Ҫитес эрне ӗҫлекенсемшӗн кӗскерех пулӗ. Ку уявпа ҫыхӑннӑ. Тунтикун, чӳк уйӑхӗн 4-мӗшӗнче, Халӑх пӗрлӗхӗн кунне паллӑ тӑваҫҫӗ. Эрнере 5 кун тӑрӑшакансем чӳкӗн 2-4-мӗшӗсенче канӗҫ, ӗҫе ытларикун ҫеҫ тухӗҫ.
Ҫапах хӑш-пӗр организаци уяв кунне пӑхмасӑрах ӗҫлеме тухма йышӑннӑ-мӗн. Вӗсем куншӑн Ҫӗнӗ ҫулта, раштав уйӑхӗн 31-мӗшӗнче, канӗҫ. Кӑҫал вӑл ытларикуна лекӗ.
Палӑртмалла: ку эрнере, уяв умӗнхи канмалли кунсем умӗн, эрнекун кӗскетнӗ ӗҫ кунӗ пулмӗ.
РБК телеканалпа «Битва дизайнеров» (чӑв. «Дизайнерсен ҫапӑҫӑвӗ») кӑтараткан кӑларӑма пирӗн ентеш те хутшӑнать. Вӑл – Денис Горшков.
Денис Шупашкарта пурӑнать. Вӑл И.Я.Яковлев ячӗллӗ ЧППУн ӳнерпе графика факультетне вӗренсе пӗтернӗ, халӗ мӑшӑрӗпе пӗрле «ДД» дизайн студийӗнче ӗҫлет. Вӗсем интерьер проекчӗсене хатӗрлеҫҫҫӗ. Сӑмах май, студи Инстаграмра страница тытса пырать, ӑна 174 пин ҫын пӑхса тӑрать.
Кӑларӑмра дизайнерсен икӗ команди заданипе интерьер концепцине хатӗрлет. Ҫӗнтерӳҫе сасӑлав мелӗпе палӑртаҫҫӗ. Дениса пулӑшас килсен ҫак ссылкӑпа сасӑламалла: http://battle.style.rbc.ru/style/bachelor.
НТВ федераци телеканалӗпе Чӑваш Енре пурӑнакан хӗрарӑм пирки сюжет кӑтартнӑ. Вӑл Чернобыльти аварие пӗтернӗ ҫӗрте ӗҫленӗ арҫыннӑн мӑшӑрӗ, халӗ тӑлӑх арӑм.
Хайхискер пурӑнмалли ҫурт-йӗре лайӑхлатмашкӑн 2016 ҫулта регионти влаҫран пулӑшӑва, укҫа-тенке, тивӗҫнӗ. Каярахпа, 2 ҫултан, тӳре-шара унӑн мӑшӑрӗ аварие пӗтернӗ ҫӗрте ӗҫлемен тесе укҫана, 1,5 миллион тенке, каялла илме шутланӑ. Следстви комитечӗ халӗ ҫакӑ саккунпа килӗшсе тӑнипе тӑманнине тӗрӗслет. НТВ телеканалпа шӑпах ҫакӑн пирки каласа кӑтартнӑ.
Сюжет ӗнер, юпа уйӑхӗн 25-мӗшӗнче, эфира тухнӑ.
РФ Патшалӑх Думи виҫҫӗмӗш вулавра Ӗҫ кодексне улшӑнусем кӗртнӗ. Ҫӗнӗлӗх ялта ӗҫлекен хӗрарӑмсене пырса тивет. Малашне вӗсен эрнере 36 сехет ҫеҫ ӗҫлеме тивӗ.
Ӗҫ укҫине вара малтанхи пекех, эрнере 40 сехет ӗҫленӗ пек, тӳлӗҫ. Кунсӑр пуҫне вӗсен ӗҫ условийӗсемпе килӗшӳллӗн ӗҫ кунне пайланӑ тӑк ытларах тӳлев илме право пур.
