Шупашкарти Артур Михайлов «Раҫҫейри чи лайӑх такси водителӗ» конкурса хутшӑнса 150 пин тенкӗ укҫана тата «Lada Vesta» автомобиле тивӗҫнӗ.
Мероприяти Хусанта иртнӗ. Унта ҫӗршывӑн 32 регионӗнчи такси водителӗсем хутшӑннӑ. Вӗсем практика тата пултарулӑх конкурсӗсенче ӑмӑртнӑ.
«Кашниех ҫӗнтерессишӗн пынӑ. Мана арӑм хавхалантарни пуринчен ытла вӑй-хал парса пычӗ. Вӑл манпа пултарулӑх конкурсне те хутшӑнчӗ. Атте-аннепе туссем ырӑ суннине те туйса тӑтӑм. Ку конкурсра ҫӗнтерес ӗмӗтпе эпӗ пилӗк ҫул пурӑннӑ», – хавхаланса каласа кӑтартнӑ Артур.
Арҫын республикӑри конкурссенче унччен пӗрре кӑна мар ҫӗнтернӗ, ҫӗршыврисенче те палӑрнӑ. 2019 ҫулта Сочи хулинче вӑл иккӗмӗш вырӑн йышӑннӑ, пӗлтӗр Шупашкарта виҫҫӗмӗш вырӑна тухнӑ.
Чӑваш Енрен Мускава ӗҫлеме кайнӑ арҫын ҫухалнӑ. Кун пирки МИХсенчен пӗрне арҫыннӑн арӑмӗ пӗлтернӗ.
52 ҫулти Евгений Подъячев арӑмӗпе утӑ уйӑхӗн 11-мӗшӗнче 10 сехет те 30 минутра телефонпа, видеоҫыхӑну мелӗпе, калаҫнӑ. Ун чухне вӑл Мускаври Щелково автовокзалӗ ҫывӑхӗнче пулнӑ.
Мускавра ҫуртсем тата суту-илӳ павильонӗсем тунӑ ҫӗрте ӗҫленӗ арҫын ҫав кун Шупашкара килесшӗн пулнӑ. Автобус 18 сехетре ҫула тухмалла пулнӑ. Анчах арҫын ҫухалнӑ, арӑмӗ вӑл ӑҫтине пӗлмест.
Етӗрне округӗнчи Сӑрҫи ялӗ ҫывӑхӗнчи пӗвере 1986 ҫулта ҫуралнӑ хӗрарӑм путса вилнӗ. Ку инкек утӑ уйӑхӗн 13-мӗшӗнче пулнӑ.
Шупашкарти Дементьев урамӗнчи 7-мӗш ҫуртӑн чатӗнче ҫакна сӳтсе яваҫҫӗ. Унта пӗлтернӗ тӑрӑх, ҫав хӗрарӑмӑн 4 ача юлнӑ. Ашшӗ вара пӗлтӗр вилнӗ-мӗн. Ҫынсем ҫемьене, ачасене пулӑшас тесе укҫа пухма тытӑннӑ.
Аса илтерер: ҫав каҫах Шупашкарти тӗп пляжра ӳсӗр арҫын путса вилнӗ.
Шӑматкун, утӑ уйӑхӗн 13-мӗшӗнче, Шупашкарти тӗп пляжра каллех ҫын путса вилнӗ. Ку каҫхи 7 сехетре пулнӑ.
Унта пулнӑ ҫынсем каланӑ тӑрӑх, арҫын буйоксен хыҫӗнче 6 метр леререх шыва кӗнӗ. Вӑл путсан пляжри ҫӑлавҫӑсем пулӑшма чупнӑ. Арҫынна шыв тӗпӗнче тупсан ӑна ҫыран хӗррине илсе тухнӑ, реанимаци тума пуҫланӑ, анчах кӑлӑхах.
Малтанлӑха пӗлтернӗ тӑрӑх, арҫын ӳсӗр пулнӑ. Палӑртмалла: ҫулла пуҫланнӑранпа республикӑра 21 ҫын путса вилнӗ. Вӗсенчен 3-шӗ - ачасем.
Чӑваш Енре пурӑнакан Шишовсен ҫемйине ҫӗршыв Президенчӗ Владимир Путин Мускава пырса курма чӗннӗ.
«Ашшӗ-амӑшӗн мухтавӗ» тата «Мухтавлӑ амӑшӗ» орденсемпе чысланисене Мускава пырса курма ҫӗршыв ертӳҫи ҫу уйӑхӗн 30-мӗшӗнче иртнӗ онлайн-тӗлпулу вӑхӑтӗнче йыхравланӑ. Ҫавсен йышӗнче Ҫӗнӗ Шупашкарти 9 ачаллӑ Шишовсем те пулнӑ.
