Вырсарникуна пӗтӗмлетме вӑхӑт:

• кӑшӑлвирус ҫаклатнисен йышӗпе Аслӑ Британи 6-мӗш вырӑна ҫитнӗ. Китайран иртсе кайса. Сӑмах май, Китайра та паян 99 ҫӗнӗ ҫынна тупса палӑртнӑ. Иккӗмӗш хум пуҫланасран шикленме пулать — вӗсем нумай пулмасть кӑна-ҫке хӑйсен пурнӑҫне йӗркене кӗртме пуҫланӑччӗ...

• тӗнчере 1,845 млн ҫын кӑшӑлвируса ҫаклатнӑ. Ытларах та пуль — статистика пурне те кӑтартмасть-ҫке. 114 пине яхӑн вилнӗ...

• ҫӗнӗ ҫынсем хушӑннипе Раҫҫей паян 7-мӗш вырӑна тухнӑ. Малта АПШ (+24 пин), Аслӑ Британи (+5,3 пин), Турци (+4,8 пин), Итали (+4,1 пин), Испани (+3,1 пин) тата Франци (+2,9 пин).

• 1 пин ытларах ҫавӑн пекех Германире (+2,0), Иранра (+1,7), Бельгире (+1,6) тата Голландире (+1,2) тупса палӑртнӑ.

• кӑшӑлвируса ҫаклатнисен йышӗпе Раҫҫей 16-мӗш вырӑна хӑпарнӑ — Австринчен иртсе кайнӑ (лешсен паян +139 ҫын). Хӑвӑртлӑх чакмасан Португали те ҫӳлте нумаях тытӑнса тӑмӗ — вӗсемпе пирӗн патшалӑх хушшинче 815 ҫын ҫеҫ тӑрса юлнӑ.

• кун хушшинче 10% ытла ӳснӗ чирлисен йышӗпе Беларуҫе (+352; Украинӑран та иртсе кайӗҫ пуль...), Узбекистана (+98), Бангладеша (+139), Ганӑна (+158; пурӗ вӗсен 566 ҫеҫ! — ку Африкӑри патшалӑх), Кӑркӑсстана (+38), Гватемалӑна палӑртма пулать.

• тата тепӗр танлаштару: кӑшӑлвирус тӗрӗслевӗ пирки. Калӑпӑр, АПШ влаҫӗ ку тӗлӗшпе питӗ мухтанатчӗ. Ку тӗлӗшпе Раҫҫей 3-мӗш вырӑнта. Малта АПШ — кунта 2,8 млн тӗрӗслев ирттернӗ. Иккӗмӗш вырӑнта — Германи (1,3 млн). Раҫҫейре 1,2 млн ҫынна тӗрӗсленӗ тет. 1 миллион ҫынна ҫавӑн пекех Италире тӗрӗсленӗ. Ку статистикӑра Китай ҫук — вӗсем ытларах та ирттернӗ пуль.

• Гана патне таврӑнас пулсан — вӑл Африкӑна вырнаҫнӑ, унта хӗл нихҫан та пулмасть темелле. Ҫавна май, ӑшӑ килсен вӑл кӑшӑлвируса ҫӗнтерӗ тенине шанни кӑлӑхах. Ганӑпа юнашарти патшалӑхсенче те чирлисем чылай: Кот-д'Ивуарта — 533, Буркина-Фасора — 484, Тогора — 76, Нигеринче — 318, Камерунта — 820. КУратӑр пуль: хӗртсе пӑхакан хӗвел кӑшӑлвируса пӗрре те чӑрмантармасть.

Сывлӑхлӑ пулӑр! Ан чирлӗр!

chuvash.org/news/24865.html — Никита Тӗнче Чӑваша таврӑнма васкамасть...

www.kp.ru/online/news/3832848/ — Китайри ӑсчахсем тӗпчев ирттернӗ. Вӗсен пӗтӗмлетӗвӗпе кӑшӑлвирус чирлӗ ҫынран теприсене 4 метр таран сывлӑшпа ерме пултарать.

стопкоронавирус.рф/news/20200412-1649.html — ПТССО (ВОЗ) та ман шухӑшах пӗлтерет — Мускавра чирлекенсен йышӗ хӑвӑрт ӳснин сӑлтавсенчен пӗри шӑп та лӑп ҫынсен ҫӑмӑлттайлӑхӗ. «Мана ку пырса тивмӗ», — текенсем чылай.

Ҫӗнӗ Лапсар посёлокӗнче пуш-пушах темелле. Автобусра, ман умӗн иртсе каяканнинче, 2-3 ҫын кӑначчӗ. Водителӗ маскӑпа. Посёлокра та маскӑллӑ ҫынна 2-3 ҫеҫ куртӑм. Лаввка умӗнче амӑшӗпе ачи тӑратчӗҫ — амӑшӗ ачин пичӗ ҫинчи маскине тӳрлететчӗ. Кайран ман хыҫҫӑн кӗҫӗҫ.

Лавккинче, сӑмах май, кашни метртан касса умӗнче ятарлӑ паллӑсем ҫыпӑҫтарнӑ — ҫынпа ҫын хушши вырӑн пултӑр тесе ӗнтӗ. Анчах пӑхӑнаҫҫӗ-пӑхӑнмаҫҫӗ-и — курма май килмерӗ, касса умӗнче хам пӗччен кӑначчӗ.

Беларуҫра кӑшӑлвируслӑ ҫынсен йышӗ ӳсет: www.rbc.ru/rbcfreenews/5e92d68c9a794714c80b2293?from=newsfeed 

Енчен те ӗнер 301 ҫӗнӗ ҫынна тупнӑ пулсан, паян — 358.

Халь ҫакнашкал.

Юсарӗҫ — 11.

Чӑваш Республикин сывлӑх сыхлав министерствин сайтӗнче 20 минут ытла 12 ҫын пирки пӗлтерӳ тӑрать... Эх...

Чиркӳсем паян лӑк тулли тет:

medicin.cap.ru/news/2020/04/12/12-aprelya-v-chuvashii-covid-19-potverdilsya-esche — эх, ӑнманскерсем... Те 12, те 11...

vk.com/wall-181162659_8145 — «Пӑшӑрханман Чӑваш Ен» тӗплӗрех пӗлтернӗ: саккӑрӑшӗ республикӑра ҫаклатнӑ: Хулан иккӗмӗш пульницин 6 пациенчӗ тата унта ӗҫленӗ икӗ тухтӑр. Пӗри 1№ Хула клиника пульницин 3№ акушер стационарӗнче выртать. Икӗ ҫын тулашран ҫаклатса килнӗ.

Тинех республикӑри сывлӑх сыхлав министерстви хӑйӗн статистикине хатӗрлесе ҫитерчӗ. Пурӗ республикӑра 51 ҫын кӑшӑлвируса ҫаклатнӑ (+11), 2 сывалнӑ (+1). Ытти енӗпе цифрӑсем ӗнерхисемех.

Мурманск облаҫӗнчи Кола районӗнче инкеклӗ лару-тӑру режимӗ туса хунӑ. Кун пирки «Новости» РИА пӗлтернӗ.

Кола районӗнче пысӑк тоннӑллӑ тинӗс сооруженийӗсем тӑвакан центрта кӑшӑлвирус лекнӗ тӗслӗх йышлӑ-мӗн. Ҫӗнӗ мера ҫавӑнпа ҫыхӑннӑ.

«Пӑшӑрханусӑр Чӑваш Ен» комментарисенче ҫырать:

«Эпир ӑнлантарсаччӗ ӗнтӗ, регионти статистика тӗрӗсрех шутланать — мӗншӗн тесен вӑл регион лаптӑкӗнче пурӑнаканнисене шута илет. Федераци шайӗнчи вара тӗрӗслеве ӑҫта ирттернинчен пухӑнать, ҫавна пула эпир ӑна нихӑҫан та кӑтартмастпӑр та».

(…мы поясняли, что более точной считается региональная статистика, так как она учитывает тех, кто находится на территории региона. Федеральная формируется на основании места взятия теста и поэтому мы никогда её не выкладываем.)

Унсӑр пуҫне хальхи вӑхӑтра вӗсем информацие пухаҫҫӗ иккен, тӗрӗслеҫҫӗ. Пӗтӗмлетӳ тӑвайсанах хыпарлаҫҫӗ. Кӗтӗпӗр.

Редактор шухӑшӗ: вырӑссен менталитетне сӑнлакан пӗр сӑмах пур: «авось». Вӗсем ӑна хӑйсен ҫӑмӑлттайлӑхне тӳрре кӑларма тӑрӑшнӑ чухне усӑ кураҫҫӗ. Шел те, вырӑсланнӑ ҫемӗн чӑвашсем те ҫак йӑлана йышӑнса пыраҫҫӗ. Вӗсем ытларах хӑйсен вӑйне мар, темле вӑя (Турра-и унта, е ӑнӑҫулӑха...) шанма пуҫлаҫҫӗ. Ку вара хальхи лару-тӑрура пире пысӑк сиен кӳме пултарӗ.

Сывлӑхлӑ пулӑр! Ан чирлӗр!

Кӑшӑлвирус ернисен шучӗпе Раҫҫей тӗнчере 16-мӗш вырӑна хӑпарнӑ. 15-мӗшне хӑпарасси те иккӗленӳллӗ мар пулас. 17-мӗш вырӑна юлнӑ Австрире 13 838 ҫын чирленӗ, Раҫҫейре — 15 770. 15-мӗш вырӑн йышӑнакан Португалире вара — 15 987 (анчах вӗсем паянхи статистикӑна ҫӗнетмен-ха — ӗнер вӗсем 515 ҫӗнӗ тӗслӗх ҫеҫ пулнӑ).

Ҫур сехет иртрӗ, пирӗн сывлӑх сыхлав министерствинчен ҫӗнӗ хыпар ҫук. Вырсарникун... Канаҫҫӗ пулас. Е ӗҫе ҫитме йывӑр — паян республика юр айне пулнӑ.

Сывалнисен енӗпе Раҫҫейри стопкоронавирус.рф сайт пӗлтернӗ тӑрӑх пирӗн республикӑра 1 ҫын сывалнӑ (ун пирки республикӑри тӳре-шара ӗнерхи статситикӑра пӗлтернӗччӗ). Тутарстанра — 3 ҫын сывалнӑ, Мари Элте — 2. Вилнисен статистикинче пирӗн республика та кӳршӗсем те ҫук.

Раҫҫейре паян яланхи пекех ҫӗнӗ «ҫитӗнӳ» — +2 186 ҫын кӑшӑлвируса ҫаклатнӑ. Ҫаклатасса вӗсем, паллах, темиҫе кун маларах ҫаклатнӑ-ха та... статистикӑна вара паян лекнӗ.

Яланхи пекех кӳршӗсенчен Чулхула облаҫӗ малта — 42 ҫӗнӗ ҫын хушӑннӑ. Мӑкшӑ республикинче ӗнер кӑна 19 ҫын кӑначчӗ, пӗр ҫӗнӗ тӗслӗх те ҫукчче — паян вара 42 ҫынна ҫитнӗ (+23). Тутарстанра та паян пӗр ҫӗнӗ тӗслӗх те тупман тет-ха (вӗсен йышӗ епле ӳссе пынине Яндекс.Карттӑри график ҫине пӑхсах паллӑ).

Мари Элте 7 ҫӗнӗ тӗслӗх, Чӗмпӗр облаҫӗнче — 8. Ҫапла май, кӳршӗсем хушшинче пирӗн республика халӗ те аялтан иккӗмӗш вырӑнта-ха.

Статистика расналӑхӗ пирки: кӑшӑлвируса тупса палӑртакан лабораторисем республикӑра вырнаҫманнипе пулас, анализсене ытти тӑрӑхсене яраҫҫӗ. Пӗр енчен пирӗн республикӑра медицина япӑх мар аталаннӑ темелле, нумай-нумай укҫа-тенкӗ унта хываҫҫӗ, анчах та анализсене Чулхулана е ытти тӑрӑхсене яраҫҫӗ. ЧПУ-н медицина факультечӗ те япӑххисенчен мар-ҫке...

Ҫавна май ӗнтӗ результатсем тӳрех ҫитмеҫҫӗ пулас. Эпир хамӑр республикӑн статистики ҫине таянса ӗҫлӗпӗр. Паллах, ыттисене те пӗлтерсех тӑрӑпӑр.

Чӑваш Енри сывлӑх сыхлав министерстви тата «Контактра» халӑх тетелӗнчи «Пӑшӑрханусӑр Чӑваш Ен» ушкӑн ҫӗнӗ информаци хальлӗхе вырнаҫтарман-ха. Кӗтетпӗр.

Раҫҫейри паянхи статистика хатӗр:

Паянхи куна пӗтӗмлетсе ҫакна палӑртма пулать:

• COVID-19 вируса ҫаклатнисен йышӗ 1,77 млн ҫын таран ҫитнӗ.

• Вилнисен йышӗпе АПШ малти вырӑна тухнӑ (+1 557 паян) — унта 20,3 пин ҫын пурнӑҫӗ татӑлнӑ.

