Чӑваш Енӗн Экономика аталанӑвӗн тата пурлӑх хутшӑнӑвӗсен министрӗн ҫумӗ пулса ӗҫлекен Ольга Рассановӑна ӗҫрен кӑларма йышӑннӑ. Ольга Евгеньевна министерствӑри ҫемҫе пукана пуш уйӑхӗн 27-мӗшӗнчен пушатӗ.
Ольга Рассанова министр ҫумӗ пулса ӗҫлеме 2024 ҫулхи утӑ уйӑхӗнче пуҫӑннӑ. Вӑл ун чухне 51 ҫулта пулнӑ.
Министр ҫумӗ пулма тивӗҫ пулнӑ хӗрарӑм Киров облаҫӗнче ҫуралнӑ, Мускаври потребкоопераци университечӗн Шупашкарти коопераци институтӗнчен вӗренсе тухнӑ. Вӑл — экономика наукисен кандидачӗ, доцент.
Министр ҫумне лариччен Ольга Рассанова Экономика аталанӑвӗн тата пурлӑх хутшӑнӑвӗсен министерствинче экономика тишкерӗвӗн, стратеги енчен планлас тата прогноз тӑвакан пай пуҫлӑхӗнче тӑрӑшнӑ.
Чӑваш Республикин вӗренӳ министрӗ Дмитрий Захаров пӗлтернӗ тӑрӑх, 2026 ҫулхи пуш уйӑхӗн 28-мӗшӗнчен, шӑматкунтан, республикӑра ачасене пӗрремӗш класа ҫыртарма пуҫлӗҫ. Ҫак йышӑнӑва ашшӗ-амӑшӗшӗн меллӗ пултӑр тесе тунӑ: йышӑну кампанийӗ канмалли кун пуҫланни ҫемьесене ӗҫрен ирӗк ыйтмасӑр, документа лӑпкӑн тата васкамасӑр хатӗрлсе пама май парӗ.
Ача шкул ҫумне ҫирӗплетнӗ территорире регистрациленнӗ пулсан е унӑн ҫӑмӑллӑхсем пур пулсан, заявленине пуш уйӑхӗн 28-мӗшӗнчен пуҫласа ҫӗртме уйӑхӗн 30-мӗшӗччен пама май пур. Утӑ уйӑхӗн 6-мӗшӗнчен вара, пушӑ вырӑнсем юлнӑ пулсан, ачасене урӑх шкула та ҫыртарма май пулӗ. Заявленине Патшалӑх пулӑшӑвӗсен порталӗ урлӑ, шкула хӑйне кайса е МФЦ урлӑ пама юрать.
Чӑваш Республикинчи ӑста йӑваланӑ ҫӑматӑна Раҫҫей дипломачӗ Мария Захарова питӗ килӗштернӗ. Килӗштернӗ кӑна мар, туяннӑ та.
Мускавра халӑх промыслисен «Ладья» куравӗ иртнӗ. Унта Раҫҫей дипломачӗ, Ют ҫӗршыв ӗҫӗсен министерствин официаллӑ представителӗ Мария Захарова та ҫитсе курнӑ. Вӑл чӑваш ӑстисенчен ҫӑматӑ туяннӑ. Мария Владимировнӑна уйрӑмах тӗрленӗ уйӑппа илемлетнӗ ҫӑматӑ килӗшнӗ.
«Мана хальхинче чӑваш ҫӑмачӗ питӗ тӗлӗнтерчӗ», — ҫапла пӗлтернӗ Мария Захарова «Известия» хаҫат корреспондентне.
Хӑй каланӑ тӑрӑх, вӑл ӑна ҫитес хӗл валли туяннӑ. Ҫапах та ҫак кунсенче те сивӗ – тен, халӗ те тӑхӑннӑ ӑна.
Муркаш округӗн пуҫлӑхӗ Алексей Матросов хӑйӗн ирӗкӗпе ӗҫ вырӑнне пушатнӑ. Кун пирки «Правда ПФО» кӑларӑм пӗлтерет. Пуш уйӑхӗн 3-мӗшӗнче пухӑннӑ Муркаш округӗн депутачӗсем пуҫлӑхӑн заявленине тивӗҫтернӗ, ӗҫ вырӑнне пушатнипе килӗшнӗ.
