Биатлона юратакансем чӑваш биатлон шкулӗн воспитанникӗн Татьяна Акимован спортри юлашки вӑхӑтри утӑмне сӑнасах тӑраҫҫӗ пулӗ. Тӗнче чемпионатӗнче пирӗн хӗрарӑмсем те, арҫынсем те савӑнтараймарӗҫ пулин те шанчӑк паракан спортсменсем пуррине шанма пулать. Ҫавсенчен пӗри — маларах асӑннӑ Татьяна Акимова.
25-ри Чӑваш Енри спортсменкӑна Пӗтӗм тӗнчери биатлонистсен союзӗ сезонти чи лайӑх ҫӗнӗ ҫын тесе хакланӑ. Кун пирки Раҫҫейӗн биатлонисчӗсен пӗрлешӗвӗ хыпарланине тӗпе хурса республикӑн Спорт министерстви пӗлтерет.
Раҫҫейӗн пӗрлештернӗ командин йышне Татьяна Акимова кӑҫалхи сезонта лекрӗ. Тӗнче кубокӗн шайӗнче вӑл 12 хутчен тупӑшрӗ тата тӗнче чемпионатӗнче — виҫӗ хут. Ханты-Мансийскра иртнӗ Тӗнче кубокӗнче спринтра Татьяна Раҫҫей биатлонистскисенчен чи лайӑххи пулнине, финиша 12-мӗш ҫитнине, эпир пӗлтернӗччӗ.
Паян, пуш уйӑхӗн 19-мӗшӗнче, «Шупашкар-Арена» Пӑр кӗрменӗнче сывлӑх кунне ирттернӗ. Унта пушарнӑйсем коньки ҫине тӑнӑ.
Пӑр керменӗнче хоккей клубӗн хоккеисчӗсем ӑсталӑх класӗ ирттернӗ. Вӗсем клюшкӑпа тата шайбӑпа мӗнле вылямаллине вӗрентнӗ. РФ МЧСӗн «Служу Отечеству» вокалпа инструмент ансамблӗ юрланӑ. Ачасем валли хаваслӑ вӑйӑсем ирттернӗ. Шӑпӑрлансем пысӑк пуканесемпе сӑн ӳкерӗннӗ.
Пӑр керменне ҫитнисене пушарнӑйсем кӗтмен парнепе савӑнтарнӑ. Катока тӳлевсӗр кӗртнӗ.
Кӑҫал «Урожай» спорт обществин кубокне ҫӗнсе илессишӗн 14 команда тупӑшнӑ. Матчсем пӗр уйӑх иртнӗ: Ҫӗрпӳ, Етӗрне, Йӗпреҫ, Комсомольски районӗсенче.
Пӗтӗмлетӳ вӑййи «Шупашкар-Арена» Пӑр керменӗнче иртнӗ. Етӗрнесене Шупашкар районӗ ҫӗнтернӗ. Йӗпреҫсем вара каҫалсене хыҫа хӑварнӑ.
Унтан Йӗпреҫ тата Етӗрне районӗсем тӗл пулнӑ. Йӗпреҫсем етӗрнесене 5:2 шутпа ҫӗнтернӗ. Виҫҫӗмӗш вырӑншӑн тупӑшса Комсомольски районӗ Шупашкар районне ҫӗнтернӗ.
Хальхи вӑхӑтра Ханты-Мансийскра биатлонистсен тӗнче чемпионачӗн тӑххӑрмӗш тапхӑрӗнче иртет. Халӗ кӑна хӗрарӑм спортсменсем спринт енӗпе тупӑшрӗҫ. 7,5 километра пӗрре выртса, тепре тӑрса персе ҫӗнмелли инҫӗше Раҫҫей командинчен ҫиччӗн старта тӑчӗҫ, ҫав шутра Чӑваш Енри биатлон шкулӗн воспитанникӗ Татьяна Акимова та пулчӗ. Пирӗн биатлонисткӑсем ҫӗнтерӳҫсӗсен пьедесталӗ ҫине хальхинче те (Норвегире иртнӗ тӗнче чемпионатӗнче Раҫҫей спортсменӗсем пӗр медаль те ҫӗнсе илейменчччӗ) лекеймерӗҫ. Ҫапах та хальхинче пирӗн ҫӗршыври хӗрарӑм-спринтерсенчен ентешӗмӗр чи лайӑх кӑтартупа финиша тухрӗ. Вӑл пенӗ чухне йӑнӑшмарӗ. Ҫӗнтерӳҫӗрен, Финляндири Кайса Мякяряйненран, 45,7 ҫеккунт юлса 12-мӗш вырӑн йышӑнчӗ. Раҫҫейӗн ытти биатлонисткисенчен Анастасия Загоруйко — 18-мӗш (старта +1.00,7 минут кая юлса ҫитрӗ, перессипе 1 йӑнӑшрӗ); Дарья Виролайнен — 20-мӗш (+1.07,0 (1); Екатерина Юрлова — 32-мӗш (+1.35,5 (2); Екатерина Шумилова — 35-мӗш (+1.39,0 (1); Анна Щербинина — 62-мӗш (+2.37,3 (2); Светлана Слепцова — 67-мӗш (+2.56,2 (2).