• Кун хушшинче нумай ҫӗнӗ тӗслӗх тупӑннӑ патшалӑхсен йышӗнче: АПШ (+22,7 пин), Аслӑ Британи (+5,2), Турци (+5,1), Франци (+4,8), Итали (+4,7). Кӑшӑлвируса ҫаклатнисен йышӗпе Аслӑ Британи ырансене Китайран иртсе кайӗ пулас, Турци вара Ирана хӑвалама пуҫлӗ. Асаилтерер, Иран кӑшӑлвирус вучахӗ пек маларах палӑрнӑччӗ.

• Малти 10 вырӑна шута илмесен пин ытла ҫӗнӗ ҫынна Раҫҫейре (+1,7 пин), Голландире (+1,3 пин) тата Канадӑра (+1 пин) тупса палӑртнӑ.

• Вирус ҫаклатнисен йышӗ 10% ытларах Раҫҫейре, Перура (+951), Индире (+846), Мексикӑра (+403), Пӗрлешӳллӗ Арап Эмиратӗнче (+376), Украинӑра (+308), Беларуҫре (+245), Кувейтра (+161), Узбекистанра (+143), Бахрейнра (+115) ӳснӗ.

• Ӗнер ҫӗнӗ тӗслӗхсемпе (+2,1 пин) питӗ вӑйлӑ палӑрнӑ Эквадорта вара паян 96 ҫынна кӑна тупнӑ...

Ан чирлӗр! Хӑвӑра упрӑр! Сывӑ пулӑр!

АПШ тӳри-шари кӑшӑлвирусшӑн Китая явап тыттарасшӑн: вӗсене пула имӗш халь ӗҫсӗрлӗх пысӑк, вируса пула вилекенсем чылай: ren.tv/news/politika/684778-v-ssha-predlozhili-nakazat-kitai-za-koronavirus

Ӗпхӳри пульницӑра 170 тухтӑрпа чирлӗ ҫынна кӑшӑлвирус ертни пирки следстви комитечӗ тӗпчев пуҫланӑ тет: ufacitynews.ru/news/2020/04/11/sledkom-bashkirii-nachal-proverku-posle-massovogo-zarazheniya-vrachej-i-pacientov-rkb-koronavirusom/

Дмитрий Песков пӗлтернӗ тӑрӑх Ҫӗнтерӳ Парадне урӑх куна куҫарасси пирки шухӑш пур.

//аса илтерер, маларах тӗрлӗ регионсенчи суйлав кунне куҫарма йышӑннӑччӗ. Авӑнӑн 13-мӗшӗнчи пӗрлехи суйлав кунӗ пирки те сас-хура тухнӑччӗ, анчах ӑна хальлӗхе куҫарман-ха.

Кӑшӑлвирус тупман регионсен йышӗ иккӗ юлнӑ. Алтай Республики тата Чукотка автономи округӗ.

Ӗҫсӗр тӑрса юлнисем валли: ӗҫпе тивӗҫтерекен центр инҫет мелпе епле ӗҫлени пирки кунта пӗлме пулать: mintrud.cap.ru/news/2020/04/07/vazhnaya-informaciya-po-registracii-i-pereregistra (регистрацилесси, регистрацине тӑсасси тата ытти те…)

Статистика расналӑхӗ пирки.

www.worldometers.info/coronavirus/ — кунти информацие тӗпе хурас пулсан ырансене Раҫҫей кӑшӑлвирус ҫаклатнисен йышӗпе Австринчен иртсе кайӗ.

Тинех статистикӑри пӑтрануллӑ самант пирки республикӑн сывлӑх сыхлав министерствинчен хыпар пур: 6 ҫӗнӗ тӗслӗх тет. Иккӗшӗ — республикӑра ҫаклатнӑ, тӑваттӑшӗ — ытти тӑрӑхран ҫаклатса килнӗ.

Чулхула облаҫӗнчи лаборатори результачӗсем киличченех вӗсене пульница хунӑ тет, кампа-кампа хутшӑннине маларах палӑртнӑ тет...

Кунта: medicin.cap.ru/news/2020/04/11/chislo-zaregistrirovannih-sluchaev-zarazheniya-cov

Раҫҫейри оперативлӑ штаб статистики тӑрӑх кӳршӗсенчи лару-тӑру йывӑрланса пырать. Чулхула облаҫӗ Раҫҫейпе 5-мӗш вырӑна тухнӑ, ытларах Мускавра, Мускав облаҫӗнче тете Питерта тата Коми Республикинче ҫеҫ. Тутарстанра +23 тӗслӗх (ӗнерех ҫӗнӗ тӗслӗхсем вӗсен пулман), Чӗмпӗр облаҫӗнче — +22 тӗслӗх (чылай вӑхӑт хушши 1 ҫын кӑна тупнӑччӗ вӗсен патӗнче...). Мари Элте тата Мӑкшӑ республикинче — паян хушӑнман. Анчах ырансенех тӑрук пысӑк хисеп хушӑнмассине пӗрре те шанма май ҫук.

Сывлӑхлӑ пулӑр! Ан чирлӗр!

Стопкоронавирус.рф сайтри статистика. «Пӑшӑрханусӑр Чӑваш Ен» те, республикӑн сывлӑх сыхлав министерстви те 34 пирки кӑна калать. Раҫҫей статистики тӑрӑх вара — +7 ҫын...

Кисан облаҫӗнче вара кӑшӑлвируспа кӗрешекенсем ытлашши нумай шухӑшласа тӑман — илнӗ те икӗ яла хупса лартнӑ. Заокское тата Коростова яла кӗрекен хытӑ ҫулсене хупласа хунӑ, таврари ахаль ҫулсене вара канав чавса хупланӑ. Сӑлтавӗ вара — ку ялсенче чирленисем чылай пулнинче (Кисан облаҫӗнчи пӗтӗм йышран 34% вӗсенче пурӑнать имӗш).

Те ку лару-тӑру тавра пысӑк шӑв-шав ҫӗкленнине пула, те урӑх сӑлтава пула Кисан облаҫӗн кӗпернаттӑрӗ Николай Любимов ҫавах та паян кӑнтӑрла карантина ку икӗ ялта пӗтерес тенӗ. Ҫавах та ял ҫыннисене килте ларма хушнӑ.

Кунта тӗплӗрех вулама пулать: progorod62.ru/news/22218

Сывлӑх сыхлав министерстви республикӑри лару-тӑру пирки информацие ҫӗнетнӗ:

• тухтӑрсен сӑнавӗнчен ҫулталӑк пуҫламӑшӗнче пурӗ 2 503 пулнӑ (+105);

• хальхи вӑхӑтра 861 ҫын сӑнавра тӑрать (+47);

• кӑшӑлвируса 34 ҫынӑнне тупса палӑртнӑ (0);

• икӗ ҫын сывалнӑ (+1).

Кунта пӑхма пултаратӑр: medicin.cap.ru/

Кӑшӑлвирус сиен кӳнипе АПШ-ра ҫапларах кӗрешеҫҫӗ: пӗчӗк бизнеса 168 млрд доллар уйӑрнӑ. Енчен те ку укҫана усламҫӑсем хӑйсен ӗҫченӗсене ӗҫ укҫи тӳлеме усӑ кураҫҫӗ пулсан — тавӑрмасӑр та пултараҫҫӗ. Экономикӑна тӗрев пама вара пурӗ АПШ 2 трлн доллар пӗтересшӗн пулас.

Кун пирки ахаль сайт мар, ТАСС пӗлтерет: tass.ru/ekonomika/8218465

Кашни хӑйне хӑй ирӗксӗрлесе килте мӗнле тытмалли пирки тата гигиенӑна епле пӑхӑнмалли ҫинчен «Машӑпа Упа» мультфильм урлӑ пӗлтересшӗн иккен. «Animaccord» (мультфильма ӳкерекен студи ячӗ) пӗрремӗш ролике паян, акан 11-мӗшӗнче Ютубри официаллӑ каналта кӑтартмалла.

Сӑмах май вырнаҫтарнӑ та иккен: www.youtube.com/watch?v=VOIbLDK4uBU

ТАСС пӗлтернӗ тӑрӑх Раҫҫейре паянхи кун тӗлне тухтӑрсем 159 пин ҫынна сӑнаса тӑраҫҫӗ.

Кунта вуласа пӗлме пулать: tass.ru/obschestvo/8218901

Ҫӗнӗ Мускавра хӑпартакан пульница чӑн та хӑвӑрт ӳсет. Ӗнерхи сӑнсене пӑхас пулсан — 2-3 хутлӑ ҫуртсен тӳррисене витме те ӗлкӗрнӗ. Китайпа танлашма йывӑртарах пулӗ-ха та ӗнтӗ, анчах та кунти масштаб пысӑкрах пулнине кура мухтамалли пур!

Хотя... Китайри стройкӑпа паллашсан — пирӗннисем вӗсене ҫавах ҫитеймеҫҫӗ пулас. 10 кун хушшинче хӑпартса лартнӑ пульница Китайра ҫав-ҫавах 1 пин чирлӗ ҫын валли. Ҫӗнӗ Мускаври вара — 500–600 валли ҫеҫ...

Пулӑшакансем тата та пур: АПШ хӑйӗн пулӑшӑвне Италие ярӗ. Хӑйсен лару-тӑрӑвӗ ҫӑмӑлах мар пулин те ҫапла май вӗсем тӗнчере малта пынине кӑтартасшӑн, унсӑр пуҫне малашлӑхра инфекци сарӑлассине чарасшӑн.

Сӑмах май, АПШ-ра ӗнер 2 пин ҫын ытла кӑшӑлвируса пула вилнӗ тет.

Сӑмах май, Китай тухтӑрӗсем Раҫҫее кӑшӑлвируспа кӗрешес ӗҫре пулӑшма килӗҫ. Кун пирки Китайӑн ЮҪӖМӗ (МИД) пӗлтерет. Миҫе ҫын килесси паллах мар-ха. Анчах паян ирхине вӗсем Раҫҫее килме тухнӑ та ӗнтӗ.

Раҫҫей ӑстисем, сӑмахран, вырӑнти тухтӑрсене Италире, Сербире тата Боснипе Герцеговинӑра пулӑшаҫҫӗ.

Китайри сывлӑх сыхлав ыйтӑвӗпе ӗҫлекен наци комиссийӗ пӗлтернӗ тӑрӑх паян Китайра ҫӗнӗ 42 тӗслӗх тупса палӑртнӑ — пурте ҫӗршыва килнисен йышӗнчен. 3 ҫын вилнӗ тет, 70 ҫын сывалнӑ.

Кунта пӗлтереҫҫӗ: www.nhc.gov.cn/xcs/yqtb/202004/be5fdf84937844bcb88841c2c6bb8145.shtml (Гугл е Яндекс урлӑ куҫарма пултаратӑр).

Тӗнчери статистика:

• вилнисен шучӗ тӗнчере 100 пинрен иртнӗ. Кунта малта Итали пырать, анчах ырансене АПШ иртсе каять пулас. Францире тата Аслӑ Британире вилӗм статистики пӑшӑрхануллӑ — ку патшалӑхсенче паян пин ҫын патнелле вилнӗ.

• Тунтикунсене Аслӑ Британи чирлисен йышӗпе Китая хуса иртсе кайӗ пулас. Паян унта 8,9 пин ҫын кӑшӑлвируса ҫаклатнӑ. Китайра вара — 42 кӑна. Вӗсенчен чылайӑшӗ — чикӗ леш енчен кӳрсе килнисем. Сӑмах май Аслӑ Британи паян Иранран иртсе кайнӑ — 7-мӗш вырӑна хӑпарнӑ.

• Францире ҫӗннисене чылай палӑртма пуҫланӑ. Паян — 7,1 пин. Турцире йыш 10% ытла ӳснӗ — +4,7 пин (пурӗ 47 пин).

• АПШ-ра кӑшӑлвируслӑ ҫын йышӗ ҫурмиллиона ҫите пуҫланӑ — 490 пин. Ыран 500 пин урлӑ каҫатех ӗнтӗ (кунне унта 20 пин ытла ҫӗнӗ тӗслӗх тупаҫҫӗ!).

• Тӗнчере, сӑмах май, 1,681 млн. — тепӗр май каласан, пӗтӗм йышран 1/3 патнелле пайӗ АПШ ҫынни.

• Малти 10 вырӑна шута илмесен кунне пин ытла ҫынна паян Эквадорта (+2,1 пин), Раҫҫейре (+1,8), Португалире (+1,5), Ирландире (+1,5), Бразилире (+1,5), Голландире (+1,3), Канадӑра (+1,2) тупса палӑртнӑ.

• Раҫҫей 17-мӗш вырӑна хӑпарнӑ. Ӗнер Израильти йышран иртнӗччӗ пулсан, паян Кӑнтӑр Корейӑран ҫӳлерех хӑпарнӑ. Чирлекенсен йышӗ ӳснин хӑвӑртлӑхӗ чакайсан Австри темиҫе кун ҫӳллӗрех тӑрӗ-ха та... Чакаймасан — ырансене е вырсарникунсене иртсе кайма та пултаратпӑр. Малта вара — йышпа пысӑкрах патшалӑхсем, вӗсене хуса ҫитме йывӑртарах пулӗ. Ирландипе Эквадор йышшисем хуса ҫитсе иртсе кайсан вара аяларах йӗркене те йышӑнма пултарӑпӑр.

