Ҫӗрпӳ округӗнчи Чурачӑк ялӗнчи шкула аванӑн 1-мӗшӗнче уҫмалла пулнӑ. Икӗ уйӑх кая юлнӑ. Шкул алӑкӗсене ӗнер кӑна, чӳкӗн 7-мӗшӗнче, уҫӑлнӑ.
Шкула 2023 ҫулта пуш уйӑхӗнче тума тытӑннӑ. Ун валли уйӑрнӑ 339,5 млн тенкӗ ҫумне тепӗр 93 млн тенкӗ хушма тивнӗ.
Ҫӗнӗ шкула уҫиччен ачасем авариллӗ тесе йышӑннӑ кивӗ шкулта вӗреннӗ. Ҫӗнӗ шкул – 350 ача валли. Хальхи вӑхӑтра унта 283 ача вӗренет.
Улатӑр округӗнчи Чуварлей ялӗнче ҫӗнӗ шкул тӑвасшӑн. Ҫавна май аукцион ирттереҫҫӗ.
Малтанхи хак – 611,5 миллион тенкӗ. Аукциона чӳк уйӑхӗн 8-мӗшӗнче пӗтӗмлетӗҫ.
Шкул виҫӗ хутлӑ пулӗ. Ҫавӑн пекех 3 автобус вырнаҫмалӑх гараж, котельнӑй тӑвӗҫ.
Сӑмах май, Чуварлейри хальхи шкул кивӗ, хальхи стандартсемпе килӗшсе тӑмасть. Вӑл –1957 ҫулта хута янӑскер.
Эрнекун Муркаш муниципаллӑ округӗнчи Ильинка вӑтам шкулӗнче Б.И. Гузовский ячӗллӗ ҫӗнелнӗ музей уҫӑлнӑ. Хӗрлӗ хӑйӑва Чӑваш Республикин ҫутҫанталӑк пурлӑхӗсемпе экологи министрӗн ҫумӗ Елена Дымза, Муркаш муниципаллӑ округӗн пуҫлӑхӗ Алексей Матросов тата шкул директорӗ Надежда Иванова каснӑ.
Хӑнасем валли пӗрремӗш экскурсие «Вӑрман тусӗсем» шкул лестничествинче вӗренекен ачасем ирттернӗ. Вӗсем музейри экспонатсем пирки каласа панӑ, вӑрман пирки хӑйсем мӗн пӗлнине уҫса панӑ.
Хӑнасем те пуш алӑпа килмен: «Сӑрҫум» заповедникӑн директор ҫумӗ йӑвасем илсе килнӗ, теприсем антресоль, виҫмелли вилка, ҫӳллӗше виҫмелли хатӗр, ытти япаласем парнеленӗ.
Комсомольскинче 640 ача вӗренмелӗх шкул пулӗ. Акцион ирттерсе ҫӗнтерӳҫе палӑртнӑ. Ку ӗҫе Ҫӗрпӳри «ПМК 8» организаци пурнӑҫлӗ. Кун валли 1 миллиард та 275 миллион та 878 пин те 462,81 тенкӗ уйӑрӗҫ.
Подрядчикӑн шкула 2026 ҫулхи утӑ уйӑхӗн 31-мӗшӗччен туса пӗтермелле. Унта 2 тата 3 хутлӑ икӗ блок пулӗ. Ӗҫе пуҫӑниччен малтан кивӗ шкула ишсе антармалла.
Шупашкар муниципаллӑ округӗнчи Тутаркасси ялӗнчи шкулта ӗҫлекен Альбина Ишовӑна «Чӑваш Республикин халӑх учителӗ» хисеплӗ ят пама йышӑннине Чӑваш халӑх сайчӗ пӗлтернӗччӗ-ха. Ку ята вӑл педагогикӑра тата воспитани ӗҫӗнче чылай ҫул тӑрӑшса ӗҫленӗшӗн тивӗҫнӗ.
Альбина Валентиновна Тутаркассинчи шкулта ачасне чӑваш чӗлхипе литературине вӗрентет. Вӑл — Чӑваш Республикин тава тивӗҫлӗ учителӗ, аслӑ категориллӗ вӗрентекен.
Альбина Ишован вӗренекенӗсем яланах тӗрлӗ конкурсра ҫӗнтереҫҫӗ. Хастар учитель хӑй вӑхӑтӗнче шкулта класс-музей уҫнӑ. Унта тӑван халӑхӑмӑр йӑли-йӗркипе палалшма пулать, ҫавӑнтах уроксем иртеҫҫӗ.
