И.Н.Ульянов ячӗллӗ ЧПУ студенчӗ, медицина факультетӗнче реаниматолога вӗренекенскер, пандеми пуҫлансан медбратра ӗҫлеме пуҫланӑ. Дежурствӑран пушӑ вӑхӑтра Висраил Хаманаев Чӑваш Енре пурӑнакансене лезгинка ташлама вӗрентет.
Студент «Дети гор» ансамбль йӗркелесе янӑ, ӑна хӑйех ертсе пырать. Ун патӗнче чӑвашсем те, эрменсем те, аварсем те, чеченсем те, азербайджансем те ташлаҫҫӗ.
Занятисем хыҫҫӑн Висраил пульницӑна 12 сехетлӗхе дежурствӑна васкать. Кӑҫал кӗркунне вӑл экзаменсем тытать, ун хыҫҫӑн ординатурӑна куҫӗ. Ӑна вӑл ӑҫта ирттерессине хальлӗхе палӑртман.
Етӗрне районӗнчи чӑваш ялӗнче ҫуралса ӳснӗ Анастасия Олангина Мускавра, Останкино башнинче, ӗҫлет.
Темиҫе ҫул каялла вӑл И.Н. Ульянов ячӗллӗ Чӑваш патшалӑх университечӗн вырӑс тата чӑваш филологийӗн тата журналистика факультетӗнчи журналистика уйрӑмӗнчен вӗренсе тухнӑ. Философи ӑслӑлӑхсен кандидачӗ Эрбина Никитина сӗннипе (кун пирки хӗр Фейсбукра пӗлтернӗ) вӑл Чӑваш Енӗн наци телевиденине ӗҫлеме кайса пӑхма кӑмӑл тунӑ. Унта 4 ҫул ӗҫленӗ хыҫҫӑн Мускава тухса кайнӑ.
Анастасия Останкино башнинче 2,5 ҫул ӗнтӗ ӗҫлет. Хальхи вӑхӑтра вӑл продюсер тата маркетолог евӗр тӑрӑшать. МИХсем валли ӳкерессинчен, ҫурт ҫине рекламӑран пуҫласа ятарлӑ пулӑмсем тупса хатӗрлессипе килӗштерсе ӗҫлеме блогерсем шыраса тупасси таранах унӑн яваплӑхӗ шутланать. Хӑйӗн ӗҫне чӑваш хӗрӗ питех те килӗштерет.
Кӑрлач уйӑхӗн 17-мӗшӗнчен пуҫласа И.Н.Ульянов ячӗллӗ ЧПУ студенчӗсене, пӗрремӗш компонентпа вакцинациленменнисене, экзамена, аслӑ шкула кӗртме пӑрахӗҫ. Унашкаллисене дистанци мелӗпе вӗренме ярӗҫ.
Кун пирки аслӑ шкулӑн ректорӗ хушу кӑларнӑ-мӗн. Нарӑс уйӑхӗн 17-мӗшӗнчен вара иккӗмӗш компонентпа вакцинациленменнисене кӗртме пӑрахӗҫ.
Анчах хальлӗхе университетра ку хыпара ҫирӗплетсе калаймаҫҫӗ, хушӑва татӑклӑн йышӑнман-мӗн. Студентсем экзаменсене дистанци мелӗпе те тытма пултараҫҫӗ иккен.
И.Н. Ульянов ячӗллӗ Чӑваш патшалӑх университетӗнче ҫак эрнере ҫӗнӗ проект ӗҫлесе кайнӑ. Кун пирки аслӑ шкулӑн преподавателӗ Елен Нарпи Фейсбукри хӑйӗн страницинче пӗлтернӗ.
«Чӑматанри чӑваш чӗлхи» проект Раҫҫей Федерацийӗн халӑхсен тӑван чӗлхисене упрас тата вӗрентес енӗпе ӗҫлекен фондӑн грантне тивӗҫнӗ. Ӑна пурнӑҫа кӗртессишӗн яваплисем — И.Н. Ульянов ячӗллӗ ЧПУри чӑваш филологи уйрӑмӗнче вӗренекенсемпе преподавательсем. Проект ертӳҫи — А.М. Иванова.
