Чӑваш Енӗн пӗрремӗш Элтеперӗ пулнӑ Николаев Фёдорова республика Элтеперӗ Олег Николаев сенатор должноҫне шантарнӑ.
Шӑматкун, утӑ уйӑхӗн 12-мӗшӗнче, вӗсем тӗлпулнӑ. Николай Фёдоров сенатор пулнӑ май туса ирттернӗ ӗҫсем пирки каласа кӑтартнӑ. Унсӑр пуҫне регионӑн 2030 ҫулчченхи аталанӑвӗн комплекслӑ программине сӳтсе явнӑ.
Олег Николаев республика ертӳҫине суйлансан Николай Фёдоровах Чӑваш Енен ӗҫ тӑвакан влаҫӗн сенаторен должноҫӗнче хӑварма шантарнӑ.
Маларах ку должноҫе республикӑн культура министрне Светлана Каликовӑна шанса парӗҫ текен сӑмах тухнӑ.
ЧР Элтеперӗҫн пресс-секретарӗ Борис Краснов кӑҫал нарӑсӑн 10-мӗшӗнче ӗҫрен кайнӑ хыҫҫӑн ку вырӑн пушӑ пулнӑ. Акӑ халӗ тинех, ҫур ҫултан, Элтепер валли пресс-секретарь тупӑннӑ.
Ку пукана Григорий Буйлов йышӑннӑ. Вӑл Удмурт Республикинче Ижевск хулинче ҫуралнӑ. 1998 ҫултанпа медиара ӗҫленӗ, PR тата информаци сферинче тӗрлӗ должноҫ йышӑннӑ. Унӑн биографийӗ Севастополь кӗпӗрнаттӑрӗ пулнӑ Дмитрий Овсянниковпа тачӑ ҫыхӑннӑ.
ЧР Элтеперӗ Олег Николаев саппасри подполковникӑн, ятарлӑ ҫар операцийӗн ветеранӗн Руслан Валиуллинӑн наставникӗ пулӗ. Ку – «Время СВОих» регионти проектпа килӗшӳллӗн.
Ҫавӑн пекех Элтепер ӑна хӑйӗн пулӑшуҫи пулма сӗннӗ. Валиуллин ятарлӑ ҫар операцийӗпе ҫыхӑннӑ общество организацийӗсемпе тата ҫар ӗҫӗн ветеранӗсемпе ҫыхӑну тытӗ.
Палӑртмалла: Руслан Валиуллин 1986 ҫулта Патӑрьел районӗнчи Тутар Тимеш ялӗнче ҫуралнӑ. 2020 ҫулхи чӳкре ӑна сывлӑхне кура саппаса янӑ. 2022 ҫулта вӑл тулли мар мобилизаципе ятарлӑ ҫар операцине кайнӑ. 2023 ҫулта йывӑр аманнӑ, вӑл службӑна юрӑхсӑр тесе йышӑннӑ.
Чӑваш Ене ыран, ута уйӑхӗн 3-мӗшӗнче, Раҫҫей Президенчӗн Федерацин Атӑлҫи округӗнчи элчи килӗ.
Вӑл «Навигационная безопасность – 2025» (чӑв. Навигаци хӑрушсӑрлӑхӗ - 2025) наци форумне уҫма хутшӑнӗ. Унта навигаци тытӑмӗпе инфраструктура хӳтӗлевӗн нацин хӑрушсӑрлӑхне тата ҫӗршывӑн технологи суверенитетне сӳтсе явӗҫ.
Игорь Комаров республикӑри социаллӑ пӗлтерӗшлӗ объектсене те ҫитсе курӗ, унта канашлусемпе тӗлпулусем ирттерӗ. Унсӑр пуҫне вӑл ача-пӑчапа ҫамрӑксен театр коллективӗсен «Театр Атӑлҫийӗ» фестивалӗн ҫӗнтерӳҫисемпе курса калаҫӗ.
Ҫӗнӗ Шупашкар хулин пуҫлӑхӗ Максим Семёнов хӑйне отставкӑна янипе килӗшесшӗн мар. Вӑл вырӑнти Депутатсен пухӑвӗн йышӑнӑвне хирӗҫлесе суда тавӑҫпа тухнӑ.
«Правда ПФО» тӗнче тетелӗнчи хаҫат хыпарланӑ тӑрӑх, суд ун пек ӗҫсене хӑвӑрт, заявлени пырса ҫитнӗ хыҫҫӑн 10 кунта, пӑхса тухать. Юристсем шухӑшланӑ тӑрӑх, ответчика хӳтӗленме ҫӑмӑл пулас ҫук, мӗншӗн тесен муниципалитет органӗ ун пек йышӑнӑва хӑйӗн полномочийӗпе килӗшӳллӗн туман имӗш.
Николай Федоров сенатор Чӑваш Ен прокурорне Эдуард Гиматова тӗрӗслев ирттерме ыйтнӑ: хӑш-пӗр муниципалитетри депутатсене Элтепер суйлавӗн кандидатне Олег Николаева пулӑшу парас тесе ирӗксӗрлесе, хӑратса алӑ пустараҫҫӗ имӗш.
Сенатор пӗлтернӗ тӑрӑх, унран хӑш-пӗр муниципалитетри депутатсем пулӑшу ыйтнӑ.
