Паян ҫӗрле, 2 сехет иртсен, Тӑвай районӗнче лаша вити ҫунма пуҫланӑ. Пушар Йӑнтӑрччӑ ялӗнче пулнӑ.
Шел те, ҫулӑм 500 тӑваткал метр лаптӑк ҫинче вырнаҫнӑ йывӑҫ витене тӗп тунӑ. Халӗ пушар мӗнрен тухнине тӗпчеҫҫӗ.
Улатӑрта вара Хурӑнлӑ урамӗнчи 3-мӗш ҫуртри пӗр пӳлӗмлӗ хваттерте диван ҫунма тытӑннӑ. Пушарнӑйсем ҫулӑма 5 минутран сӳнтернӗ. 26 ҫулти кил хуҫине ҫӑлма май килнӗ.
Утӑ уйӑхӗн 18-мӗшӗнче юсавсӑр пуйӑса пула «Сӑрҫум» заповедник ҫумӗнчи курӑк ҫунма пуҫланӑ. 12 сехет тӗлӗнче Улатӑр районӗнче чукун ҫулпа тавар тиенӗ тӗтӗм мӑкӑрӑлтаракан пуйӑс иртсе кайнӑ. Вут-хӗм сирпӗтнӗрен чукун ҫул ҫывӑхӗнчи курӑк тивсе илнӗ.
Тӑватӑ ҫухрӑм тӑршшӗнче ҫулӑма ҫичӗ вырӑнта тупса палӑртнӑ, вӗсене пӗтерме виҫӗ сехет кирлӗ пулнӑ. Юрать-ха ҫулӑм вӑрман таран ҫитеймен — ӑна сухаласа пӑрахнӑ лаптӑксем тытса чарнӑ.
Ҫулӑма алхасма касса пӑрахнӑ ҫамрӑк хунавсем те пулӑшнӑ иккен. Электриксем ҫутӑ линине вӗсенчен иртнӗ, анчах хӑйсем хыҫҫӑн тирпейлесе хӑварман — каснӑ хунавсене ҫавӑнтах пӑрахса хӑварнӑ. Типӗ курӑк ҫинчи ҫулӑма вӑй илме вӗсем питӗ аван пулнӑ.
«Сӑрҫум» заповедникри пушарпа кӗрешекенсем кӑҫал чукун ҫул ҫине ҫулӑма сӳнтерме виҫҫӗ ҫитнӗ.
«Чукун ҫул ҫинчи турттаракан хатӗрсем улшӑнаҫҫӗ. Час-часах эпир реактивлӑ самолетсем евӗр ҫула касса пыракан ҫӗнӗ локомотивсене куратпӑр, анчах, шел пулин те, хӑшпӗр чухне вут тивертекенсем пуйӑссем те иртеҫҫӗ», — пӗлтернӗ хӑйсен пӑшӑрханӑвне «Сӑрҫум» заповедникре.
Хальхи вӑхӑтра Горький чукун ҫулӗпе, тата пушар тухассинчен тимлекен органсемпе пӗрлехи ӗҫ ирттереҫҫӗ.
Ӗнер, утӑ уйӑхӗн 16-мӗшӗнче, Шупашкарта пӗр машина ҫунса кайнӑ.
«ГАЗ 2217» маркӑллӑ автомобиль Шумилов урамӗнчи 20-мӗш «в» ҫурт тӗлӗнче, «Шупашкар» пасартан инҫех мар вырӑнта ларнӑ.
Инкеклӗӗҫсен министерствин респубикӑри управленийӗн пресс-служби Телеграмра хыпарланӑ тӑрӑх, машинӑна чӗртсе яма путарнӑ. Яваплӑ службӑсем пушар сӑлтавне палӑртӗҫ.
Комсомольски районӗнче вӑрман ҫунма пуҫланӑ.
Юрать, ӑна хӑвӑрт сӳнтернӗ.
61-мӗш кварталта пушар тухни пирки иртнӗ шӑматкун, утӑ уйӑхӗн 15-мӗшӗнче, 15 сехет те 55 минутра пӗлтернӗ. Пушарпа кӗрешекенсем вырӑна хӑвӑрт ҫитнӗ. Тепӗр ҫур сехетрен ҫулӑма сарӑлма чарнӑ, унтан пачах сӳнтернӗ.
Пушар 0,1 гектар ҫинче алхаснӑ. Телее, ҫулӑм вӑрман хуҫалӑхне тӑкак кӳмен.
Халӗ пушар мӗнрен тухнине уҫӑмлатаҫҫӗ.
Муркаш районӗнчи Амоксар утравӗнче, Атӑл варринче, Мари Элти археологсем шырав ирттернӗ те 11-мӗш ӗмӗрти вилтӑприсене тупнӑ. Ку ӗҫе Мари археологи экспедицийӗ тата нимеҫӗсем пурнӑҫланӑ.
Вӗсем вилтӑприсенче алка-эреш, хӗҫ-пӑшал, ӗҫ хатӗрӗ, антропологи материалӗсем тупнӑ. Археологсем палӑртнӑ тӑрӑх, инвентаре тата виле пытарнин йӑли-йӗркине пӑхсан вилтӑприсем марисенни пек. Ҫапах урӑхлараххисем те пур.
