Иртнӗ талӑкра пушарнӑйсем Шупашкарта тата Улатӑрта пушар сӳнтернӗ. Ӗнер Улатӑр хулинче Горький урамӗнче йывӑҫ ҫурт ҫунса кайнӑ.
Шупашкарта та харпӑр ҫурт кӗле ҫаврӑннӑ. Хуҫи, 70 ҫулти арҫын, шар курнӑ. Вӑл пӳртре тухнӑ ҫулӑма сӳнтерес тесе хӑй сӗрӗмпе наркӑмӑшланнӑ. Паян вара Шупашкарта «Юбилейный» сад юлташлӑхӗнче икӗ хутлӑ ҫурт ҫуннӑ. Ҫулӑм мӗнрен тухнине уҫӑмлатаҫҫӗ.
Сӑмах май, ҫулталӑк пуҫланнӑранпа Чӑваш Енре 1032 пушар тухнӑ. Вӗсенче 62 ҫын вилнӗ, 54 ҫын суранланнӑ.
Ҫак кунсенче Чӑваш Ен тӗп хулинче ҫӗнӗ клуб хутлӑхӗ уҫма хатӗрленеҫҫӗ. Вӑл Шупашкар хулинчи халӑхӑн социаллӑ ыйтӑвӗсене тивӗҫтерекен центрӑн пулӗ.
«Мой социальный центр» (чӑв. Манӑн социаллӑ центр) клуб хутлӑхне хута ярассипе ҫыхӑннӑ ӗҫсем халӗ малалла пыраҫҫӗ. Строительсем тар тӑкнипе пӗрлех йӗркелӳпе ҫыхӑннӑ ытти ӗҫе те пурнӑҫлаҫҫӗ.
Ҫӗнӗ учрежденире ваттисем валли тӗрлӗ енӗпе кӑсӑклӑ мероприятисем иртӗҫ. Халӑхӑн социаллӑ ыйтӑвӗсене тивӗҫтерекен центрпа танлаштарсан унти пурнӑҫа ҫулланнӑ ҫынсем хайсене кирлӗ пек йӗркелеме пултарӗҫ. Вӑл Константин Иванов урамӗнче вырнаҫӗ.
Паян ирхи 6 сехет те 30 минут тӗлӗнче Шупашкарта троллейбус микроавтобуспа ҫапӑннӑ.
Чӑваш Енӗн Шалти ӗҫсен министерствинче пӗлтернӗ тӑрӑх, инкек Энгельс тата Гагарин урамӗсем хӗресленнӗ вырӑнта пулса иртнӗ. Пассажирсене 15-мӗш маршрутпа турттаракан троллейбус светофор тӗлӗнче чарӑннӑ микроавтобус ҫине пырса кӗнӗ. Асӑннӑ транспорт пассажирсене Шупашкартан Ҫӗнӗ Шупашкара 234-мӗш маршрутпа турттарать.
Троллейбуса руль умӗнче 27 ҫул ларакан водитель тытса пынӑ. Вӑл ӑнлантарнӑ тӑрӑх, транспортӑн тормозӗ ӗҫлеме пӑрахнӑ. Салонта 10 ҫын пулнӑ, ҫавӑн чухлех ҫын — маршрут микроавтобусӗнче. 46-64 ҫулсенчи икӗ хӗрарӑм-пассажир кӑштах суранланнӑ, вӗсем тухтӑрсенчен пулӑшу ыйтнӑ.
Водительсем иккӗшӗ те урӑ пулнӑ.
Паян Шупашкар хулин администрацийӗнче кадр улшӑнӑвӗ пулса иртнӗ. Кун пирки Алексей Ладыков сити-менеджер Инстаграмри хӑйӗн страницинче пӗлтернӗ.
Паянтан хулари Мускав районӗн администрацине ҫӗнӗ ҫын ертсе пыма тытӑннӑ. Тилхепене Сергей Ильина тыттарнӑ.
Сергей Вячеславович «Трактор савучӗсем» концернра, «Волгостальконструкция» предприятире тата ытти хӑш-пӗр вырӑнта самай яваплӑ вырӑн йышӑннӑ. 2012 ҫултанпа вӑл «Городская реклама» (чӑв. Хула реклами) муниципалитетӑн хысна учрежденине ертсе пынӑ. Вӑл тӑрӑшнипе хыснана ҫулталӑкра укҫа кӗресси 11-12 миллион тенкӗрен 5 хут ӳссе 50 миллион тенке ҫитнӗ.
Мускавра пурӑнакан 9 ҫулти Алиса Теплякова пирки юлашки вӑхӑтра чылай МИХ хыпарларӗ пулӗ. Вӑл Мускаври патшалӑх университетне кӗме экзамен тытнӑ. Ача психологи факультетӗнче вӗренесшӗн иккен.
Ачана ятарлӑ программӑпа ашшӗ-амӑшӗ килте вӗрентнӗ. Алиса шкул программине ӑша хывса ӗлкӗрнӗ, экзаменсене аван тытнӑ.
Пултаруллӑ ачан кукашшӗпе кукамӑшӗ — Вера Ивановнӑпа Аркадий Евсеевич Миневичсем — Шупашкарта 40 ҫул ытла пурӑнаҫҫӗ иккен. Вӗсем кунта аслӑ шкултан вӗренсе тухнӑ хыҫҫӑн направленипе килсе ҫитнӗ. Чӑваш Енре мӑшӑрӑн икӗ хӗр: Жанна тата Наталия (Алиса Теплякован амӑшӗ) — ҫуралнӑ. Наташа та пӗчӗкренех ӑслӑ пулнӑ иккен. Вӑл механикӑпа математика факультететӗнчен вӗренсе тухнӑ, Финанс университетӗнчи магистратурӑра пӗлӳ илнӗ. Маларах банкра ӗҫленӗ.
