«Русада» допинга хирӗҫ агентство Чӑваш Енре допинг правилисене пӑснӑ фактсене тупса палӑртнине эпир пӗлтернӗччӗ. Усал хыпар утпа ҫӳрет теҫҫӗ те, ку сӑмах Раҫҫейри информаци агентствисемпе электрон кӑларӑмсем тӑрӑх самантрах сарӑлчӗ.
Чӑваш Ен Элтеперӗ Михаил Игнатьев РБК информаци агентствипе калаҫнӑ чух «Русада» тӗпчевне ӗненмесӗртерех калаҫнӑ. Ҫакна вӑл хӑй нимӗнле тӗпчев материалне те курманнипе сӑлтавланӑ.
Чӑваш Енӗн Спорт министерствинче ӗнер брифинг ирттернӗ. Михаил Богаратов министр «Русада» агенствӑна тӗпчев ирттерме пулӑшассине ӗнентернӗ.
Ӗнер каҫхине Чӑваш Енӗн Сывлӑх сыхлав министертствин сайтӗнче асӑннӑ ведомствӑн спорт медицини енӗпе ӗҫлекен штатра тӑман специалисчӗн Арнольд Карзаковӑн комментарине вырнаҫтарнӑ. Допинг правилисене ҫул ҫитмен ачасем те пӑснӑ тесе РБК ҫырнине вӑл кӑмӑлсӑрланса вуланӑ-мӗн. Вӑл ӗнентернӗ тӑрӑх, Чӑваш Енӗн спорт медицинин врачӗсем ҫамрӑк «олимпиецсен» сывлӑхӗшӗн пӑшӑрханаҫҫӗ, вӗҫӗмех медицина тӗрӗслевӗ ирттереҫҫӗ. Спорт тухтӑрӗсем хӑйсен квалификацине ӳстерсех тӑнине те палӑртнӑ.
Ҫав вӑхӑтрах «Русада» агентствӑн пуҫлӑхӗн ҫумӗ Маргарита Пахноцкая ТАСС информагентствӑна каланӑ тӑрӑх, Чӑваш Енри спорт отраслӗн ертӳҫисемпе тӳре-шари валли планпа пӑхман семинар ирттерсех допинг пирки ӑнлантарса парасшӑн.
Ҫӗртме уйӑхӗн 15-16-мӗшӗсенче Шупашкарта хӑвӑрт утас енӗпе Раҫҫей чемпионачӗ тата первенстви иртӗ. Чӑваш Ене ҫӗршыври 20 регионти 150 ҫӑмӑл атлет килме палӑртнӑ.
Ӑмӑрту Шупашкарти кӳлмекре иртӗ. Арҫынсем – 50 ҫухрӑм, хӗрарӑмсем 20 ҫухрӑм утӗҫ. Юниорсен тупӑшӑвӗ вара «Олимпийский» стадионта иртӗ. Спортсменсем 5 тата 10 ҫухрӑм утса тухӗҫ.
ЧР Спорт министерстви пӗлтернӗ тӑрӑх, кӑҫал наци первенствипе килӗшӳллӗн регионсен хушшинче «Ҫамрӑк скороход» тупӑшу ирттерме палӑртнӑ. Унта 14-15 ҫулсенчи хӗрсемпе каччӑсем хутшӑнӗҫ, пӗрремӗшӗсем – 3 ҫухрӑм, иккӗмӗшӗсем 5 ҫухрӑм парӑнтарӗҫ.
Чӑваш Енри спортсменкӑна Олеся Моисеевӑна Пӗтӗм Раҫҫейри допинга хирӗҫ кӗрешмелли правилӑсен 2.1 пунктне пӑснӑшӑн дисквалификациленӗ. Вӑл ака уйӑхӗн 12-мӗшӗнчен пуҫласа ӑмӑртусене тӑватӑ ҫул хутшӑнаймӗ. Ҫапла йышӑннӑ Пӗтӗм Раҫҫейри ишесси енӗпе ӗҫлекен федераци.
Спортсменкӑн проби ҫинче усӑ курма юраман субстанци, унӑн метаболичӗсемпе маркерӗсене тупнӑ. Палӑртмалла: Олеся Моисеева Олимп резервӗсен ачасемпе ҫамрӑксен ишесси енӗпе 9-мӗш спорт шкулӗнче ӑсталӑхне туптать, Чӑваш Ен чысне ӑмӑртусенче хӳтӗлет.
Спортсменка пӗлтӗр чӳк уйӑхӗнче Раҫҫей спорт мастерӗн нормативне пӗрремӗш хут пурнӑҫланӑ, 1500 метра 17.03,86 минутра ишсе тухнӑ.
