Муркаш районӗнчи прокуратура асӑннӑ тӑрӑхри Александровскинчи врач амбулаторине тӗпрен юсассине епле йӗркеленине тӗрӗсленӗ.
Юсав ӗҫӗпе «ПремьеР» суту-илӳпе промышленность компанийӗ кӳлӗнме килӗшнӗ. Унпа ятарлӑ килӗшӳ тунӑ, алӑ пусса ҫирӗплетнӗ.
Контрактра пӑхса хӑварнӑ тӑрӑх, мӗнпур ӗҫе 2022 ҫулхи авӑн уйӑхӗн 30-мӗшӗ тӗлне вӗҫлемелле пулнӑ. Анчах строительсем васкаман. Ҫавна кура прокуратура подряд организацийӗ ячӗпе асӑрхаттару хучӗ ҫырнӑ, унӑн директорӗ тӗлӗшпе административлӑ ӗҫ пуҫарса 110 пин тенкӗ штраф хуса панӑ.
Прокуратура тӗрӗсленӗ хыҫҫӑн стройорганизаци ӗҫе хӑвӑртлатнӑ.
Чантӑр ҫывӑхӗнчи пӗвере пулӑ виллисене асӑрханӑ. Ҫавна май Шупашкарти Мускав районӗн прокуратури тӗрӗслев пуҫарнӑ.
Пулӑ виллисем ҫыран хӗрринче те, пӗвере те пулнине асӑрханӑ. Халӗ специалистсем пулӑсем мӗншӗн вилнине уҫӑмлатаҫҫӗ. Айӑплисене тупсан прокуратура вӗсен тӗлӗшпе мерӑсем йышӑнӗ.
Ҫӗрпӳ районӗнчи аптекӑсенче тӗрӗслев ирттернӗ те 18-мӗш аптекӑра амоксициллин антибиотик, суспензи евӗрри, пулманнине тупса палӑртнӑ. Ҫавна май прокуратура унӑн директорне дисциплинарлӑ майпа явап тыттарма йышӑннӑ.
Хальхи вӑхатра ҫав аптекӑна амоксициллин антибиотик сутлӑха килнӗ.
Патӑрьел районӗнчи Люля поселокӗнче ейӳ сарӑлнӑ. Вырӑна район прокурорӗ, администраци ӗҫченӗсем ҫитнӗ.
Люля юханшывӗнче шыв шайӗ хӑпарнӑ. Ҫавна май ҫак ятлӑ поселокра ҫулсене шыв илнӗ.
Прокуратура яваплӑ органсем ейӳпе мӗнле кӗрешнине тӗрӗслӗ. Халӗ шыв шайӗ чакма пуҫланӑ. Поселокра та ейӳ чакма пуҫланӑ.
Ҫӗмӗрлере 67 ҫулти хӗрарӑма суд тӑвӗҫ. Ӑна РФ Пуҫиле кодексӗн 105-мӗш статйин 1-мӗш пайӗпе суд тӑвӗҫ.
Кӑҫалхи кӑрлачӑн 6-мӗшӗнче ӳсӗр хӗрарӑм хӑйӗн хваттерӗнче упӑшкипе хирӗҫсе кайнӑ. Сӑмахпа калани ҫитмен пек туйӑннӑ курӑнать — алла ҫӗҫӗ ярса илнӗ. Арҫынна вӑл темиҫе хутчен ҫӗҫӗпе чикнӗ. Суранланнӑ этем кӑштахран реанимацире вилсе кайнӑ.
Хӗрарӑм тӗлӗшпе пуҫарнӑ пуҫиле ӗҫе суда ярса панӑ.
Васкавлӑ медпулӑшу фельдшерӗсем Элӗк районӗнче Мӑн Вылӑ ялӗнче пурӑнакан 81 ҫулти арҫын патне пулӑшма ҫитсен яла машинӑпа кӗрейменни пирки пӗлтернӗччӗ.
Аса илтерер: тухтӑрсем пациент патне 2 ҫухрӑм ҫуран утнӑ. Юрать, чӗрепе аптӑраса ӳкнӗскере пулӑшса ӗлкӗрнӗ. Ӑна вӗсем машина патне пластмасса ваннӑпа 2 ҫухрӑм сӗтӗрсе тухнӑ.
