Юпа уйӑхӗн 8-мӗшӗнче каҫхине Канашра пурӑнакан 77 ҫулти арҫын вӑрмантан хӑй тӗллӗн тухаймассине ӑнланса полицие шӑнкаравланӑ. Вӑл темиҫе сехет ҫухалса ҫӳренӗ.
Арҫын Йӗпреҫ районӗнчи чукун ҫулӗ ҫывӑхӗнчи вӑрмана кӑмпа татма килнӗ. Анчах хайхискер каялла тухмалли ҫула шыраса тупайман, аташса кайнӑ.
Полицейскисем вырӑна ҫитнӗ, арҫынпа телефонпа ҫыхӑнсах тӑнӑ, ҫул туптӑр тесе машина ҫинчи сигнала янӑ. 21 сехет тӗлне полици подполковникӗ Зофер Камалетдинов ватӑ арҫынна вӑрмантан тухма пулӑшнӑ. Вӑйран кайнӑ пулин те сарике тухтӑрсен пулӑшӑвӗ кирлӗ пулман.
Паян Раҫҫей тава тивӗҫлӗ артисчӗ Борис Моисеев вилнӗ. Кун пирки унӑн арт-директорӗ Сергей Горох пӗлтернӗ.
Борис Моисеев 68 ҫулта пулнӑ. Ӑна хӑҫан пытарассине, унпа хӑш кун сыв пуллашассине хальлӗхе пӗлтермен. Палӑртмалла: 2010 ҫулта унӑн инсульт пулнӑ. 2015 ҫулта вара — микроинсульт. Унтанпа артист сцена ҫине тухман.
Юрӑҫ 1954 ҫулта Беларуҫре ҫуралнӑ. Иртнӗ ӗмӗрӗн 70-мӗш ҫулӗсенче вӑл Алла Пугачевӑн труппине лекнӗ. 80-мӗш ҫулсен пуҫламӑшӗнче вара хӑй тӗллӗн юрлама пуҫланӑ. Сцена ҫинче вӑл 30 ҫул ирттернӗ, хореограф, режиссер, юрӑҫ пулнӑ.
Раҫҫей Правительстви ӗҫшӗн тӳлекен чи пӗчӗк виҫене ҫитес ҫул пысӑклатасшӑн. Вӑл 16 пин те 242 тенкӗпе танлашмалла. Кун пирки РИА Новости пӗлтерет. Агентство хыпарланӑ тӑрӑх, улшӑнусем ҫитес ҫул тата 2024 ҫулта пулмалла.
Саккун проектне РФ Патшалӑх Думин пӑхса тухмалла. Аса илтерер: халӗ ӗҫшӗн тӳлемелли чи пӗчӗк виҫе 15 пин те 279 тенкӗпе танлашать.
Ҫитес ҫул нарӑс уйӑхӗн 1-мӗшӗнче Раҫҫейре Амӑшӗн капиталне индексацилӗҫ. Ҫапла вӑл 12,4 процент хӑпарӗ.
Ҫав тапхӑртан пӗрремӗш ачашӑн паракан тӳлев 589,5 пин тенкӗ пулӗ, икӗмӗшӗшӗн – 779 пин тенкӗ. Хальхи вӑхӑтра ку тӳлевсем 524,5 пинпе тата 693,1 пин тенкӗпе танлашаҫҫӗ.
Ашшӗ-амӑшӗ пӗрремӗш ачишӗн амӑшӗн капиталне илнӗ пулсан иккӗмӗшӗ ҫуралсан ҫемьене 189,5 пин тенкӗ парӗҫ.
Юпа уйӑхӗн 1-мӗшӗнченпе Раҫҫейре водитель правине смартфонран кӑтартма ирӗк парӗҫ. Электронлӑ документ «Госуслуги. Авто» сарӑмра пулӗ. Ку сервиса юпа уйӑхӗн 1-мӗшӗнчен хута яма палӑртнӑ. Анчах хальлӗхе – тест режимӗнче кӑна.
Тӳре-шара саккуна улшӑнусем кӗртме хатӗрленет – электронлӑ документпа саккунпа килӗшӳллӗн усӑ куртарасшӑн. Ҫӳлерех асӑннӑ сарӑмӑн тӗнче тетелӗ ҫук вырӑнта та ӗҫлемелле.
Алла Пугачева паян хӑйне те иноагентсен йышне кӗртме сӗннӗ. Ку сӗнӗве вӑл хӑйӗн Instagram*-ӗнче вырнаҫтарнӑ.
«Мана хамӑн юратнӑ ҫӗршыври ют ҫӗршыв агенчӗсен ретне илме ыйтатӑп, мӗншӗн тесен эпӗ хамӑн упӑшкапа, тӳрӗ кӑмӑллӑ, йӗркеллӗ те уҫӑ кӑмӑллӑ ҫынпа, Раҫҫейӗн чӑн-чӑн тата никама сутӑнман патриочӗпе пӗр шухӑшлах, Тӑван ҫӗршыва вӑл тулӑх та мирлӗ пурнӑҫ, ирӗклӗх сунать, вӑл пирӗн ачасем тӑван ҫӗршыва тӗнчерен уйрӑлтаракан, граждансен пурнӑҫне йывӑрлатакан иллюзиллӗ тӗллевсемшӗн ҫапӑҫса пуҫ хунине хирӗҫлет» («Атӑл. Тӑлмач» куҫарӑвне якатнӑ), — пӗлтернӗ вӑл хӑйӗн ҫырӑвӗнче.