Наташа пулас мӑшӑрӗпе Женьӑпа 2011 ҫулта паллашнӑ. Паян вӗсем 7 ача ӳстереҫҫӗ. Женя Мускаври патшалӑх университетӗнчен вӗренсе тухнӑ. Ҫамрӑк мӑшӑр пӗр вӑхӑтра та Китайра та пурӑннӑ.
Шупашкарта 180 килограмм панулмине тӗп тунӑ. Кун пирки Россельхознадзорӑн Чӑваш Енри тата Чӗмпӗр облаҫӗнчи управленийӗн пресс-служби пӗлтерет.
Чӑваш Енри транспорт прокуратури ҫурла уйӑхӗн 5-мӗшӗнче суту-илӳ вырӑнӗнче 182,2 килограмм панулми тупнӑ. Ун ҫинчи этикеткӑсем ҫинче нимӗнле маркировка та пулман. Ҫакӑ курӑннӑ: панулмисене татнӑ. Анчах документсем пулман.
Тӗрӗслев хыҫҫӑн вӗсене туртса илнӗ, 182,2 килограмм панулмине тӗп тунӑ.
Хуласенчи нумай хваттерлӗ ҫуртсенчи пӗрремӗш хутра пурӑнакансенчен хӑшӗсем хӑйсен балконӗ айне нӳхреп чавма кӑмӑллаҫҫӗ. Анчах ҫак ӗҫе пуҫӑниччен ятарлӑ службӑсенчен ирӗк илмелле. Ахальлӗн нӳхрепе сӳтме тивӗ.
Шупашкарта икӗ ҫын тӗлӗшпе суд пулнӑ. Хулари Калинин район администрацийӗн пресс-службинче пӗлтернӗ тӑрӑх, пӗрремӗш хутра пурӑнакан хваттер хуҫисем хӑйсем тӗллӗн нӳхреп чавнӑ. Унта вӗсем хӑйсен балконӗнчен кӗмелле тунӑ. Никамран ирӗк илмесӗр нӳхреп тунине «Жилищный стандарт» управляющи компани асӑрханӑ.
Суд икӗ хваттер тӗлӗшпе пулнӑ. Вӗсен хуҫисен нӳхрепе сӳтмелле, стена унччен епле пулнӑ, ҫавӑн пек йӗркене кӗртмелле.
Паян, ҫурла уйӑхӗн 4-мӗшӗнче, республикӑра кӑнтӑрлаччен ҫумӑр ҫурӗ. Шупашкарта урамсене шыв илнӗ. Сӑнӳкерчӗксене, видеосенче ҫынсем тӗнче тетелне вырнаҫтарнӑ.
Урамсем Венецири урамсене аса илтернӗ, шӑв шӑнкӑртатса юхнӑ. Тӗп хулари Суту-илӳпе курав центрӗн чи аялти, путвалти, хутне шыв кӗнӗ. Урамри ливневка ҫавӑн чухлӗ шыв ҫӑтса ӗлкӗреймен – суту-илӳ центрне те лекнӗ.
«Мадагаскар» суту-илӳ центрӗ патӗнче те урам юханшыва ҫаврӑннӑ.
Юлашки вӑхӑтра ҫутҫанталӑк хӑйӗн вӑйне хытах кӑтартма пуҫларӗ. Ҫил-тӑвӑл, шыв-шур, вут-кӑвар этеме — пуян-и вӑл е чухӑн-и, ӑслӑ-и е айван-и, пысӑк вырӑн йышӑнать е хура ӗҫе пурнӑҫлать-и — никама та уяса-суйласа тӑмасть. Алхасса кайсан пурин пурлӑхне те пӗр пек ишет-ватать, ҫӗмӗрет-ҫӗрпе танлаштарать.
Ҫутҫанталӑк тата технологи лару-тӑрӑвӗ ҫурт-йӗре, хваттере, ытти пурлӑха сиен кӳнине саплаштарассипе пирӗн республикӑра ятарлӑ программа йышӑнма палӑртнӑ. Ҫурла уйӑхн 2-мӗшӗнче ку ыйтупа Чӑваш Ен Правительствин ҫуртӗнче тӳре-шара канашлӑва пухӑннӑ. Сергей Артамонов вице-премьер ертсе пыракан мероприятие страхлакан компанисенче ӗҫлекенсем те хутшӑннӑ.
Сӑмах май каласан, ӗнер те пирӗн тӑрӑхра вӑйлӑ ҫил алхасрӗ. Шупашкарта, ав, «Пичет ҫурчӗ» чарӑнӑва тӳнтерсе янӑ.
Шупашкарти аэропортра юсав ӗҫӗсем пуҫӑнӗҫ. Ку хыпара аэровокзалӑн пресс-служби ӗнер Фейсбукра пӗлтернӗ.
«Аэровокзалӑн ҫуртне юсаса ҫӗнетме хатӗрленес ӗҫӗн черетлӗ тапхӑрне вӗҫленине хавасланса пӗлтеретпӗр, — тесе ҫырнӑ хыпарта. — Строительсем тинех ӗҫе пуҫӑнӗҫ».
Подряд организацийӗ юсав ӗҫне эрнекун, ҫурла уйӑхӗн 6-мӗшӗнче, кӳлӗнӗ. Хальлӗхе ку вӑл хатӗрленӳ тапхӑрӗ пулӗ, пассажирсене ҫавӑ пырса тивмӗ.
Сӑмах май каласан, реконструкци вӑхӑтӗнче те аэропорт унчченхиллех ӗҫлӗ, самолётсем те яланхиллех вӗҫӗҫ.
+19.3 °C