Ачасен амӑшӗ Ольга Шишова «ФедералПресс» корреспондентне тӗлпулу питех те ӑшшӑн ирсте кайнине пӗлтернӗ май пӗчӗк ачасем валли те, аслисемшӗн те кӑсӑкли нумай пулнине палӑртса хӑварнӑ. Хӗрарӑма Мускав хӑйӗн чиркӗвӗсемпе килӗшнӗ иккен. Эрне хушшинче ҫемье тӗрлӗ экскурсире пулса курнӑ.
Президент валли ҫемье тӑмран кӗнеке евӗр япала хатӗрлесе илсе кайнӑ. Ун ҫине тарӑн та ҫирӗп тымарлӑ, йӗкелсемлӗ, нумай туратлӑ юмана ӳкерсе хунӑ. Ҫийӗнчен тата Владимир Путин калашле, «Раҫҫей — пысӑк ҫемье», — тесе ҫырса хунӑ.
«Уҫӑ хула» порталта Шупашкарӑн хисеплӗ ҫыннине суйлас тӗлӗшпе сасӑлав вӗҫленнӗ. Кӑҫал унта 4887 ҫын сасӑланӑ. Ята илессишӗн 9 кандидат кӗрешнӗ. Кам ытларах сасӑ пухнӑ-ха?
Патшалӑх Думин депутачӗ Анатолий Аксаков чи нумай сасӑ пухнӑ. Уншӑн 2466 ҫын сасӑланӑ. Ҫапла вӑл кӑҫал Шупашкарӑн хисеплӗ ҫынни пулса тӑма пултарӗ. Ку ыйтӑва хула пухӑвӗн депутачӗсем пӑхса тухӗҫ.
Сӑмах май, Анатолий Аксаков унччен Чӑваш Енӗн хисеплӗ ҫынни пулнӑ.
Шупашкарта пурӑнакан Геннадий Михайлов тивӗҫлӗ канура пулин те ӗҫсӗр лармасть, вӑл гипсран тӗрлӗ япала ӑсталать.
Мучие Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗ Эльвира Авдеева пулӑшса пырать.
Ватӑ ҫын гипсран илемлӗ тӗрлӗ япала ӑсталассинче чун киленӗҫне тупнӑ.
«Кӳлепесене тӑвасси пуҫа ӗҫлеттерме хистет. Вӗсене епле формӑллӑ тата мӗнле тӗспе сӑрласси таранах пуҫа вататӑп», — тет иккен мучи.
Шупашкартан Турциех вӗҫме май килӗ. Ҫапла шантарнӑ ЧР Элтеперӗ Олег Николаев. Анчах рейссене Шупашкарти аэропорта реконструкцилесен кӑна уҫма май килнине каланӑ вӑл.
Сӑмах май унччен пирӗн патран Антальйӑна самолетсем вӗҫнӗ. Анчах 2020 ҫулта пандемие пула рейссем хупӑннӑ. Кайран та вӗҫмен - аэропортра реконструкци пуҫланнӑ.
Паян Олег Николаев Турцин Хусанти тӗп консулӗпе Угур Йылмазпа тӗл пулса Турцие самолетсен рейсне уҫассине сӳтсе явнӑ.
Шупашкар хулинче пурӑнакан пӗр карчӑк лавккаран укҫа шыраса илме пултарнӑ. Ӑна ҫав енӗпе Шупашкарти Калинин районӗн прокуратури хӳтӗленӗ.
Пӗлтӗрхи хӗлле 67 ҫулти хӗрарӑм хулари Калинин урамӗнчи лавккаран тухнӑ чухне пӑрланса ларнӑ картлашка ҫинче шуҫса ӳкнӗ. Хӗрарӑм пуҫӗпе ҫапӑннӑ, урине хуҫнӑ.
Судра прокуратура ҫав картлашкана лавккан тытса тӑмаллине ҫирӗплетсе панӑ. Суд лавккана хӗрарӑма кӑмӑл-сипет тӗлӗшӗнчен сиен кӳнӗшӗн 150 пин тенкӗ тӳлеттермелле, эмел тавраш туянса пӗтернӗ 12 пин тенке саплаштарма йышӑннӑ.
Шӑмӑршӑ округӗнчи Шамкай ялӗнчи пӗвере ҫын путса вилнӗ. Унта 1975 ҫулта ҫуралнӑ арҫыннӑн пурнӑҫӗ татӑлнӑ. Вӑл ятарласа хатӗрлемен вырӑнта шыва кӗнӗ.
Аса илтерер: нумаях пулмасть Муркаш, Патӑрьел округӗсенче арҫынсем путса вилнӗ. Шупашкарта, Атӑл леш енче, 19-ти тата 21 ҫулти каччӑсем шыва кӗрсе пурнӑҫран уйрӑлнӑ.
+6.3 °C