Иртнӗ эрнере Шупашкарти Энтузиастсен урамӗнчи 21-мӗш ҫурт патӗнче ҫул ҫинчи инкекре икӗ ҫын аманнӑ, 4 ҫулти ачана пульницӑна сывлӑхне тӗрӗслеме ӑсатнӑ.
Пӑтӑрмах 15 сехет те 35 минутра пулса иртнӗ. «Фольксваген Поло» рульне тытса пынӑ 49 ҫулти водитель малта пыракан «Лада Веста» тата «ГАЗ 3009» автомобильсем ҫине пырса кӗнӗ.
«Вестӑн» 32 ҫӳлти водительне тата 31 ҫулти хӗрарӑм-пассажира тухтӑр пулӑшӑвӗ кирлӗ пулса тухнӑ. Салонта пулнӑ 4 ҫӳлти хӗрача сывлӑхне те тухтӑрсем терӗсленӗ, вӑл йывӑр шар курман.
«Фольксваген Поло» водителӗ урӑ пулман-мӗн.
Шупашкарти шкул ачине Илья Павлова Сочире иртнӗ BRICS олимпиадӑра Раҫҫей гимнне юрлама шаннӑ. Ку тивӗҫе вӑл питӗ аван пурнӑҫланӑ.
Илья вокала 5 ҫул вӗренет. Унӑн ертӳҫи - Светлана Куликова. Илья Шупашкарти 3-мӗш ӳнер шкулӗнче ӑс пухать. Вӑл ытларах патриотлӑх юррисене юрлама кӑмӑллать.
Шупашкарта тӗрлӗ туй кортежне курма пулать. Ку таранччен хӗрпе каччӑ хыҫҫӑн троллейбуссемпе те, КамАЗсемпе те пынине асӑрханӑ.
Хальхинче вара туйра автошкул машинисем пулнӑ. Вӗсем Шупашкар урамӗсемпе ҫӳренӗ.
Шупашкарта 14-мӗш троллейбус водителӗ автобус водителӗ патне пынӑ та ҫапма пуҫланӑ. Ҫакна пӗр пассажир видео ӳкернӗ.
Ку юпа уйӑхӗн 17-мӗшӗнче ирхи 7 сехет ҫурӑра «Богдан Хмельницкий урамӗ» чарӑнура пулнӑ.
Икӗ водитель мӗншӗн вӑрҫни паллӑ мар. Ахӑртнех, троллейбус водительне автобус ытлашши патӗнче пыни, пассажирсене маларах пуҫтарни килӗшмен.
Полици ку тӗслӗх тӗлӗшпе тӗрӗслев ирттерет. Ҫакна курнӑ ҫынсенчен пулӑшу ыйтать.
Шупашкарта ҫуралса ӳснӗ Полина Осипова пултарулӑхӗпе ют ҫӗршывсене тӗлӗнтерет. Вӑл хуларан кайсан чӑваш культурине, хӑйӗн ҫемйин историне тӗпчеме пуҫланӑ. Халӗ вара унӑн куравӗ Токиори пысӑк универмаргра ӗҫлет. Вӑл чӳк уйӑхӗн 5-мӗшӗччен пулӗ.
Вӑл универмага илемлетнӗ ҫеҫ мар. Полина хӑйӗн принчӗсемпе футболкӑсемпе толстовкӑсем кӑларнӑ.
Хӗр 1998 ҫулта Шупашкарта ҫуралнӑ, халӗ Аслӑ Британире ӗҫлет. Вӑл модӑллӑ брендсемпе килӗштерсе ӗҫлет.
Паян Шупашкарта ватӑсемпе ҫемьесем валли икӗ центр уҫӑлнӑ. Вӗсем хулари халӑхӑн социаллӑ ыйтӑвӗсене тивӗҫтерекен комплекслӑ центрта вырнаҫнӑ.
Пӗри — нумай ӗҫ пурнӑҫлакан ҫемье центрӗ, тепри — «Манӑн ҫемье центрӗ» клуб уҫлӑхӗ.
Асӑннӑ центрсене уҫас тесе нумай ӗҫ туса ирттернӗ: пӳлӗмсене юсаса ҫӗнетнӗ, хӑтлӑлатнӑ, илемлетнӗ, сӗтел-пуканпа пуянлатнӑ. Центр ертӳҫисем ӗнентернӗ тӑрӑх, ӗҫ-пуҫ юсав туса ирттернипех ҫырлахмӗ, асӑннӑ центрсем халӑхпа та урӑхларах, унчченхинчен тата та хӑвӑртрах ӗҫлеме тытӑнӗҫ.
Ҫӗнӗ лапамсене уҫма республикӑн ӗҫ министрӗ Алёна Елизарова, сывлӑх сыхлав министрӗ Владимир Степанов, Чӑваш парламенчӗн председателӗн ҫумӗ Ольга Петрова, Шупашкарти Калинин районӗн управин ертӳҫи Яков Михайлов, президент Торгово-промышленной палаты Чувашии Игорь Суту-илӳпе промышленность палатин президенчӗ Игорь Кустарин хутшӑннӑ.