Халӗ Алексей Матросов вырӑнӗнче вӑхӑтлӑха унӑн пӗрремӗш ҫумӗ ӗҫлӗ. Вӑл — тирпей-илем кӗртес тата территорисене аталантарас енӗпе ӗҫлекен управленийӗн пуҫлӑхӗ Андрей Мясников.
Алексей Матросов Муркаш тӑрӑхне 2022 ҫултан ертсе пыма тытӑннӑ. 2025 ҫулта ӑна тӑлӑх ачасем валли начар хваттерсем туянса панӑшӑн судпа айӑпланӑччӗ. Суд ӗҫе пӑхса тухнӑ хыҫҫӑн Муркаш округӗн пуҫлӑхне пуҫиле яваплӑхран хӑтарнӑ. Халӗ вӑл хӑй ирӗкӗпе ӗҫ вырӑнне пушатнӑ.
Чӑваш Республикин вице-премьерӗ пулнӑ Дмитрий Краснов ӑҫта ӗҫлени паллӑ. Тӳрех аса илтерер: вӑл 2025 ҫулхи ҫурла уйӑхӗн 20-мӗшӗнче вице-премьер должноҫӗнчен хӑйӗн ирӗкӗпе кайнӑччӗ. Унта вӑл 3 уйӑх ӗҫленӗ. Вице-премьер пулнӑ чухне вӑл промышленноҫ, экономика тата туризм ыйтӑвӗсемпе тӑрӑшнӑ. Унччен вара, 2020 ҫулхи утӑ уйӑхӗнчен пуҫласа 2025 ҫулхи ҫу уйӑхӗччен, ЧР экономика аталанӑвӗн министрӗ пулнӑ.
Хальхи вӑхӑтра Дмитрий Краснов Донецк Халӑх Республикин экономика аталанӑвӗн министрӗн тивӗҫӗсене пурнӑҫлать. Ку хушӑва регион пуҫлӑхӗ Денис Пушилин паян, пуш уйӑхӗн 2-мӗшӗнче, алӑ пуснӑ.
Чӑваш Ен Элтеперӗн Олег Николаевӑн малашне ҫӗнӗ пулӑшуҫӑ пулӗ. Кун пирки Олег Алексеевич халӑх тетелӗсенчи хӑйӗн страницисенче пӗлтернӗ.
Ку тивӗҫе Элтепер Наталия Воскресенскаяна шаннӑ. Наталия Валерьевна республикӑра «Кадрсем» наци проектне мӗнле пурнӑҫланине тӗрӗслесе тӑраканни пулӗ.
Палӑртса хӑварар: Наталия Воскресенская 2002 ҫулта И.Н. Ульянов ячӗллӗ Чӑваш патшалӑх университечӗн экономика факультетӗнчен вӗренсе тухнӑ. Хальччен вӑл ЧПУра хушма пӗлӳ паракан центр пуҫлӑхӗнче ӗҫленӗ. Вӑл – экономика ӑслӑлӑхсен кандидачӗ тата РФ Вӗренӳ министерствин Социоцентрӗн опытлӑ эксперчӗ.
Чӑваш Ен Элтеперӗ Олег Николаев ялсене аталантарасси пирки хӑйӗн шухӑшне пӗлтернӗ. Вӑл палӑртнӑ тӑрӑх, ял ҫыннисен хулари пек пурӑнмалли майсем пулмалла. «Ку вӑл пирӗн инвестици меслечӗ: ҫын хӑйне меллӗ тата шанчӑклӑ туймалли, мегаполисри мӗнпур сервиссемпе усӑ курмалли, ҫав хушӑрах ялти пурнӑҫӑн мӗнпур лайӑх енӗсене сыхласа хӑвармалли тавралӑха йӗркелесси. Ҫак ӗҫе технологи тата республикӑри кашни ҫыншӑн уйрӑм майсем туса парассине тӗпе хурса малалла тӑсӑпӑр», — тенӗ вӑл.
Ҫак тӗллевпе килӗшӳллӗн «Ял территорийӗсене комплекслӑ аталантарасси» программа пурнӑҫланать. Унпа килӗшӳллӗн ялсенче культура ҫурчӗсемпе шкулсене юсанӑ. Ҫӗнӗ оборудовани илсе панӑ. Ҫавӑн пекех спортпа туслӑ пулмашкӑн футбол тата хоккей вылямалли вырӑнсем йӗркеленӗ.