• Пӑшӑрхануллӑ лару-тӑру ҫак патшалӑхсенче (кунне 10% ытла хушӑннӑ): Инди, Пӗрлешӳллӗ Арап Эмирачӗ, Доминикана Республики, Украина, Беларуҫ, Молдави, Венгри, Бангладеш. Юлашкинче пурӗ 424 тупса палӑртнӑ пулсан та кун хушшинче 94 ҫӗнӗ тӗслӗх хушӑннӑ. Ку патшалӑхсенче эпидеми пуҫланать кӑна пулас-ха.

Ан чирлӗр! Сывӑ пулӑр!

Раҫҫейри статистика:

• паян пурӗ тата 1786 ҫӗнӗ тӗслӗх хушӑннӑ, ҫав шутра Чӑваш Енри 15 ҫын (республикӑра тупни ыранхи статистикӑна ҫеҫ каять пулас...);

• кӳршӗсене пӑхсан Чулхула облаҫӗнче чи нумаййи. Иккӗмӗш вырӑнта вара Мари Эл. Унта 63 ҫын ҫак вируса ҫаклатнӑ.

• Тутарстан статистики кӑсӑклӑ — унта ҫӗнӗ ҫынсен йышӗ кашни 3 кунтан хушӑнса пырать (чылай чухне — самай ӳсет). Хальлӗхе унта 50 ҫын шутланать.

• Кӳршӗсене илес пулсан хальхи вӑхӑтра Мӑкшӑ Республики йышпа кайра — унта 19 ҫынна ҫеҫ тупса палӑртнӑ. Анчах манмалла мар — чылай вӑхӑт хушши вӗсем малтаччӗ... Чӗмпӗр облаҫӗ кайраччӗ те халь Чӑваш Енрен иртсе кайнӑ (40 ҫын). Мари Элте чылай вӑхӑт хушши пӗр ҫын та ҫукччӗ... — халь вара иккӗмӗш вырӑнта вӗсем...

Паянхи статистика. Малтан Чӑваш Республикинчи:

• тухтӑрсен сӑнавӗнче пурӗ 814 ҫын тӑрать. Ҫулталӑк пуҫламӑшӗнчен 2 398 ҫын тӗрӗслев урлӑ тухнӑ.

• кӑшӑлвируса 34 ҫынӑнне тупса палӑртнӑ, вӗсенчен пӗри сывалнӑ.

• йывӑр чирлекенсен йышӗнче — 4 ҫын (ку ӗнерхи информаци, паян ӑна ҫӗнетмен).

• вилнисене палӑртман.

Тӗнче тетелӗнче Чӑваш Енре кӑшӑлвируспа чирлекенсен списокӗ сарӑлнӑ. Ӳкерсе илнӗ хут ҫинче чирлисен ятне-шывне, вӗсем ӑҫта пурӑннине палӑртнӑ. Ку инфомаци тӗнче тетелне епле майпа лекнӗ? Ҫав ҫынна тупнӑ, 1 пин тенкӗ штраф тӳлеттерме йышӑннӑ.

Паян Чӑваш Ен чиккинче йӗрке хуралҫисемпе тухтӑрсем ытти регионтан килекенсене тӗрӗслеме пуҫланӑ. Ҫакна республикӑна кӑшӑлвируспа чирлӗ ҫын килесрен тӑваҫҫӗ. Тухтӑрсем пассажирсемпе калаҫаҫҫӗ, вӗсен сывлӑхӗпе кӑсӑкланаҫҫӗ, иккӗленӳ пур тӑк ӳт температурине виҫеҫҫӗ.

Тӗнчери лару-тӑру:

• кӑшӑлвирус ҫаклатнӑ ҫынсен шучӗ тӗнчере 1,5 миллионтан иртнӗ;

• Испанире чирлисен йышӗ 150 пин урлӑ каҫнӑ;

• Франци Германирен иртсе 4-мӗш вырӑна тухнӑ;

• Аслӑ Британи чирленисен йышӗпе Ирана хуса тытма пуҫланӑ, ырансене иртсе те каймалла пек;

• Раҫҫейре кӑшӑлвирус ҫаклатнисен шучӗ 10 пин урлӑ каҫнӑ — 18-мӗш вырӑна хӑпарнӑ;

• Китайра кун хушшинче 63 ҫӗнӗ ҫын ку чире ҫаклатнӑ, Кӑнтӑр Корейӑра — 39.

• кун хушшинче нумай ҫӗнӗ ҫынна нумай Перура (+914), Индире (+809), Эквадорта (+515), Беларуҫре (+420), Бангладешра (+112, пурӗ 330 ҫеҫ), Украинӑра (+224, пурӗ 1892), Азербанджанра (+104, пурӗ 926) тупнӑ. Кашнинче 10% ытла хушӑннӑ.

Ан чирлӗр, сывлӑхлӑ пулӑр!

Республикӑра искусствӗннӑй майпа сывлаттармалли 422 аппарат пур. Вӗсемпе коронавируспа чирлисене кӑна мар, ытти пациента та сиплемелле. Ҫавӑнпа ҫитес вӑхӑтра Чӑваш Ен тепӗр 36 аппарат туянасшӑн. Ҫу уйӑхӗнче тепӗр 94 аппарат ҫитмелле.

Хулари ача-пӑча клиника пульницин филиалӗсенче тата поликлиникисенче коронавирус сарӑнӑ тапхӑрта пациентсене скайп урлӑ сӗнӳсем парӗҫ. Вӗсем дистанци мелӗпе ака уйӑхӗн 8-мӗшӗнче ӗҫлеме пуҫланӑ.

Кӑшӑлвируспа чирлисен шучӗ Чӑваш Енре тата тепӗр 15 ҫын хушӑннӑ.

www.rbc.ru/rbcfreenews/5e8efdc59a79471dc29aee08 — кӑшӑлвирус ересрес профилактика тума тӑварлӑ шыв аван тет. Кун пирки Сывлӑх сыхлав министерствин информацийӗ ҫине таянса РБК пӗлтерет.

Чӑваш Енре кӑшӑлвируспа чирлесе хальхи вӑхӑтра пульницӑра сипленекен 18 ҫынран (пӗри, 19-мӗшӗ, сипленсе тухнӑ) тӑваттӑшӗ хӑйне йывӑр туяҫҫӗ-мӗн. Вӗсене кислородпа сывлаттараҫҫӗ. Кун пирки республикӑн Сывлӑх сыхлав министерстви пӗлтернӗ.

Вулаканӑмӑрсем! Ӗнер чирлерӗм (шӑннӑ пулас та пуҫ ыратрӗ), ҫавна май онлайн пирӗн кӑшт ҫӗнелмесӗр тӑчӗ. Пӗлтермелли вара чылайччӗ: Путин виҫҫӗмӗш хут халӑх умне тухса калаҫрӗ, кӑшӑлвируса вара тутарсемпе ытти чылай халӑхӑн мӑн асллашӗсене епле ҫӗнтернӗ ҫавнашкалах ҫӗнтерӗпӗр тесе шантарнӑ; Раҫҫейре халь кунне пин ытла ҫын кӑшӑлвируса ҫаклатать (ҫапла май эпир Швеципе Израильтен иртсе кайрӑмӑр...) тата ытти, тата ытти хыпар... Онлайна анлӑрах каҫалапа паян ҫутатма пуҫлас тетпӗр (пухӑнса кайнӑ ытти ӗҫсене туса пӗтернӗ хыҫҫӑн).

Чӑваш Енре кӑшӑлвируспа чирлӗ тата тепӗр икӗ ҫынна тупса палӑртнӑ. Вӗсенчен пӗри — Шупашкар ҫынни, вӑл чирлӗ ҫынпа хутшӑннӑ. Тепри Мускавран Комсомольски районне килнӗ.

Тӗнче шайӗнчи паянхи статистика:

• АПШ (391 пин /паян +23,6 пин хушӑннӑ/; вӗсенчен 12,5 пин вилнӗ);

• Испани (140 пин /+3,8 пин/; вӗсенчен 13,9 пин вилнӗ);

• Итали (136 пин /+3,0 пин/; вӗсенчен 17,1 пин вилнӗ);

• Франци (109 пин /+11,1 пин/; вӗсенчен 10,3 пин вилнӗ);

• Германи (107 пин /+4,1 пин/; вӗсенчен 2,0 пин вилнӗ);

• Китай (82,6 пин /+32 ҫын/; вӗсенчен 3,3 пин вилнӗ);

• Иран (62,6 пин /+2,1 пин/; вӗсенчен 3,9 пин вилнӗ);

• Аслӑ Британи (55,2 пин /+3,6 пин/; вӗсенчен 6,2 пин вилнӗ);

• Турци (34,1 пин /+3,9 пин/; вӗсенчен 0,7 пин вилнӗ);

• Швейцари (22,3 пин /+596 ҫын/; вӗсенчен 0,8 пин вилнӗ).

Пӗтӗмлетсе ҫапла калама май пур: Франци тӑваттӑмӗш вырӑна хӑпарнӑ. Кун хушшинче чи нумай ҫӗнӗ ҫын палӑртни тӑрӑх вӑл иккӗмӗш вырӑнта. Пин ытла кун хушшинче Бразилире (1,5 пин); Бельгире (1,4), Канадӑра (1,2), Раҫҫейре (1,2) тупса палӑртнӑ. Пилӗкҫӗртен ытла: Голландире (+777), Португалире (+712) тата Индире (+533).

Раҫҫей йышпа халь те 20-мӗш вырӑнта юлнӑ, анчах ӳсӗм хӑвӑртлӑхӗ Швеципе Израильтен пысӑкрах. Паян Раҫҫейре 1 154 тӗслӗх пулнӑ пулсан, Швецире — 487 (пурӗ 7 693), Израильте — 344 (9 248). Кӑнтӑр Корея та инҫех мар — унта 10 331 ҫын (паян +47 ҫеҫ).

Раҫҫейре йыш ӳссе пыни юнашарти патшалӑхсене те витӗм кӳрет: Белоруҫре паян +161, Украинӑра — +143. Казахстан +35 кӑтартнӑ, Армени +20, Грузи +8, Азербайджан +76 (кунта ҫавӑн пекех Турци витӗмӗ сахал мар).

Паян, ака уйӑхӗн 7-мӗшӗнче, Чӑваш Енре кӑшӑлвируспа чирлӗ тата тепӗр 9 тӗслӗх шута илнӗ. Кун республикӑн влаҫ органӗсен официаллӑ порталӗнче ЧР Элтепер Администрацийӗн пресс-служби пӗлтернӗ.

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян Шупашкарти 1-мӗш клиника пульницин 3-мӗш акушер стационарӗнче пулнӑ. Кӑшӑлвируспа чирлисене унта йышӑнма хатӗррине тӗрӗсленӗ.

vk.com/bezpaniki21?w=wall-181162659_4487 — кӗҫнерникун, акан 9-мӗшӗнче, Олег Николаев тӳрӗ лини ирттерӗ, пӗчӗк тата вӑтам усламҫӑсене епле пулӑшасси пирки сӑмах пулӗ.

Ыйтусене «Чувашия без паники» (Пӑшӑрханман Чӑваш Ен) ушкӑнра та йышӑнаҫҫӗ пулас.

Раҫҫейрипе Чӑвашри статистика пӗртан марри пирки «Пӑшӑрханман Чӑваш Ен» (Чувашия без паники) ушкӑнра пӗлтернӗ:

«Эпир те ҫак ыйтӑва ҫӗклерӗмӗр. Шел пулин те, федераци агрегаторӗпе регион министрӗсен даннӑйӗсен хушшинчи йывӑрлӑхпа тӗл пулнӑ пӗртен-пӗр регион кӑна мар (маларах эпир чӑваш Енре чирленисен пӗр пайне Мускавра анализ панӑран унта кӗртнӗ тесе ҫырнӑччӗ). Ҫавӑнпа регионти тӗрӗсленӗ даннӑйсене ҫеҫ пӗлтеретпӗр тата пирӗн пата килекен информацие тӗплӗн тӗрӗслетпӗр» — ҫапла ҫырнӑ (ку Яндекс.Тӑлмач куҫарӑвӗ).

Ҫӑлкуҫӗпе кунта паллашма пулать: vk.com/bezpaniki21?w=wall-181162659_4480_r4496  

Пӗтӗмлетсе каласан, пӗртан марри пирӗн ҫеҫ мар, ытти тӑрӑхсенче те пур. Саккӑрӑшӗнчен иккӗшӗ апла-тӑк Мускавра шутланаҫҫӗ...

Раҫҫейре кун хушшинче пӗр пин ытла кӑшӑлвирус ернӗ ҫӗнӗ ҫынна палӑртнӑ. Пурӗ 1154 ҫын.

Чӑваш Республикинче — +3 ҫын. Ҫапла май 6 ҫын шутланать. Раҫҫейрипе вырӑнти статистика мӗншӗн пӗрешкел мар? Сӑлтавӗ пирӗн шутпа 2 ҫынни Мускавра шутланнинче (лешсем, хайхи тарса килнисем). Шел те, оперативлӑ штаб ку тӗлӗшпе пире нимӗн те калаймарӗ.

