Ҫӗнӗ Шупашкарта икӗ пикене машинӑпа ҫапса кайнӑ водителе тытса чарнӑ.
15 ҫулхи икӗ хӗрача электросамокатпа ҫул урлӑ каҫма тӑнӑ. Вӗсем ҫуран ҫӳрекенсене каҫса ҫӳремелли вырӑнта пулнӑ.
Ҫав вӑхӑтра вӗсем ҫине «Хендай» автомобиль пырса кӗнӗ. Пикесенчен пӗри чавсине хуҫса пӑрахнӑ.
Водитель инкек вырӑнӗнчен кайнӑ, анчах кӑштахран ӑна йӗрке хуралҫисем тытса чарнӑ.
Шупашкар хулинчи Дементьев урамӗнче ҫапӑҫма юратакансем пурӑнаҫҫӗ иккен. Пӗтӗм урамӗпех мар-ха. Анчах ҫав урамри 1-мӗш ҫуртра пурӑнакансем ҫавӑн пек хӑтланма юраткалаҫҫӗ-мӗн. Кун пирки эпир Телеграмри каналсенчен пӗринчи хыпар тӑрӑх пӗлтӗмӗр.
Темиҫе арҫын малтан хирӗҫсе кайнӑ, унтан ҫапӑҫмах тытӑннӑ. Асӑннӑ ҫуртра пурӑнакансем каланӑ тӑрӑх, унтисем кун пек харкашни унччен те пулкаланӑ.
Пӑтӑрмаха асӑрханисем ҫапӑҫакан арҫынсене тӑна кӗме ыйтнӑ, лӑплантарнӑ. Йӗрке хуралҫисене никам та пӗлтермен.
Йӗрке хуралҫи пулса тӑрӑшнӑ арҫын руль умне ӳсӗрле ларнӑ. Пӑтӑрмаха вӑл утӑ уйӑхӗн 20-мӗшӗнче каҫхине ҫакланнӑ.
Автомобилистсем Вӑрнар автоҫулӗ ҫинче «Субара» автомобиль ҫулпа тӳррӗн пыманнине асӑрханӑ. «М7» ҫул ҫинче, Карачура тӗлӗнче, вӑл хирӗҫ пыракан ҫул ҫинех тухса кайнӑ.
Пӑтӑрмаха асӑрханӑ ҫын ҫул-йӗр инспекторӗсене пӗлтернӗ, хӑй ҫав машина хыҫҫӑн йӗрлесе пынӑ.
Кӑштахран хайхи автомобиль Шупашкар районӗнчи Мӑн Кивпулӑх ялне пӑрӑнса кӗрсе кайнӑ. Унта вӑл клуб умӗнчи ҫамрӑксем ҫине чутах пырса кӗмен.
Ялта ҫул-йӗр инспекторӗсем водителе тытса чарнӑ. Арҫын водитель прави ҫуккине пӗлтернӗ, ун вырӑнне ШӖМ ветеранӗн удостоверенине кӑларса кӑтартнӑ. Вӑл автоинспекцире 10 ҫул ӗҫленине, ӑна никам та ним те тумассине пӗлтернӗ. «Руль умӗнче» форумра пӗлтернӗ тӑрӑх, кайран ҫав этем такам патне шӑнкӑравлама пуҫланӑ.
Ӳсӗр водитель яваплӑхран та пӗрех пӑрӑнаймӗ.
Шупашкар хулинче пӗр арҫын аллине картлашкан карлӑкӗ хушшине чиксе лартнӑ. Ӑна вӑл унтан каялла кӑларайман.
Пӑтӑрмах утӑ уйӑхӗн 20-мӗшӗнче каҫхине, 19 сехет те 40 минутра, хулари Лебедев урамӗнчи пӗр ҫуртра пулса иртнӗ.
Аллине карлӑк хушшинче хӗстерсе лартнӑ арҫыннӑн ирӗксӗрех ҫӑлавҫӑсенчен пулӑшу ыйтма тивнӗ.
Арҫынна пулӑшма ҫӑлавҫӑсем пырса ҫитнӗ. Вӗсем «Спрут» ятлӑ хатӗр пулӑшнипе алла карлӑкран кӑларма пулӑшнӑ.
Паян ҫӗрле, 2 сехет иртсен, Тӑвай районӗнче лаша вити ҫунма пуҫланӑ. Пушар Йӑнтӑрччӑ ялӗнче пулнӑ.
Шел те, ҫулӑм 500 тӑваткал метр лаптӑк ҫинче вырнаҫнӑ йывӑҫ витене тӗп тунӑ. Халӗ пушар мӗнрен тухнине тӗпчеҫҫӗ.
