Йӗпреҫ округӗнче пурӑнакан 94 ҫулти кинемее документсем ҫуккипе тыл ӗҫченӗ тесе палӑртман. Прокуратура пулӑшнӑ.
Милица Кирилловна Павлова ҫамрӑк чухне, Тӑван ҫӗршывӑн Аслӑ вӑрҫи вӑхӑтӗнче, вырӑнти колхозра ӗҫленӗ. Анчах архивра справкӑсем тата документсем ҫуккипе тылра ӗҫленине ӗнентереймен, ҫавна май ветеран статусне те илеймен.
Милица Кирилловна ватӑ пулнӑран документсемпе хӑй ҫӳреймест. Сывлӑхӗ те хавшанӑ ун. Ҫавӑнпа ун вырӑнне прокуратура суда тавӑҫ тӑратнӑ.
Судра вӑл вӑрҫӑ вӑхӑтӗнче колхозра ӗҫленине ӗнентернӗ. Ҫапла Милица Павлова Тӑван ҫӗршывӑн Аслӑ вӑрҫин ветеранӗн статусне илнӗ. Ку удостоверени ӑна ҫӑмӑллӑхсем тата тӳлевсем илме май парать.
Йӗпреҫ районӗнче спорт шкулӗ уҫасса уҫнӑ та анчах унта кирлӗ оборудование туянса ҫитермен.
«Патвар» спорт шкулне вырӑнти прокуратура тӗрӗсленӗ. Ҫавӑн чухне надзор органӗ унти хӑш-пӗр кӑлтӑка тупса палӑртнӑ.
Спорт шкулӗнчи бассейнта, сӑмахран, ачасене ишме вӗрентнӗ чух кирлӗ инвентарь ҫук. Ҫав шутра стена ҫине ҫакса хумалли тӑватӑ сехет юппиллӗ секундомер, ҫурӑм ҫинче ишме вӗреннӗ чух кирлӗ старт тренажерӗ. Кӗрешме вӗрентекен залра та кирлӗ оборудовани пулман: ятарлӑ тренажер, йывӑр атлетика помосчӗ, ытти хатӗр-хӗтӗр туянман.
Кӑлтӑка пӗтерме хушса надзор органӗ хут ҫырнӑ, ӑна спорт шкулӗн директорӗн ячӗпе шӑрҫӑланӑ.
Елчӗк округӗнче арҫын арӑмӗ пулнӑ хӗрарӑм хӗрӗ умӗнче сӑмахпа хӑртнӑшӑн 10 пин тенкӗ тӳлӗ.
Нумай ачаллӑ амӑшӗ упӑшки пулнӑскер ӑна хӗрӗ умӗнчех сӑмахпа кӳрентернӗ тесе прокуратурӑна кайса заявлени ҫырнӑ. Ведомство административлӑ ӗҫ пуҫарнӑ, суд ӗҫе пӑхса тухсан арҫынна 3 пин тенкӗ штраф тӳлеттерме йышӑннӑ.
Унтан прокуратура хӗрарӑма кӑмӑл-сипет тӗлӗшӗнчен сиен кӳнӗ тесе суда тавӑҫ тӑратнӑ, упӑшки пулнӑскертен 10 пин тенкӗ шыраса илме ыйтнӑ. Суд тавӑҫа тивӗҫтернӗ. Ҫапла арҫыннӑн сӑмахпа кӳрентернӗшӗн арӑмӗ пулнӑ хӗрарӑма 10 пин тенкӗ тӳлемелле.
Улатӑрта амӑшӗ ывӑлне хӗненӗ, ун валли ӑшӑ тум туянман тесе шутлаҫҫӗ. Ҫавна май ун тӗлӗшпе пуҫиле ӗҫ пуҫарнӑ.
Прокуратура тӗрӗслев ирттернӗ те ҫакна палӑртнӑ: кӑҫал кӑрлач уйӑхӗнчен пуҫласа пушчен Улатӑрта пурӑнакан хӗрарӑм 13 ҫулти ывӑлне хӗненӗ. Ҫав шутра – ӳсӗр чухне те.
Кунсӑр пуҫне вӑл ун валли ҫанталӑка кура ӑшӑ тум, вӗренмелли хатӗрсем илсе паман, ҫителӗклӗ ҫитермен. Ача ҫанталӑка кура тумланманнине, вӗренмелли хатӗрӗсем ҫуккине шкулта та курнӑ, анчах кун пирки профилактика системин органӗсене пӗлтермен.
Йӗпреҫ районӗнчи Пысӑк Упакасси ялӗнче пурӑнакан хӗрачана пӗр арҫын 150 пин тенкӗ тӳлӗ. Кун пек йышӑнӑва вырӑнти суд Йӗпреҫ районӗнчи прокуратура тавӑҫне тивӗҫтернӗ май кӑларнӑ.
Пӗлтӗрхи пуш уйӑхӗн 9-мӗшӗнче Мӑн Упакасси ялӗ патӗнчи ҫул ҫинче «Киа Спектра» автомобиль ҫулпа велосипедпа пыракан хӗрача ҫине пырса кӗнӗ. Ача аванах аманнӑ, экспертиза палӑртнӑ тӑрӑх, ачан сывлӑхне вӑтам шайра сиен кӳнӗ.
Айӑплӑ водителе административлӑ майпа явап тыттарнӑ-ха. Шар курни ҫул ҫитмен ача пулнине кура прокуратура кӑмӑл-сипет енчен сиен кӳнине саплаштарма ыйтса суда тавӑҫпа тухнӑ.
Суд надзор органӗ ыйтнине тивӗҫтернӗ, айӑплӑ водителе 150 пин тенкӗ тӳлеттерме йышӑннӑ. Ку вӑл хӗрачана кӑмӑл-сипет енчен сиен кӳнине саплаштарма кайӗ.
