Етӗрне районӗнчи Ирҫе ялӗнче ҫуралнӑ, халӗ Шупашкарта пурӑнакан Зоя Семёнова паян 90 ҫул тултарнӑ. Ҫав ятпа кинемее Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн пай пуҫлӑхӗ Марина Петрова тата Елена Ефремова социаллӑ ӗҫчен саламланӑ.
Асӑннӑ центр ватӑ ҫынна 2019 ҫулхи ҫу уйӑхӗнченпе пӑхса пулӑшать. Зоя Васильевнӑн упӑшки те, ачисем те пулнӑ-ха. Анчах вӗсем пурнӑҫран уйрӑлса кайнӑ.
Ҫичӗ класс вӗренсе пӗтерсен ял хӗрӗ Шупашкара килсе ӗҫе вырнаҫнӑ. Тепӗр икӗ ҫултан вӑл Мускава тухса кайнӑ. Унта стройкӑра ӗҫлеме пуҫласан штукатур-маляр ӗҫне алла илнӗ. 1957 ҫулта ҫемье ҫавӑрсан упӑшкипе Казахстана тухса кайнӑ, унта 9 ҫул стройкӑра тӑрӑшнӑ хыҫҫӑн Шупашкара таврӑннӑ. Кунта тӗрлӗ ӗҫре тӑрӑшнӑ.
Шупашкарта, Чӑваш патшалӑх оперӑпа балет театрӗнче, Пӗтӗм тӗнчери оперетта фестивалӗ пуҫланнӑ. Вӑл «Виват, оперетта!» гала-концертпа тытӑннӑ.
Уяв каҫне икӗ пая уйӑрнӑ. Пӗринче ют ҫӗршыв классикин шедеврӗсем янӑранӑ. Иккӗмӗшӗнче вара хамӑр ҫӗршыври чи лайӑх опереттӑсемпе паллаштарнӑ: Исаак Дунаевский, Юрий Милютин хайлавӗсем янӑранӑ. Халӑх вӗсене тӑвӑллӑн алӑ ҫупса йышӑннӑ.
Фестиваль пӗр эрнене тӑсӑлӗ. Куракансене «Мы хотим танцевать», «Фиалка Монмарта» спектакльсемпе паллаштарӗҫ. Фестиваль «Ваш Андрей Петров» гала-концертпа вӗҫленӗ.
Сӑмах май, билетсене «Пушкин карттипе» те туянма май пур.
Ака уйӑхӗн 20-24-мӗшӗсенче Чӑваш Енре телерадиовещание вӑхӑтлӑха чарӗҫ. Ку хӑш-пӗр ялсене пырса тивет.
Ҫак тапхӑрта телекурав тата радио чӑрмавсемпе ӗҫлеме пултарӗ. Акан 20-мӗшӗнче (01:00–10:00 сехетсенче) Шупашкара, Ҫӗрпӳ хулине тата Йӗпреҫ поселокне пырса тивӗ ку. Акан 21-мӗшӗнче (11:00–17:00 сехетсенче) Улатӑр округӗнчи Первомайски поселокӗнче йӗркеллӗ ӗҫлемӗ. Акан 22-мӗшӗнче (11:00–17:00 сехетсенче) Шӑмӑршӑ округӗнчи Палтиел ялӗнче вӑхӑтлӑха чарӗҫ. Акан 23-мӗшӗнче (10:00–16:00 сехетсенче) Тӑвайра чарӗҫ. Акан 24-мӗшӗнче (10:00–16:00 сехетсенче) Шупашкар округӗнчи Кивҫурткассинче чӑрмавсем пулӗҫ.
Шупашкарта общество транспортӗнче ҫӳреме хакланӗ. Постановление Чӑваш Енӗн тариф енӗпе ӗҫлекен Патшалӑх служби хатӗрленӗ.
Хальлӗхе хаксем хӑҫан ӳсессине каламан, анчах ҫакӑ паллӑ: хаксем 4 тенкӗ хӑпарӗҫ. Ку Шупашкара та, Ҫӗнӗ Шупашкара та пырса тивет. Аса илтерер: Шупашкарта хальхи вӑхӑтра автобусра укҫан тӳлесен билет 37 тенкӗ тӑрать, карттӑпа – 33 тенкӗ. Ҫӗнӗ Шупашкарта та хаксем ҫавнашкалах.