Кӳршӗсене илес пулсан, чылайӑшӗнче ӳсмен. Чӗмпӗр облаҫӗнче ҫеҫ 2 ҫын хушӑннӑ. Халӗ унта 4 ҫын шутланать.

Паянхи кун Чӑваш Республикинче ҫакнашкал статистикӑпа пуҫланать:

• ҫулталӑк пуҫланнӑранпа 2105 ҫынна тӗрӗсленӗ (+158);

• 704 ҫынна (+142) сӑнаса тӑраҫҫӗ;

• 8 тӗслӗх тупнӑ (+2);

• 1 ҫын сывалнӑ;

• 0 вилнӗ.

Тӗнче шайӗнчи паянхи статистика:

• АПШ (356 пин /паян +19,7 пин хушӑннӑ/; вӗсенчен 10,5 пин вилнӗ);

• Испани (135 пин /+3,4 пин/; вӗсенчен 13,2 пин вилнӗ);

• Итали (133 пин /+3,6 пин/; вӗсенчен 16,5 пин вилнӗ);

• Германи (102 пин /+1,4 пин/; вӗсенчен 1,7 пин вилнӗ);

• Франци (98 пин /+5,2 пин/; вӗсенчен 9,0 пин вилнӗ);

• Китай (82,6 пин /+39 ҫын/; вӗсенчен 3,3 пин вилнӗ);

• Иран (60,5 пин /+2,3 пин/; вӗсенчен 3,7 пин вилнӗ);

• Аслӑ Британи (51,6 пин /+3,8 пин/; вӗсенчен 5,3 пин вилнӗ);

• Турци (30,2 пин /+3,1 пин/; вӗсенчен 0,7 пин вилнӗ);

• Швейцари (21,7 пин /+552 ҫын/; вӗсенчен 0,8 пин вилнӗ).

Кун хушшинче кӑшӑлвируспа чирленӗ пин ытла ҫынна Бельгире кӑна тупса палӑртнӑ. Пӗр пин патнелле: Канадӑра (986), Раҫҫейре (954), Голландире (952). Пакистанра чирлисен йышӗ хӑвӑрт ӳсет (+609), Индире (+489), Португалинче (+452), Филиппинра (+414).

Кӑшӑлвирус тупса палӑртнин йышӗпе Раҫҫей 20-мӗш вырӑна хӑпарнӑ ӗнтӗ — Австралипе Норвегине иртсе кайнӑ. Малта Швеци тата Израиль. Паянхи пекех пӗр пин патнелле ҫӗнӗ тӗслӗх тупмасан вӗсене хӑвӑртах иртсе каймалла мар пек. Швецинче те Израильте те COVID-10 кӑшӑлвируслӑ ҫынсене кун хушшинче сахал мар тупаҫҫӗ. Швецинче паян 376 тупнӑ, Израильте — 181. Анчах палӑртас пулать — Израильте ку вӑхӑт тӗлне 8,6 пин ҫынӑнне тупса палӑртнӑ, Раҫҫейре вара 6,3 пинӗшӗнне ҫеҫ.

Белоруҫ статистики хумхантарать. Паян унта 138 ҫӗнӗ ҫынна тупса палӑртнӑ, пурӗ вара — 700 кӑна. Кӑркӑсстанра 69 кӑшӑлвируслӑ ҫӗнӗ ҫынна паян тупса палӑртнӑ, ҫапла май унта пӗтӗмӗшле йыш 216 ҫитнӗ!

Ираида Зейналова НТВ эфирӗнче суя информаци панӑ тет: Раҫҫейре кӑшӑлвирусран 40 пин ҫын вилни пирки пӗлтернӗ. Ҫав вӑхӑтрах ун хыҫӗнчи экран ҫинче официаллӑ майпа палӑртнӑ информаци курӑннӑ.

Кун пирки, сӑмахран, «Газета.ру»-ра вуласа пӗлейретӗр: www.gazeta.ru/social/news/2020/04/06/n_14255635.shtml (аса илтерер, паян ирхи те Чӑвашра миҫе ҫынна ерни пирки пӑтрануллӑ лару-тӑру пулса иртрӗ..)

ППЭ кӑҫал каярах пуҫланмалла. Чи пӗрремӗш экзаменсене ҫӗртмен 8-мӗшӗнче ирттересшӗн. Ачасен пӗлӗвне ун чухне географи, литература тата информатика предмечӗсемпе тӗрӗслесшӗн. Утӑ уйӑхӗн 11-мӗшӗ тӗлне экзаменсем вӗҫленмелле.

Кун пирки ТАСС пӗлтерет: tass.ru/obschestvo/8173875

Медицина ӗҫченӗсем кӳршӗри тӑрӑхсенче те кӑшӑлвирус ҫаклатаҫҫӗ: Пушкӑртстанра — пилӗкӗшне ертнӗ, Чулхулара та пӗри ҫаклатнӑ теҫҫӗ.

Пушкӑртстан пирки кунта итлеме пултаратӑр: vk.com/video-172931669_456239067?list=8ef6dadb03a5ca891b

Православи тӗнне ӗненекенсен Мӑнку ҫывхарать, чиркӳре вара пухӑнма сӗнмеҫҫӗ хальхи вӑхӑтра. Шупашкарти чиркӳсем кӗлӗ службисене тӳрӗ эфирта ирттерӗҫ.

Пушӑн 28-мӗшӗнче РФ Президенчӗ Владимир Путин халӑх патне тӳрӗ эфира тухнӑ чухне федераци амӑшӗн капиталне илме тивӗҫ ҫемьесене пандеми вӑхӑтӗнче 5-шер пин тенкӗ парассине пӗлтернӗччӗ. Чӑваш Енре кунашкал тӳлеве 34 пин ача тивӗҫӗ. Ӑна 3 уйӑх тӳлӗҫ.

Хулари 2-мӗш пульница стационарне карантина хупнӑ. Унта кӑшӑлвируспа чирлӗ ҫынпа хутшӑннӑ пациент е тухтӑр /кӑна хальлӗхе пӗлтермен/ пур-мӗн. Поликлиника вара унчченхи йӗркепех ӗҫлет. Тӗплӗнрех кунта: chuvash.org/news/24828.html.

Паллӑ ҫынсен пурнӑҫне сӑнама юратакансем валли: Лев Лещенкӑпа Игорь Николаев кӑшӑлвирусран сывалнӑ, вӗсене киле янӑ.

Кунта вулӑр: www.kommersant.ru/doc/4315705#id1878415

Чӗмпӗр облаҫӗнчи ҫӗнӗ чирлӗ ҫын пирки:

• Пуш уйӑхӗн 19-мӗшӗнче вӑл Балирен канса таврӑннӑ.

• «Мускав–Самар» пуйӑс ҫине ларса Сызраньте тухнӑ; пушӑн 21-мӗшӗнче Новоспасска киле ҫитнӗ.

• 21–22-мӗшсенче никампа та хутшӑнман, амӑшӗпе ҫеҫ.

• 23-мӗшӗнче пульница хутне хупас тӗллевпе Новоспасск пульницине офтальмолог патне кайнӑ.

• Тепӗр кунхине, пушӑн 24-мӗшӗнче, хӑй ӗҫлекен шкула кайса ӗҫрен каясси пирки заявлени ҫырнӑ.

• Пушӑн 25-мӗшӗнче хӑйне япӑх туйнине пула терапевт патӗнче пулнӑ.

• Пушӑн 27-мӗшӗнче вӑл вара сӑнав йышне лекнӗ.

• Пушӑн 30-мӗшӗнче кӑшӑлвирус тӗлӗшпе анализ панӑ.

• Пушӑн 31-мӗшӗнче ОРВИ палӑрӑмӗсем пулнӑран ӑна сыватма пуҫланӑ.

• Ака уйӑхӗн 1-мӗшӗнче Чӗмпӗр облаҫӗн гигиенӑпа эпидемиологи центрӗ хӗрарӑмӑн кӑшӑлвирус пуррине палӑртнӑ, ҫавна май иккӗмӗш тӗрӗслеве Мускава янӑ.

• Акан 6-мӗшӗнче Мускав лабораторийӗнчи тӗрӗслев хӗрарӑм чирленине ҫирӗплетнӗ.

Кун пирки кунта пӗлме пулать: drugoigorod.ru/new-zaragen-korona/

Паянхи график:

Кӑшӑлвируса пула импӗр, ыхра тата лимон хакланса кайни пирки пӗлетӗрех пулӗ. Халь вара ку тӗлӗшпе Тӗп прокуратура тӗрӗслев ирттерӗ. Монополипе кӗрешекенсенчен ку мӗншӗн ҫапла пулса тухнине ыйтнӑ.

Кунта вулама пулать: life.ru/p/1317013

Татарстанра ятарлӑ сайт ӗҫлет: rt-covid19.ru/  

Унта та вӗсен информаци пӗр пекех. Хусанти аэропорт хӑйӗн ӗҫне чарса лартманнине пула ӗнтӗ вӗсен ҫавӑн пекех миҫе пассажира тӗрӗслени пирки информаци пур.

Чулхула облаҫӗн сывлӑх сыхлав министерстви пӗлтернипе Раҫҫери пӗтӗмӗшле статистика хушшинче уйрӑмлӑх ҫук. Унта та кунта та 56 тесе ҫыраҫҫӗ (пирӗн тӑрӑхри лару-тӑру: Чӑваш Енри сывлӑх сыхлав министерстви 8 тесе палӑртать (паян +4), Раҫҫейри пӗтӗмӗшле статистикӑра вара — 3).

Унсӑр пуҫне вӗсен ҫирӗплетсех ҫитерейменнисен йышӗ те пур. 31 ҫын вӑл списокра тет.

Кунта пӑхса илме пултаратӑр: zdrav-nnov.ru/

Михаил Мурашко Пӗрремӗш каналти «Познер» программӑра пурне те маскӑпа ҫӳреме чӗнсе каланӑ.

Аса илтерер, маска чирлисемшӗн кӑна усӑллӑ. Тата ан манӑр: ун ҫине лекнӗ вирус унта эрне таран пурӑнма пултарать.

Михаил Мурашко ҫапларах каланӑ тет: «Камӑн вирус пуррипе ҫуккине эпир пӗлместпӗр-ҫке. Енчен те пӗри усӑ курать, тепри ҫук — шанӑҫӗ сахалрах. Енчен те пурте пӗр-пӗр хӳтӗлевпе усӑ кураҫҫӗ пулсан — ку лайӑхрах». Кунта вулама пулать: ria.ru/20200406/1569640928.html

Кӑшӑлвирус тӗлӗшпе кашни ҫын тӗрӗсленме пултарать. Анчах куншӑн тӳлеме тивӗ. Роспотребнадзор пӗлтернӗ тӑрӑх хакӗ 1250 тенкӗ тӑрӗ. Кунсӑр пуҫне вӗсене ҫул укҫишӗн тата тӳлеме тивӗ (ара, киле пырса тӗрӗслӗҫ-ҫке...).

Хальлӗхе сӑмах Мускав хулипе Мускав облаҫӗнче пурӑнаканнисем пирки пырать: ria.ru/20200406/1569634797.html

Кремль Ҫӗнтерӗвӗн 75 ҫулне палӑртма 65 ҫултан аслисене чӗнмелле марри пирки Правительствӑна ҫыру янӑ тет. Кун пирки «Эхо Москвы» пӗлтерет: echo.msk.ru/news/2620115-echo.html  

Ҫӗнтерӳ Парадне урӑх вӑхӑта куҫарасси пирки хальлӗхе сӑмах-юмах тухманччӗ-ха.

Кӑнтӑрлапа палӑртнӑ чӑшӑлвируспа чирлесе ӳкнӗ икӗ ҫын пирки кӑшт информаци пур: пӗри Шупашкартан. Тепри — Вӑрмартан. Кун пирки «Чувашия без паники» (чӑвашла «Чӑваш Енре хӑрамалли ҫук» е «Пӑшӑрханман Чӑваш Ен» пек куҫармалла ӗнтӗ) ушкӑнра пӗлтернӗ: vk.com/bezpaniki21?w=wall-181162659_4176_r4224

Тӗп прокуратура Чӑваш Енре суя хыпарлавҫӑсене тупнӑ (фейк-ньюс текен япалана). Сӑмах «Мы из Чувашии» ятлӑ пӗрлӗх пирки пырать иккен. Унта Шупашкара тӗппипех хупасси пирки сӑмахланӑ. Ку вара суя информаци пулнӑ. Информаци вырнаҫтараканӑн халь ҫакӑншӑн явап тытмалла пулӗ. Кун пирки кунта ҫырнӑ: genproc.gov.ru/smi/news/genproc/news-1821006/  

Эпир, сӑмах май, тӗрӗсленӗ информаци кӑна лартатпӑр, вырнаҫтарнин ҫӑлкуҫне кӑтартатпӑр.