Чӑваш Енри ял хуҫалӑх министрӗ Андрей Макушев пӗлтернӗ тӑрӑх, ҫак программа валли 2025 ҫулта 2,6 миллиард тенкӗ уйӑрнӑ пулнӑ. 2026 ҫул валли вара калӑпӑш 3,1 миллиард тенке ҫитнӗ.
Программа ял ҫыннисене пурӑнмалли ҫурт-йӗр туянма та пулӑшать. Пӗлтӗр 12 ҫемье ҫурт лартма укҫа илнӗ. Тата 31 ҫын ҫӑмӑл ял ипотекипе усӑ курнӑ.
Ял ҫыннисем хӑйсем те айккинче тӑмаҫҫӗ, ялсене илемлетме хутшӑнаҫҫӗ.
Чӑваш Республикин Министрсен Кабинечӗ агропромышленноҫ комплексне пулӑшмалли ҫӗнӗ йӗркене ҫирӗплетнӗ. Унччен кашни 6 енпе уйрӑм йӗрке пулнӑ, халӗ вӗсене пӗрлештерсе пӗр пӗтӗмӗшле йӗрке туса хунӑ. Ку федераци саккунӗсемпе килӗшсе тӑрать.
Тӗп улшӑнусем ҫакӑн пек:
• Вӑрлӑх енӗпе: субсидипе халӗ Раҫҫейре ӗрчетнӗ сортсемшӗн кӑна пулӑшаҫҫӗ.
• Ӑратлӑ выльӑх-чӗрлӗх енӗпе: селекцилеме укҫапа пулӑшӗҫ. 2027 ҫулхи кӑрлач уйӑхӗн 1-мӗшӗнчен пуҫласа выльӑхсене ятарлӑ патшалӑх системинче (ФГИС) регистрацилемелле.
• Сӗт туса илессипе: пулӑшу пӗчӗк тата вӑтам усламҫӑсене кӑна лекӗ. Вӗсен тупӑшӗ ҫулталӑкра 800 миллион тенкӗрен иртмелле мар.
Пӗлме: 2026 ҫулта АПК сферине пулӑшма пӗтӗмӗшле 776,6 млн тенкӗ уйӑрнӑ (федераци хыснинчен – 436,8 млн, республикӑран – 339,8 млн).
Роспотребнадзорӑн Чӑваш Енре управленийӗн пуҫлӑхӗ улшӑннӑ. Ку должноҫе вӑхӑтлӑха Татьяна Гермонова пурнӑҫлать.
Вӑл 2021 ҫулхи чӳк уйӑхӗнченпе ертӳҫӗ ҫумӗ пулнӑ. Халӗ вӑл Надежда Луговская кайнӑ хыҫҫӑн ертӳҫӗ тивӗҫӗсене вӑхӑтлӑха хӑйӗн ҫине илнӗ.
Надежда Луговская кӑҫал 65 ҫул тултарнӑ. «Чеб.ру» портал пӗлтернӗ тӑрӑх, вӑл патшалӑх службинчен каймасть, Мускав облаҫне ӗҫлеме куҫать. Вӑл Роспотребнадзорӑн Чӑваш Енри управленине 2011 ҫултанпа ертсе пынӑ.
ЧР Элтеперӗ Олег Николаев пӗр округ пуҫлӑхӗ тӗлӗшпе пуҫиле ӗҫ пуҫлани пирки пӗлтернӗ.
Элтепер каланӑ тӑрӑх, халӗ йӗрке хуралҫисем хӑйсен ӗҫне тӑваҫҫӗ-мӗн. «Палӑртни пӗлтерӗшлӗ: должноҫе тата мӗнле хисепе тивӗҫнине пӑхмасӑр саккун умӗнче пурте пӗр тан», — ҫапла ҫырнӑ Олег Николаев халӑх тетелӗнчи страницинче.
Вӑл кам пирки сӑмах пынине каламан. Анчах тӗрлӗ ҫӑлкуҫсем кунта Патӑрьел муниципалитет округӗн пуҫлӑхӗ Рудольф Селиванов пирки сӑмах пынине палӑртнӑ. Ун патӗнче паян ухтарусем иртнӗ-мӗн.
+28.3 °C