Документра палӑртнӑ тӑрӑх, саккун вӑя кӗрсен унччен пулнӑ ӗҫ укҫине пӗчӗклетме юрамасть.
Палӑртмалла: Чӑвашстат пӗлтернӗ тӑрӑх, 2019 ҫулхи карлачӑн 1-мӗшӗ тӗлне республикӑра 452 743 ҫын ялта пурӑнать, вӗсенчен 225 728-шӗ – хӗрарӑмсем.
Раҫҫей почти ачасен ӳкерчӗкӗсен эскизӗсемпе Ҫӗнӗ ҫул открыткисем кӑларӗ. Конкурса 7-17 ҫулсенчи ачасем хутшӑнаяҫҫӗ. Вӗсен Пӗтӗм Раҫҫейри «Ҫӗнтерӳ чӑрӑшне ӳкер» конкурса ӳкерчӗксем ярса памалла. Ӑна Ҫӗнтерӳ музейӗ тата Раҫҫей почти йӗркелет.
Ӳкерчӗксен Аслӑ Ҫӗнтерӳпе, 1945 ҫулхи Ҫӗнӗ ҫулпа, ҫыхӑнмалла. Ҫавна май конкурса Ҫӗнтерӳ пулнӑранпа 75 ҫул ҫитнине халаллӗҫ.
Ӳкерчӗксене жюри хаклӗ. Вӗсен йышӗнче профессионал ӳнерҫӗ-иллюстраторсем, Раҫҫей Почтин тата Ҫӗнтерӳ музейӗн ӗҫченӗсем пулӗҫ.
Заявкӑсене ҫак сайтра йышӑнаҫҫӗ: http://elkapobedy.ru/konkurs.php. Ӗҫсене чӳк уйӑхӗн 10-мӗшӗччен ярса памалла. Ҫӗнтерӳҫӗсене раштав пуҫламӑшӗнче пӗлтерӗҫ. Палӑртмалла: ачасен ӳкерчӗкӗсен эскизӗсемпе кӑларнӑ открыткӑсен тиражӗ нумай пулмӗ.
Чӳк уйӑхӗн пуҫламӑшӗнче Сочире Пӗтӗм Раҫҫейри такси конкурсӗ иртет. Унта Чӑваш Ен чысне Артур Михайлов хӳтӗлӗ. Вал регион шайӗнче иртнӗ конкурсра ҫӗнтернӗ.
Унччен Артур дальнобойщик пулнӑ, ҫемйине сахал курнӑ. Кайран вӑхӑтлӑха таксире ӗҫлеме пуҫланӑ. Халӗ 3 ҫул ӗнтӗ вӑл унта официаллӑ майпа ӗҫлет.
Артур конкурса тӗплӗн хатӗрленнӗ: канмалли кунсенче автодромра ярӑннӑ, правилӑсене тепӗр хутчен аса илнӗ. Усси пулнах: регион шайӗнче мала тухнӑ.
Раҫҫей шайӗнчи ӑмӑрту «Сочи Автодромра» иртӗ. Унта хутшӑнакансен ҫул укҫине йӗркелӳҫӗ тӳлет. Таксистсен теорие пӗлмелле, автодромра ярӑнмалла, унтан ачаллӑ пассажира кирлӗ ҫӗре илсе ҫитермелле, хӑйне евӗр тиеве илсе каймалла.
Ӗнер, юпан 20-мӗшӗнче, «Лучше всех!» (чӑв. «Пуринчен те лайӑхрах!») кӑларӑм черетлӗ хут экран ҫине тухрӗ. Хальхинче унта Шупашкарта пурӑнакан Макар Семенов ҫынсене тӗлӗнтерчӗ.
Макар 3 ҫулта кӑна-ха. Анчах вӑл пулӑсем пирки тепӗр ҫынран та ытларах пӗлет. Арҫын ача каланӑ тӑрӑх, вӑл пулӑ тытма юратать. Ашшӗ вара ҫапларах ӑнлантарать: ача ӗметленме кӑна юратать, ку таранччен вӑл пула тытман, шуйсене ҫес пуҫтарнӑ.