«Ирхине пӗтӗмпе паянхи кун тӗлне республикӑра 6 ҫынна чирлӗ тесе шута илнӗ пулсан, каярахпа тата ҫӗнӗ хыпар килсе ҫитнӗ, тепӗр 2 ҫынна COVID-19 инфекцийӗпе чирлӗ пулнине пӗлтернӗ. Ҫапла вара Чӑваш Енре коронавируспа чирлекен 8 ҫынна тупса палӑртнӑ, вӗсенчен пӗр ҫын сывалнӑ, халӗ вӑл килте пурӑнать», — пӗлтереҫҫӗ ЧР Пуҫлӑхӗн администрацийӗнчен:

gov.cap.ru/chuv/news.aspx?guid=e1b9cc03-580e-4330-806e-e1f13b54d90d&type=c01b5ae8-2883-494d-95eb-7eb4575c9e35

www.cap.ru/news/2020/04/06/v-chuvashii-slozhilasj-napryazhennaya-situaciya-c — 8 ҫын таран ӳснӗ. Ирхине 6 пулнӑ, халь 8 тет.

Юрий Шакеев ертсе пыракан Телеграмри каналта Патӑрьел районӗнче Таджикистан ҫыннинче кӑшӑлвируса тупса палӑртнӑ тесе пӗлтереҫҫӗ.

tass.ru/ekonomika/8170771 — медицина маскисем таврашӗнче чарусем кӗртнӗ. Аптекӑсем 10 пусран ытларах хакне хӑпартмӗҫ, опт мелӗпе пурте сутаймӗҫ пулас...

Сӑмах май, Шупашкарта аптекӑсенче ку тавар сайра тӗл пулать пулас... ӑна ытларах кӗпе-тумтир ҫӗлекен предприятисем хатӗрлеҫҫӗ... вӗсемех сутаҫҫӗ...

Медицина маскинче кӑшӑлвирус эрне таран пурӑнма пултарать тет. Кӑна Гонгонгри университетӑн тата аллергипе инфекци чирӗсен Америкӑри наци институчӗн эксперчӗсем тупса палӑртнӑ. Вӗсем COVID-19 тӗрлӗ материалсем ҫинче мӗн чухлӗ пурӑннине тӗпченӗ:

• хут — 3 сехетрен кая;

• йывӑҫ тата мамӑк пусми ҫинче — 1 талӑк та пурӑнайман;

• кантӑк тата хут укҫа ҫинче — 3 талӑк;

• тимӗр тата пластик — 4–7 кун;

• медицина маски ҫинче вара — 7 кун.

Тӗплӗнрех кунта вулӑр: www.interfax.ru/world/702699

medicin.cap.ru/news/2020/04/06/poliklinika-n1-i-2-gorodskogo-klinicheskogo-centra — Шупашкар хулин клиника центрӗн 1-мӗш тата 2-мӗш № поликлиникисене карантина хупнӑ. Сӑлтавӗ: унта ӗҫлекен пӗр ҫын кӑшӑлвирус ҫаклатма пултарнӑ тесе шутлаҫҫӗ. Ҫуртсене дезинфекцилеҫҫӗ, унта ӗҫленӗ кашни ҫынран анализ илнӗ.

Михаил Мишустин регионсем пӗр-пӗрин хушшинчи чикӗсене хупнине хирӗҫ тет: www.kommersant.ru/doc/4315334

yandex.ru/maps/covid19?ll=41.830512%2C57.560117&z=5 — Яндексӑн кӑшӑлвирус сарӑлнине кӑтартакан карттӑна ӗненес пулсан Раҫҫей Австралипе Норвегинчен иртсе кайса 20-мӗш вырӑна хӑпарнӑ.

Ӗнер Чулхула облаҫӗнче 2 карчӑк вилни пирки информаци пурччӗ... официаллӑ информацие вара вӗсем лекмен пулас: кӳршӗри Чулхула облаҫӗнче халӗ те вилнӗ ҫынсен шучӗ 0-пе танлашать.

Кӳршӗ тӑрӑхсенчи информаци пирки. Хушӑннӑ:

• Тутарстан +16 (пурӗ 41);

• Мари Эл +9 (пурӗ 13);

• Чулхула облаҫӗ +9 (пурӗ 56);

• Чӑваш Ен +2 (пурӗ 3);

• Мӑкшӑ Республики +1 (пурӗ 6);

• Чӗмпӗр облаҫӗ +1 (пурӗ 2).

Ҫапла май чи лайӑх лару-тӑру кӳршӗри Чӗмпӗр облаҫӗнче шутланать.

Паянхи информаци тӑрӑх Раҫҫейре 954 ҫӗнӗ тӗслӗх регистрациленӗ. Пурӗ — 6 343. Талӑк хушшинче 2 ҫын вилнӗ. Пӗри Мускав облаҫӗнче, тепри — Коми республикинче.

Чӑваш Республикинче 2 ҫын хушӑннӑ тесе пӗлтереҫҫӗ... Пурӗ 3 пулать.

Халь ӗнтӗ Раҫҫейри статистика ҫине куҫма та вӑхӑт (Чӑвашри тӗрӗс информацие палӑртнӑ хыҫҫӑн)...

«Чӑваш Ен» ПТРК та 6 пирки пӗлтерме пуҫланӑ: chgtrk.ru/novosti/zdravoohranenie/po-utochnennym-dannym-v-chuvashii-6-zarajennyh-covid-19/

Тинех министерство сайтӗнче информацие ҫӗнетрӗҫ: чӑннипе 6 чирленӗ тет.

Сывлӑх сыхлав министерствин тӳри-шари умӗнче ҫак ыйтусене тӑратмаллах ӗнтӗ:

Чӑваш Республикин сывлӑх сыхлав министерстви пӗлтернӗ тӑрӑх 4 ҫынӑнне кӑшӑлвирус тупнӑ, ҫулталӑк пуҫланнӑранпа 1967 ҫынна тӗрӗсленӗ (+97), медицина ӗҫченӗсем 542 ҫынна сӑнаса тӑраҫҫӗ (-279). Вилнисем, турра шӗкӗр, хальлӗхе ҫук.

Тем тесен те сывлӑх сыхлав министерствинче ӗҫлекен тӳре-шаран Кӑнтӑр Корейӑран тӗслӗх илмелле: кӑшӑлвируса ҫӗнтерме май панӑ сӑлтавсенчен пӗрин хушшинче информаципе тӑтӑш тата тӗрӗс паллаштарса тӑрасси пулнӑ. Пирӗннисенчен вара ӑнланма йывӑр информаци тухать. Те ҫиччӗ, те улттӑ — сайтра вара тӑваттӑ ҫеҫ тесе палӑртнӑ. Тӗрӗс информаци илме «Контактри» «Чувашия без паники» ушкӑна кайса пӑхмалла иккен!

chuvash.org/news/24823.html — ку хыпара тӳрлетрӗмӗр. Тепӗр икӗ ҫын Доминикана республикинчен килнӗскерсем. Вӗсем килсенех хупӑнса ларнӑ, ҫавна май ыттисене ертеймен теҫҫӗ.

Итак, «Чӑваш Ен» ПТРК тӗрӗс мар информаци панӑ тет: vk.com/bezpaniki21?w=wall-181162659_4060  

Тӗрӗссипе ултӑ ҫын пулмалла тет. Сывалнине, лешне, акан 4-мӗшӗнче киле янине, икӗ хут шутланӑ тет.

Эпир хамӑрӑн онлайна малалла тӑсатпӑр. Чӑваш Енре тупса палӑртнӑ COVID-19 тӗслӗхӗсем 7 ҫитнӗ текен информаци пур. Вӗсем «Чӑваш Ен» ПТРК сюжечӗ ҫине таянаҫҫӗ, анчах вӑл информацие сайтра хальхи вӑхӑтра кӑларса пенӗ.

Сывлӑх сыхлав министерствин сайтӗнче кӑтартакан информаци тӑрӑх 4 ҫынна кӑна тапнӑ.

Кӳршӗрен килнӗ ырах мар тепӗр хыпар: Чулхула облаҫӗнче кӑшӑлвируспа чирлесе ӳкнӗ икӗ карчӑк вилнӗ — пӗри 80 ҫулта, тепри 83 ҫулта пулнӑ. Пурӗ кӳршӗри тӑрӑхра 47 ҫынна тупса палӑртнӑ (вӗсенчен 22 — паян). Тӑваттӑшӗ сывалнӑ.

Тӗплӗн кунта вулама пулать: tass.ru/obschestvo/8167653

Тӗнче шайӗнчи паянхи статистика:

• АПШ (330 пин /паян +18,8 пин хушӑннӑ/; вӗсенчен 9,4 пин вилнӗ);

• Испани (130 пин /+4,6 пин/; вӗсенчен 12,4 пин вилнӗ);

• Итали (129 пин /+4,3 пин/; вӗсенчен 15,9 пин вилнӗ);

• Германи (100 пин /+3,9 пин/; вӗсенчен 1,6 пин вилнӗ);

• Франци (91 пин /+~15 ҫын/; вӗсенчен 7,5 пин вилнӗ);

• Китай (82,6 пин /+30 ҫын/; вӗсенчен 3,3 пин вилнӗ);

• Иран (58,2 пин /+2,5 пин/; вӗсенчен 3,6 пин вилнӗ);

• Аслӑ Британи (47,8 пин /+5,9 пин/; вӗсенчен 4,9 пин вилнӗ);

• Турци (27,1 пин /+3,1 пин/; вӗсенчен 0,6 пин вилнӗ);

• Швейцари (21,1 пин /+595 ҫын/; вӗсенчен 0,7 пин вилнӗ).

Кун хушшинче кӑшӑлвируспа чирленӗ пин ытла ҫынна ҫавӑн пекех Канадӑра (1,5), Бельгире (1,3), Голландире (1,2) тупса палӑртнӑ.

Кӑшӑлвирус тупса палӑртнин йышӗпе Раҫҫей ӗнерхи пекех 22-мӗш вырӑн йышӑнать. Ыран та паянхи пекех 658 пекех нумай тупсан Норвегипе Австралине иртсе кайма пултаратпӑр (Норвегипе Австралире паян 137 ҫӗнӗ ҫынна кӑна тупнӑ...). Раҫҫейрен аяларахра вырнаҫнисенчен Перу, Польша, Пакистан ҫӗршывӗсене асӑнма пулать — вӗсенче йыш хӑвӑрт хушӑнса пырать.

COVID-19 ҫаклатнӑ чӑваш велосипедҫи пирки: вӑл сывалнӑ. Халӗ Чӑваш Республикине таврӑннӑ. Ҫавах та сакӑр ҫынна кӑшӑлвируспа чирлеттерме ӗлкӗрнӗ тет — халӗ вӗсем Геленджикра сывалаҫҫӗ.

Кунтан: www.kuban.kp.ru/online/news/3823443/

Газшӑн, шывшӑн, электроэнергишӗн, тата ҫавӑн пекех ҫуп-ҫапшӑн вӑхӑтра тӳлеменшӗн правительство пени илме чарнӑ. Постановление Михаил Мишустил акан 2-мӗшӗнче алӑ пуснӑ. Ку йӗрке ҫулталӑк вӗҫӗччен пырӗ.

//Чӑваш Республикинче пени майӗпе сайра хутра тӳлеменнисене хӑраткалатчӗҫ. Ҫавах та ку енӗпе «МВК «Экоцентр» анлӑ усӑ куратчӗ — пӗр уйӑх тӳлемесенех 100% пени ҫырса паратчӗҫ. Ҫакна вӗсем саккун ирӗк панипе сӑлтавлатчӗҫ.

Кейӳ хулин влаҫӗсем урамра маскӑсӑр ҫӳреме чарнӑ. Чару тунтикунран (ыранран) пуҫланӗ.

Кӑшӑлвирус тупса палӑртман регионсем сахаллансах пыраҫҫӗ. Паян, сӑмахран, Карелинче икӗ ҫынна тупнӑ. //Мари Эл ҫутӑ-сарӑ тӗсрен сарӑ тӗсе куҫмалла...

Кӳршӗри хыпар: кӑшӑлвирус ернӗ ҫынсен шучӗ Мари Элте 13 ҫитнӗ! Тепӗр май каласан, тата 9 ҫынна тупса палӑртнӑ. Вӗсем пурте маларах чирлесе ӳкнисемпе хутшӑннисем.

Асаилтерер, Мари Элте тупса палӑртнӑ пӗр хӗрарӑм Мускавран киле Шупашкар урлӑ кайнӑ.

Турцинче кӑшӑлвирусран сиплемелли вакцинӑна чӗрчунсем ҫинче тӗрӗсленӗ тет. Тӗрӗслев ӑнӑҫлӑ иртнӗ. Малалла ӑна ҫынсем ҫинче тӗрӗслемелле, вара чирлисене вакцинӑлама май пулӗ.

tass.ru/obschestvo/8167389 — Таинландра кӑшӑлвирус ҫаклатнӑ 48 ҫулти Раҫҫей ҫынни вилсе кайнӑ тет.

Таиландра паянхи кун тӗлне 6 Раҫҫей ҫынни кӑшӑлвируспа чирлет. Вӗсем — 28–60 ҫулти хӗрарӑмсем.

Кӑшӑлвируса пула Ливи премьерӗн вырӑнне маларах йышӑннӑ Махмуд Джибриль вилнӗ тет. Вӑл 68 ҫулта пулнӑ. COVID-19 ҫаклатнӑ хыҫҫӑн Египетри пульницӑра сипленнӗ.

Кӑшӑлвирус ҫын статусне те пуянлӑхне те пӑхса тӑмасть...

