Канаш хулин пуҫлӑхӗ Виталий Михайлов отставкӑна кайни пирки пӗлтернӗччӗ. Вӑл темиҫе кун маларах хӑйӗн ҫумӗпе Валерий Черновпа паллаштарнӑ. Шӑпах вӑл халӗ хулапа пӗрлештернӗ Канаш округӗн пуҫлӑхӗ пулса тӑнӑ.
Сӑмах май, ку пукан ҫине икӗ ҫынран пӗри ларма пултарнӑ: Валерий Чернов е Наталия Суркова. Валерий Чернов вырӑнти хӑйтытӑмлӑх органӗсенче 23 ҫул ӗҫленӗ.
ЧР Элтеперӗ Олег Николаев каллех «тӳрӗ лини» ирттерме палӑртнӑ. Хальхинче вӑл чӳк уйӑхӗн 28-мӗшӗнче каҫхи 6 сехетре пулӗ.
Ӑна Элтеперӗн телеграм-каналӗнче, «Контактри» унӑн страницинче, «Чӑваш Республики» сообществӑра, Наци телекуравӗпе курма, Наци радиовӗпе тата «Тӑван радиопа» итлеме май пулӗ. Ыйтусене Патшалӑх пулӑшӑвӗсен порталӗ урлӑ яма, пост-анонс айӗнче комментари хӑварма юрать.
Сӑмах май, юлашки хутчен «тӳрӗ лини» ҫурла уйӑхӗн 29-мӗшӗнче иртнӗ.
Паян Ҫӗмӗрле округӗн администрацийӗн ҫӗнӗ пуҫлӑхне суйланӑ. Ӑна округри депутатсен пухӑвӗн ларӑвӗнче палӑртнӑ.
Округ пуҫлӑхне суйласси пирки ыйтӑва пӑхса тухнӑ чухне конкурс комиссийӗ икӗ кандидата малалла кӗрешме ирӗк панӑ. Вӗсем – Эдуард Васильев тата Ольга Краснова.
Сасӑлав иртнӗ хыҫҫӑн округ администрацийӗн пуҫлӑхне палӑртнӑ. Ку пукана Эдуард Васильев йышӑннӑ.
РФ Патшалӑх Думини финанс рынокӗн ыйтӑвӗсемпе ӗҫлекен комитет председателӗ Анатолий Аксаков Тӗп банк пуҫлӑхне Эльвира Наибуллинӑна ҫуралнӑ кун ячӗпе «Раҫҫейӗн тӗрленӗ карттине» парнеленӗ.
Кӗнекере – 328 страница, пӗлтӗр вӑл 1500 тенкӗ тӑнӑ.
Сӑмах май, Раҫҫейӗн тӗрленӗ карттине 2022 ҫулта хӑтлӑлатнӑ.
ЧР Элтеперӗ Олег Николаев Чӑваш наци телерадиокомпанине интервью панӑ, авӑн уйӑхӗнчи ӗҫсене пӗтӗмлетнӗ.
Олег Алексеевичран вӑл хӗл валли пахча ҫимӗҫ консервлани пирки ыйтнӑ. Вӑл ку ӗҫпе мӑшӑрӗпе пӗрле аппаланнине каланӑ.
Элтепер ялта тӑванӗсем патӗнче пахча ҫимӗҫ пуҫтарнине, хӑйсен килӗнче те йӑрансем пуррине каланӑ.
Сӑмах май, ҫулталӑк ҫурӑ каялла тӳрӗ линире Олег Алексеевич чи юратнӑ апачӗ хуппипе пӗҫернӗ ҫӗрулми пулнине каланӑ.
РФ Патшалӑх Думин Председателӗ Вячеслав Володин Патшалӑх депутатне Алла Салаевӑна Тав хучӗпе чысланӑ.
Палӑртмалла: Алла Салаева Патшалӑх Думин депутатӗнче 2021 ҫултанпа ӗҫлет. Ун умӗн вӑл ЧР Патшалӑх Канашӗн Председателӗн ҫумӗ пулнӑ.
Унсӑр пуҫне парламентӑн аялти палатинче Чӑваш Ен интересӗсене Алена Аршинова (ЕР), Анатолий Аксаков (СР) тата Ирина Филатова (КПРФ) хӳтӗлеҫҫӗ.
Мурманск облаҫӗн кӗпӗрнаттӑрӗ Андрей Чибис суйлавра ҫӗнтернӗ. ЦИК пӗлтернӗ тӑрӑх, суйлавҫӑсен 41 проценчӗ сасӑланӑ, 73,99 проценчӗ Андрей Чибисшӑн сасӑ панӑ. Сувлава «Пӗрлӗхле Раҫҫей» партирен хутшӑннӑ.
Андрей Владимирович - Чӑваш Енрен. Вӑл 1979 ҫулта Шупшкарта ҫуралнӑ. 2019 ҫултанпа Мурманск облаҫӗн кӗпӗрнаттӑрӗн должноҫне йышӑнать. Унччен вӑл РФ строительство тата ЖКХ министрӗн ҫумӗ пулнӑ.
Чӑваш Енӗн Правительствинче кадр улшӑнӑвӗ пулса иртӗ. Патшалӑхӑн юстици енӗпе ӗҫлекен службин пуҫлӑхӗн ҫумӗ пулса тӑрӑшнӑ Игорь Михайлова ӗҫрен кӑларнӑ. Документа республика ертӳҫи Олег Николоаев паян, авӑн уйӑхӗн 3-мӗшӗнче, алӑ пуснӑ.
Игорь Викторович — юридици пӗлӗвӗллӗ ҫын. Вӑл 2004 ҫулта Мускаври Ҫар университетӗнчен вӗренсе тухнӑ, унта вӑл юриспруденци енӗпе вӗреннӗ, специализацийӗ — «Прокурорпа тӗпчев ӗҫӗ».
ЧР Элтеперӗ Олег Николаев черетлӗ «тӳрӗ лини» ирттерме палӑртнӑ. Хальхинче вӑл ҫурла уйӑхӗн 29-мӗшӗнче 18 сехетре иртӗ.
«Тӳрӗ линие» халӑхпа «Ковалев разберется» ятарлӑ проект формачӗ евӗр ирттерме палӑртнӑ. Ку программа Наци телекуравӗнче пур, унта автор ҫивӗч ыйтусене хускатать.
Ыйтусене маларах Элтеперӗн халӑх тетелӗсенчи страницисене яма пулать. Ҫавӑн пекех ыйтӑва МФЦ сечӗн видеокамерисем ҫине ҫыртарма май пур.
РФ Патшалӑх Думин депутачӗ Анатолий Аксакова тепӗр награда панӑ. Физкультурниксен кунӗ ячӗпе иртнӗ уявра ӑна юбилейлӑ медаль панӑ. Вӑл – физкультура тата спорт тытӑмӗнче патшалӑх органӗ йӗркеленнӗренпе 100 ҫул ҫитнине халалланӑскер. Ҫак наградӑнах спорт министрӗ Василий Павлов та тивӗҫнӗ.
Аса илтерер: ҫурла уйӑхӗн 15-мӗшӗнче Анатолий Аксакова «Шупашкарӑн хисеплӗ ҫынни» ята панӑ. 2022 ҫулта вара вӑл «Чӑваш Республикин хисеплӗ ҫынни» ята тивӗҫнӗ.
+29.3 °C