«Депутатсене хупӑ канашлусене чӗнсе илсе кандидатшӑн, республикӑн хальхи Элтеперӗшӗн О.А. Николаевшӑн, алӑ пусмасан ӗҫрен кӑларассипе е ытти япӑх пулӑмсемпе хӑратаҫҫӗ», - ҫапла ҫырса кӑтартнӑ «Правда ПФО» интернет-хаҫат.
Интернет-хаҫат пӗлтернӗ тӑрӑх, Красноармейски, Куславкка, Сӗнтӗрвӑрри, Ҫӗрпӳ округӗсенчи депутатсене хӗсӗрленӗ. Вӗсене паспортпа пӗрле алӑ пусма чӗнсе илнӗ имӗш.
Чӑваш ЕН Элтеперӗн суйлавӗ ҫывхарса килет. Унта хутшӑнма хальлӗхе Олег Николаев ҫеҫ заявлени панине Чӑваш халӑх сайчӗ пӗлтернӗччӗ-ха.
Суйлава паянхи кун тӗлне илсен тата тепӗр тӑватӑ кандидат хутшӑнасси паллӑ. Вӗсене пурне те политика партийӗсем сӗннӗ.
Чи паллӑрах кандидат — Чӑваш Енӗн Патшалӑх Канашӗн депутачӗ Константин Степанов, вӑл ЛДПРӑн регионти уйрӑмне ертсе пырать.
«Пенисонерсен партийӗ» хӑйӗн ҫӗнӗ ертӳҫине Владимир Ильина сӗннӗ. Вӑл — «Чувашлифт» предприятин учредителӗ тата гендиректорӗ.
Симӗссисен партийӗ регионти канашӑн пердседательне Владимир Савинова суйлава хутшӑнтарасшӑн. Вӑл ӑслӑлӑх экспертизисен бюровне ертсе пырать.
Унсӑр пуҫне суйлава «Ҫӗнӗ ҫынсем» партирен Максим Морозов хутшӑнма пултарӗ. Вӑл тӗрлӗ компани учредителӗ, ҫав шутра Ҫӗнӗ Шупашкарти аш-какай комбиначӗн, Сӗнтӗрвӑрринчи аш-какай комбиначӗн; «Агротранс», «Центр Авто», «Модуль» обществӑсен.
Суйлава хутшӑнас кӑмӑллисен документсене утӑ уйӑхӗн 25-мӗшӗнчи 18 сехетчен парса ӗлкермелле.
«Пенсионерсен партийӗ» Элтепер суйлавне хутшӑнакан кандидатурӑна тӑратнӑ. Вӑл – Владимир Ильин.
Вӑл партин регионти уйрӑмӗн ертӳҫи шутланать. Кандидатӑн кӗҫех документсене суйлав комиссине памалла.
Аса илтерер: ЛДПРтан Константин Степанов, «Симӗссисен партийӗнчен» Владимир Савинов хутшӑнать. Олег Николаев кандидатурине хӑй тӑратнӑ. Суйлав авӑн уйӑхӗн 12-14-мӗшӗсенче иртет.
Паянтан республикӑра суйлав комиссийӗ Элтепер суйлавне хутшӑнакан кандидатсенчен документсем йышӑнма тытӑннӑ.
Чи малтан унта халӗ Элтепер должноҫне йышӑнакан Олег Николаев документсене кайса панӑ. Вӑл суйлава хӑйӗн кандидатурине хӑй тӑратать. Паянтан ҫакна тумашкӑн ирӗк илме муниципалитет депутачӗсенчен тата суйлавҫӑсенчен алӑ пуснине пухма тытӑнать.
Суйлав комиссийӗ документсене утӑ уйӑхӗн 25-мӗшӗччен 18 сехетчен йышӑнать. Аса илтерер: суйлав авӑн уйӑхӗн 12-14-мӗшӗсенче иртет.
Чӑваш Ен Элтеперӗн Олег Николаевӑн пресс-службин управленийӗн пуҫлӑхне Юлия Стройковӑна пысӑкрах должность шанса панӑ. Вӑл Чӑваш Ен Элтеперӗн Администрацийӗн ертӳҫин ҫумӗ — пресс-служба тата протокол управленийӗн пуҫлӑхӗ пулса тӑнӑ.
Юлия Стройкова пресс-служба управленине виҫӗ ҫула яхӑн ертсе пынӑ, ҫав шутра Элтеперӗн пресс-секретарӗ пулса та тӑрӑшать.
Юлия Викторовна 1968 ҫулхи раштав уйӑхӗнче ҫуралнӑ. «Канале 5 плюс» каналта журналист тата ведущи пулнӑ, унтан «Чебоксары-ТВ» телеканалта ӗҫленӗ. Чӑваш Енӗн Наци телерадиокомпанине уҫнӑ хыҫҫӑн директорӑн заместителӗ пулса тӑнӑ, 2013-2014 ҫулсенче унта ертӳҫӗ тивӗҫне пурнӑҫланӑ. 2015 ҫулхи ҫӗртме уйӑхӗнче вӑл республикӑн информаци политикин министрӗн ҫумӗн пуканне йышӑннӑ. Ку должноҫре ҫичӗ ҫул ӗҫленӗ. 2022 ҫулхи ҫурла уйӑхӗнче ӑна Чӑваш Ен Элтеперӗн Олег Николаевӑн пресс-службин управленийӗн пуҫлӑхӗ пулма шаннӑ.
+13.3 °C