Халӗ преподавательсемпе студентсем интерактивлӑ уроксемпе шкулсене тата ытти вырӑна тухса ҫӳреҫҫӗ. Ӗнер, чӳк уйӑхӗн 18-мӗшӗнче, ЧПУн медицина факультетӗнче педиатри уйрӑмӗнче вӗренекенсемпе урок ирттернӗ.
И.Н. Ульянов ячӗллӗ Чӑваш патшалӑх университетӗнче 1991-1995 ҫулсенче бухгалтер учёчӗн тата финанс кафедрин заведующийӗнче, экономика факультетӗнче деканра ӗҫленӗ Владимир Хирбю прунӑҫран уйрӑлса кайнӑ. Кун пирки унӑн хӗрӗ Вера пӗлтерни тӑрӑх Юрий Шакеев ятлӑ ҫын Фейсбукра хыпарланӑ. Григорий Хирбю ывӑлӗ ковида пула вилнӗ.
Уҫӑ ҫӑлкуҫсенче пӗлтерни тӑрӑх, ҫакна калама пулать: Владимир Григорьевич 1950 ҫулта ҫуралнӑ. Малтан Шупашкарти ЧПУра вӗреннӗ, унтан Г.В. Плеханов ячӗллӗ Халӑх хуҫалӑхн институтӗнчи аспирантурӑра, унта экономика наукисен кандидачӗ ята илнӗ. «Электроприбор» акционерсен омществинче экономика реформисен управленийӗн пуҫлӑхӗнче, 1998-1999 ҫулсенче Чӑваш Ен экономика министрӗн ҫумӗнче тӑрӑшнӑ.
РФ Вӗрентӳ министерстви чӳк уйӑхӗн 8-мӗшӗнчен аслӑ шкулсенче дистанци мелӗпе ӗҫлеме ирӗк пани пирки пӗлтернӗччӗ. Аттестаци те онлайн мелпе иртме пултарать.
Чӑваш Енре ҫитес эрнерен аслӑ шкулсем дистанци мелӗпе вӗренӗҫ. Тепӗр тесен, вӗсем халӗ те, канмалли кунсенче, ҫак мелпех ӑс пухаҫҫӗ. Хальлӗхе кун пирки И.Н.Ульянов ячӗллӗ ЧПУ, Чӑваш патшалӑх аграри университечӗ, Коопераци институчӗ пӗлтернӗ. Ку хӑҫанччен тӑсӑлассине хыпарламан-ха.
Аса илтерер: кӑшӑлвирус сарӑлнине пула республикӑра чӳк уйӑхӗн 8-мӗшӗччен канмалли кунсем шутланаҫҫӗ. Халӗ суту-илӳ центрӗсем, пасарсем, апат-ҫимӗҫ сутман лавккасем, парикмахерскисемпе илем салонӗсем ӗҫлемеҫҫӗ.
Шупашкар хулинче ҫӗнӗ архитектора ҫирӗплетнӗ. Хула администрацийӗн архитектура тата хула строительствин управленийӗн пуҫлӑхӗн ҫумӗ — Шупашкарӑн тӗп архитекторӗ пулма Павел Корнилова шаннӑ. Унччен вӑл хулан архитекторӗн тивӗҫӗсене пурнӑҫланӑ.
Петр Корнилов 1989 ҫулхи ака уйӑхӗн 12-мӗшӗнче ҫуралнӑ. 2015 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. «Архформа» проектпа дизайнер фирминче, «Союзпроект» проект организацийӗнче архитекторта ӗҫленӗ. Раҫҫейри тата Чӑваш Енри архитекторсен союзӗсен пайташӗ.
И.Н.Ульянов ячӗллӗ ЧПУ студенчӗсене кӑшӑлвирусран прививка тунӑшӑн укҫа параҫҫӗ. Кун пирки университет «Контактра» халӑх тетелӗнчи страницинче пӗлтернӗ.