Троллейбусра билет хакӗ карттӑпа – 29 тенкӗ, чӗрӗ укҫапа – 31 тенкӗ.
Шупашкарти ырӑ та уҫӑ кӑмӑллӑ ватӑсем пӗтӗм ҫӗршывӗпе иртекен «Красная гвоздика» (чӑв. Хӗрлӗ гвоздика) акцие хутшӑнаҫҫӗ.
Унта, сӑмах май каласан, кирек кам та хутшӑнма пултарать. Республикӑри социаллӑ центрсемсӗр пуҫне шкулсенче те вӑл иртет.
Акци вӑхӑтӗнче ятарлӑ значок сутаҫҫӗ. Ачасем ӑна, калӑпӑр, 100 тенкӗ парса илеҫҫӗ; аслисем — 200 тенкӗрен пуҫласа. Кам миҫе тенкӗ тӳлесси ҫынран, унӑн кӑмӑлӗнчен, килет.
Акци вӑхӑтӗнче пуҫтарӑннӑ укҫа вӑрҫа тата тӗрлӗ хирӗҫтӑрӑва хутшӑннӑ ветерансене пулӑшма каять.
Шупашкар хулинчи хастар ватӑсем пирки каласан, вӗсем кунсӑр пуҫне тӗрлӗ мероприяти ирттерме палӑртаҫҫӗ, анчах хальлӗхе вӑртӑнлӑхра тытаҫҫӗ-ха. «Малтан ӗҫне тумалла, кайран мухтанма та юрать», — тесе шӳтлеҫҫӗ вӗсем.
Йӑлана кӗнӗ тӑрӑх, кӑҫал та республикӑра «Раҫҫейри симӗс ылтӑн» сӑра фестивалӗ иртӗ. Унта пырса курма чӗнеҫҫӗ: вӑл утӑ уйӑхӗн 25-мӗшӗнче пуҫланӗ те ҫурлан 1-мӗшӗнче вӗҫленӗ.
Кӑҫал фестивалӗн пӗчӗк юбилей темелле: ӑна йӗркелеме пуҫланӑранпа 5 ҫул ҫитет. Хальхинче та ӑна Шупашкарти Юханшыв портӗнче ирттерӗҫ. Яланхи пекех тӗрлӗ сӑра тутанса пӑхма, чӑваш сӑрине мӗнле вӗретнипе паллашма май пулӗ.
Сӑмах май, пӗлтӗр фестивале ҫӗршыври сӑра вӗретекен 34 компани хутшӑннӑ. Унта 160 пин ҫын ҫитсе курнӑ. Хӑнасене йышӗнче ют регион, ҫывӑхри тата инҫетри ют ҫӗршыв ҫыннисем те пулнӑ.
Шупашкар хулинче «Лада Ларгус» автомобиль тротуарпа пынӑ. Пӑтӑрмаха пуш уйӑхӗн вӗҫӗнче хулари Ленин проспектӗнче асӑрханӑ. Кун пирки Чӑваш Енӗн Шалти ӗҫсен министерствин пресс-служби ведомствӑн сайтӗнче пӗлтернӗ. Сӗмсӗр водителе пӗр ватӑ арҫын чарма та хӑтланса пӑхнӑ.
Пӑтӑрмах пирки халӑх тетелӗнчи пабликсенчен пӗринче хыпарланӑ. Сӑмахпа каланине ҫирӗплетме унта видео та вырнаҫтарнӑ.
Ҫул-йӗр правилине сӗмсӗррӗн пӑсакан водителе йӗрке хуралҫисем часах тупса палӑртнӑ. Вӑл этем хулара пурӑнакан 57 ҫулти арҫын пулнӑ.
Патшалӑх автоинспекцийӗн уйрӑм батальонӗн ӗҫченӗсем водитель тӗлӗшпе административлӑ протокол шӑрҫаланӑ. Халӗ ӑна административлӑ майпа явап тыттарса 2 пин тенкӗ штраф хурса панӑ.