Кӑшӑлвирус сирӗн организма лекнин уйӑрса илмелли палӑрӑмӗ: температура хӑпарса кайни. Кун пирки ПТССО элчи Маргарет Харрис каланӑ.

«Чирлисем ҫӗр варринче вӑранса каяҫҫӗ те кӑмӑл пӑтраннине туйса илеҫҫӗ, вӗсем хӑйсене питӗ япӑх туяҫҫӗ, мӗн пулса иртнине ӑнланмаҫҫӗ. Вӗсен температури хӑпарса кайнӑ... Унтан вӗсем сасартӑк сивӗ пулнине, чӗтренине туяҫҫӗ...» — ӑнлантарнӑ Харрис. Кунашкал палӑрӑм чирлесе ӳкнӗ 90% ҫыннӑн палӑрать.

Кунтан: www.rbc.ru/rbcfreenews/5e8a07109a7947012e96b3ee

Чӑваш Енре тунтикунран пуҫласа чылай предприяти-савут ӗҫлеме пуҫланӑран общество транспорчӗ те тӑтӑшрах ҫӳреме тытӑнӗ. Аса илтерер:ку эрнере РФ Президенчӗ Владимир Путин сӗннипе чылайӑшӗ каннӑ. Владимир Владимирович ҫакна кӑшӑлвируспа чирлекенсен йышне чакарас тӗллевпе йышӑннӑ.

Чӑваш Енре самоизоляцие пӑхӑннипе пӑхӑнманнине тӗрӗслекен 36 мобильлӗ ушкӑн йӗркеленӗ. Унта полици, Роспотребнадзор ӗҫченӗсем, тухтӑрсем, тӳре-шара кӗнӗ. Вӗсем чи малтанах ют ҫӗршывран килнӗ ҫынсем карантина мӗнле пӑхӑннине тӗрӗслеҫҫӗ. Чӑваш Енре унашкал 923 ҫын, вӗсенчен ҫурри - Шупашкарта.

Тутарстанра килтен тухма кирлӗ СМС илмелли йӗркене ҫӑмӑллатнӑ. Енчен те маларах хушамат, ят тата ытти даннӑйсем пӗлтермелле пулнӑ пулсан, халь вара паспорт даннӑйӗсем кӑна ҫителӗклӗ.

Мускавпа Питӗртен килнисене ҫавӑн пекех 14 кунлӑх карантина Норильскпа Красноярск хупма тытӑннӑ.

Вӑрмарти хӗрарӑм пирки тата сас-хура ҫӳрет... Анчах те тӗрӗс, те суя... Официаллӑ ун пирки пӗлтермен-ха. Кӗтес пулать.

Томскра ытти регионсенчен килнисене 14 кунлӑх карантина хупма тытӑнӗҫ. Мускавран вӗҫсе килнисене — пурне те. www.kommersant.ru/doc/4314954  

Чӑваш Республикин тӗп хулине, Шупашкара, Мускаврай пуйӑс ҫӳрет-ха. Самолетсем вара вӗҫме пӑрахнӑ. Ҫӑвӑн пекех муниципалитетсене ҫыхӑнтаракан автобус маршручӗсене чарса лартнӑ...

Раҫҫейре паян миҫе ҫыннӑн COVID-19 кӑшӑлвируса тупса палӑртнин статистикине пӗлтернӗ. Калӑпӑр, кунта паллашма пулать: www.kommersant.ru/doc/4314868?from=main_sujet ?

Пурӗ 658 ҫыннӑн ҫӗнӗрен палӑртнӑ. Вӑл шутра! Чӑваш Республикинче пӗр тӗслӗх те ҫук. Пирӗн тӑрӑхра малтанхи пекех 1 ҫын кӑна чирленӗ тесе кӑтартаҫҫӗ.

Кӳршӗсене илес пулсан, Чулхула облаҫӗнче — 22 ҫыннӑнне тупнӑ. Ӗнер пӗр тӗслӗх те пулман вӗсен...

Чи нумаййи — Мускавра тупнӑ. 536 тӗслӗх. //сӑмах май, Чӑвашра тупнӑ кашни ҫӗнӗ тӗслӗх Мускавра анализ панӑ. Тен, вӗсене унта шута илнӗ?..

Нумай пулмасть, ӗнер кӑна, Собянин ҫапларах пӗлтернӗ: «Воронов пульница строительстви тепӗр стадие куҫнӑ. Тӗп строительство, корпуссен ытларах пайӗнче монтаж ӗҫӗсем вӗҫленнӗ, общежитире монтаж ӗҫӗсене вӗҫлесси юлать. Паян отделка ӗҫӗсене, комплектацилессине тата медицина оборудованине вырнаҫтарассине пуҫлама пулать, реанимаци уйрӑмӗсенчен пӗринче ку ӗҫе тунӑ ӗнтӗ, унта ӗҫе вӗҫленипе пӗрех ӗнтӗ» (Собянин сӑмахӗсене Яндекс.Куҫаруҫӑ урлӑ куҫартӑмӑр…).

Сӑмах май, Ҫӗнӗ Мускаври Бабенки ялӗ патӗнче хӑвӑрт хӑпартмалли материалсенчен инфекци пульницине тӑвас шухӑш пуш уйӑхӗнче паллӑ пулнӑччӗ. Пушӑн 10-мӗшӗнче ӑҫта тумалли вырӑна суйланӑччӗ. Пушӑн 12-мӗшӗсенче ӑна хӑпартма пуҫланӑччӗ. Хута яма ӑна ҫак уйӑхра шантараҫҫӗ.

Сӑмах май, Китайри Уханьте ҫӗнӗ пульницӑна 10 кун хушшинче туса лартнӑ. Собянин та 2 эрне панӑ тет-ха та, анчах хушу панипе ӗҫ тӑвасси хушшинче уйрӑмлӑх пысӑк пулас.

Ҫӗнӗ Мускаври инфекци пульницине туса ҫитереймен, анчах ҫынсен пурнӑҫне вӑл илсе кая пуҫланӑ та тет. Палаткӑсенче пушар тухнӑ иккен — 1 ҫын пурнӑҫӗ татӑлнӑ.

Пушар палаткӑна ӑшӑтакан кӑмакаран тухнӑ тет.

Тӗплӗнрех кунта: tass.ru/proisshestviya/8165769

Енчен те маларах кӑшӑлвирус ертесрен Китайран килнӗ ҫынсене пурне те карантина хупатчӗҫ пулас, халӗ вара Раҫҫей ҫыннисене хупмалла пулас. Тӗп Китай телекуравӗ пӗлтернӗ тӑрӑх 13 КНР гражданинӗн кӑшӑлвируса тупса палӑртнӑ — вӗсем пурте Китая Раҫҫейрен таврӑннӑ.

Малтан вӗсем Мускавран Владивостока вӗҫсе ҫитнӗ, кайран чикӗ урлӑ автобуссемпе хӑйсен машинисемпе каҫнӑ, Суйфэгьхэне ҫитнӗ. Кунта вара вӗсене пурне те карантина хупнӑ. Анализ илнӗ те вунвиҫҫӗшӗн кӑшӑлвирус пуррине тупса палӑртнӑ. Тӗплӗнрех кунта: rg.ru/2020/04/05/reg-dfo/u-13-vernuvshihsia-v-knr-cherez-vladivostok-liudej-nashli-koronavirus.html  

//Раҫҫейри Тинӗсҫум крайӗнче вара паянхи кун тӗлне пурӗ те 7 ҫынна ҫеҫ тупайнӑ.

Паянхи куна пӗтӗмлетме вӑхӑт. COVID-19 чи нумай тупса палӑртнӑ ҫӗршывсем:

1) АПШ-ра чирленисен йышӗ 300 пинрен иртнӗ (+29 пин), 8,3 пин ҫын вилнӗ;

2) Испани иккӗмӗш вырӑна тухнӑ — 124,7 пин ку вируса ҫаклатнӑ (+5,5 пин), 11,7 пин вилнӗ;

3) Италире пурӗ 124,6 пин тупнӑ тӗслӗх (+4,8 пин), вӗсенчен 15,4 пин ҫын вилнӗ;

4) Германире 95,6 пин ҫынӑнне кӑшӑлвирус (+4,5 пин) тупнӑ, вӗсенчен 1,4 пин ҫын вилнӗ;

5) Франци пиллӗкмӗш вырӑна хӑпарнӑ — 90 пин ҫыннӑн кӑшӑлвирус пуррине (+7,8 пин) тупнӑ, вӗсенчен 7,6 пин вируса пула ҫут тӗнчерен уйрӑлнӑ.

Китайра кун хушшинче пурӗ те 19 ҫӗнӗ ҫынна регистрациленӗ, ку патшалӑх халь 6-мӗш вырӑнта. 81,6 пинрен 76,6 пин ҫын сывалнӑ, 3,3 пинӗшӗ вилнӗ.

Кун хушшинче пин ытла ҫӗнӗ чирлӗ ҫынна Аслӑ Британире (+3,7), Турцире (+3,0), Иранра (+2,6), Бельгире (+1,7), Канадӑра (+1,5), Бразилинче (+1,1) тупса палӑртнӑ.

Раҫҫей кӑшӑлвирус ҫаклатнисен йышӗпе Ирландирен иртсе 22-мӗш вырӑна хӑпарнӑ.

Ӗнер эпир маскӑсем сыввисемшӗн усӑ паманни пирки ҫырнӑччӗ. Кун пирки ПТССО (WHO, ВОЗ) калани ҫине тайӑннӑччӗ.

Медицина ӑслӑлӑхӗсен докторӗ Сергей Яковлев медицина маски хӑҫан усӑлли пирки ӑнлантарса панӑ: aif.ru/health/coronavirus/pochemu_ne_stoit_nosit_masku_na_ulice?

Конор Макгрегор, Ирланди кӗрешӳҫи, Китай влаҫӗсене пулӑшнишӗн тав тумалла мар тенӗ. Сӑлтавӗ вара — Китайран пулӑшу пек ярса панӑ маскӑсен, кислород баллонӗсен тата ытти таварӑн пахалӑхӗ питӗ япӑх иккен. Сӑмах май, тепӗр эрнере Минпромторг медицина маскисене ярса памалла — вӗсене вара Китайра туяннӑ...

Кун пирки кунта ҫырнӑ:

sportrbc.ru/news/5e88850d9a79478520df6d22?ruid=UET9A1xAcbCo33mDA4RJAg==&from=newsfeed

www.medicin.cap.ru/news/2020/04/04/v-chuvashii-zaregistrirovani-novie-sluchai-zarazhe — паян тупса палӑртнисем ҫинчен тӗплӗнрех Сывлӑх сыхлав министерствин сайтӗнче пӗлтернӗ. Иккӗшӗ те килтен тухса ҫӳремен тет, халь вӗсене Васкавлӑ медпулӑшу пульницине вырттарнӑ.

Паян республикӑра тепӗр ҫын, тӑваттӑмӗш, кӑшӑлвируспа чирленине палӑртнӑ. Вӑл - Чӑваш Ен ҫынни, Мускавра анализ панӑ, анчах кӑтартӑвне кӗтсе илеймесӗр республикӑна хӑйӗн машинипе ҫитнӗ. Унӑн тӑванӗсенчен те анализ илнӗ халӗ. Тӗплӗнрех кунта: chuvash.org/news/24814.html.

Малтанхи хӗрарӑм пекех Мускавра анализ панӑ та результата кӗтмесӗрех республикӑна вӗҫтернӗ...

Чӑваш Енре 3-мӗш ҫынна тупса палӑртнӑ: www.instagram.com/p/B-jt0_xApeR/

Пирӗн сайт урлӑ та маскӑсем сутма пуҫларӗҫ: chuvash.org/borda (хаклӑ мар, 100 тенкӗ ҫеҫ).

Шупашкар хулин оперативлӑ штабӗ пӗлтерет:

Ирӗксӗр кану кунӗсенче те ӗҫлеме тивекен ашшӗ-амӑшӗ валли Шупашкарта 24 ача пахчи ӗҫлет. Калинин районӗнче — 8, Ленин районӗнче — 9, Мускав районӗнче — 7.

Хӑш ача пахчисем ӗҫленине кунта пӗлме пулать: www.cheboksary.ru/education/101949_v_cheboksarah_rabotajuschie_roditeli_mogut_privodit_detej_v_24_dou.htm

«ПроГород» журналисчӗсем «Мегастройра» пулса курнӑ: pg21.ru/news/63597 .

Пӗтӗмлетӳ: юсав ӗҫӗнче кирлӗ материалсем сутакан пысӑк центр, унта пурӑнма кирлӗ таварсем сутнӑ май, ӗҫлет. Суту-илӳ центрӗнче халӑх купипех — кану вӑхӑчӗпе усӑ курса ҫынсем юсав ӗҫӗсем тӑвасшӑн пулас...

Раҫҫейри кӑшӑлвирус сарӑлнин хӑвӑртлӑхӗ.

Китайри Уханьре (вирус ку вырӑнтан сарӑлма пуҫланӑ) кушаксене тӗрӗсленӗ. 15% — кӑшӑлвируслӑ пулнине палӑртнӑ. Тӗплӗнрех кунта: ria.ru/20200404/1569565692.html

Чи малтан COVID-19 кӑшӑлвируса ҫаклатнӑ арҫынна пульницӑран кӑларнӑ. Вирусран хӑтӑлнӑ хыҫҫӑн вӑл пневмонипе чирлесе ӳкнӗ. Вӑл чиртен те сывалнӑ хыҫҫӑн ӑна киле янӑ.

