Патӑрьел районӗнчи выльӑх-чӗрлӗх пусакан цехсенчен пӗри ӗҫ йӗркине пӑснӑ. Кӑлтӑка Россельхознадзорӑн управленийӗ «Меркурий» тытӑм пулӑшнипе тупса палӑртнӑ.
Выльӑх-чӗрлӗх пусмалли пункта кӑҫал ҫулталӑк пуҫланнӑранпа 4 пин ытла мӑйракаллӑ шултра выльӑх тата лаша илсе пынӑ. Выльӑха Тутарстанра, Мӑкшӑ Республикинче, Пушкӑртстанра, Удмурт Республикинче, Пенза тата Киров облаҫӗсенче туяннӑ.
Вӗсенчен 200 ытла тӗслӗхӗнче ветеринарсем выльӑха лейкозпа, бруцеллезпа чирлипе чирлӗ маррине тӗрӗсленӗ хут пулман. Кунсӑр пуҫне Тутарстанран кӳрсе килнӗ 500 ытларах пуҫ мӑйракаллӑ шултра выльӑха антибиотикпа юлашки хутчен хӑҫан сипленине кӑтартман.
Красноармейски районӗнчи пӗр арҫын туберкулёзран сипленесшӗн пулман. Арҫын уҫӑ формипе (вӑл ҫынсене ерет) чирленӗ. Вӑл Республикӑн туберкулёзпа кӗрешекен диспансерӗнче унччен выртнӑ-ха, анчах хӑй тӗллӗн тухса каяс йӑла пулнӑ. Кӑҫалхи ҫӗртме уйӑхӗнченпе вӑл сипленме пӑрахнӑ.
Ыйтӑва прокуратура тата суд урлӑ татса пама тивнӗ. Республикӑн Сывлӑх сыхлав министерстви надзор органне евитленӗ, унтисем суда ҫитнӗ. Суд арҫынна больницӑра сипленмелле йышӑну кӑларнӑ.
Чӑваш Ене пневмококран вакцина кӳрсе килнӗ. Пурӗ — 5 830 доза.
«Пневмовакс-23» ятлӑ вакцина пневмококк инфекцийӗн 23 серотипӗнчен хӳтӗлет иккен. Ҫав шутра — пневмонирен (ӳпке шыҫни), отитран (хӑлха шыҫни), ҫӗрекен менингитран (пуҫ мими шыҫни), эндокардитран (эндокарди шыҫни), артритран (шӑмӑ чирӗ) тата ытти чӗр-чӗртен.
Вакцинӑна 2 ҫултан иртнӗ ачасенчен пуҫласа тӑваҫҫӗ. Препарата республикӑн сывлӑх сиплев учрежденийӗсене валеҫсе панӑ.
Юпа уйӑхне хӗрарӑмсен кӑкӑр ракӗпе кӗрешмелли пӗтӗм тӗнчери уйӑхлӑх тесе йышӑннӑ.
Республикӑн онкологи диспансерӗнче пӗлтернӗ тӑрӑх, пирӗн ҫӗршывра ҫак органӑн усал шыҫҫине ҫулсерен 70 пин хутчен тупса палӑртаҫҫӗ. Юлашки 15 ҫулта ку чирпе чирлекенсен шучӗ икӗ хут ытла ӳснӗ.
Чӑваш Енре кӑкӑр ракне ҫулсерен 400 ытла хутчен тупса палӑртаҫҫӗ. Кӑҫалхи ҫур ҫулта палӑртнӑ 252 тӗслӗхрен 185-шӗнче чир 1-2-мӗш стадире пулнӑ.
Хӗрарӑмсен кӑкӑр ракне тупса палӑртассипе ҫак уйӑхра пирӗн республикӑра тӗрлӗ мероприяти ирттерӗҫ.
Шупашкар районӗнчи Томаккассинче выльӑх-чӗрлӗхӗн урнӑ чирне тупса палӑртнӑ. Ҫавна май ветеринарсем ҫав тӑрӑхра карантин туса хунӑ.
Карантин паянтан, авӑн уйӑхӗн 2-мӗшӗнчен, вӑя кӗнӗ. Вӑл ятарлӑ йышӑну кӑларичченех вӑйра тӑрӗ.
Урнӑ чире Томаккасси ялӗнчи Вӑрман урамӗнчи 29-мӗш ҫуртра асӑрханӑ. Карантин зони тесе асӑннӑ кил ҫывӑхӗнчен 1,5 километр таран инҫӗшне палӑртнӑ.
