Юрӑ кӗнекин хуплашки

Трак енрен композиторсем чылайӑн тухнӑ. Вӗсем тӑван халӑхӑмӑра ҫӗршер-пиншер юрӑ парнеленӗ. Хӑшӗ-пӗри, чӑн та, вӑхӑт иртнӗҫемӗн, пурнӑҫ улшӑнса пынӑ май манӑҫа тухса пырать ӗнтӗ. Чылайӑшне вара уйрӑм юрӑҫсемпе пултарулӑх коллективӗсем паян кун та манӑҫа кӑлармаҫҫӗ. Юрӑсене хывнӑ хӑш-пӗр композиторсем халӗ пирӗн хушӑра ҫук пулсан та, вӗсен хайлавӗсем вилмеҫҫӗ, пурӑнаҫҫӗ, концертсенче тӑтӑшах янӑраҫҫӗ.

Акӑ Кушкӑ ялӗнче ҫуралнӑ, Красноармейски ялӗнче кун кунланӑ Михаил Ильич Ильин педагог, спорт тусӗ, композитор пурӑннӑ пулсан кӑҫал 85 ҫул тултармаллаччӗ. Шел, унӑн чӗри икӗ ҫул каялла тапма чарӑнчӗ. И. Я. Яковлев ячӗллӗ Чӑваш патшалӑх педагогика институтӗнче истори учителӗн дипломне алла илсе 40 ҫул ытла ҫамрӑк ӑрӑва тивӗҫлӗ воспитани парас тесе вӑй хунӑ М. И. Ильин. Ҫавӑншӑн ӑна «РСФСР халӑха вӗрентес ӗҫ отличникӗ», «Чӑваш АССР тава тивӗҫлӗ учителӗ» хисеплӗ ятсем панӑ.

Обществӑлла ӗҫрен те аякра тӑман Михаил Ильич. 30 ҫул ытла пропагандист тивӗҫне пурнӑҫланӑ, ҫав хушӑрах районти тӗп больницӑпа «Сельхозтехника» пӗрлешӗвӗн хорӗсене ертсе пынӑ. Иртнӗ ӗмӗрӗн 50-мӗш ҫулӗсенче вӑл районти Акатуйӗнче пӗрлештернӗ хор дирижерӗ пулнӑ, республикӑри ӗҫпе юрӑ уявӗсене те пӗрре мар хутшӑннӑ. Ку вӑхӑтрах спортпа та туслӑ пулнӑ: йӗлтӗрпе чупса, волейболла выляса, шашка спортӗнче малти вырӑнсене ҫӗнсе илнӗ, тренер пулса чылай спортсмен хатӗрленӗ. Михаил Ильич ертсе пыракан шашка кружокне ҫӳрекенсем республикӑра 6 хутчен — пӗрремӗш, 3 хутчен иккӗмӗш вырӑнсене тивӗҫнӗ, Раҫҫей шайӗнче Рыбинск, Тула, Анат Тагил, Орел хулисенче иртнӗ ӑмӑртусенче тупӑшнӑ. Ахальтен мар пултаруллӑ тренера 1987 ҫулта «РСФСР спорт ветеранӗ» ят та панӑ.

Пушӑ вӑхӑтра Михаил Ильич ашшӗнчен юлнӑ фисгармонипе, аккордеонпа, балалайкӑпа вылянӑ, чӑвашла 50 ытла юрӑ ҫырнӑ, вӑл шутран 30-шӗ «Ялав» журналта, республикӑпа районти хаҫатсенче кун ҫути курнӑ. Пулла, кӑмпана ҫӳрени, дачӑра ӗҫлени те хавхалантару кӳнӗ ӑна.

Мӑшӑрӗ ҫинчен ҫӗнӗ «Ҫӗмӗртсем, ҫӗмӗртсем…» юрӑсен кӗнекин ум сӑмахӗнче педагогикӑра чылай вӑй хунӑ, «ЧР тава тивӗҫлӗ учителӗ» ята тивӗҫнӗ Мария Федоровна Ильина та ӑшшӑн аса илет. М.И. Ильинӑн ҫывӑх тусӗ, тӑванӗ — И.Р. Степанов композитор пухса хатӗрленӗ ҫак кӗнекене пӗтӗмпе Михаил Ильич кӗвӗленӗ лирикӑлла 44 юрӑ кӗнӗ. Сӑввисен авторӗсем — Н. Ершов, Ю. Петров, Л. Антонов, И. Ивник, А. Галкин, А. Тимофеев, Н. Йӑлӑм, Н. Степанова, В. Давыдов-Анатри, В. Димитриев, И. Малкай, М. Хури, Г. Трофимов, Н. Кузьмина, В. Урдаш, П. Ҫӑлкуҫ, Г. Белов. «Саншӑн мар» ятлӑ юрӑ сӑмахӗсене М. И. Ильин хӑех, «Асанне юмахӗ» ятлинне Н. Степановапа пӗрле ҫырнӑ. Юрӑсен нотисем те пур.

Кӗнекене М. И. Ильинӑн пурнӑҫӗпе ӗҫӗ-хӗлне сӑнлакан чылай сӑнӳкерчӗкпе пуянлатнӑ.

Кӗнеке редакторӗ Н.Г. Ершов, музыка редакторӗ Н.Ф. Филимонов. Ӑна 100 экземпляр тиражпа Шупашкарти «Ҫӗнӗ Вӑхӑт» типографире кун ҫути кӑтартнӑ. Вӑл — юрра-кӗвве юратакансемшӗн пысӑк парне.

#Красноармейски, #Красноармейски районӗ, #Кушкӑ, #кӗнекесем