Чехири чиперкке Габриэла Соукалова та перессипе пӗртте йӑнӑшмарӗ, анчах финиша пӗрремӗш тухма ӑна 3,1 ҫеккунт ҫитеймерӗ.
Шупашкарти ҫамрӑк пушарнӑй шывра ишессипе иртнӗ тӗнчен хӗллехи чемпионатӗнче ҫӗнтернӗ. Ӑмӑртӑва 42 ҫӗршыври 1200 ытла спортсмен хутшӑннӑ.
Тӗменре иртнӗ XX чемпионат нумаях пулмасть вӗҫленнӗ. Кунашкал ӑмӑрту Раҫҫейре пӗрремӗш хут иртнӗ.
Чемпионата Шупашкарти Андрей Гориянов хутшӑннӑ. Раҫҫей МЧСӗсен пухмачӗ икӗ ылтӑн медальпе пуянланнӑ: вӗсем 100 тата 200 метра ишсе мала тухнӑ.
Раҫҫей спортсменӗсем 50 метрлӑ дистанцире иккӗмӗш пулнӑ. 25 метрлӑ дистанцире Чӑвашри Андрей Гориянов виҫҫӗмӗш вырӑн йышӑннӑ. Эстафетӑна хутшӑнса вӑл пӑхӑр медале тивӗҫнӗ. Андрей — 26 ҫулта.
Чӑваш Енри тепӗр тӑватӑ спортсмен «РФ тава тивӗҫлӗ спорт мастерӗ» ята тивӗҫнӗ. Кун пирки РФ спорт министрӗ Виталий Мутко хушу алӑ пусса ҫирӗплетнӗ.
ЧР Спорт министерстви пӗлтернӗ тӑрӑх, Чӑваш Республикинчен ҫав йыша Александр Новиков ҫӑмӑл атлет, Ришат Нигматуллин самбист кӗнӗ. Ҫавӑн пекех ку ята Павел Вязовпа Дмитрий Ефимов триатлонистсем тивӗҫнӗ.
Сӑмах май, кӑҫал Чӑваш Енри тепӗр тӑватӑ спортсмен сумлӑ ята илнӗ. Вӗсем «Тӗнче класлӑ спорт мастерӗ» ята тивӗҫнӗ.
Ҫак кунсенче Новосибирск хулинче биатлон енӗпе Раҫҫей Кубокӗ VII тапхӑрӗ пырать. Вӑл пуш уйӑхӗн 12-мӗшӗнче пуҫланнӑ, паян вӗҫленмелле. Ҫӗршыв шайӗнчи ӑмӑртӑва Чӑваш Енри тӑватӑ спортсмен хутшӑнать. Стартӑн пӗрремӗш кунӗнче спринтерсен ӑмӑртӑвӗнче Муркаш тӑрӑхӗнчен тухнӑ, Спортӑн хӗллехи енӗсен республикӑри центрӗнче хӑйӗн ӑсталӑхне туптакан Вячеслав Акимов ҫӗнтернӗ. 10 километра вӑл 24 минут та 54 ҫеккунтра ҫӗннӗ. Красноярск тӑрӑхӗнчи кӗмӗл призертан Сергей Корастылевран вӑл 11 ҫеккунт иртнӗ.
Спринта ҫӗршывӑн тӗрлӗ регионӗнчен пурӗ 70-е яхӑн спортсмен хутшӑннӑ. Чӑваш Енрен пурӗ тӑваттӑн тупӑшнӑ. Ҫавсенчен Павел Магазеев пиллӗкмӗш вырӑна тухнӑ, Павел Охотников финиша 25-мӗш ҫитнӗ, Евгений Петров — 29-мӗш.
Мускавра сётокан енӗпе ачасен хушшинче Пӗтӗм Раҫҫейри ӑмӑрту иртнӗ. Унта 41 регионти 1500 ытла спортсмен хутшӑннӑ.
Чӑваш Ен спортсменӗсем ӑнӑҫлӑ тупӑшнӑ. Арҫынсен кумитэ дисциплининче «Будокан» спорт клубӗн спортсменӗ Александр Аввакумов ҫӗнтернӗ. Ҫапла майпа вӑл Раҫҫейӗн пӗрлештернӗ командине кӗнӗ. Команда кӑҫалхи юпа уйӑхӗнче Грецире иртекен Европа чемпионатне хутшӑнӗ.