Асаилтеретпӗр, арҫын Бразилирен таврӑннӑ май Швейцарипе Мускав урлӑ иртнӗ. Ҫапла май кӑшӑлвируса ҫаклатнӑ.

«Вектор» кӑшӑлвирусран вакцинӑна чӗрчунсем ҫинче ака уйӑхӗн вӗҫӗччен тӗрӗслесшӗн. Ҫынсем ҫинсе — ҫулла пуҫламӑшӗнче: www.rbc.ru/society/04/04/2020/5e884c9a9a79477277b2560b?from=newsfeed

Тулӑра кӑшӑлвирусран сывалнӑ 93 ҫулхи карчӑк вилнӗ тет. Пӗр кун маларах унӑн анализӗ вирусран сывалнине кӑтартнӑ. Ӑна киле яма хатӗрленнӗ... анчах ӗлкӗреймен.

Тӗплӗрех кунта: tvzvezda.ru/news/vstrane_i_mire/content/2020441130-voDMB.html

COVID-19 кӑшӑлвируспа чирлесе ӳкнисен йышӗпе Франци 5-мӗш вырӑна тухнӑ. Кӑна Яндекс.Карттӑри статистика урлӑ курма пулать. Ҫапла май Китай 6-мӗш вырӑна аннӑ. Раҫҫей вара 22-мӗш вырӑна хӑпарнӑ — Ирландирен иртнӗ.

Ивармектин эмел кӑшӑлвируспа кӗрешме пулӑшать тет. Кун пирки кунта ҫырнӑ: naked-science.ru/article/medicine/protivoparazitarnoe-sredstvo

Ивармектин — паразитсемпе кӗрешмелли препарат. Унпа пыйтӑ тата тӗрлӗ хурт-шӗвӗрӗлчен ерсен усӑ кураҫҫӗ.

Талӑк хушшинче 9 ҫын вилнӗ тет. Ҫиччӗшӗ — Мускавра, пӗрер ҫын — Тинӗсҫум крайӗнче тата Кустӑрма облаҫӗнче.

Кӑшӑлвирус тупса палӑртнисен шучӗ кунран кун чакса пырать. Ӗнер 601 тӗслӗх пирки сӑмах пыратчӗ пулсан, паян — 582 кӑна. Кӑшӑлвируспа кӗрешме йӗркеленӗ оперативлӑ штаб пӗлтернӗ тӑрӑх Чӑваш Енре халӗ те 1 ҫынӑнне кӑна тупнӑ иккен (тӗрӗссипе вара — 2). Кӳршӗсене пӑхсан 1 ҫын Мӑкшӑ Республикинче тупнӑ.

Украинӑра COVID-19 кӑшӑлвируспа чирлисен йышӗ пӗр пинтен иртнӗ. Кун хушшинче 154 ҫӗнӗ тӗслӗх тупса палӑртнӑ: moz.gov.ua/article/news/operativna-informacija-pro-poshirennja-koronavirusnoi-infekcii-2019-ncov-

«Макдональдс» Шупашкарти васкавлӑ пулӑшу тухтӑрӗсене тӳлевсӗр кӑнтӑрлахи апатпа тивӗҫтерме тытӑннӑ. Кун пирки аслӑ шкулсенчен пӗрин вӗрентекенӗ Андрей Федоров Фейсбукра паян пӗлтернӗ.

Ҫылӑха телефонпа е Skype урлӑ каҫарттарма пулать. Кун пирки Мускав патриархачӗн чиркӳ тулашӗнчи ҫыхӑну пайӗн пуҫлӑхӗ Иларион митрополит каланӑ тӑрӑх «Новости» РИА хыпарланӑ.

Паянхи кун пуҫламӑшӗнчи Чӑваш Енри кӑшӑлвирус таврашӗнчи информаци: пурӗ 1 870 (ӗнерхипе танлаштарсан +35) ҫынна тӗрӗсленӗ; 821 (-142) ҫын сывлӑхне сӑнаса тӑраҫҫӗ; COVID-19 тупса палӑртнӑ тӗслӗхсем: 2 (0).

Ҫул ҫитмен ачасен хӑйсем пурӑнакан вырӑнтан урӑх ҫӗре кайма юрамасть. Кун пирки Чӑваш Енре йышӑннӑ хушура каланӑ.

Ҫыраҫҫӗ: «Как языки народов РФ из школьной программы убирать, так Москва решает. А как карантин — так регионы пусть сами думают».

Чӑвашла: «Шкул программинчен РФ халӑхӗсен чӗлхине кӑларас тесен Мускав йышӑну тума хатӗр. Карантин пирки сӑмах пуҫарсан — регионсем хӑйсемех пуҫ ватччӑр».

Муниципалитетсем хушшинчи автобус ҫыхӑнӑвне чарса хурӗҫ. Кун пирки хӑйӗн Инстаграмӗнче Олег Николаев пӗлтернӗ: www.instagram.com/tv/B-hobMhAKS3/

Паянхи статистикӑпа малта АПШ — унта 21,4 пин ҫӗнӗ чирлӗ ҫынна палӑртнӑ. Ун хыҫҫӑн Испани пырать — 5,6 пин (хӑш-пӗрисем Испани чирлисен йышӗпе Италирен иртсе иккӗмӗш вырӑна тухнӑ теҫҫӗ). Виҫҫӗмӗш вырӑнта Франци — унта кун хушшинче 5,2 пин ҫынна тупса палӑртнӑ (пурӗ вӗсен 64,3 пин ҫын чирлет). Германи тӑваттӑмӗш вырӑнта — ҫӗннисен йышӗнче 5 пин ҫын тупнӑ. Итали пиллӗкмӗш вырӑнта ҫеҫ — +4,6 пин.

Пин ытла ҫӗнӗ чирлӗ ҫынна Аслӑ Британире (+4,5 пин), Турцире (+2,8), Иранра (+2,7), Бельгире (+1,4), Голландире (+1,0) тупса палӑртнӑ.

Раҫҫей пӗтӗм ҫӗршывсем хушшинче 23-мӗш вырӑнта. Ӗнер кӑна 24-мӗшӗнче вӑл пулнӑ, паян, ав, вирус ернисен шучӗпе Чехирен (22-мӗшӗнчен 24-мӗшне паян куҫнӑ) иртсе кайнӑ.

Тӗнче шайӗнчи паянхи статистика:

• АПШ (266 пин /паян +21 пин хушӑннӑ/; вӗсенчен 6,8 пин вилнӗ);

• Итали (120 пин /+4,6 пин/; вӗсенчен 14,7 пин вилнӗ);

• Испани (118 пин /+5,6 пин/; вӗсенчен 10,9 пин вилнӗ);

• Германи (90 пин /+5 пин/; вӗсенчен 1,2 пин вилнӗ);

• Китай (82 пин /+31 ҫын/; вӗсенчен 3,3 пин вилнӗ).

Кӑшӑлвируса пула Чӑваш Енре йышӑннӑ хушма мерӑсем (хушӑва республика Элтеперӗн тивӗҫӗсене вӑхӑтлӑх пурнӑҫлакан Олег Николаев паян алӑ пуснӑ) ака уйӑхӗн 3-мӗшӗнчен вӑя кӗнӗ. Ҫӗнӗлӗх ятарлӑ йышӑну тӑвиччен вӑйра тӑрӗ.

Чӑваш Енри 12 организацире маска ҫӗлеҫҫӗ. Вӗсенчен пӗринче, «Шупашкар трикотажӗнче», талӑкра 30 пин маска ҫӗлеҫҫӗ. Тавар федераци сечӗсене, влаҫ органӗсене, промышленность предприятийӗсене ӑсанать.

Шкулта тата техникумсемпе колледжсенче ӑс пухакансем ака уйӑхӗн 6-мӗшӗ хыҫҫӑн инҫет мелӗпе вӗренме тытӑнӗҫ.

Ӗҫе ҫӳрекенсене предприяти-организацисен ятарлӑ справкӑсем памалла.

«Производство организацийӗсене ӗҫлеттерме пуҫлас терӗмӗр. Анчах вӗсенче хӑрушсӑрлӑх мерисене пӑхӑнмалла, дезинфекци ирттермелле, санитарно-эпидемиологи требованийӗсене тата ыттине пурнӑҫламалла», — тенӗ Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян предприятисен пуҫлӑхӗсемпе видеоконференци мелӗпе ирттернӗ канашлу вӑхӑтӗнче.

Чӑваш Ене ятарлӑ пропускпа кӗртме тытӑнӗҫ.

Кӑшӑлвируса пула Чӑваш Енре хушма мерӑсем йышӑннӑ. 65 ҫултан аслӑраххисен тата ҫивӗч респиратор вирусӗпе чирлисен килте лармалла.

Кӑшӑлвирус ҫемьесене упрать! chuvash.org/news/24799.html — уйрӑлас тесен хайхи ҫӗртме уйӑхӗччен кӗтме тивӗ пулас. Мӑшӑрланас текенсен те ҫак вӑхӑтах кӗтме тивӗ...

Кӑшӑлвируслӑ хӗрарӑма пула 7 ҫынна пульница вырттарнӑ, тепӗр вунтӑххӑрӑшне «Вӑрман юмахӗ» санаторине ӑсатнӑ.

COVID-19 тупса палӑртнӑ хӗрарӑм пирки ӗнер пӗлтернӗччӗ. Вӑл Мускавра анализ тунӑ, анчах пӗтӗмлетӗвне кӗтсе тӑмасӑр Шупашкара вӗҫтернӗ. Чӑваш Ене вӑл автобуспа килнӗ.

Кампа-кампа вӑл калаҫнине тата ҫыхӑну тытнине тупса палӑртнӑ, ҫавна май 7 ҫынна пульница хунӑ, 19-ӗшне вӗсенчен — обсервацие ӑсатнӑ («Вӑрман юмахӗ» санаторие). Кӑшӑлвируслӑ хӗрарӑм карантина пӑснӑшӑн ун тӗлӗшпе пуҫиле ӗҫ пуҫарнӑ.

Пуйӑспа ҫӳреме хӑнӑхнисене пӗлме: Канашпа Шупашкара тата Шупашкарпа Питӗре ҫыхӑнтаракан пуйӑссем ҫӳреме пӑрахӗҫ — РЖД вӗсене чупма акан 9-мӗшӗпе раштавӑн 12-мӗшӗччен чарать. Шупашкара Мускавпа ҫыхӑнтараканни вара сайрарах ҫӳрӗ — эрнере виҫӗ хут кӑна. Акан 26-мӗшӗпе ҫу уйӑхӗн 11-мӗшӗ хушшинче тата ҫертмен 12-мӗшӗнче ҫеҫ кашни кун ҫӳрӗ. Расписани улшӑнӑвӗ вӑйра раштавӑн 12-мӗшччен пулӗ...

Тӗплӗрех кунта: pass.rzd.ru/static/public/ru?STRUCTURE_ID=5409

«Сывлӑха сыхламалли маскӑсен хакӗ ҫине влаҫрисем витӗм кӳреймеҫҫӗ», — тенӗ Иван Моторин. Ҫавах та лару-тӑру эрнерен улшӑнмалла. Ун чухне РФ Минпромторгӗ республикӑна 326 пин маска ярса памалла имӗш. Хальхи вӑхӑтра вара 50–150 тенкӗллисене туянма тивӗ.

Сӑмах май, ПТССО (ВОЗ) каланӑ тӑрӑх, маскӑсем сыввисемшӗн усӑллӑ мар, кӑшӑлвирусран сыхлама пултараймаҫҫӗ. Чирлисемшӗн вара усӑллӑ — вируса анлӑ сарӑлма чарать.

Китай ертӳҫисем ака уйӑхӗн 4-мӗшне кӑшӑлвирусран (коронавирусран) вилнисене асӑнмалли хурлӑх кунӗ тума йышӑннӑ. Ку кун ялавсене антарӗҫ, хаваслӑ мероприятисем ирттермӗҫ. Тӗплӗрех кунта: www.rbc.ru/rbcfreenews/5e8698909a7947457e5184a8

Медицина маскине ӑҫта туянма май пур? gcheb.cap.ru/news/2020/04/03/gde-v-cheboksarah-kupitj-maski — кунта лавккасен списокне вырнаҫтарнӑ. Хакӗсем — пӗри 80–150 тенке ларӗ.

Сарӑту облаҫӗнче кӑшӑлвирусран (коронавирусран) пӗр ҫын пурнӑҫӗ татӑлнӑ тет. Сывлӑх сыхлав министерстви пӗлтернӗ тӑрӑх унӑн ытти чирсем те пулнӑ. Ку тӑрӑхра сӑмах май, 19 ҫынна кӑшӑлвирус ернӗ, вӗсенчен пӗри ҫеҫ сывалайнӑ.

Ҫынсемпе хутшӑнмасӑр пурӑнмалли режима (режим самоизоляции) пӑснӑшӑн Ӗпхӳре пӗр ҫынна 15 пинлӗх штраф ҫырса панӑ. 33 ҫулхи арҫын хӑйӗн айӑпне йышӑннӑ тет.

