Паян ирхи 6 сехетре Йӗпреҫ районӗнчи Кӑшмаш ялӗнче пушар пулнӑ. Унта йывӑҫ ҫурт ҫунса кӗлленнӗ.
Инкеклӗ лару-тӑру министерстви хыпарланӑ тӑрӑх, пушарта 53 ҫулти кил хуҫи ҫунса вилнӗ. Халӗ ведомство ҫулӑм мӗнрен тухнине уҫӑмлатать.
Кӑрлач уйӑхӗн 19-мӗшӗнче Етӗрне районӗнчи Ирҫере пушар тухнӑ. Тӑр кӑнтӑрла, 14 сехет тӗлӗнче, пурӑнмалли пӳртре вут-ҫулӑм алхасма тытӑннӑ.
Шел те, инкекре ҫын пурнӑҫӗ татӑлнӑ. 90 ҫулхи кинемей куҫне ӗмӗрлӗхе хупнӑ.
Пушар сӑлтавне тата тӑкак виҫине специалистсем палӑртӗҫ.
Сӑмах май каласан, Инкеклӗ ӗҫсен министерствин республикӑри управленийӗ ирттернӗ пресс-конференцире пушар вӑхӑтӗнче ҫынсен хӑйсене тӗрӗс мӗнле тытмалли ҫинчен аса илтернӗ. Сӑмахран, ҫунакан пӳлӗм алӑкне тата чӳречине хупса хумалла та урӑх пӳлӗме каймалла.
Кӑрлач уйӑхӗн 17-мӗшӗнче каҫхине Йӗпреҫ районӗнчи Пӑва поселокӗнче пушар алхаснӑ. Унта ҫурт ҫуннӑ.
Пушарта 63 ҫулти кил хуҫи тата унӑн 35-ри ывалӗ шар курнӑ. Пиҫсе кайнӑскерсене тата сӗрӗмпе наркӑмӑшланнӑскерсене районти тӗп пульницӑна илсе ҫитернӗ.
Малтанлӑха пӗлтернӗ тӑрӑх, ҫулӑм электрохатӗр юсавсӑр пулнӑран тухнӑ. Пушар 4 тӑваткал метр маччана, пурлӑхӑн пӗр пайне, шалти отделкӑна сиенлетнӗ.
Паян ирхине 8 сехет те 52 минутра Шупашкарта, Пичет ҫурчӗ умӗнче, автобус ҫунса кайнӑ. Вӑл 101-мӗш маршртупа ҫӳрекенскер пулнӑ.
Автобус Ҫӗнӗ Шупашкартан килнӗ. Юрать-ха, ҫунма тытӑнсан пассажирсем тухма ӗлкӗрнӗ.
Транспорт капот айӗнчен хыпса илнӗ, питӗ хӑвӑрт ҫунса кайнӑ. Пушара пула ҫав вырӑнта троллейбус линийӗ сиенленнӗ.
Шупашкар хулинчи Шевченко урамӗнчи общежитире кӑрлач уйӑхӗн 5-мӗшӗнче пушар тухнӑ хыҫҫӑн килсӗр-ҫуртсӑр юлнӑ. Инкекре 19-ти хӗр сӗрӗмпе чыхӑнса вилнине Чӑваш халӑх сайчӗ унччен пӗтернӗччӗ-ха.
Шар курнисене бюджетран 10-шар пин тенкӗ уйӑрса панӑ. Ӑна илме пурӗ 120 ҫын заявлени ҫырса панӑ, анчах вӗсенчен 79-шӗ ҫеҫ хальлӗхе укҫана илнӗ. Ыттисем кирлӗ документсене тӑратса ҫитермен-мӗн.
Инкек общежитири пӳлӗмсенчен пӗринче пурӑннӑ ӳсӗр арҫын пирус туртнине пула тухнӑ иккен.
Халӗ ҫынсем вӑхӑтлӑх пурӑнмалли вырӑн шыраҫҫӗ. Хула ертӳҫисем сӗннӗ хӑш-пӗр ҫуртра пурӑнма условисем начар иккен.