Ракӑн ятарлӑ паллисем ҫук та темелле. Чылай чухне ҫак амак ытти чир хыҫне пытанать. Республикӑн онкологи диспансерӗнче шӑпах ҫавӑн пек пациентсенчен пӗрне пулӑшнӑ та.
45 ҫулти арҫын пыр ыратнипе аптӑранӑ, апат ҫӑтнӑ чух та ӑна кансӗр пулнӑ. Вӑл тӗрӗсленме пульницӑна кайнӑ. Тухтӑрсем усал шыҫӑ мар-ши тесе ӑна Республикӑн онкологи больницине кайса килме сӗннӗ.
Чӑн та, рак пулнӑ. Пыр патӗнчен усал шыҫӑ чӗлхе ҫине куҫнӑ. Рак 3 стадие ҫитнӗ. Арҫынна халӗ операци тунӑ, усал шыҫҫӑ касса илнӗ.
ЧР патшалӑх ветеринари служби кӳршӗ регионсенче сыснасен Африка мурӗ пуррине тупса палӑртнӑ. Апла ҫак чир пирӗн регионпа юнашарах
Ведомство пӗлтернӗ тӑрӑх, сыснасем, хир сыснисем Африка мурӗпе чирленӗ тӗслӗхсене Тутарстанра тата Чӗмпӗр облаҫӗнче тупса палӑртнӑ. Ҫавӑнпа сысна усракан ҫынсене, хуҫалӑхсене йӗркене пӑхӑнма ыйтаҫҫӗ. Ҫак регионсенчен выльӑх тата вӗсен апатне кӳрсе килмелле мар. Хир сысни пурӑнма пултаракан вӑрмансене ҫӳреме тӑхтамалла. Выльӑх тӑрук вилсен е чирлесен ветеринарсене пӗлтермелле. Выльӑх туяннӑ чухне сутаканран ятарлӑ документсем ыйтмалла.
Ҫавӑн пекех ЧР патшалӑх ветеринари служби выльӑха маркировка тума сӗнет.
Ярославль, Чита, Амур облаҫӗсенче, Приморье крайӗнче, Дагестанра, Калмӑк Республикинче вӗтӗ мӑйракаллӑ шултра выльӑх шатра чирӗпе аптӑранине палӑртнӑ. Чӑваш Енре хальлӗхе унашкал тӗслӗх ҫук.
Чир пирӗн пата ҫитмен пулсан та санитарсем ӑна кӗтсе илме хатӗрленеҫҫӗ. Ку енӗпе ятарлӑ вӗренӳ пулнӑ.
Сценари тӑрӑх, Ҫӗрпӳ районӗнче ӑнсӑртран сурӑх вилнӗ. Унӑн сив чир пулнӑ, шатра тапса тухнӑ. Ҫав вырӑна специалистсем дезинфекци тунӑ, сурӑх виллине утилизацие янӑ. Унтан санитарсем пост чиккисене тунӑ, машинӑсене дезинфекциленӗ.
Чӑваш Ен Элтеперӗ Олег Николаев Чӑваш Енре пурӑнакансене каллех маска тӑхӑнса ҫӳреттересшӗн. Ун пек хушӑва вӑл маларах пӑрахӑҫланӑ пулин те чирлекенсем пирӗн тӑрӑхра пурпӗрех пур иккен. Унччен кунне 20-25 ҫын кӑшӑлвируспа чирленине тупса палӑртнӑ пулсан, халӗ ҫак цифра 65-66 ҫынпа танлашать.
Олег Николаев ҫынсене халӑх йышлӑ ҫӳрекен вырӑнта тата суту-илӳ центрӗсенче маска тӑхӑнма сӗннӗ. Кун пирки вӑл паян Правительство ҫуртӗнче иртнӗ канашлура каланӑ.
Раҫҫейре упӑте шатра чирӗпе аптӑранӑ пӗрремӗш ҫынна тупса палӑртнӑ. Роспотребнадзор пӗлтернӗ тӑрӑх, ҫак чир Европӑран таврӑннӑ ҫамрӑк ҫынна ернӗ. Вӑл ют ҫӗршывран килсен кӗлетки ҫине шатра тухса тулнӑ тесе пульницӑна пынӑ.
Ҫамрӑк ҫыннӑн чирӗ ҫӑмӑллӑн иртет. Роспотребнадзор хыпарланӑ тӑрӑх, ӑна сарӑлма паман.
Сӑмах май, упӑте шатра чирӗ - вирус инфекцийӗ. Унччен вӑл Африкӑра ҫеҫ тӗл пулнӑ. Кӑҫал ҫуркунне вӗҫӗнче тӗнчипе сарӑлма тытӑннӑ.
+2.3 °C