Ҫак сӑн ӳкерчӗкри пӗчӗк хӗр пӗрчи Назира Сангакова халӗ 23 ҫулта. Вӑл тӑван амӑшне шырать. Ашшӗ Назирӑна Таджикистана илсе кайнӑ. Хӗрача ун чухне пӗчӗк пулнӑ, ҫавӑнпа вӑл амӑшне астумасть те.
Назирӑн упӑшки Саша /Раҫҫейре ӑна ҫак ятпа чӗнеҫҫӗ/ интернетра Шупашкарта пурӑнакан Светлана Черновӑпа ҫыхӑннӑ. «Ашшӗ Назирӑна Раҫҫейрен 2001 е 2003 ҫулта илсе кайнӑ. Таджикистанра вӑл ачана хӑйӗн амӑшӗпе хӑварнӑ, хӑй кайран темиҫе хут та авланнӑ, Раҫҫейрех пурӑннӑ. Назира амӑшне вӑл Раҫҫейре юлнине пӗлнӗренпе шыраса тупма ӗмӗтленет. Ҫулсем иртнӗҫемӗн унӑн тунсӑхӗ ӳссе кӑна пырать. Вӑл ӑна питӗ курасшӑн.
Назирӑпа Саша халӗ Раҫҫейре Новосибирскра пурӑнаҫҫӗ. Саша манпа ҫыхӑнсан Назира амӑшне шырани пирки хамӑн страницӑра пост вырнаҫтартӑм. Ман пата унӑн амӑшӗ пекрех хӗрарӑмсен сӑн ӳкерчӗкӗсене ярса паркаларӗҫ. Анчах вӗсенчен пӗри те вӑл пулманни палӑрчӗ. Тӗнчере пӗр пек 7 ҫын пур теҫҫӗ вӗт. Назира сӑнӗпе амӑшӗ пекех. Унӑн пит ҫӑмарти ҫинче пысӑк тур палли пур. Ахӑртнех, амӑшӗ ҫакна астуса юлнӑ. Ҫак сӑн ӳкерчӗкре пӗчӗк Назира мӗнле тумпа - ахӑртнех, ашшӗ ӑна ҫавӑнпах илсе кайнӑ, ҫуркунне пулнӑ-тӑр.
Шупашкарти 24 ҫулти медсестра ултавҫӑсене 2,8 миллион тенкӗ куҫарса панӑ.
Ун патне палламан ҫын шӑнкӑравланӑ та сим-карттӑн срокне тӑсмалли пирки каланӑ. Вӑл вӗсене ӗненнӗ, смс-ҫырупа килнӗ парольсене каланӑ. Ҫапла вӑл «Госуслуги» портала кӗрейми пулнӑ.
Кайран ун патне татах шӑнкӑравланӑ. Хальхинче унӑн ячӗпе такамсем кредит илме, пухнӑ укҫине вӑрлама пултарнине каланӑ. Ӑна хайне кредит илсе пӗтӗм укҫана «хӑрушсӑр счет» ҫине куҫарма хушнӑ. Ҫапла вӑл 2,8 миллион тенкӗ ҫухатнӑ.
Чӑваш Енре малярипе чирленӗ тӗслӗхе тупса палӑртнӑ. Вӑл ӑна Кӑнтӑр Судана командировкӑна кайсан ертсе килнӗ.
Хӗрарӑма Шупашкарти Васкавлӑ медпулӑшу пульницине илсе килнӗ. Ун чухне унӑн сывлӑхӗ йывӑр пулнӑ: ӳт температури хӑпарнӑ, пуҫӗ вӑйлӑ ыратнӑ. Вӑл тухтӑрсене пӗлтӗртенпе Кӑнтӑр Суданра командировкӑра пулнине каласа кӑтартнӑ. Шупашкара таврӑнма тухсан чир паллисем палӑрнӑ, вӑл Африкӑрах туяннӑ эмелсене ӗҫме пуҫланӑ. Анчах ку пулӑшман, сывлӑхӗ япӑхлансах пынӑ. Шупашкара ҫитсенех вӑл тухтӑрсене чӗннӗ. Анализсем унӑн маляри пулнине палӑртнӑ.
Тухтӑр тӗрӗс препарат ӗҫме хушсан унӑн сывлӑхӗ лайӑхланма тытӑннӑ.
Раҫҫейӗн тӗрленӗ карттин музейӗ валли тепӗр 20 млн тенкӗ уйӑрма хатӗр. Ку укҫапа медиахатӗрсем вырнаҫтарасшӑн.
Аукцион иртет. Малтанхи хак - 20 млн та 199,3 пин тенкӗ. Аукцион ҫӗнтерӳҫин хатӗрсене чӳк уйӑхӗн 11-мӗшӗччен вырнаҫтармалла.
Аса илтерер: Шупашкарти кӳлмекре Раҫҫейӗн тӗрленӗ карттин музейне тума 51,9 млн тенкӗ уйӑрнӑ. Вӑл 250 тӑваткал метр пулӗ. Ӑна чӳк уйӑхӗн 10-мӗшӗччен туса пӗтермелле.
+10.3 °C