Вакцинациленнисене 1500 пин тенкӗпе хавхалантарма йышӑннӑ. Ку укҫана тӳлевлӗ вӗренекен студентсем те илееҫҫӗ. 1500 тенке ку вӗренӳ ҫулӗнче пӗр хутчен илме май пур. Студент билечӗ тата вакцинациленнине ӗнентерекен сертификат ҫеҫ кӑтартмалла.
Кирлӗ документсене тӑратнӑ стедентсене укҫана стипендипе пӗрле парӗҫ.
Паян И.Н. Ульянов ячӗллӗ Чӑваш патшалӑх университетӗнче Владимир Чекушкин философи наукисен докторӗ, профессор 85 ҫул тултарнӑ ятпа «Философия и песня в моей судьбе» (чӑв. Манӑн шӑпамри философи тата юрӑ) курав хуҫалнӑ. Ҫакӑн пирки Фейсбукра Альбина Юрату сӑвӑҫ пӗлтернӗ.
Курава йӗркелеме ЧПУри музей ертӳҫи Ольга Галошева тӑрӑшнӑ.
Юбиляра саламлама, Альбина Юрату пӗлтернӗ тӑрӑх, «сумлӑ ҫынсемпе медицина факультетечӗн студенчӗсем» пырса ҫитнӗ.
Владимир Чекушкин – Патӑрьел районӗнчи «Труд» колхозӑн хисеплӗ ҫынни иккен. Вӑл тӑрӑхра ҫуралнӑскере ентешӗсем сума сӑваҫҫӗ, хисеплеҫҫӗ.
Альбина Юрату калашле, «Владимир Чекушкин чӑваш юррисене юрласа, шӑпӑр каласа чылай ют ҫӗршыва ҫитнӗ. Вьетнамра та, Индире те, Америкӑра та, Испанире те, Венгрире те, Чехинче те, Польшӑра та, Германинче те, Ирландире те, Словакире те вӑл илемлӗ те янӑравлӑ чӑваш чӗлхипе калаҫнӑ, асамлӑ тӗрӗллӗ чӑваш тумӗпе тӗрлӗ халӑх умне тухнӑ, чӑваш пулнипе мӑнаҫланнӑ».
«Пӗрлехи Раҫҫей» партин Чӑваш Енри уйрӑмӗн президиумӗ Николай Владимирова республикӑн ӗҫ тӑвакан влаҫӗнчен РФ Федераци Канашне сенатор пулма сӗннӗ. Татӑклӑ йышӑнӑва республикӑн Патшалӑх Канашӗн пӗрремӗш сессийӗнче тӑвӗҫ. Лару авӑн уйӑхӗн 29-мӗшӗнче иртмелле. Чӑваш Ен парламентӗнче чылайӑшӗ «Пӗрлӗхлӗ Раҫҫей» парти пайташӗ пулнине шута илсен асӑннӑ кандидата депутатсем ырласси пирки иккӗленме кирлӗ мар.
Конституцире пӑхса хӑварнӑ тӑрӑх, ҫӗршывӑн Федераци Канашӗнче Раҫҫейӗн кашни регионӗнчен икшер кандидат пулмалла. Чӑваш Енӗн тепӗр пайташӗ пулма республика ертӳҫи Олег Николаев Николай Федорова сӗннӗ.
Николай Федорова нумайӑшӗ пӗлет. Вӑл Чӑваш Енӗн пӗрремӗш Элтеперӗ пулнӑ.
Николай Владимиров пирки ҫакна пӗлтермелле: вӑл пӗр вӑхӑт «Чӑваш бройлерӗ» предприятие ертсе пынӑ. Николай Николаевич 1979 ҫулхи чӳк уйӑхӗн 18-мӗшӗнче Шупашкарта ҫуралнӑ. И.Н. Ульянов ячӗллӗ Чӑваш патшалӑх университетӗнче вӗреннӗ.
+14.3 °C