Шупашкарта пурӑнакан 47 ҫулти арҫынна ҫынсене суйса пропискӑна тӑратнӑшӑн явап тыттарасшӑн. Ун тӗлӗше пуҫиле ӗс пуҫарнӑ.
Таджиксене хӑйӗн хваттерӗнче пропискӑна тӑратнӑшӑн ӑна лешсем укҫа тата икӗ мӑшӑр кроссовки панӑ. Ҫавӑншӑн арҫын тӑватӑ таджика пропискӑллӑ тунӑ. Хваттере ют ҫӗршыв ҫыннисене вӑл авӑн уйӑхӗн вӗҫӗнче пропискӑна тӑратнӑ. Пурӑнма арҫын хӑй тӑванӗпе (вырӑсла хыпарта сестра тенӗ) пурӑннӑ, 20-26 ҫулсенчи таджиксем вара Ярмӑрккӑ урамӗнче хваттер тара илнӗ.
Юпа уйӑхӗн 14-мӗшӗнче ҫӗрле пирӗн республикӑра Узбекистан номерӗллӗ автобуса тытса чарнӑ.
А-151 автоҫулпа пыракан транспортра 50 ҫын ларса пынӑ, вӗсем Узбекистанран тата Таджикстанран килнӗскерсем пулнӑ. Автобус Мускавран тӑван ҫӗршыва кайма тухнӑ иккен. Салонта пулнисенчен ҫиччӗшӗн пирӗн ҫӗршывра пулма ирӗк паракан документсем пулман.
Саккуна пӑсса пирӗн ҫӗршывра пурӑннисем тӗлӗшпе административлӑ ӗҫ пуҫарнӑ.
Автобуса йӗрке хуралҫисем чикӗ леш енне каҫса кайичченех сӑнаса пынӑ.
Автобус водительне вара йӗркене пӑсса пирӗн ҫӗршыва килнӗ ҫынсене турттарса ҫӳренӗшӗн явап тыттарма йышӑннӑ.
Шупашкарта ачасем вылямалли лапам патӗнче пӗр кунхине ӳсӗр арҫын выртнӑ.
Пӑтӑрмах Кривов урамӗнчи нумай хваттерлӗ ҫуртсен картишӗнче пулнӑ. Асфальт ҫинче выртакан арҫыннӑн аллинче эрех кӗленчи пулнӑ.
Ӑна видео ӳкерсе илекенсем пулнӑ, унтан ҫавна халӑх тетелӗнче вырнаҫтарнӑ.
Йӗрке хуралҫисем ҫав арҫынна тупса палӑртнӑ. Вӑл 62-рискер иккен. Ӑна административлӑ майпа явап тыттарасси пирки икӗ протокол шӑрҫаланӑ.
«Ҫыхӑнура» порталта пӗлтернӗ тӑрӑх, видеона тата ытти ӳсӗр те лекнӗ, вӗсене явап тыттарнипе тыттарманни пирки паллӑ мар.
Эх, ҫав эрех! Пӗр ҫынна та ырӑ тумасть ҫав вӑл. Пӗрех этем алли ун енне туртӑнать.
Шупашкарта пурӑнакан 51 ҫулти арҫын килӗнче тӑванӗпе (РФ Следстви комитечӗн Чӑваш Енри управленийӗн сайтӗнчи вырӑсла хыпарта «брат» тенӗ. Те пиччӗшӗ ӗнтӗ, те шӑллӗ. — Т.Т. асӑрхаттарӑвӗ) хирӗҫсе кайнӑ. Хӑй ӳсӗр пулнӑ. Сӑмахпа ҫӗнтереймессӗн туйӑннӑ пуль-ши — алла ҫӗҫӗ ярса илнӗ те унпа пӗр хутчен чикнӗ. Шар курни куҫне ӗмӗрлӗхе хупнӑ.
51 ҫулти арҫынна ҫынна вӗлернӗшӗн суд тенкелӗ ҫине лартӗҫ.
Улатӑрта пурӑнакан пӗр хӗрарӑм пасарта маркӑламан атӑ-пушмак сутнӑ. Ҫавна Роспотребнадор ӗҫченӗсем тупса палӑртнӑ.
Уйрӑм усламҫӑ маркӑламан 15 мӑшӑр пушмак тата тавар ҫаврӑнӑшӗн мониторингне кӗртмен 4 мӑшӑр пушмак сутнӑ.
Кӑлтӑк тӗлӗшпе надзор органӗн ӗҫченӗсем административлӑ ӗҫ пуҫарнӑ, саккунсӑр продукцие туртса илӗ.
Суд Роспотребнадзорпа килӗшнӗ, усламҫӑ-хӗрарӑма административлӑ майпа явап тыттарма, таварне конфискацилеме йышӑну кӑларнӑ.
Усламҫӑ Таможня союзӗн техника регламентне пӑхӑнманнине те, потребительсене хӳтӗлесси ҫинчен калакан саккуна тата Тавар сутмалли правилӑна пӑснине те тупса палӑртнӑ. Уншӑн та ӑна административлӑ майпа явап тыттарнӑ.