Александр кӗмӗл медаль хуҫи те пулса тӑнӑ. Ӑна вӑл командӑпа тупӑшса тивӗҫнӗ. Олег Тарашкинпа Владимир Тютин та Чӑваш Ен чысне хӳтӗленӗ.
Раҫҫейӗн ачасен пӗрлештернӗ командине Александр Максимов, Богдан Авдеев, Роман Владимиров тата Илья Тарасов кӗнӗ. Вӗсем Сербире иртекен ӑмӑртӑва хутшӑннӑ.
«Хавал» чӑвашсен халӑх пӗрлешӗвӗ юлашки ҫулсенче вӗҫӗмех чӑваш чӗлхине калаҫура вӗренмелли лагерь йӗркелет. Хастарсем кӑҫал та ӑна пухӗҫ. Хальхи, шучӗпе ҫиччӗмӗш, утӑ уйӑхӗн 3-10-мӗшӗнче «Сурские зори» (чӑв. Сӑр шурӑмпуҫӗ) кану базинче пуҫтарӑнӗ.
Лагере пухнин тӗллевне «Хавал» ҫулленхи тӗлпулусене йӑлана кӗртессипе ҫыхӑнтарать. Тӗлпулу тӗллевӗ вара, маларах палӑртрӑмӑр ӗнтӗ, ҫав вӑхӑтра чӑваш чӗлхине ҫине тӑрса тата хӑвӑрт ӑша хывасси. Тӑван халӑхӑмӑрӑн культурипе, историйӗпе, йӑла-йӗркипе паллаштарассине те тӗллев шутне кӗртеҫҫӗ.
Программа епле пулассине те халех палӑртнӑ. Чӑваш чӗлхи урокӗсене виҫӗ шайпа йӗркелесшӗн. Ачасемпе яш-кӗрӗмпе хӗр-упраҫ валли вӗренӳ вӑйӑ курсӗ евӗр те пулӗ. Чӗлхене преподавательсем хальхи вӑхӑтри меслетсемпе усӑ курса ӑша хывма пулӑшӗҫ. Наци тӗррипе, халӑх юррисемпе тата ташшисемпе ӑсталӑх класӗсем иртӗҫ. Вӗреннипе пӗрлех вӑхӑта спорт мероприятийӗсенче кӑсӑклӑ ирттерме май туса парӗҫ. Экскурсисем йӗркелеме те шантараҫҫӗ.
Лагере хутшӑнакансен йӗркелӳ тата чӗлхе взносӗ, пурӑннишӗн тата апат ҫинишӗн тӳлеме тивӗ.
Ҫак кунсенче Етӗрне районӗнчи Пӗрҫырланта районти тӗрлӗ ялсенчен пухӑннӑ 7 ушкӑн волейбол ӑмӑртӑвне хутшӑннӑ. Ку ӑмӑртусем кӑҫалхипе Чурпай ялӗнче пурӑннӑ Сергей Станиславович Григорьева асра тытса 3-мӗш хут иртнӗ.
Сергей Григорьев хӑй вӑхӑтӗнче вырӑнти Тимирязев ячӗллӗ колхоз ертӳҫи, унтан чылай вӑхӑт хушши Етӗрнери электрокомпани пуҫлӑхӗ пулса тӑрӑшнӑ. Халӑх ӑна темиҫе хутчен те район депутачӗ пулма суйланӑ. Депутат тивӗҫӗсене вӑл яланах чыслӑн пурнӑҫланӑ. Спорта юратакансем «Заря» (Шурӑмпуҫ") футбол команди йӗркелесен вӑл вӗсене куллен пулӑшма майсем тупма пултарнӑ, Пӗрҫырлан ял тӑрӑхӗнчи «Сӑрьен» тата «Илем» юрӑ ансамблӗсене те яланах спонсорла пулӑшу панӑ.
Пухӑннисем малтанах Сергей Григорьева ырӑ сӑмахсемпе аса илчӗҫ: Пӗрҫырлан ял тӑрӑхӗн пуҫлӑхӗ Степанова Н.Ю, вырӑнти депутат Мурзин Николай Михайлович инженер, пӗрле ӳссе ҫитӗннӗ, афган вӑрҫине хутшӑннӑ Козлов Александр Владимирович пухӑннисене ӑмӑртура ӑнӑҫусем сунчӗҫ.
Ҫӗнтерӳҫӗ ятне кӑҫалхипе иккӗмӗш хутчен Асламасран килнӗ «Асламасы» волейбол команди ҫӗнсе илчӗ, куҫса ҫӳрекен кубока тивӗҫрӗ.
+28.3 °C