗн.
Анчах тӗрӗслев ҫакна ҫирӗплетмен: ҫемьере йӑлтах йӗркеллӗ. Кӳршисем ҫӑхавланӑ тӑрӑх, амӑшӗ эрех ӗҫет, ачисене пӑхмасть, вӗсем ҫине пӗрмай кӑшкӑрать.
Опека органӗсем тӗрӗсленӗ хыҫҫӑн ҫакӑ суя пулнине палӑртнӑ. Хӗрарӑм ачисене пӗчченех ӳстерет, пурӑнмалли условисем пур. Ачисем тутӑ, амӑшӗ эрех-сӑра ӗҫмест, ӗҫлет. Амӑшӗ ӑнлантарнӑ тӑрӑх, шӑпӑрлансем питӗ «чӗрӗ», пӗр вырӑнта лармаҫҫӗ, ишме ҫӳреҫҫӗ.
Нумай ачаллӑ, ипотека илнӗ ҫемьесемшӗн ку ҫӑмӑллӑх тинех ҫитет. Кун пирки кӑҫал нумай калаҫрӗҫ-ха, анчах саккун вӑя кӗменччӗ. Сӑмах – нумай ачаллӑ ҫемьесене ипотекӑна тӳлемешкӗн 450 пин тенкӗ парасси пирки.
Халӗ паллӑ: ку саккун авӑн уйӑхӗн 25-мӗшӗнче вӑя кӗрӗ. Ку тӳлеве ҫемьесем 2019 ҫулхи кӑрлачӑн 1-мӗшӗнчен пуҫласа 2022 ҫулхи раштавӑн 31-мӗшӗччен ҫуралнӑ виҫҫӗмӗш е ун хыҫҫӑнхи ачашӑн тивӗҫеҫҫӗ. Укҫапа ипотекӑн тӗп парӑмне тӳлеме май пулӗ. Ку сумма 450 пин тенкӗрен пӗчӗкрех пулсан – процентсемшӗн.
450 пин тенке илмешкӗн ҫемьесен банка пырса заявлени ҫырмалла.
Элӗк районӗнчи Тавӑтра пурӑнакан пилӗк ачаллӑ Саватинсем патшалӑх туса панӑ пӳрте пурӑнма куҫнӑ.
Район администрацийӗнче пӗлтернӗ тӑрӑх, нумай ачаллӑ ҫемье ҫуртлӑ пулас тесе 2012 ҫулта черете тӑнӑ. 3 ывӑлпа 2 хӗр ӳстерекен йыш паян ҫӗнӗ пӳрте пуҫласа ура ярса пуснӑ. Ҫак пулӑм ячӗпе вырӑнти артистсем пухӑннӑ. Ҫурта кӗнӗ ҫӗре хӗрлӗ хӑю карнӑ. Юлашкинчен каланине касма тӳре-шара ҫитнӗ.
Ҫурта вырӑнти МСО хӑпартнӑ. Шӑпах вӑл муниципалитет контрактне пурнӑҫа кӗртмелли конкурсра тивӗҫнӗ.
Пӳртӗн пӗтӗмӗшле калӑпӑшӗ — 71,3 тӑваткал метр. Унта шыв, ҫутӑ кӗртнӗ, газ пур. Ҫурта ҫемьене социаллӑ найм мелӗпе панӑ.
Патшалӑх шучӗпе пӳртлӗ пулнӑ ҫемьене тӳре-шара саламланӑ, Саватинсем вара патшалӑха тав тунӑ.
+10.3 °C