Авӑнӑн 16-мӗшӗнче Юстици министерстви (йӑлана кӗнӗ тӑрӑх ҫӗнӗ иноагентсен йышне вӑл эрнекунсерен пӗлтерет) Максим Галкина иноагентсен йышне хушни пирки хыпарланӑччӗ.
* (Раҫҫей Федерацинче экстрамистла организацисен йышне кӗртнӗ Meta компанин шутне кӗрет, пирӗн ҫӗршывра ӗҫлеме чарнӑ)
РФ Президенчӗ Владимир Путин Раҫҫейри нумай ачаллӑ ҫемьесене «Ашшӗ-амӑшӗн мухтавӗ» орденпа тата орден медалӗпе чысласси пирки хушу алӑ пуснӑ. Ҫак списокра Чӑваш Енри ҫемьесем те пур.
Пирӗн республикӑри виҫӗ ҫемьене орден медалӗпе чысланӑ. Вӗсем – Алексейпа Татьяна Зайцевсем, Дмитрипе Марина Леонтьевсем, Геннадипе Вера Яковлевсем.
Сӑмах май, унччен Владимир Путин орден медальне тивӗҫнӗшӗн – 200 пин, ордена илнӗшӗн 500 пин тенкӗ пама сӗннӗ.
СТС телеканалпа ҫӗнӗ сериал, камит, пуҫланнӑ. «Классная Катя» ятлӑскерте Шупашкарти хӗр ӳкерӗннӗ.
Литература вӗрентекенне Соньӑна 24 ҫулти Светлана Коновалова вылянӑ. Вӑл Шупашкарти 37-мӗш шкулта ӑс пухнӑ, театр кружокне ҫӳренӗ. 2021 ҫулта ГИТИС пӗтернӗ. Ку таранччен Светлана вун-вун сериалпа фильмра рольсене вылянӑ.
Сериал сюжечӗ ҫапларах: Мускав ҫывӑхӗнчи хула мэрӗ хӑйӗн пуҫтах хӗрне шкула географи учителӗнче ӗҫлеме ярать.
Мускаври Тӗп клиника пульници пӗлтернӗ тӑрӑх паян каҫхине Михаил Горбачев вилсе кайнӑ. ТАСС пульница пӗлтернӗ хыпара вырнаҫтарнӑ: «Паян каҫхине йывӑр та нумай вӑхӑт хушши чирленӗ хыҫҫӑн Михаил Сергеевич Горбачев вилсе кайнӑ».
СССР пӗрремӗш президенчӗ 91 ҫулта пулнӑ. Вӑл 1931 ҫулхи пуш уйӑхӗн 2-мӗшӗнче Ставрополь крайне кӗрекен Привольное ялта ҫуралнӑ. Ашшӗ вырӑс, амӑшӗ украинка пулнӑ. Унӑн кукашшӗпе аслашшӗ иккӗшӗ те 1930-мӗш ҫулсенче репрессине ҫакланнӑ. Кукашшӗне Лев Троцкий шухӑшӗсене майлӑ пулнӑшӑн тытса хупнӑ, аслашшӗне — 1934 ҫулта тыр-пул акас плана пурнӑҫламаннишӗн. Кукашшӗне 1938 ҫулта ирӗке кӑларнӑ, аслашшӗне — 1936 ҫулта. Вӑрҫӑ вӑхӑтӗнче Провольное ял 1942 ҫулта нимӗҫсен аллине лекнӗ, ҫапла май 10 ҫулти Михаил пилӗк уйӑх хушши оккупацинче пурӑннӑ.
Михаил Сергеевич 13 ҫултах колхоза пулӑшма тытӑннӑ. 15 ҫула ҫитсен комбайнер пулӑшуҫи пулса ӗҫленӗ. Шкул пӗтернӗ хыҫҫӑн правительство наградине тивӗҫнине пула Мускаври патшалӑх университетне вӗренме кӗнӗ. Коммунистсен партине ҫамрӑкранах кӗме тӗмсӗлнӗ. 19 ҫулта кандидат пулса тӑнӑ. Тепӗр виҫӗ ҫултан ӑна КПСС членне илнӗ. 1955 ҫулта университетӑн юридици факультетӗнчен чаплӑ паллӑсемпе вӗренсе тухнӑ.
Раҫҫейре «Амӑшӗ Героиня» ята ҫирӗплетнӗ. Кам тивӗҫейӗ-ха ӑна? 10 ача е ытларах ҫуратнӑ, воспитани панӑ амӑшӗсем. Ҫак ятсӑр пуҫне 1 миллион тенкӗ парса хавхалантарӗҫ.
Анчах условисем пур. 10-мӗш ача ҫуралсанах «Амӑшӗ Героиня» пулаймӑн. Ҫав ачан 1 ҫул тултармалла. Кунсӑр пуҫне аслисен пурин те чӗрӗ пулмалла. Анчах ҫӗршыва хӳтеленӗ чухне хыпарсӑр ҫухалнӑ е вилнӗ, теракт е инкеклӗ лару-тӑрура пурнӑҫран уйрӑлнӑ, контузие пула чӗри тапма пӑрахнӑ ачасене шута илеҫҫӗ.
+15.9 °C