Чӑваш Енре хӗрарӑмӑн прокуратурӑранах пулӑшу ыйтма тивнӗ. Унӑн ачине, сусӑра, ятарлӑ кӳмепе тивӗҫтермен. Вӑл вара реабилитаци программи витӗр тухма кирлӗ пулнӑ.
Амӑшӗ кӳмене кӗтсе илеймен. Ӑна туянма сертификат та паман. Ку ӗҫе прокуратура тишкернӗ. Кун хыҫҫӑн ведомство Пенси тата социаллӑ страхлав фончӗн Чӑваш Енри уйрӑмӗн ертӳҫи тӗлӗшпе представлени ҫырнӑ. Кун хыҫҫӑн кӑна хӗрарӑма ачи валли кӳме туянма сертификат панӑ.
Куславкка хула администрацийӗн экс-пуҫлӑхӗ тӗлӗшпе пуҫиле ӗҫ пуҫарнӑ.
Чӑваш Енӗн прокуратурин пресс-службинче пӗлтернӗ тӑрӑх, 2022 ҫулхи раштав уйӑхӗн 1-мӗшӗнче ҫав ҫын Куславккари «Геометрика» паркра автостоянка валли асфальт сарма контракт алӑ пуснӑ. Ӗҫе пӗлтӗрхи раштав уйӑхӗн 25-мӗшӗ тӗлне вӗҫлемелле пулнӑ. Ӗҫе вӗҫлемен пулин те тӳре-шара 600 пине яхӑн тенкӗ куҫарса панӑ.
Пӑтӑрмаха прокуратура тӗрӗслевӗ вӑхӑтӗнче тупса палӑртнӑ. Материалсене РФ Следстви комитетне ярса панӑ хыҫҫӑн пуҫиле ӗҫ пуҫарнӑ.
Сӑмах май каласан, паркра асфальта халӗ те сарса пӗтермен иккен.
Шупашкарта шкул юсасси графикпа пӑхса хӑварнинчен кая юлса пырать. Кунта сӑмах хулари 10-мӗш шкула тӗплӗн юсасси пирки пырать. Унсӑр пуҫне «Садовый» микрорайонти шкула хӑпартассипе йывӑрлӑх сиксе тухнӑ.
2022 ҫулхи ҫӗртме уйӑхӗн 16-мӗшӗнче Республикӑн пӗрлехи заказчик служби «Строительство компанийӗн консорциумӗ» обществӑпа 92 миллион тенкӗ ытлалӑх килӗшӳ тунӑ. Асӑннӑ укҫапа кӑҫалхи ҫурла уйӑхӗн 20-мӗшӗччен Шупашкарти 10-мӗш шкула тӗплӗн юсаса пӗтермелле пулнӑ.
Ҫӗртме уйӑхӗн 20-мӗшӗнче прокуратура тӗрӗслев ирттернӗ. Ӗҫе палӑртнинчен 20 процентне ҫеҫ пурнӑҫланӑ иккен.
«Садовӑй» микрорайонта шкул тӑвакан подряд организацийӗпе вара ӗҫ килӗшӗвне пӑрахӑҫланӑ. Заказчик строительствӑна ҫапах та вӑхӑтра вӗҫлеме шантарнӑ.
Элӗк районӗнчи тӑлӑх прокуратура пулӑшнипе кӑна хваттерлӗ пулнӑ. Каччӑна ашшӗ-амӑшӗсӗр тӑрса юлсан ҫурт-йӗр тивӗҫмешкӗн черете тӑратнӑ.
Хайхискер 18 ҫул тултарнӑ, хваттер вара паман. Хӑй ҫемьеленнӗ, харпӑрлӑхӗнче ҫурт-йӗр пулман. Ҫавна май унӑн укҫа тӳлесе хваттер тара илме тивнӗ. Ҫапла самай нухрат тӑкакланӑ.
Прокуратура вырӑнти администрацие тӑлӑха хваттерпе тивӗҫтерме ыйтса тавӑҫ тӑратнӑ. Кун хыҫҫӑн тин ӑна ҫӗнӗ те хӑтлӑ ҫуртра хваттер уйӑрса панӑ.
Ӗнер Канаш районӗнчи Карӑклӑ ялӗ ҫывӑхӗнче «Лада Веста» бензовозпа ҫапӑнни пирки пӗлтернӗччӗ. Аса илтерер: «Лада Веста» хирӗҫ ҫул ҫине тухса кайса бензовоз ҫине пырса кӗнӗ. Аварире 63-ри арҫын, 63 ҫулти хӗрарӑм тата 12 ҫулти ача вилнӗ. Тепӗр икӗ ҫынна – 56 ҫулти хӗрарӑма тата 6-ри ачана - пульницӑна илсе кайнӑ.
Шел те, пульницӑра тепӗр пассажир вилнӗ. 56 ҫулти хӗрарӑмӑн чӗри тапма пӑрахнӑ. 6 султи ача пульницӑра.