Улатӑрта вара Хурӑнлӑ урамӗнчи 3-мӗш ҫуртри пӗр пӳлӗмлӗ хваттерте диван ҫунма тытӑннӑ. Пушарнӑйсем ҫулӑма 5 минутран сӳнтернӗ. 26 ҫулти кил хуҫине ҫӑлма май килнӗ.
Шупашкар хулинчи Петров урамӗнчи 7-мӗш ҫуртра ҫын виллине тупнӑ.
Асӑннӑ ҫуртри иккӗмӗш подъездра ҫӗрӗк шӑрши кӗнӗрен ҫынсем ятарлӑ службӑсене пӗлтернӗ. Унтисем пырса алӑка ватнӑ. Ҫавӑн чухне вӗсем унта арҫын виллине курнӑ.
Асӑннӑ ҫуртра пурӑнакансем пӗлтернӗ тӑрӑх, асӑннӑ хваттертен халӗ те ырӑ мар шӑршӑ кӗрет. Алӑка хӑй вырӑнне лартса хумантан унта килсӗр ҫынсем кӗрсе ҫӳреме тытӑннӑ имӗш.
Ҫуртра пурӑнакансем подъездра хлор шӗвекӗ сапаҫҫӗ, анчах ырӑ мар шӑрша пӗрех ҫӗнтереймеҫҫӗ.
Шупашкарти йӗрке хуралҫисем ҫын ӳкерсе хӑварнӑ 5 пин укҫана илнӗ хӗрарӑма шыраҫҫӗ.
Хӗрарӑм сӑнпа пӑхсан 50-55 ҫулсенче, 160-165 сантиметр ҫуллӗш, ҫӳҫӗ вӑрӑм, сарӑ ҫӳҫне вӗҫӗнче хура тӗспе сӑрланӑ. Хӗрарӑм шурӑ рюкзакпа пулнӑ.
Хӗрарӑма палласа илекенсене йӗрке хуралҫисене пӗлтерме ыйтаҫҫӗ.
Аса илтерер: ҫын ҫҫхатса хӑварнӑ япалана илни те вӑрлани шутланать. Ҫавӑнпа та ют пурлӑха хапсӑнма кирлӗ мар.
Паян 15 сехетре Канаш районӗнчи Шуркасси ялӗ ҫывӑхӗнче ҫӑмӑл машина аварие ҫакланнӑ. Салонра ачасем те пулнӑ.
Малтанлӑха палӑртнӑ тӑрӑх, 33 ҫулти водитель руле итлеттереймен те кювета чӑмнӑ. Ҫавна май водитель, 33 ҫулти пассажир, хӗрарӑм, тата 7 ҫулти хӗрача аманнӑ. 12-ри тата 14 ҫулти ачасене пульницӑна тӗрӗслеме илсе кайнӑ.
Халӗ йӗрке хуралҫисем ӗҫ-пуҫа уҫӑмлатаҫҫӗ.
Улатӑр арҫынни 5-мӗш хутран ӳксе вилнӗ.
Инкек утӑ уйӑхӗн 17-мӗшӗнче хулари «Стрелка» микрорайонти 30-мӗш ҫуртра пулса иртнӗ.
Малтанласа палӑртнӑ тӑрӑх, арҫын ҫав ҫуртра пӗрисем патӗнче хӑнара пулнӑ. Кӑштахран вӑл балкон ҫинче ҫывӑрса кайнӑ. Кил хуҫи хваттере питӗрсе тухса кайнӑ.
Вӑрансан хӑна хваттертен тухас тенӗ. Кил хуҫине кӗтсе ларас темен курӑнать, балкон ҫинчен кӳршӗсен балконӗ ҫине каҫма шухӑш тытнӑ. Анчах алли вӗҫерӗнсе кайнӑ та персе аннӑ. Ӳксен вӑл вилмеллех аманнӑ.
Шупашкарта пурӑнакан ҫамрӑк арҫын маркетплейсра ӗҫлесе илес тенӗ те укҫасӑр юлнӑ.
32 ҫулти арҫын йӗрке хуралҫисене пӗлтернӗ тӑрӑх, ун патне хушма укҫа ӗҫлесе илме сӗнсе ҫырнӑ ҫыру мессенджерсенчен пӗринче ҫитсе выртнӑ.
Кунне 15-шер пин тенкӗ таран хушма укҫа тума пулать тесе ӗнентернӗ хайхисем. Ҫапла путӑр тесен нумаях та кирлӗ мар-мӗн, тавар айне «килӗшет» текен паллӑ лартмалла тата хӑш-пӗр продукцие туянмалла. Тӑкака ӗҫ укҫипе пӗрле саплаштарма шантарнӑ.
Арҫын 164 пин тенкӗлӗх тавар туяннӑ. Укҫана каялла тавӑрма май килмен.
-7.7 °C