Аса илтерер: утӑ уйӑхӗн 8-мӗшӗнче кӑнтӑрла Амоксар утравӗ ҫинче пушар тухни курӑннӑ.
Кӑҫал кӑрлачӑн 14-мӗшӗнче Улатӑрта пурӑнакан нумай ачаллӑ Ударцевсем ҫуртсӑр юлнӑ – пушар вӗсен пӳртне кӗл купине ҫавӑрнӑ. Кун хыҫҫӑн ырӑ кӑмӑллӑ ҫынсем вӗсене пулӑшма тӑрӑшнӑ. Халӗ ав савӑнӑҫлӑ хыпар пур: Ударцевсем халӑх пулӑшнипе икӗ хутлӑ ҫурт туяннӑ. Пӳрте вӗсем пуш уйӑхӗнче туяннӑ. Ӑна хӑтлӑлатма тытӑннӑ.
Ударцевсем пушарта нимӗн те илсе тухайман. Чукун ҫул хӗрринче пурӑннӑран пушар машини патне пырайман. Шланг тӑсса пӗтернӗ ҫӗре ҫурт ҫунса та кайнӑ. Кун хыҫҫӑн ҫемье пӗлӗшӗсем патӗнче пурӑннӑ.
Инкек пирки тӗнче тетелӗнче вырнаҫтарсан ырӑ кӑмӑллӑ ҫынсем апат-ҫимӗҫпе те, япаласемпе те, укҫан та пулӑшма пуҫланӑ. Халӗ Ударцевсем ырӑ кӑмӑллӑ ҫынсене куншӑн тав тӑваҫҫӗ.
Паян кӑнтӑрла Атӑл ҫинчи утрав ҫунма пуҫланӑ. Сӑмах Муркаш районӗнчи Васильевка выҫҫӑлккине хирӗҫ вырнаҫнӑ Амоксар утравӗ пирки пырать.
Ҫак утрав ҫинче вӑрман та, хуралтӑ таврашӗсем те пур.
Ку хыпара "Про Город" хаҫата халӑх корреспоненчӗ Андрей Михайлов пӗлтернӗ. Вӑлах сӑнӳкерчӗксем янӑ.
Ӗнер кӑнтӑрла хыҫҫӑн Тӑвай районӗнче Вырӑс Нарвашӗнчен инҫех мар ҫӳп-ҫап купи ҫунма тытӑннӑ. Кун пирки ҫынсем васкавлӑ службӑна 16 сехет те 16 минутра шӑнкӑравласа пӗлтернӗ.
Пушарнӑйсем тӳрех ҫитнӗ. Вырӑна район прокурорӗн ҫумӗ Артур Белов та пынӑ. 18 сехет ҫурӑ тӗлне полигонра унта-кунта ҫунакан вырӑнсем кӑна юлнӑ. Вӗсене тӑпрапа, шывпа сапнӑ.
Халӗ прокуратура тӗрӗслев ирттерсе ҫӳп-ҫап купи мӗншӗн ҫунма тытӑннине палӑртать.
Ҫитес вӑхӑтра республикӑра шӑрӑх ҫанталӑк тӑрӗ, ҫумӑр ҫумӗ. Ҫавна май икӗ районта пушар тухас хӑрушлӑх пысӑк пулнине палӑртнӑ.
Ку Тӑвай тата Елчӗк районӗсене пырса тивет. Вӗсенче ҫутҫанталӑк пушарӗ тухас, типӗ курӑк ҫунма пуҫлас хӑрушлӑх пысӑк. Ҫавӑнпа ҫак икӗ районта пушар тухас хӑрушлӑхӑн 5-мӗш класӗ пулнине палӑртнӑ. Тепӗр 16 муниципалитетра - 4-мӗш класс.
Сӑмах май, Чӑваш Енре утӑ уйӑхӗн 1-20-мӗшӗсенче вӑрмана кӗме чарнӑ. Ку та пушар тухас хӑрушлӑх пысӑк пулнипе ҫыхӑннӑ.
Паян ирхине Шупашкарти Трактор тӑвакансен проспектӗнчи 34-мӗш ҫуртра пушар пулнӑ. Унта пӗрремӗш хутри хваттер ҫуннӑ. Ҫав вӑхӑтра 19-ти каччӑ 8 ҫулти тата 13-ри йӑмӑкӗсемпе килте пулнӑ.
Ирхи 7 сехет ҫурӑра асли тӗтӗм шӑршипе вӑраннӑ. Вӑл йӑмӑкӗсене вӑратса урама тухнӑ. Иртен-ҫӳрен ҫулӑм тухнине курса пушарнӑйсене чӗннӗ.
Хваттерте тӗпел ҫуннӑ. Кӳршӗре пурӑнакан хӗрарӑмпа ачана ҫӑлавҫӑсем урама тухма пулӑшнӑ.
Малтанлӑха пӗлтернӗ тӑрӑх, пушар юсавсӑр электропралука пула тухнӑ.
+6.3 °C