Халӗ прокуратура ку тӗслӗх тӗлӗшпе тӗрӗслев ирттерет. Тухтӑрсем пациент патне ҫула юр тултарнине пула ҫитеймен.
Пациент вара халӗ пульницӑра.
Нумаях пулмасть тӗнче тетелне Шупашкарти 53-мӗш шкулта пӳлӗмре кӑвакӑш пулнине ӳкернӗ видео вырнаҫтарнӑ. Кун хыҫҫӑн прокуратура унта тӗрӗслев ирттернӗ.
Чӑнах та, шкулта кӑвакӑш пур иккен. Тӗрӗслев кӑтартнӑ тӑрӑх, ун пеккине 3-мӗш хутра географи класӗнче асӑрханӑ. Апла пулин те унта уроксем ирттерме чарман.
Прокуратура шкул директорӗ тӗлӗшпе представлени ҫырнӑ. Класри кӑвакӑша ятарлӑ дезинфекци шӗвекӗпе пӗтернӗ. Шкул ертӳлӗхне ҫурт тӑррине ҫӗнетиччен, ытти юсава тӑвиччен пӳлӗмри кӑвакӑша сӑнаса тӑма хушнӑ.
Елчӗк районӗнчи 41 ҫулти арҫынна амӑшӗн ҫуртне чӗртсе янӑшӑн суд тӑвӗҫ. Ун тӗлӗшпе район прокуратури айӑплава ҫирӗплетнӗ.
Следстви версийӗ тӑрӑх, пӗлтӗр чӳк уйӑхӗн 28-мӗшӗнче ҫак арҫын амӑшӗн килне пынӑ та бензин сапса чӗртсе янӑ. Кунсӑр пуҫне вӑл унта газ балонне йӑтса кӗнӗ. Юрать, амӑшӗ килте пулман. Ывӑлӗ вӑл ӑна эрех илме укҫа паманшӑн тарӑхнӑ-мӗн.
Телее, амӑшӗ пушар тухнине часах асӑрханӑ. Ҫулӑма кӳршисем, пушарнӑйсем пулӑшнипе сӳнтернӗ.
Следстви вӑхӑтӗнче арҫын укҫа паманшӑн амӑшне вӗлерессипе те хӑратни ҫиеле тухнӑ.
Шупашкарти 62-мӗш шкулта тӑрӑран шыв аннине видео ӳкерсе тӗнче тетелне вырнаҫтарнӑ. Мускав районӗн прокурорӗ ҫакӑ тӗрӗсех-ши тесе унта тӗрӗслеме пынӑ.
Чӑнах та, 3-мӗш хутра кӗтесре шыв анать. Урайӗнче витресем лараҫҫӗ, унта шыв тумлать.
Тӗрӗслев хыҫҫӑн ҫитменлӗхсене пӗтерес тӗллевпе ӗҫлӗҫ. Ҫавӑн пекех шкулта юсав ӗҫӗсене маларах ирттерес ыйтӑва хускатӗҫ. Планра вара юсава 2024-2025 ҫулсенче ирттерме палӑртнӑ.
Вӑрмар районӗнче пурӑнакан 92 ҫулти кинемей Тӑван ҫӗршывӑн аслӑ вӑрҫин ветеранӗ ята халӗ тин тивӗҫнӗ. Ҫав ятшӑн карчӑкӑн суд тӑрӑх ҫӳреме тивнӗ.
Суд тӑрӑх хӑй ҫӳремен-ха – прокуратура хӳтте кӗнӗ.
Вырӑнти социаллӑ хӳтлӗх пайӗнче кинемее Тӑван ҫӗршывӑн аслӑ вӑрҫин ветеранӗ ята ҫирӗплетсе пыракан удостоверение пама килӗшмен. Тӳре-шара ҫирӗплетнӗ тӑрӑх, кинемей вӑрҫӑ ҫулӗсенче тылра ӗҫленине ӗнентерсе парайман.
Кинемее хӳтӗлесе прокуратура суда ҫитнӗ. Унта карчӑк вӑрҫӑ ҫулӗсенче кӗрӗк арки йӑваласа ларманнине, колхозра тар тӑкнине ӗнентерсе пама килнӗ.
+5.3 °C