Етӗрне районӗнче тухтӑра суд тенкелӗ ҫине лартнӑ. Етӗрне районӗнчи тӗп больницӑра ӗҫленӗ хирурга РФ Пуҫле кодексӗн 291.2 статйин 1-мӗш пайӗпе (пӗчӗк сӗтев илнӗшӗн), 292-мӗш статьян 1-мӗш пайӗпе (ӗҫ вырӑнӗпе усӑ курнӑшӑн) явап тыттарнӑ.
Шурӑ халатлӑ ҫав ҫын 2021 ҫулхи кӑрлач уйӑхӗнчен тытӑнса 2022 ҫулхи ҫурла уйӑхӗччен 2 ҫына суя больничнӑйсем туса панӑ.
Суд тухтӑра сӗтев илнӗ виҫелӗх штраф хурса панӑ. Сӗтев илнӗ укҫана вара патшалӑха тавӑрса пама тивӗ.
Пакунлисем тухтӑра сӗтев панисен тӗлӗшпе те пуҫиле ӗҫ пуҫарнӑ. Ӗҫе ҫывӑх вӑхӑтра суд пӑхса тухӗ.
Канаш районӗнчи пӗр ялта пурӑнакан фермер тӗлӗшпе пуҫиле ӗҫ пуҫарнӑ.
2019 ҫулта ҫав ҫамрӑк арҫын мӑйракаллӑ шултра выльӑх туянма тесе патшалӑхран 3 миллион тенкӗ грант илнӗ.
Нумаях пулмасть пакунлисем фермер отчёт валли суя документсем тӑратнине тупса палӑртнӑ. Улталаса арҫын 250 пин тенке вӑрланӑ-мӗн.
Йӗрке хуралҫисем тата Чӑваш Енӗн Ял хуҫалӑх министерствин ӗҫченӗсем вырӑна тухса тӗрӗсленӗ те нимле ферма та курман.
Халӗ ял ҫынни тӗлӗшпе РФ Пуҫиле кодексӗн 15-мӗш статйин 3-мӗш пайӗпе килӗшӳллӗн пуҫиле ӗҫ пуҫарнӑ.
Ӗнер каҫхине Хӗрлӗ Чутай районӗнчи Хватукасси ялӗнчи 38 ҫулти арҫын кил хуҫалӑхӗнче улӑм ҫунса кайнӑ. Инкеклӗ лару-тӑру министерстви пӗлтернӗ тӑрӑх, инкек ачасем шӑрпӑкпа алхаснӑран пулнӑ.
Сакӑр тюк улӑм ҫунса кайнӑ. Унтан ҫулӑм кӳршисен хуралтӑ таврашӗ ҫине куҫнӑ. Инкеклӗ лару-тӑру министерствин ӗҫченӗсем вырӑна ҫитсен пушара 20 минутран сӳнтернӗ.
Сӑмах май, ҫулталӑк пуҫланнӑранпа республикӑра 1023 пушар пулнӑ. Вӗсенче 39 ҫын пурнӑҫӗ татӑлнӑ.
Чӑваш Ен хӗрарӑмӗ пуяс тенӗ курӑнать те, анчах Forbes списокне лекеймен.
Чӑваш Енре ҫуралса ӳснӗ хӗрарӑм халӗ Ямал-Ненецк тӑрӑхӗнче пурӑнать. Ҫурла уйӑхӗн пуҫламӑшӗнче тӑван тӑрӑха килсен вӑл мессенджерсенчен пӗринче инвестици компанине укҫа хывма май пурри ҫинчен пӗлтерӳ курнӑ. Хӗрарӑмпа «менеджре» та кӗҫех ҫыхӑннӑ. Газ организацийӗн акцине туянмалла тесе ӑнлантарнӑ хайхине. Ун валли телефонта ятарлӑ приложени вырнаҫтарма хушнӑ. Ҫавӑнта хӗрарӑм 1,1 миллион тенкӗ ытларах хывнӑ. Вӑл шутран 800 пинне кредит илнӗ.
Укҫана каялла илме май ҫуккине ӑнланса илнӗ ыҫҫӑн хӗрарӑм пакунлсем патне васканӑ, вӗсенчен пулӑшу ыйтнӑ.
