Кӑрлач уйӑхӗн 2-мӗшӗнче Шупашкар районӗнче пӗр машина ҫаврӑнса ӳкнӗ.
«Хендай-Cанта Фе» автомобиль «М-7» федераци ҫулӗпе Хусан еннелле васканӑ. Ишлей ҫул ҫаврӑмне ҫитсен вӑл ҫул айккине тухса кайса кювета чӑмнӑ, машина ҫаврӑнса ӳкнӗ.
Руль умӗнче 54 ҫулти водитель пулнӑ. Ӑна тӗрӗсленӗ те, вӑл эрех сыпнине тупса палӑртман. Салонта водителӗн икӗ хӗрӗ: 6 тата 13 ҫулсенчи ачасем — пулнӑ. Вӗсем аманнӑ. Хӗрачасене пульницӑна ӑсатнӑ.
Паян 10 сехетре Вӑрнар райойӗнчи Ершепуҫ ялӗнче микровтобус ҫунма тытӑннӑ. Вӑл Шупашкартан Йӗпреҫе каяканскер пулнӑ.
Водитель ҫухалса кайман - ҫулӑма сӳнтерме пуҫланӑ. Салонра пассажирсем пулнӑ. Вӗсем те юр сапса ҫулӑма сӳнтерме пулӑшнӑ.
Телее, никам та шар курман.
Паян 12 сехетре Канаш районӗнче пулнӑ аварире ҫын пурнӑҫӗ татӑлнӑ. Водитель 34 ҫулта пулнӑ.
А-151 автоҫулӑн 29-мӗш ҫухрӑмӗнче ҫӑмӑл машина водителӗ руле итлеттереймен те транспорт хирӗҫ килекен ҫул ҫине тухса кайнӑ. Унта вӑл КамАЗпа ҫапӑннӑ.
Ҫӑмӑл машина водителӗ авари вырӑнӗнче вилнӗ.
Паян ирхи 9 сехетре Куславкка районӗнче М-7 ҫул ҫинче авари пулнӑ. Малтанлӑха пӗлтернӗ тӑрӑх, Удмурт Республикинчи 45 ҫулти арҫын «Тойота камри» машина рулӗ умӗнче ларнӑ арҫын транспорта итлеттереймен, хирӗҫ ҫул ҫине тухса кайса фурӑпа ҫапӑннӑ.
Ҫӑмӑл машинӑри пассажир, 38 ҫулти хӗрарӑм, вилнӗ. Унӑн паян ҫуралнӑ кунӗ пулнӑ. 4 ҫулти ачана вара, суранланнӑскере, пульницӑна илсе ҫитернӗ.
Халӗ йӗрке хуралҫисем ӗҫ-пуҫа уҫӑмлатаҫҫӗ.
Шупашкарти сывлӑх сиплев учрежденийӗсенчен пӗрне кӗнӗ ҫӗрте тухтӑр кӳлепине вырнаҫтарса хунӑ. Хулари Чечек урамӗнче вырнаҫнӑ медицина центрӗ ҫапла майпа хӑйсен организацийӗ умне илем кӳрес тенӗ.
Кӗҫех тухтӑр кӳлепине куҫ хывакан та тупӑннӑ. Кӑҫалхи раштав уйӑхӗнче ҫавна пӗҫертсе кайнӑ.
6 пин тенкӗ тӑракан кӳлепене вӑрланӑ ҫын тӗлӗшпе хулари йӗрке хуралҫисем РФ Пуҫиле кодексӗн 158-мӗш стайин 1-мӗш пайӗпе пуҫиле ӗҫ пуҫарнӑ. Тухтӑр кӳлепине ӳсӗр арҫын килне йӑтса кайнӑ иккен.
Муркаш районӗнчи Ҫатракасси шкулӗнчи ачасене илсе ҫӳренӗ автобус ҫунса кайнӑ. Вӑл гаражра тӑнӑ.
Автобус раштав уйӑхӗн 27-мӗшӗнче ҫӗрле ҫуннӑ. Пушарнӑйсем ҫитсен ҫулӑма ҫур сехетренех сӳнтернӗ. Автобус ҫунса кайнӑ. Юрать-ха, гаражра тӑракан трактора ҫӑлса хӑварма май килнӗ.
