Канашра Тутарстанри пенсионера суд тӑвӗҫ. Ҫав ҫын пуйӑсра тепӗр ҫыннӑн телефонне вӑрланӑ.
Пӑтӑрмах пӗлтӗрхи ҫу уйӑхӗнче пулса иртнӗ. «Мускав – Екатеринбург» пуйӑсра Екатеринбургра пурӑнакан 69 ҫулти хӗрарӑмӑн телефонӗ ҫухалнӑ. Вӑл ӑна сӗтел ҫине хунӑ, ҫиелтен хутаҫпа витнӗ. Ҫывӑрса вӑраннӑ хыҫҫӑн телефон ҫуккине асӑрхасан тепӗр номерпе хӑйӗн телефонӗ ҫине шӑнкӑравланӑ, анчах телефона сӳнтерсе хума ӗлкӗрнӗ пулнӑ.
Телефона Тутарстанра пурӑнакан 65 ҫулти арҫын вӑрланӑ иккен.
Канашра пурӑнакан 29 ҫулти хӗрарӑм пӗлӗшӗн 500 пин тенкине вӑрланӑ та ултавҫӑсене куҫарса панӑ. Вӑл инвестицисемпе укҫа ӗҫлесе илес тенӗ-мӗн. Анчах тупӑш тӑвайман — парӑма кӗрсе кайнӑ, ун тӗлӗшпе пуҫиле ӗҫ те пуҫарнӑ.
Хӗрарӑм унчченех «инвест-проекта» 2 млн тенкӗ ытла хывнӑ иккен. Хайхи «менеджер» ӑна юлашки хутчен укҫа хывса пысӑк тупӑш илме сӗннӗ. Ҫапла вӑл хӗрарӑм пӗлӗшӗн телефонне илнӗ те унӑн кредит картти ҫинчен палламан ҫынна 500 пин тенкӗ ытла куҫарса панӑ.
Халӗ 29-ти хӗрарӑмӑн ют ҫын укҫине вӑрланӑшӑн явап тытма тивӗ.
Чӑваш Енри 10 студент уйӑхсерен 10-шар пин тенкӗ илсе тӑрӗ. Ку тӳлеве тӑваттӑмӗш курсра вӗренекен ҫамрӑксем тивӗҫнӗ. Ӑна вӗсене вӗренӳ ҫулӗ тӑршшӗпех тӳлесе тӑрӗҫ.
Ҫак тӳлеве тивӗҫнисен йышне Ҫӗрпӳри аграрипе технологи техникумӗнчи Антон Антоновпа Никита Огурцов, Н.В.Никольский ячӗллӗ професси колледжӗнче пӗлӳ пухакан Анастасия Борзовӑпа Злата Иванова, Ҫӗнӗ Шупашкарти химипе механика техникумӗн студенчӗсем Илья Ельмовпа Евгений Медведев, Шупашкарти электромеханика колледжӗнче вӗренекен Денис Васильев, Шупашкарти строительство техникумӗн студентки Анна Гарифуллина, Шупашкарти экономикӑпа технологи колледжӗнче вӗренекен Вероника Кузьмина, Канашри транспортпа энергетика техникумӗнче ӑс пухакан Маргарита Фадеева лекнӗ.
Паян ирине Канаш хулинче кафе ҫунма тытӑннӑ. «Малина» кафере пушар тухни пирки ҫӑлавҫӑсене 8 сехет те 46 минутра пӗлтернӗ. Ҫуллахи веранда тата тӑрри ҫунма пуҫланӑ, пӗтӗмпе 400 — тӑваткал метр. Ҫулӑмпа 20 ҫӑлавҫӑ тата 7 техника кӗрешнӗ.
Малтанлӑха пӗлтернӗ тӑрӑх, пушарта, шел те: 1 хӗрарӑм вилнӗ. Вӑл персонала тата апатланма пынӑ ҫынсене эвакуациленӗ хыҫҫӑн кафене каялла таврӑннӑ.
Шупашкарти Н.В.Никольский ячӗллӗ професси колледжӗ малашне урӑхла ятлӑ пулӗ: Н.В.Никольский ячӗллӗ педагогика колледжӗ. Постановление ЧР Министрсен Кабинечӗн председателӗ Сергей Артамонов алӑ пуснӑ.
Колледжӑн виҫӗ филиал: Шупашкарта – иккӗ, тепри – Канашра. Ҫапла оптимизаци хыҫҫӑн пулнӑ. 2015 ҫулта Шупашкарти механика-технологи техникумне тата педагогика колледжне пӗрлештернӗ. 2023 ҫулта вӗсемпе Канашри педагогика колледжӗ пӗрлешнӗ.
Комсомольски округӗнчи Владимир Мунтайкина «Чӑваш Республикин тава тивӗҫлӗ механизаторӗ» хисеплӗ ят панӑ. Ку наградӑна вӑл ял хуҫалӑх тытӑмӗнче нумай ҫул тӑрӑшса ӗҫленӗшӗн тивӗҫнӗ.
Шӑпа ӑна ҫамрӑк чухнех механизатор профессийӗ патне илсе ҫитернӗ – 1977 ҫулта «Урожай» колхозра ӗҫлеме тытӑннӑ. Канашри училищӗре професси илсен, салтака кайса килсен хӑйӗн пурнӑҫне ял хуҫалӑхӗпе ҫыхӑнтарнӑ.