Макар тӑватӑ чӗлхе пӗлет: акӑлчанла, испанла, малазийла тата финла. Шупашкар ачи куракансене пулӑсем пирки мӗн пӗлнине каласа кӑтартнӑ. Максим Галкин телеертӳҫӗ ӑна тинӗс чӗрчунӗсене сӑнланӑ видео кӑтартнӑ, Макар вара вӗсен ячӗсене каласа пынӑ.
«Туту ру» ҫулҫӳревсен сервисӗ «Манӑн планета» телеканалпа пӗрле «Раҫҫейри чи интереслӗ ятлӑ ял» конкурс ирттерни пирки хыпарланӑччӗ. Аса илтерер: сасӑлава кӗнӗ списока Шупашкар районӗнчи Ишек (вырӑсла «Ишаки») ялӗ те лекнӗ.
Ку эрнере финала тухассишӗн 10 ял тупӑшнӑ. Конкурсӑн улттӑмӗш финалисчӗ Калуга облаҫӗнчи Мошонки ялӗ пулса тӑнӑ. Уншӑн 5370 ҫын сасӑланӑ. Иккӗмӗш вырӑнта – Воронеж облаҫӗнчи Хренище ялӗ. Ишек ялӗ 3352 сасӑ пухса виҫҫӗмӗш вырӑна тухнӑ.
Конкурс малалла пырать. Финалччен тата тепӗр тӑватӑ сасӑлав иртмелле.
Паллӑ телеертӳҫӗрен Владимир Познертан журналистсем акӑ мӗн ыйтнӑ: вӑл наци чӗлхисене ачасен кӑмӑлне, суйлавне кура вӗрентни пирки мӗн шутлать? Владимир Познер ку ӑна килӗшменнине палӑртнӑ, кунашкал ыйту тухса тӑни те ӑна питӗ тӗлӗнтерет. Унӑн шухӑшӗпе, чӗлхе ҫынна кӑтартать. «Вырӑс чӗлхине вӗренмеллех-и?» тесе ыйтнӑ пулсан вӑл хӑть ҫакна ӑнланӗччӗ. Наци чӗлхи пирки вара…
«Манӑн шухӑшпа, республикӑра кун пек ыйту пулмалла мар, ҫакна ӑнланманни, наци чӗлхин аталанӑвне хӗстерни ырри патне илсе ҫитермест, тӗрлӗ наци ҫыннисен туслӑхне ҫирӗплетмест», - тенӗ Владимир Познер.
Телеертӳҫӗ тӗслӗх вырӑнне Канадӑна, Бельгие, Швейцарие, Финляндие илсе кӑтартнӑ. Познер каланӑ тӑрӑх, ҫак ҫӗршывсенче халӑхран унӑн тӑван чӗлхине туртса илмелле маррине ӑнланакан ҫынсем пурӑнаҫҫӗ.
Новосибирскри коллекторсем Чӑваш Енре пурӑнакан хӗрарӑм патне шӑнкӑравласа халтан янӑ. 34 ҫулти хӗрарӑм кун пирки полицие пӗлтернӗ.
Унӑн ӗҫтешӗ кредит илнӗ пулнӑ-мӗн. Анчах вӑл вӑхӑтра тӳлесе пыман, парӑма кӗнӗ. Коллекторсем вара ун патне те, ӗҫтешӗ патне те шӑнкӑравалама тытӑннӑ.
Палӑртмалла: Новосибирскри «Сибирь консалтинг групп» компани унччен те явап тытнӑ-мӗн. Хальхинче суд компание 55 пин тенкӗ штраф тӳлеттерме йышӑннӑ.
Арбитраж сучӗн приговорӗ саккунлӑ вӑя кӗнӗ.
+1.3 °C