Муркаш районӗнчи Мӑн Сӗнтӗр ялӗнче пурӑнакан пӗр арҫыннӑн ҫӗрне туртса илесшӗн.
Вырӑнти прокуратура тӗрӗслев ирттернӗ чухне 2025 ҫулти раштав уйӑхӗнче Мӑн Сӗнтӗр арҫыннине нимле суту-илӳ ирттермесӗрех пахча валли тесе ҫӗр уйӑрса пани палӑрнӑ. Кӑштахран арҫын ку ҫӗре «уйрӑм хушма хуҫалӑх валли» тесе улӑштарнӑ, кӗҫех ӑна сутасси пирки тӗнче тетелӗнче пӗлтерӳ вырнаҫтарнӑ.
Саккун вара апла хӑтланма ирӗк памасть иккен. Ку вӑл ҫӗрпе саккуна пӑсса усӑ курни пулать.
Ҫӗре ятарлӑ йӗркене пӑхӑнмасӑр ҫынна пани саккуна пӑсни пулать, ун пек суту-илӳ килӗшӗвне пӑрахӑҫламалла, ҫӗре унӑн ҫӗнӗ хуҫинчен туртса илмелле тесе прокуратура суда тавӑҫпа тухнӑ.
Шупашкарта хӗрача канализаци люкне кӗрсе ӳкнӗ. Юрать, ку пысӑк инкекпе вӗҫленмен.
Пӑтӑрмах паян 12 сехетре Чапаев поселокӗнчи Киров урамӗнче пулнӑ. Хӗрача утса пынӑ чухне юр айӗнчи люка кӗрсе ӳкнӗ. Унӑн хуппи уҫӑ пулнӑ.
Юрать-ха, хӗрачан тусӗ вӑхӑтра пулӑшу чӗннӗ. Иртен-ҫӳрен хӗрачана канализаци люкӗнчен хӑвӑртах кӑларнӑ. Кун хыҫҫӑн ӑна медпулӑшу панӑ.
Ҫав вырӑна тӗрӗсленӗ хыҫҫӑн ҫакӑ палӑрнӑ: хуппи юнашар выртнӑ. Халӗ прокуратура тӗрӗслев ирттерет.
Етӗрне районӗн тӗп пульницинчен 1,5 миллион тенкӗ шыраса илесшӗн. Ку – тухтӑр йӑнӑшне пула.
Истори акӑ мӗнлерех: 2025 ҫулхи раштав уйӑхӗнче участок терапевчӗ хӗрачан анеми пулнине палӑртнӑ та стационара выртма направлени панӑ. Тепӗр кунхине хӗре пульницӑна илсе ҫитернӗ. Анчах икӗ талӑкра унӑн сывлӑхне тӗплӗн тӗрӗслемен. Кайран вара унӑн пуҫ миминчи юн ҫаврӑнӑшӗ пӑсӑлнине палӑртнӑ. Кун хыҫҫӑн ӑна Шупашкарти Васкавлӑ медпулӑшу пульницине илсе ҫитернӗ.
Ҫапла сывлӑхне тӗплӗн тӗрӗслеменнине пула хӗрӗн сывлӑхӗ вӑйлах япӑхланнӑ. Ҫавна май хӗрӗн амӑшӗ прокуратурӑна заявлени ҫырнӑ.
Чӑваш Енре каллех юр йывӑрӑшне пула ҫурт тӑрри ишӗлсе аннӑ. Хальхинче – Куславкка хулинче. Унта ку юр йывӑрӑшне пула Карл Маркс урамӗнче вырнаҫнӑ почта уйрӑмӗ шар курнӑ.
Ку паян 10 сехет ҫурӑра пулса иртнӗ. Тӑрӑн пӗр пайӗ ишӗлнӗ. Халӗ район прокуратури ку тӗслӗх тӗлӗшпе тӗрӗслев ирттерет. Кун хыҫҫӑн ведомство ҫурт тӑррине юсас ӗҫе тата малашне ун пек ан пултӑр тесе тӗрӗслесе тӑрӗ.
Аса илтерер: ӗнер Ҫӗрпӳ округӗнчи Кӑнар поселокӗнчи ача пахчин тӑрри ишӗлни пирки хыпарланӑччӗ. Юсав ӗҫӗсене тунӑ вӑхӑтра ашшӗ-амӑшне ачисене урӑх учреждение илсе кайма сӗннӗ.
Кӑҫал юр нумай пулнӑран республикӑра ҫуртсен тӑррисем ҫине-ҫинех йӑтӑнса анчӗҫ. Хальхинче кун пекки Ҫӗрпӳ округӗнчи Кӑнар поселокӗнче пулнӑ.
Унта пуш уйӑхӗн 3-мӗшӗнче ҫӗрле ача пахчин тӑррин пӗр пайӗ ишӗлсе аннӑ. Ҫурт 1973 ҫулта тунӑскер. Ун тӑрринче юр нумай пухӑннӑ. Ҫитменнине, юрӗ нӳрӗ халӗ.
Ҫак ача пахчине 22 шӑпӑрлан ҫӳрет. Тӑрӑ йӑтӑнса аннӑран ашшӗ-амӑшне ачисене вӑхӑтлӑха урӑх шкул умӗнхи пӗлӳ учрежденине яма сӗннӗ. Вырӑнти администраци вара юсав ӗҫӗсене тума контракт алӑ пуснӑ.
Вырӑна район прокурорӗ Евгений Петров ҫитнӗ. Ҫав самант тӗлне тӑрӑран юра, пӑра тасатман пулнӑ. Халӗ тӗрӗсле пырать.
+18.6 °C