Шупашкарта пурӑнакан 54 ҫулти хӗрарӑм, медучрежденире администраторта ӗҫлекенскер, Интернетри Максима шанса 7 миллион тенкӗ куҫарса панӑ. Пӑтӑрмах пирки вӑл йӗрке хуралҫисене виҫӗмкун пӗлтернӗ.
Шар курнӑ хӗрарӑм каласа кӑтартнӑ тӑрӑх, пуш уйӑхӗн пуҫламӑшӗнче паллашу сайтӗнче Максим ятлӑ ҫынпа ҫыру ҫӳретме тапранса кайнӑ. Кӑштахран хайхискер хӗрарӑма криптобиржӑра укҫа ӗҫлесе илме май пур тесе ӗнентернӗ.
Малтанласа хӗрарӑм 70 пин тенкӗ инвестици хывнӑ. Кӑштахран пысӑкран та пысӑк сумма хума тапранса кайнӑ. Кӑштахран банка хваттерне 4,5 миллион тенкӗлле салука хывнӑ.
Криптобиржӑна хӗрарӑм пӗтӗмпе 7 миллион тенкӗ ытла хывнӑ. Хӑйӗн пухса пынӑ укҫисӗр пуҫне тата кредит, пӗчӗк займ илнӗ, пӗлӗшӗсенчен кивҫене кӗрсе кайнӑ.
Пакунлисем асӑрхануллӑ пулмаллине тепӗр хутчен аса илтереҫҫӗ.
Шупашкара Мускавран килекен пуйӑсра вӑрҫӑнма тапранса кайнӑ арҫынна суд 80 пин тенкӗ штраф хурса панӑ.
Пӑтӑрмах кӑҫалхи кӑрлач уйӑхӗнче пулса иртнӗ. Мускав облаҫӗнчи Мытищи хулинче пурӑнакан 35 ҫулти арҫын 54-мӗш номерлӗ пуйӑсра хӑйне килӗшӳсӗр тытнӑ. Ҫакна пассажирсем те, проводник та тӳсеймен — йӗрке хуралҫисене чӗнсе илес тенӗ.
Владимир облаҫӗнчи Муром районӗнчи Стригино станцийӗнче пуйӑса транспорт полицийӗн ӗҫченӗсем кӗрсе тӑнӑ. Анчах вӗсене курсан та арҫын лӑпланман. Арҫын пакунлине тапса ҫапма тапранса кайнӑ. Кун пирки транспорт прокуратуринче пӗлтернӗ.
Нумаях пулмасть Муром хулинчи суд арҫынна РФ Пуҫиле кодексӗн 318-мӗш статйин 1-мӗш пайӗпе айӑпланӑ. Йӗрке хуралҫи ҫине алӑ ҫӗкленӗшӗн 80 пин тенкӗ штраф тӳлеттерме йышӑннӑ.
Шупашкарта шыври шоу кӑтартӗҫ. Программӑна хатӗрлекенни — Шупашкарти юханшыв порчӗ. Ӑна организаци шыв тӑрӑх тиев турттармалли ҫӗнӗ тапхӑр пуҫланнине халалласа ирттерме шухӑшланӑ.
Сӑмах май каласан, пӗлтӗр те ун пеккине йӗркеленӗ. Ун чухне вӑл юнкун, 17 сехет ҫурӑра пуҫланнӑ. Эрне варри, ӗҫрен тухсан вӑл вӑхӑта ҫитсе ӗлкӗрме йывӑртан куракансем сахал пулнӑ. Кӑҫал навигацие шӑматкун, 11 сехетре, уҫӗҫ. Шыври шоу вара 12 сехетре пуҫланӗ. Унта тӑватӑ буксир хутшӑнӗ.
Пӗлтӗр кӗвӗ ҫеммипе «Волгарь-7» тата К-884 вальс ҫаврӑннӑ, кӑҫал «Волгарь-17» тата «Волгарь-30» хутшӑнӗҫ.
Шоу-программӑпа пӗрлех культура программи те хатӗрлеҫҫӗ.
Шыври шоуна Юханшыв порчӗн «Контактри» пабликӗнче тӳрӗ эфирта кӑтартӗҫ.
+2.3 °C