Ҫӗнӗ Шупашкарти шкулсенчен пӗринче педагога укҫа енчен хӗсӗрленине тупса палӑртнӑ. Кӑлтӑка прокуратура асӑрханӑ.
Кӑҫалхи кӑрлач уйӑхӗнчен пуҫласа ҫу уйӑхӗн вӗҫӗччен учительсенчен пӗрне ыттисенчен самай сахалтарах преми парса пынӑ. Вӗрентекен вара ытти чухнехи пекех ӗҫленӗ, ӑна дисциплина тӗлӗшӗнчен явап тыттарман. Унчченхи приказсене тишкернӗ те, тӑрӑшса ӗҫленине палӑрнӑ.
Суйласа преми панӑшӑн шкул директорне прокуратура штрафлама йышӑннӑ.
Арӑмӗпе упӑшки ҫӳпҫипе хупӑлчи теҫҫӗ те Шупашкарта пурӑнакан ҫамрӑк мӑшӑр та пӗр ҫӑвартан пурӑннӑ. Анчах ырӑ ӗмӗт-шухӑшпа ҫунатланса та ӗмӗтленсе мар. Вӗсем иккӗшӗ те преступлени ҫулӗ ҫине тӑнӑ.
Арҫынпа хӗрарӑма пакунлисем хулари Гагарин урамӗнче асӑрханӑ. Вӗсем сутма юраман япаласене сутакан интернет-лавкка пирки пӗлтерӳ ҫыпӑҫтарса ҫӳренӗ.
Хӑйсем ӗҫленине вӗсем ӳкерсе илнӗ, сӑнӳкерчӗсем отчёт валли кирлӗ пулнӑ.
Халӗ иккӗшне те административлӑ майпа явап тыттарӗҫ.
Елчӗк районӗнче пурӑнакан 55 ҫулти арҫын питӗ кӗвӗҫ пулнӑ тата ҫынна хӗнеме юратнӑ.
Тӑнлавӗ пасарнӑ арҫын ҫулӗ кайнине пӑхмасӑрах кӗвӗҫме пӑрахман. Пӗрле пурӑнакан хӗрарӑма вӑл кӳрши ҫумне хушса вӑрҫнӑ. Кӑҫалхи пуш уйӑхӗн 20-мӗшӗнчен пуҫласа ака уйӑхӗн 10-мӗшӗччен хӗрарӑма виҫӗ хутчен хӗненӗ, 5 аяк пӗрчине хуҫнӑ. Ун хыҫҫӑн хӗрарӑм унпа текех пурӑнас темен.
Ҫу уйӑхӗн 6-мӗшӗнче арҫын унччен пӗрле пурӑннӑ хӗрарӑма шыраса 80-ри карчӑк патне кайнӑ. Лешӗ ман патра ҫук тесе калани килӗшмен, ватӑ ҫынна хӗнесе пӗтернӗ, унӑн икӗ карас телефонне, телефона зарядкӑна лартмалли хатӗрсене тата ҫӑра уҫҫине йӑтса тухса кайнӑ.
Кӗҫех арҫынна РФ Пуҫиле кодексӗн виҫӗ статйипе, ҫав шутра ҫын пурлӑхне вӑрланӑшӑн та, суд тӑвӗҫ.
Сӗнтӗрвӑрри районӗнчи Туппай Сӗмӗл ялӗнче чылай вӑхӑт шывсӑр ларнӑ. Ҫавӑн пирки тӗнче тетелӗнче те пӑшӑрханса ҫыракансем пулнӑ. Пӑтӑрмах пирки пӗлсен вырӑнти прокуратура тӗрӗслев ирттерме йышӑннӑ.
Ялта ака уйӑхӗн 28-мӗшӗнчен пуҫласа ҫу уйӑхӗн 7-мӗшӗччен шыв пулман. Унӑн сӑлтавӗ — шыв башнин насусӗ ҫунса кайни.
Прокуратура тӗрӗсленӗ хыҫҫӑн «Мариинский» муниципалитетӑн унитарлӑ предприятийӗ ҫине тӑманнине палӑртнӑ. Уншӑн предприяти директорӗн тивӗҫӗсене пурнӑҫлакана административлӑ майпа явап тыттарса штрафлама йышӑннӑ. Унсӑр пуҫне шыв укҫине ҫӗнӗрен шутласа пама хистенӗ.
Йӗпреҫ районӗнчи Хурамал ялӗнче пурӑнакан 41 ҫулти арҫын хӗрӗсене алимент тӳлесшӗн пулман. Ӑна РФ Пуҫиле кодексӗн 157-мӗш статйин 1-мӗш пайӗпе явап тыттарнӑ май ӑна 5 уйӑх ӗслесе юсантарма йышӑннӑ. Ҫав вӑхӑтра тупӑшӑн 10 процентне патшалӑх валли тытса юлӗҫ.
Ачисене алимент тӳлеменшӗн арҫынна унччен административлӑ майпа явап тытарнӑ-ха. Апла пулин те вӑл парӑма ҫур миллион тенкӗрен те ирттерсе янӑ.
+1.3 °C