Японири Токио хулинче 2020 ҫулта иртекен ҫуллахи Олимп тата Паралимп вӑййисене Чӑваш Енӗн 20 спортсменӗ хутшӑнма пултарать. Вӗсенчен 11-мӗшӗ ҫӗршывӑн пӗрлештернӗ командин тӗп йышӗнче, ыттисем резерври йышра пулма пултарӗҫ. Кун пирки REGNUM информаци агентстви хыпарлать.
Хайхи ҫӑлкуҫ пӗлтернӗ тӑрӑх, Чӑваш Енӗн Министрсен Кабинечӗн пуҫлӑхӗ Иван Моторин алӑ пуснӑ йышӑну тӑрӑх Олимп тата Паралимп вӑййисене хутшӑнма пултаракан спортсменсене укҫан хавхалантарӗҫ. Ҫапла майпа ҫитес ҫулхи ҫурла уйӑхӗн 31-мӗшӗччен
Татьяна Архипова, Анжелика Сидорова, Клавдия Афанасьева, Екатерина Ишова, Алина Прокопьева ҫӑмӑл атлетсем, Ирина Калентьева, Ольга Терентьева маунтинбайкерсем, Владислав Поляшов гимнаст, Мария Кузнецова кӗрешӳҫӗ, Александра Козловӑпа Александр Мышов йывӑр атлетсем уйӑхсерен 30-шар пин тенкӗ илсе тӑрӗҫ. Вӗсем Олимпиадӑна хутшӑнма пултаракансен тӗп йышне кӗнӗ. Елена Наговицына, Марина Максимова, Надежда Мокеева, Марина Новикова, Кирилл Фролов ҫӑмӑл атлетсем, Вероника Чумиковӑпа Евгения Захарченко кӗрешӳҫӗсем, Ирина Баймулкинӑпа Яна Мохина йывӑр атлетсем резерври йыша лекнӗ, ҫавна май уйӑхсерен 15-шер пин тенкӗ илӗҫ.
Чӑваш ҫыравҫисем ака уйӑхӗн 20-мӗшӗнче Чӗмпӗр облаҫӗнчи Чӑлнӑ районӗнче пулнӑ. «Хыпар» издательство ҫурчӗн «Тӑван Атӑл» журналӗн редакторӗ Лидия Филиппова пӗлтернӗ тӑрӑх, ҫула литература журналӗн хастар авторӗсем тухнӑ.
Калем ӑстисем кӳршӗллӗ региона ытахальтен кайман. Шӑмат кун унта Николай Ларионовӑн «Подвиг во имя матери» кӗнеке-альбомне хӑтланӑ. Вӑл ӗҫе автор Надежда Сандркина спорстменкӑна халалланӑ. Надежда — марафонка. СССРӑн пӗрлештернӗ командинче пулнӑ. Чӗмпӗр облаҫӗнчи Чӑвашкассинче ҫуралнӑскер тӑван тӑрӑхӗпе ҫыхӑнӑва татман.
Кӗнеке авторӗ Николай Ларионов пирки каласан, вӑл Тутарстанра ҫуралнӑ. Халӗ вӑл — «Ульяновская правда» хаҫат эксперчӗ, «Тӑван Атӑл» журналӑн редколлегийӗн пайташӗ.
ЧР Министрсен Кабинечӗ тӗнче шайӗнче палӑрнӑ спортсменсене преми пама йышӑнӑ. Кун пирки ведомствӑн пресс-служби хыпарлать.
Игнатьев ячӗллӗ спорт хатӗрленӗвӗн центрӗн воспитанникӗ Анжелика Сидорова ҫӑмӑл атлетика енӗпе иртнӗ Европа чемпионатӗнче лайӑх кӑтартупа палӑрнӑшӑн 75 пин тенкӗ премие тивӗҫнӗ. Ҫак уйӑх пуҫламӑшӗнче спортсменка Аслӑ Британири ӑмӑртура шӑчӑпа сиксе ҫӗнтернӗ. Кунсӑр пуҫне ӑна уйӑхсерен пӗр ҫул 6,5 пин тенкӗ парса тӑрӗҫ.
А.И.Тихонов ячӗллӗ спорт хатӗрленӗвӗн центрӗн воспитанникӗ Александр Васильев та хавхаланӑва тивӗҫнӗ, ӑна 25 пин тенкӗ пама йышӑннӑ. Вӑл Италире хӗллехи триатлон енӗпе иртнӗ тупӑшура кӗмӗл медаль илнӗ. Унӑн тренерне те укҫан хавхалантарӗҫ: 12,5 пин тенкӗ парӗҫ.
Пушӑн 26-мӗшӗнче ЧР Спорт министерствин коллегийӗ пӗлтӗр чи лайӑх кӑтартусемпе палӑрнӑ спотсменсемпе тренерсен ячӗсене пӗлтернӗ.
Ведомство шухӑшӗпе, чи лайӑх спортмен ятне Татьяна Акимова биатлонистка, Лана Прусакова фристайлҫӑ, Анжелика Сидорова ҫӑмӑл атлет тивӗҫ. Вӗсем пурте – тава тивӗҫлӗ спорт мастерӗсем.