Пушкӑртстанра COVID-19 кӑшӑлвирус ернӗ пурӗ 10 ҫынна тупса палӑртнӑ, вӗсенчен ҫурри — 5-ӗшӗ — сывалнӑ та ӗнтӗ.

Ирӗксӗр кану тапхӑрӗ COVID-19 сарӑласси тӗлӗшпе лару-тӑру йӗркене кӗрсен ҫеҫ вӗҫленме пултарӗ — ҫапларах пӗлтернӗ президентӑн пресс-ҫыруҫи Дмитрий Песков. Асаилтерер, паян Раҫҫейре 601 ҫӗнӗ тӗслӗх палӑртнӑ, пурӗ вара ку кӑшӑлвирус 4 149 ҫынна ернӗ.

Кӳршӗре: Хусана килекенсемпе унтан тухакансене пурне те тӗрӗслеҫҫӗ тет. Пурӗ 14 пост йӗркеленӗ. Документсене тӗрӗслеҫҫӗ, ҫула тухма сӑлтав пуррипе ҫуккине. Асаилтеретпӗр, кӳршӗри хулара ӑҫта та пулин каяс тесен СМС урлӑ регистрациленмелле, ҫула тухнин сӑлтавне кӑтартнӑ хыҫҫӑн ҫеҫ килтен тухма пулать.

Тӗплӗнрех кунта: www.interfax.ru/russia/702114

Кушаксемпе йытӑсем кӑшӑлвируспа (коронавируспа) чирлеме пултараҫҫӗ-и? Ку ыйту йытӑ-кушак тытакансенчен чылайӑшне пӑшӑрхантарать. Ку тарана ҫити виҫӗ тӗслӗх пирки кӑна информаци пур: Бельгире пӗр кушака ҫак вирус ернӗ, тата Гонконгри икӗ йытӑ чирлесе ӳкнӗ. Урӑх тӗслӗхсем хальлӗхе ҫук.

Сӑмах май, кӑшӑлвирус пӑсарасене хӑвӑрт ерет иккен. Ҫавна май вируспа кӗрешмелли вакцина тӑвакансен лабораторийӗсенче вӗсене чылай тытаҫҫӗ тет. Ӑсчахсем пӗлнӗ тӑрӑх COVID-19 йытӑсене, сыснасене, кӑвакалсемпе чӑхсене ермест. Тӗрӗсрех каласан, вӗсене вӑл йывӑррӑн ерет (икӗ кӑшӑлвируслӑ йытӑ тупнӑ-тупнах-ҫке!), ҫавна май вӗсем ҫак чире сарма пултараймаҫҫӗ теҫҫӗ.

Пурте канасшӑн мар ҫав ку кану тапхӑрӗнче. Ав, Ҫӗнӗ Шупашкарти вӑйӑ салонӗ полици персе ҫитсен тин хупӑннӑ: chuvash.org/news/24798.html

www.kommersant.ru/doc/4311114 — «Коммерсант» онлайн сутуҫӑсен курьерӗсене ӗҫлеме чӑрмантарни пирки пӑшӑрханса ҫырать.

Асаилтерер: апат-ҫимӗҫ шутне кӗмен таварсем сутакан лавккасене ӗҫлеме чарнӑ, анчах та онлайн мелӗпе ӗҫлекенсене — чарман. Ҫапла май хӑш-пӗр тӑрӑхсенче ӑнланманлӑх сиксе тухать имӗш. Ытларах ку енӗпе ҫӗршывӑн тӗп тата кӑнтӑр тӑрӑхӗсенче пулса иртет имӗш: курьерсене тытса чараҫҫӗ, заказ илмелли пунктсене хупма ыйтаҫҫӗ, тавар турттаракан машшинсене регион чиккисенчен каҫармаҫҫӗ. АКИТ пӗрлӗх (интернет урлӑ суту-илӳ тӑвакансене пӗрлештерет) шухӑшӗпе ку ыйтӑва Правительство татса памалла.

Раҫҫейре ҫӗнӗ 601 тӗслӗх тупса палӑртнӑ тет. Чи кӑсӑкли: Чӑваш Енре халӗ те федераци шайӗнчи официаллӑ даннӑйсем тӑрӑх ку чире 1 ҫын кӑна ҫаклатнӑ.

Пирӗн кӳршӗсене илес пулсан — Тутарстанра ҫӗнӗ 6 тӗслӗх тупнӑ. Маларах икӗ кун хушши ҫӗннисем ҫукччӗ. Чулхула облаҫӗнче те ӗнер 13 ҫӗнӗ тӗслӗх палӑртнӑччӗ пулсан, паян вара пӗр ҫӗнӗ тӗслӗх те ҫук.

Чӑваш Енри коронавирус таврашӗнчи ҫӗнӗ информаци: пурӗ 1 835 (ӗнерхипе танлаштарсан +135) ҫынна тӗрӗсленӗ; 963 (+11) ҫын сывлӑхне сӑнаса тӑраҫҫӗ; COVID-19 тупса палӑртнӑ тӗслӗхсем: 2 (0).

COVID-19 коронавирус ернисен шучӗ тӗнчере 1 миллион ҫынран иртсе кайнӑ. Вируса пула 50 пин ытла ҫын вилнӗ. Коронавируса ҫаклатнисен шучӗпе Китай 5-мӗш вырӑна анса ларнӑ. Чи нумай чирлисен йышӗнче:

• АПШ (236 пин; вӗсенчен 5,6 пин вилнӗ);

• Итали (115 пин; вӗсенчен 14 пин вилнӗ);

• Испани (110 пин; вӗсенчен 10 пин вилнӗ);

• Германи (85 пин; ; вӗсенчен 0,9 пин вилнӗ);

• Китай (82 пин; вӗсенчен 3,3 пин вилнӗ).

Чӗмпӗр облаҫӗнче ҫавӑн пекех ҫулталӑк ҫурӑри ачан коронавирус пур тесе шутлаҫҫӗ. Ӑна пульница вунӑ кун каялла илсе килнӗ. Малтанхи тӗрӗслев пӗчӗк ача коронавируспа чирлеменнине кӑтартнӑ. Иккӗмӗш хут тӗрӗслев мӗн кӑтартасса кӗтеҫҫӗ — ӑна акан 6-мӗшӗнче тӑвӗҫ.

Кӳршӗри Чӗмпӗр облаҫӗнчи хыпар: коронавируспа чирленӗ Чӗмпӗр облаҫӗн саккун пухӑвӗн Михаила Рожков депутатӑн ывӑлӗ сывалнӑ тет. Димиртровградри 15 ҫулхи каччӑна киле янӑ. Депутат ывӑлӗ коронавируса Аслӑ Британирен ҫаклатса килнӗ пулнӑ.

РФ Сывлӑх сыхлав министерстви хӑш-пӗр регионта эрех сутассине чарса лартас шухӑш пуррине ырланӑ. Кун пирки министр ҫумӗ Олег Салагай пӗлтернӗ. Эрес-сӑра коронавирус ересрен пӗрре те пулӑшманни пирки асаилтернӗ. Кунашкал чарусем пирки Байкалхыҫ тата Хӗрлӗҫыр (Красноярск) крайӗсенче, Пушкӑртстанра калаҫусем иртеҫҫӗ. Хӗрлӗҫыр крайӗнче, сӑмахран, 18:00–10:00 вӑхӑт хушшинче эрех сутма чарнӑ. Ҫавнашкалах лару-тӑру Пушкӑртстанра.

Коронавируса пула вырӑнти суйлавсене те урӑх вӑхӑта куҫарма пултараҫҫӗ. Ку ыйтӑва Раҫҫейӗн Тӗп суйлав комиссийӗ ыран пӑхса тухӗ.

Валентина Матвиенко пӗлтернӗ тӑрӑх медицина маскисене ҫӗлекенсенчен лицензи ыйтса тӑмӗҫ. Кунашкал йышӑнӑва влаҫрисем эрне вӗҫӗччен йышӑнма палӑртнӑ.

Микроскоп витӗр пӑхсан COVID-19 ҫакнашкал:

ЧР Сывлӑх сыхлавӗн министерствин штатра тӑман инфекционисчӗ Сергей Ефимов республикӑра коронавируспа чирленӗ пӗрремӗш ҫынна инфекцирен сыватни пирки пӗлтернӗ. Халӗ пациент пневмонирен сиплев курсӗ витӗр тухать. Пульницӑна илсе ҫитернӗ чухне ун ӳт температури йӗркеллех пулнӑ, тепӗр кунхине хӑпарнӑ, арҫын йывӑррӑн сывлама тытӑннӑ. Рентген унӑн икӗ енлӗ пневмони аталаннине кӑтартнӑ.

Паян республикӑра коронавируспа чирлӗ тепӗр ҫынна тупса палӑртнӑ хыҫҫӑн ЧР Элтеперӗн тивӗҫӗсене вӑхӑтлӑха пурнӑҫлакан Олег Николаев килте лармалли режима тата ҫирӗплетме сӗннӗ. Влаҫ ку енӗпе хушма мерӑсене ҫитес вӑхӑтра йышӑнӗ.

РФ Правительствин резерв фондӗнчен ЧР Сывлӑх сыхлавӗн министерствине коронавируспа кӗрешме 218 млрд тенкӗ уйӑрса пама палӑртнӑ. Хушӑва ЧР Министрсен Кабинечӗн председателӗ Олег Николаев пушӑн 31-мӗшӗнче алӑ пуснӑ: chuvash.org/news/24792.html

Владимир Путинӑн ҫӗнӗ хушӑвӗпе килӗшӳллӗн регионсем хӑйсен чиккисене хупма пултараҫҫӗ: kremlin.ru/acts/news/63134 (унашкал йышӑну, сӑмахран, Чечен Республикинче тунӑ — ака уйӑхӗн 5-мӗшӗнчен пуҫласа хӑйсен патне никама та кӗртмӗҫ, никама та кӑлармӗҫ)

«Победа» авиакомпани те мӗншӗн Шупашкара вӗҫме пӑрахнӑ тетӗр? Йӑлт коронавируса пула: вӗсен темиҫе ӗҫченӗ ҫак вируса ҫаклатнӑ тет, унсӑр пуҫне чылайӑшӗ карантинра тет. Тӗплӗнрех кунта: www.rbc.ru/society/02/04/2020/5e85acae9a7947da152e4587

Кану кунӗсене ака уйӑхӗн 30-мӗшӗччен тӑсасси ҫинчен Раҫҫей Президенчӗ указ пуснӑ.

Вӗҫлерӗ хӑйӗн сӑмахне. Кӗскен каласан: уйӑх вӗҫӗччен канма тивӗ. Ӗҫпе тивӗҫтерекенсем ҫак тапхӑр вӑхӑтӗнче ӗҫ укҫине сыхласа хӑварма тивӗҫ.

Лару-тӑру ҫӑмӑллансан тен ку кану тапхӑрне кӗскетме те май пулӗ терӗ.

Кану вӑхӑчӗ уйӑх вӗҫӗччен тӑсӑлӗ — ҫапла йышӑннӑ. Кашни регион короновируспа кӗрешессине хӑйӗн майлӑ йышӑнусем тӑвӗ терӗ.

Уф... ака уйӑхӗн 30-мӗшччен тӑсаҫҫӗ! Кӑравул!

Нимеҫӗсене, тухтӑрсене пысӑк тав сӑмахӗ калать.

Пуҫланчӗ....

НТВ сайчӗ 16:50-на куҫарчӗ...

Путина кӗтнӗ май кӳршӗ тӑрӑхсенчи лару-тӑру пирки:

• чи япӑх лару-тӑру Чулхула облаҫӗнче. Унта 25 ҫынна тупса палӑртнӑ (паян кӑна +13);

• ун хыҫҫӑн Тутарстан пырать. Унта 19 ҫын тупнӑ (2 кун хушшинче ҫӗннисем хушӑнман-ха...);

• Мӑкшӑ Республикинче 4 ҫынна тупнӑ;

• Мари Элте чылай вӑхӑт хушшинче пӗр ҫын та ҫукччӗ, халь вара унта та 4 ҫынна тупса палӑртнӑ;

• Чӗмпӗр облаҫӗнче 1 чирлӗ ҫын пур.

НТВ вара 16 сехет те 40 минута кӑтартать: www.ntv.ru/air/putin020420/

Сӑмахран кунта курма пулать: www.youtube.com/watch?v=GcLc6jzrq_4

Владимир Путин халӑх умне 16 сехет ҫурӑра тухса калаҫӗ иккен.

Ҫак вӑхӑт тӗлне Чӑвашра пурӗ 1 705 ҫынна тӗрӗсленӗ. 952 ҫын сывлӑхне сӑнаса тӑраҫҫӗ. COVID-19 тупса палӑртнӑ тӗслӗхсем: 2.

Владимир Путин паян телекурав урлӑ тепре халӑх умне тухса калаҫӗ тет. Ҫӗнӗ Огаревӑри резиденцире вӑл халь текст хатӗрлет имӗш. Кун пирки Дмитрий Песков каланӑ. Халӑх умне вӑл 16:00 хыҫҫӑн тухмалла...