Паян 10 сехет те 10 минутра Шупашкарта Граждан урамӗнче ҫулпа пыракан манипулятор кранӗ ҫӑмӑл машина ҫине персе аннӑ. Манипулятор хӑяккӑн тӳнсе кайнӑ. Кузовӗнче пулнӑ ҫул-йӗр техники те тухса ӳкнӗ. Вӑл ҫӑмӑл машинӑран кӑшт аяккарах пулнӑ.
Ҫӑмӑл машина рулӗ умӗнче хӗрарӑм пулнӑ. Вырӑна васкавлӑ медпулӑшу, полици ӗҫченӗсем ҫитнӗ. Телее, хӗрарӑм аманман.
Ҫурла уйӑхӗн 27-мӗшӗнче каҫхи 11 сехетре Патӑрьелте Ленин проспектӗнче вырнаҫнӑ тырӑ упрамалли вырӑн ҫунма тытӑннӑ. Вӑл - тимӗрпе бетонран тунӑскер.
Ҫулӑм 3 тӑваткал метр лаптӑкри электрощит хатӗрне сиен кӳнӗ. Малтанлӑха пӗлтернӗ тӑрӑх, ҫулӑм электрохатӗрпе тӗрӗс усӑ курманран тухнӑ.
Ҫурла уйӑхӗн 25-мӗшӗнче Вӑрмар поселокӗнче Совет урамӗнче 15 ҫулти каччӑ мопедпа пынӑ чухне темӗн ҫине кӗрсе кайнӑ. Хӑй аманман. Анчах 14 ҫулти пассажир ӳкнӗ те вилмеллех аманнӑ.
Мопед водителӗ вырӑнтан тарса ҫухалнӑ. Анчах ӑна йӗрке хуралҫисем часах тытса чарнӑ. Аслисем пур чухне унран ку инкек пирки тӗпчесе пӗлнӗ. Ҫакӑ паллӑ: ҫамрӑксем иккӗшӗ те мотошлемсӑр пулнӑ.
Лапсар посёлокӗнче пурӑнакан ҫынсем урамра ҫӳп-ҫап купаланса выртнишӗн пӑшӑрханаҫҫӗ. Пӑшӑрханса кӑна лармаҫҫӗ-ха вӗсем, ку ыйтупа вырӑнти управляющи компание те ҫитнӗ. Анчах унтисем: «Сирӗн ӗҫ ҫук», — тесе касса татнӑ-мӗн.
Урама икӗ эрне ытла сӑнсӑрлатса выртакан ҫуп-ҫап пирки вӗсем Телеграмри каналсенчен пӗрне пӗлтернӗ. Хӑйсен сӑмахне ӗнентерме вӗсем сӑнӳкерчӗксене те ярса панӑ.
Паян 11 сехет ҫурӑра М-7 ҫулӑн 576-мӗш ҫухрӑмӗнче авари пулнӑ. Малтанлӑха пӗлтернӗ тӑрӑх, "Даф" грузовик водителӗ светофор хӗрлӗ ҫутнӑ вӑхӑтра чарӑннӑ та малта ларакан "ВАЗ-2115" машина ҫине пырса кӗнӗ.
Аварире ҫӑмӑл машина водителӗ аманнӑ. Икӗ водитель те урӑ пулни паллӑ. Халӗ ӗҫ-пуҫа уҫӑмлатаҫҫӗ.
Ҫурла уйӑхӗн 23-мӗшӗнче Шупашкарта пурӑнакан пӗр ҫын йӗрке хуралҫисене пӗр пӑтӑмах пирки пӗлтернӗ. Ҫуран ҫӳрекен ҫын пакунлисене каласа кӑтартнӑ тӑрӑх, Етӗрне ҫулӗ хӗррипе утса пынӑ чухне ӑна такам пневматика винтовкинчен пенӗ. Пуля ҫынна чутах лекмен.
Пӑтӑрмах вӑхӑтӗнче «Контур» патӗнчен «Райский дворик» ятлӑ шашлӑк пӗҫермелли вырӑн енне утса пынӑ. Сумкине майлаштарас тесе вӑл самантлӑха чарӑннӑ. Ҫав вӑхӑтра ун енне пуля вӗҫсе пынӑ.
Вырӑна йӗрке хуралҫисем пырса ҫитнӗ. Анчах вӗсем пӑшаллӑ ҫынна тупса палӑртман.
+23.3 °C