Адаптивлӑ спортра вара чи лайӑххисем ҫаксем пулнӑ: Сергей Абозин (хӑлха илтеменнисен спорчӗ), Илья Паргеев (парабидмантонист).
Ирӗклӗ кӗрушӳҫӗсенчен Евгений Захарченкӑпа Мария Кузнецовӑна палӑртнӑ. Александр Козлов йывӑр атлет, Анастасия Кирилловӑпа Вера Лоткова самбистсем те лайӑх кӑтартусемпе савӑнтарнӑ.
Чи лайӑх тренерсем – Никита Васильев (фристайл), Сергей Пегасов (самбо тата дзюдо). Сусӑрсене ӑмӑртусене хатӗрлесе Алексей Атласкин тата Григорий Сергеев тренерсем палӑрнӑ. Спорт резервне хатӗрлекенсенчен Геннадий Иванова тата Ольга Смирновӑна палӑртнӑ.
Паян, пуш уйӑхӗн 1-мӗшӗнче, Красноярск хулинче XXIX Пӗтӗм тӗнчери хӗллехи Универсиада пуҫланнӑ, унта Чӑваш Енӗн тӑватӑ спортсменӗ вӑй виҫет. Кун пирки республикӑн Физкультурӑпа спорт министерстви хыпарлать.
Хайхи ҫӑлкуҫ пӗлтернӗ тӑрӑх, кӑҫалхи Универсиадӑра ӑмӑртмашкӑн ҫӗршывӑн пӗрлештернӗ ушкӑнне Чӑваш Республикинчен тӑватӑ спортсмен кӗнӗ. Ҫапла майпа Универсиада ӑмӑртӑвӗсене Лана Прусаковӑпа Дмитрий Мулендеев фристалҫӑсем, Кристина Кускова йӗлтӗрҫӗ тата Алексей Петров биатлонист хутшӑнаҫҫӗ.
Палӑртса хӑвармарни вырӑнлӑ пулмалла, кӑҫалхи Универсиадӑра 50 ытла ҫӗршывран килнӗ 3 пине яхӑн спортсмен тупӑшать, вӗсем медальсен 76 комплектне ҫӗнсе илессишӗн хӑйсен ӑсталӑхне 11 тӗрлӗ спортра кӑтартӗҫ.
Чӑваш Ен Элтеперне Михаил Игнатьева самбо енӗпе чапа тухнӑ ҫын сӗнӳ-канашпа пулӑшӗ. Евгений Селиванова канашҫӑна ҫирӗплетме республика ертӳҫи ӗнер йышӑннӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ.
Хушура ҫырни тӑрӑх хакласан, Евгений Селиванов Элтепере ырӑ кӑмӑлтан, чунӗ ыйтнипе пулӑшса пырӗ. Тепӗр майлӑ каласан, тӳлевсӗр ӗҫлӗ.
Евгений Селиванов — Пӗтӗм Раҫҫейри самбо федерацийӗн вице-президенчӗ, Олимп резервӗн самбо тата дзюдо енӗпе 10-мӗш спорт шкулӗн директорӗн ҫумӗ.
Кӑҫал 66 ҫул тултаракан самбиста нарӑсӑн 26-мӗшӗнче, Шупашкар хулин иртнӗ ҫулхи ӗҫ-хӗлне пӗтӗмлетме депутатсемпе тӳре-шара пухӑннӑ ларура, Михаил Игнатьев РФ Президенчӗн Хисеп хучӗпе наградӑланӑ.
Ӗнер, кӑрлач уйӑхӗн 6-мӗшӗнче, самбо тата дзюдо енӗпе хатӗрлекен Олимп резервӗсен 10-мӗш ятарлӑ спорт шкулӗнче арҫын самбистсен республика шайӗнчи чемпионачӗ иртнӗ. Кун пирки «Грани» хаҫат хӑйӗн сайтӗнче хыпарланӑ.
Ӑмӑртӑва Чӑваш Енри тӗрлӗ хулапа районсенчен 120 ытла спортсмен хутшӑннӑ. Апла пулин те Шупашкар арӗсемпе каччисем пуринчен ытларах маттур пулнӑ. Вӗсен йышӗнче ылтӑн медаль ҫӗнсе илекен те ытларах. Ҫапла майпа Василий Кузьмин, Даниил Дмитриев, Сергей Дробязко, Никита Соколов, Илья Капустин, Лев Афанасьев, Олег Воробьев тата Евгений Малов ҫӗнтерӳҫӗсем пулса тӑнӑ. Вӗсен йышне ҫавӑн пекех Ҫӗнӗ Шупашкарта пурӑнакан Никита Жигаревпа Вӑрмар поселокӗнчен килнӗ Денис Тимофеев кӗме пултарнӑ.
+27.3 °C