Юпа уйӑхӗн 11-мӗшӗнче Ҫӗрпӳ хулинчи М.В. Силантьев герой ячӗллӗ 1 номерлӗ шкулта «Пурӑн, пирӗн Ҫеҫпӗл!» — «Живи, наш Сеспель!» ятлӑ поэзи уявӗ иртӗ.
«Вӗрентекенсене, библиотека ӗҫченӗсене, кӑмӑл тата вӑхӑт тупакансене пурне те уява йыхравлаҫҫӗ», — тесе пӗлтернӗ Лидия Филиппова журналист мессенджерсенчен пӗринчи ушкӑнра.
Мероприятие Чӑваш халӑх поэчӗ Юрий Сементер, Лидия Филиппова, Василий Захаров, Любовь Петрова, Николай Ишентей, Георгий Хавал, Ортем Гали, Роза Беляева, Геронтий Никифоров хутшӑнӗҫ.
Шупашкарта пурӑнакан ватӑсем ӳкерме вӗренеҫҫӗ. Ҫак ӑсталӑха вӗсем хулари халӑхн социаллӑ ыйтӑвӗсене тивӗҫтерекен комплекслӑ центрӗнче туптаҫҫӗ.
Паян, Пӗтӗм тӗнчери ваттисен кунӗнче, учрежденире ҫӗнӗ проект хута кайнӑ.
Ватӑсене ӳкерме Шупашкарти Акцыновсем ячӗллӗ 6-мӗш ӳнер шкулӗн преподавателӗ, Чӑваш Республикин тава тивӗҫлӗ художникӗ Николай Фёдоров вӗрентнӗ.
Пӗрремӗш занятире кинемейсене вӑл натюрморт ӳкерме сӗннӗ. Ку енӗпе, паллах, хӑй вӗрентсе, кӑтартса, пулӑшса пынӑ.
Чӑваш патшалӑх культурӑпа ӳнер институчӗ пултаруллӑ ачасен «Эткер» центрӗпе пӗрле авӑн уйӑхӗн 23-27-мӗшӗсенче ӳнер ӑсталӑхӗпе кӑсӑкланакан пултаруллӑ ачасем валли пултарулӑх сменисем ӗҫленӗ.
Ӑна 4 вӗренӳ программипе йӗркеленӗ: «Хореографи», «Музыкӑпа инструмент ӳнерӗ: гитара», «Эстрада оркестрен инструменчӗсем», «Театр ӳнерӗ». Сӑмах май каласан, юлашкинчен асаннӑ икӗ смена унччен пулман, вӗсене хале кӗртнӗ.
Пӗр эрнере 60 ача вӗреннӗ. Вӗсем — Чӑваш Енри 15 ӳнер шкулӗнчен.
Чӑваш Енри 8 шкул вӗренӳ тытӑмӗнчи инноваци пултарулӑхне аталантарма 500 пин тенкӗлӗх грант илӗ. Кунашкал гранта ҫулсеренех параҫҫӗ.
Кӑҫал ку укҫана Шупашкрати 65-мӗш тата 47-мӗш шкулсем, Шупашкарти 1-мӗш гимнази, Ҫӗнӗ Шупашкарти 6-мӗш гимнази, Ҫӗрпӳри 1-мӗш шкул тивӗҫнӗ.
Чӑвашла вӗрентес чи лайӑх практикӑшӑн Ҫӗмӗрле округӗнчи Хутар шкулӗ, Элӗкри И.Я.Яковлев ячӗллӗ шкул, Йӗпреҫ округӗнчи Пучинке шкулӗ грант илнӗ.
Тӳре-шара Ҫӗрпӳ округӗнчи Чурачӑк шкулӗ ку вӗренӳ ҫулӗ тӗлне уҫӑласса шантарнӑччӗ. Анчах вӑл уҫӑлман.
Пӗлӳ кунӗнче уяв линейки ҫӗнӗ шкул умӗнчех иртнӗ, анчах ачасем халӗ те киввинчех вӗренеҫҫӗ. Вӑл авариллисен йышӗнче шутланать.
375 вырӑнлӑ ҫӗнӗ шкула 2023 ҫулхи пуш уйӑхӗнче тума тытӑннӑ. Ӑна планпа кӑҫал утӑ уйӑхӗн 31-мӗшӗнче хута ямалла пулнӑ.
+27.3 °C