Кӑрлач уйӑхӗн 14-мӗшӗнче кӑнтӑрла Улатӑрта ҫурт ҫунса кайнӑ. Вӑл виҫӗ ачаллӑ Ударцевсен пулнӑ.
Ҫурт арҫынсен Ҫветтуй Троица мӑнастирӗ ҫумӗнче вырнаҫнӑ. Ҫемье пуҫӗ унта 20 ҫул ытла ӗнтӗ водительте ӗҫлет.
Ҫулӑм ҫурта кӑна мар, мунчана, хуралтӑ таврашӗсене те тӗп тунӑ. Пушар вӑхӑтенче ҫемье докуменчӗсене тата кӑштах япалисене илсе тухса ӗлкӗрнӗ.
Мӑнастирьте ӗҫлекенсем шар курнӑ ҫемье валли укҫа пухма тытӑннӑ.
Кӑрлач уйӑхӗн 11-мӗшӗнче каҫхи 5 сехетре Улатӑр районӗнчи Кире поселокӗнче пушар пулнӑ. Инкеклӗ лару-тӑру патшалӑх комитечӗ пӗлтернӗ тӑрӑх, унта Карл Маркс урамӗнчи ҫурт ҫуннӑ. Ҫулӑм верандӑна, хуралтӑ таврашне тӗп тунӑ, пурӑнмалли ҫурта та сиенлетнӗ.
Шел те, «хӗрлӗ автан» ҫын пурнӑҫне татнӑ. Пушарта 1942 ҫулта ҫуралнӑ арҫын вилнӗ.
Ҫӗнӗ Шупашкарта паян ҫӗрле, 2 сехетре, общежити ҫуннӑ. Ку Семенов урамӗнчи 21-мӗш ҫуртра пулнӑ.
Инкеклӗ лару-тӑру министерстви пӗлтернӗ тӑрӑх, ҫынсене эвакуацилеме тивнӗ. Пӗтӗмпе 11 ҫынна урама илсе тухнӑ. Вӗсен йышӗнче виҫҫӗшӗ – ачасем.
Пушара 25 минутран сӳнтернӗ. Малтанлӑха пӗлтернӗ тӑрӑх, ҫулӑм такам чӗртсе янӑран тухнӑ. «Хӗрлӗ автан» коридорта сарӑлнӑ, 6 хваттер алӑкне сиенлетнӗ.
Канмалли кунсенче Шупашкарта Ильбеков урамӗнчи общежити ҫуннине, унта 19 ҫулти хӗр вилнине пӗлтернӗччӗ. Уявсем вӗҫлениччен тӗп хулари тепӗр общежитире пушар пулнӑ.
Хальхинче Коопераци институчӗ патӗнче, Максим Горький проспектӗнчи ҫуртра. Иккӗмӗш хутри коридорти мачча, стенасем сиенленнӗ. Пӗтӗмпе – 25 тӑваткал метр. Пушара 10 минутран сӳнтернӗ, унта пурӑнакансене эвакуацилеме тивмен.
Кӑрлач уйӑхӗн 5-мӗшӗнче Шупашкарта Шевченко урамӗнче общежити ҫунни пирки хыпарланӑччӗ. Аса илтерер: ҫунакан ҫуртран 26 ҫынна эвакуациленӗ, ҫав йышра 10-шӗ - ачасем.
Хӑш-пӗр ҫынна тухтӑрсен палӑшӑвӗ кирле пулнӑ. 19 ҫулти хӗрӗн сывлӑхӗ йывӑр пулнӑ. Тухтӑрсем унӑн пурнӑҫӗшӗн ҫӗрӗпе кӗрешнӗ. Анчах, шел те, ӑна ҫӑлма май килмен, вӑл кӑрлачӑн 6-мӗшӗнче сывлама чарӑннӑ. Унпа паян ӗмӗрлӗхех сыв пуллашнӑ.
+2.3 °C