Автобус 2015 ҫулта кӑларнӑскер пулнӑ. Малтанлӑха палӑртнӑ тӑрӑх, вӑл электрохатӗр юсавсӑр пулнипе ҫунма пуҫланӑ.
Сӗнтӗрвӑрри районӗнче пурӑнакан 35 ҫулти арҫын тӗлӗшпе пуҫиле ӗҫ пуҫарнӑ. Вӑл ҫынна асӑрханмасӑр вӗлернӗ тесе шутлаҫҫӗ.
Следстви версийӗ тӑрӑх, раштав уйӑхӗн 21-мӗшӗнче ҫӗрле вӑл 66 ҫулти пӗлӗшӗн хваттерӗнче пулнӑ. Хайхискерсем хирӗҫсе кайнӑ. Ҫамрӑкки ваттине хӗненӗ, лешӗ йывӑр сурансене пула вилнӗ.
35-ри арҫынна тытса чарнӑ. Следстви малалла пырать.
Ҫӗнӗ Шупашкарта пурӑнакан арҫын кӳршине кӳрентерсе пӗтернӗ. Хӑй ҫамрӑк та мар, 57 ҫулта. Ҫамрӑк чух ҫын хӗрӳ-ха, ҫулсем кайнӑҫемӗн этем тени лӑпланакан, ӑсланакан.
Ҫӗнӗ Шупашкарти арҫын тӗлӗшпе ҫыхӑннӑ пӑтӑрмах суда, унтан суд приставӗсем патне ҫитнӗ. Приставсем ӑна кӳршинчен каҫару ыйтма хушнӑ.
Арҫын каҫару ыйтса ҫырнӑ хута Пӗлтерӳ хӑми ҫине вырнаҫтарнӑ. Унсӑр пуҫне вӑл ҫынна кӑмӑл-сипет тӗлӗшӗнчен сиен кӳнӗшӗн 15 пин тенкӗ тӳленӗ.
Шупашкар районӗнчи Янӑш шкулӗн директорне ӗҫ вырӑнӗпе усӑ курнӑшӑн штрафланӑ. Ӑна РФ Пуҫиле кодексӗн 292-мӗш статйин 1-мӗш пайӗпе явап тыттарнӑ.
2021 ҫулхи нарӑс уйӑхӗнче ӗҫ укҫин фончӗн хавхалантару пайне валеҫекен комисси ӗҫ кӑтартӑвӗпе тухӑҫлӑхӗшӗн виҫӗ воспитателе пӗчӗк балл лартса пама йышӑннӑ. Воспитательсенчен пӗри шкул директорӗн тӑван хӗрӗ пулнӑ.
Шкул директорӗ хаклава палӑртакан приказа хӑй тӗллӗн улшӑну кӗртсе балсене ӳстерсе панӑ.
Ҫапла вара 2021 ҫулхи нарӑс уйӑхӗнчен пуҫласа раштавччен виҫӗ воспитателе хавхалантару укҫине 392 пин тенкӗ ытла йӗркене пӑсса куҫарса панӑ.
Суд шкул директорне 25 пин тенкӗ штраф хурса панӑ. Приговор хальлӗхе вӑя кӗреймен-ха.
Сӗнтӗрвӑрри районӗнче кӑҫалхи чӳк уйӑхӗнче ҫын виллине тупнӑ. Пакунлисем палӑртнӑ тӑрӑх, арҫынна вӗлернӗ.
Тӗпчевҫӗсем усал ӗҫ тунӑ ҫынсене шырама тытӑннӑ. Вӑрах вӑхӑт шыраса тӑман — пуҫтахсене тытса чарнӑ. Вӗсенчен пӗри Сӗнтӗрвӑрри хулинче пурӑнакан 19 ҫулти ҫамрӑк пулнӑ, тепри — унӑн 18 ҫулти пӗлӗшӗ.
Тӗпчевҫӗсем палӑртнӑ тӑрӑх, чӳк уйӑхӗн 17-мӗшӗнче ирхи 2 сехет тӗлӗнче ӳсӗр ҫамрӑксем хӑйсен пӗлӗшӗпе тӗлпулнӑ, унпа хирӗҫме тытӑннӑ. Ҫамрӑксем арҫынна тапса-ҫапса пӗтернӗ, вӗсенчен пӗри тата шар курни ҫумне арҫын шухӑшӗпе ҫулӑхнӑ.
+22.3 °C