Халӗ кашни ир вӑл уя тухать, сехечӗ-сехечӗпе руль умӗнче ларать. Ака-суха-и, тыр-пул пухса кӗртмелле-и, выльӑх апачӗ хатӗрлемелле-и – йӑлтах лайӑх пурнӑҫлать Владимир Васильевич.
Канашри ЗАГСра 50 ҫул пӗрле пурӑнакан Кузнецовсене чысланӑ. Вӗсем 1975 ҫулта Сиккассинче пӗрлешнӗ.
Валентин Николаевичпа Людмила Ильинична икӗ ача ҫуратса ӳстернӗ, халӗ пилӗк мӑнукӗпе савӑнса пурӑнаҫҫӗ.
Валентин Николаевич культура тытӑмӗнче ӗҫленӗ: Сиккассинчи ача-пӑча ӳнер шкулӗнче вӗрентекен тата директор пулнӑ. 1986 ҫулта «Чӑваш АССРӗн тава тивӗҫлӗ культура ӗҫченӗ» ята тивӗҫнӗ. 1991 ҫултанпа вара вӑл – Раҫҫей композиторӗсен ассоциацийӗн пайташӗ.
Кузнецовсен ҫемйи – ҫамрӑксемшӗн тӗслӗх.
Канашра ҫуралса ӳснӗ Светлана Елисеевӑн сӑнӳкерчӗкӗсем Мускаври хаҫат хуплашки ҫине лекнӗ. Вӑл ҫӗршывӑн тӗп хулинче пурӑнать.
Светлана Мускаври хими ӗнӗпе аслӑ шкул пӗтернӗ хыҫҫӑн хӑйӗн профессийӗпе ӗҫленӗ. Декретра ларнӑ чухне вара сӑнӳкерчӗксемпе кӑсӑкланма пуҫланӑ. Хӗрне, тусӗсене ӳкернӗ, кайран урамри самантсене сӑн тунӑ. Халӗ вӑл Мускав ҫыннисен пурнӑҫӗнчи самантсене сӑн ӳкерет.
Унӑн сӑнӳкерчӗкӗсем Мускаври пӗр хаҫат ӗҫченӗсене питӗ килӗшнӗ, редакци вӗсене пичетлесе кӑларнӑ, ҫав шутра – хуплашка ҫинче те.
Светлана тӑван тӑрӑхне килсех ҫӳрет. Вӑл чӑваш наци туйне сӑн ӳкерме ӗмӗтленет.
Канашра саккӑрмӗш кун ӗнтӗ 15 ҫулти хӗре шыраҫҫӗ. «Лиза Алерт» шыравпа отряд хастарӗсем пулӑшу ыйтаҫҫӗ.
Анастасия Владимировна Алексеева авӑнӑн 9-мӗшӗнче киле таврӑнман. Вӑл ӑҫтине халӗ те пӗлмеҫҫӗ.
Вӑл ырхан кӗлеткеллӗ, 160 сантиметр ҫӳллӗш, ҫӳҫӗ ҫырӑ, куҫӗ тӗттӗм сӑрӑ тӗслӗ. Ҫав кун хура жилетка, шурӑ блузка, хура шӑлавар тата шурӑ кроссовка тӑхӑннӑ пулнӑ.
Ҫак номерсемпе шӑнкаравлама ыйтаҫҫӗ: 8 800 700-54-52 (Раҫҫейре тӳлевсӗр), 8 917 660 26 33 (Тучка (Дарья),
Территорисене аталанма пулӑшакан фонд Чӑваш Енӗн заявкине ырланӑ май республикӑри ишӗлекен 20 ҫуртри ҫынсене ҫӗнӗ ҫӗре куҫарма йышӑннӑ.
Ӗнер иртнӗ ларура фонд тата тепӗр 6 регионӑн заявкине ырланӑ, ҫав шутра Чӑваш Енӗнне те.
Кӑҫалхи программӑна Шупашкарти пӗр ҫурт та лекеймен. Халӗ вара Ҫӗнӗ Шупашкарти, Канашри, Ҫӗмӗрлери, Вӑрнар тата Ҫӗрпӳ районӗсенчи 20 ҫурт лекнӗ, вӗсенче 256 ҫын пурӑнать-мӗн.
Вӗсен адресӗ ҫапларах:
Ҫӗнӗ Шупашкар – Силикат урамӗнчи 12-мӗш тата 14-мӗш ҫуртсем;
Вӑрнар – Ашмаров урамӗнчи 6-мӗш тата Путевой урамри 23-мӗш ҫуртсем;
Ҫӗрпӳ – Гагарин урамӗнчи 35-мӗш, Гоголь урамӗнчи 13-мӗш, Ҫаран урамӗнчи 5-мӗш ҫуртсем;
Ҫӗрпӳ районӗнчи Хирти Тукай ялӗнчи Ҫамрӑксен урамӗнчи 13-мӗш ҫурт;
Канаш – Кабалин урамӗнчи 5-мӗш ҫурт;
Ҫӗмӗрле – Киров урамӗнчи 75-мӗш, Красноармейски урамӗнчи 1-мӗш тата 17-мӗш ҫуртсем, Мопр урамӗнчи 23-мӗш, Свердлов урамӗнчи 92-мӗш, 92а, 105-мӗш, Стройучасток урамри 9-мӗш, Тургенев урамӗнчи 17-мӗш, Угольник урамӗнчи 5-мӗш, Францев урамӗнчи 1а ҫуртсем.
+4.3 °C