Прокуратура ӗҫ-пуҫа уҫӑмлатать.
Вӑрнар районӗн прокурорӗн пуканне ҫӗнӗ ҫынна шанса панӑ. Ку должноҫе юстици канашҫи Сергей Парамонов йышӑннӑ.
Сергей Александрович 1981 ҫулта Шупашкарта ҫуралнӑ. 2003 ҫулта Шупашкарти коопераци институтне пӗтерсен прокуратура органӗсенче, Улатӑрта, следовательте ӗҫленӗ. Унтан аслӑ следователь, аслӑ пулӑшуҫӑ, Улатӑрти районсен хушшинчи прокурорӑн ҫумӗ пулнӑ. 2018 ҫултан пуҫласа ку таранччен Пӑрачкав районӗн прокурорӗ пулнӑ.
Шупашкар прокурорӗ Александр Шабалкин чылай вӑхӑт йывӑр чирпе кӗрешнӗ хыҫҫӑн вилнӗ. Вӑл 47 ҫулта пулнӑ.
Александр Владимирович 1996 ҫултанпа Чӑваш Ен прокураурин органӗсенче ӗҫленӗ. Ҫак тапхӑрта вӑл пӗр наградӑна кӑна мар тивӗҫнӗ.
Александр Шабалкинпа ыран, ҫӗртме уйӑхӗн 5-мӗшӗнче 14 сехетре Яков Ухсай ячӗллӗ культура керменӗнче сывпуллашӗҫ (Лениград урамӗ, 32-мӗш ҫурт-
Шупашкарти шкулсенчен пӗринче ӗҫлекен хӗрарӑм-учитель ачана хырӑмӗнчен тапнӑ.
«Ҫыхӑнура» форумра пӗлтернӗ тӑрӑх, пӑтӑрмах паян хулари 35-мӗш вӑтам шкулта пулса иртнӗ. Форума вырнаҫтарнӑ видео тӑрӑх хакласан, учитель: «Надоели, достали», — тенӗ пек илтӗнет.
Учитель хӑйӗн ҫӳллӗш пикене хырӑмӗнчен чӗркуҫҫипе лектерет.
Асӑннӑ пӑтӑрмах тӗлӗшпе прокуратура тӗрӗслев пуҫарнӑ иккен.
Видеона ҫынсем тӗрлӗрен хаклаҫҫӗ. Виҫӗ ҫеккунта тӑсӑлаканскер тӑрӑх унти пӑтӑрмаха хаклама йывӑр. Асӑннӑ хыпара вуланисенчен учителе тӳрре кӑларакансем ҫук та, анчах хальхи вӑхӑтри ачасем усалтарах тесе шухӑшлакансем те самайӑн.
Воронежра прокурор пулса тӑрӑшнӑ ҫынна Шупашкара ӗҫлеме куҫарнӑ.
Раҫҫейӗн генпрокурорӗн приказӗпе Шупашкар хулинчи Калинин районӗн прокурорӗ пулма юстицин аслӑ советникне Роман Лаща ҫирӗплетнӗ.
Роман Сергеевич 1987 ҫулта Карачай-Черкесск Республикинчи Черкесск хулинче ҫуралнӑ. Раҫҫейӗн Шалти ӗҫсен министерствин Волгоградри академийӗнче вӗреннӗ хыҫҫӑн хӑйӗн тӑван республикинчи прокуратура тытӑмне ӗҫе вырнаҫнӑ. Кайран вӑл Мускав облаҫӗнчи прокуратурӑра тӗрлӗ должноҫе тӑрӑшнӑ. 2022 ҫултанпа Воронежра прокурорта тимленӗ.
Муркаш районӗнчи прокуратура асӑннӑ тӑрӑхри Александровскинчи врач амбулаторине тӗпрен юсассине епле йӗркеленине тӗрӗсленӗ.
Юсав ӗҫӗпе «ПремьеР» суту-илӳпе промышленность компанийӗ кӳлӗнме килӗшнӗ. Унпа ятарлӑ килӗшӳ тунӑ, алӑ пусса ҫирӗплетнӗ.
Контрактра пӑхса хӑварнӑ тӑрӑх, мӗнпур ӗҫе 2022 ҫулхи авӑн уйӑхӗн 30-мӗшӗ тӗлне вӗҫлемелле пулнӑ. Анчах строительсем васкаман. Ҫавна кура прокуратура подряд организацийӗ ячӗпе асӑрхаттару хучӗ ҫырнӑ, унӑн директорӗ тӗлӗшпе административлӑ ӗҫ пуҫарса 110 пин тенкӗ штраф хуса панӑ.
Прокуратура тӗрӗсленӗ хыҫҫӑн стройорганизаци ӗҫе хӑвӑртлатнӑ.
+0.3 °C