Паян Чӗмпӗр облаҫӗнче пысӑк инкек пулнӑ. Автоаварире нумай ҫыннӑн пурнӑҫӗ татӑлнӑ.

Малтанлӑха пӗлтернӗ тӑрӑх, фура вӑхӑтра чарӑнса ӗлкӗреймен, малта тӑракан микроавтобус ҫине пырса кӗнӗ. Автобус умӗнче тепӗр йывӑр тиевлӗ машина пулнӑ. Ҫавна май пассажир транспортне икӗ пысӑк машина хӗстерсе лартнӑ.

Аварире 16 ҫын вилнӗ. Мерседес салонӗнче 20 ҫынна яхӑн ҫын пулма пултарнӑ. Транспорт харпӑр ҫыннӑн шутланнӑ. Пырса тӑрӑннӑ фура водителӗ вилнӗ.

Малтан автобусра Кӑркӑсстан ҫыннисем пулнине пӗлтернӗ. Анчах кайран ку информаци тӗрӗс маррине каланӑ.

Театр артисчӗсем. culture.cap.ru сайтран илнӗ сӑнӳкерчӗк

К.В. Иванов ячӗллӗ Чӑваш патшалӑх академи драма театрӗ куракансене черетлӗ, 105-мӗш, сезонта ҫӗнӗ ӗҫсемпе кӗтсе илме хатӗрленет.

Хальхи вӑхӑтра унта Вера Панова пьеси тӑрӑх хатӗрлекен «Уйрӑлу каҫӗ» спектакль-мюзикл репетицийӗ пырать.

Ҫавӑн пекех «Мӑнаккасем» камите лартассипе тимлеҫҫӗ. Александр Коровкин театрпа кино актерӗн тата драматургӑн «Тетки» пьесине чӑвашла куҫарнӑ. Куракансем валли ун тӑрӑх хаваслӑ спектакль хатӗрлеҫҫӗ.

Александр Островскийӗн «Последняя жертва» пьесине те лартӗҫ.

Унсӑр пуҫне театрта «Фольклортан пуҫласа джазчен» (ку вӑл ҫирӗплетнӗ ят мар, ӗҫ варианчӗ) спектакль-концертпа ӗҫлеҫҫӗ.

epotos.com сайтри сӑн

Тутарстан хӗрарӑмӗ Вӑрмар районӗн арҫыннисем ӑна вӑрланӑ тесе полицие кайса заявлени ҫырнӑ. Анчах куншӑн хӑйӗнех явап тытма тивнӗ.

Ку кӑҫал нарӑс уйӑхӗнче пулнӑ. Хӗрарӑм каланӑ тӑрӑх, ӑна асӑннӑ районти икӗ арҫын вӑрланӑ, Кавал ялӗнче путвалта ирччен тытнӑ.

Йӗрке хуралҫисем тӗрӗслев ирттернӗ те кун пекки пулманнине, хӗрарӑм суйнине палӑртнӑ. Ӑна хӑйне 10 пин тенкӗ штраф тӳлеттерме йышӑннӑ.

cap.ru сӑнӳкерчӗкӗ

Ӗнер Шупашкар хула админстрацийӗнче Чӑваш Енӗн пӗрремӗш президенчӗн кӑкӑрӗ ҫине медаль ҫакса янӑ. Вӑл «Шупашкар хули умӗнчи тава тивӗҫлӗ ӗҫсемшӗн» ятлӑ.

Николай Васильевич ку медале хулан социаллӑ экономика аталанӑвне пысӑк тӳпе хывнӑшӑн, общество пурнӑҫӗнчи тава тивӗҫлӗ ӗҫсемшӗн тивӗҫнӗ.

Ҫак кун ыттисем те наградӑна тивӗҫнӗ. Вӗсен йышӗнче Патшалӑх Думин финанс рынокӗн комитечӗн председателӗ Анатолий Аксаков, вӗренӳ министрӗ Дмитрий Захаров, «Чебоксарские новости» хаҫатӑн тӗп редакторӗ Лариса Буланкина, «Чувашгражденпроект» тӗп архитекторӗ Вениамин Мамуткин, Шупашкарти 2-мӗш ҫӑкӑр савучӗн директорӗ пулнӑ Юрий Кислов.

ШӖМ тунӑ сӑн

Ҫӗмӗрле районӗнчи Мисчӗ ялӗнче амӑшӗ машинӑпа тапранса кайма хатӗрленнӗ чухне 2 ҫулти ывӑлӗ ҫине кӗрсе кайнӑ. Юрать-ха, ача чӗрех юлнӑ. Анчах ӑна, суранланнӑскере, пульницӑна илсе кайнӑ. Кун пирки ШӖМ пӗлтерет.

Ку инкек ӗнер, ҫурла уйӑхӗн 19-мӗшӗнче, каҫхи 6 сехет ҫурӑра пулнӑ. 34 ҫулти хӗрарӑм ВАЗ-2111 машина рулӗ умне ларсан каялла чакма пуҫланӑ та ывӑлӗ ҫине кӗрсе кайнӑ. Вӑл ӳсӗр пулманни паллӑ.

digital.cap.ru сайтри сӑнӳкерчӗк

Чӑваш кӗнеке издательствинче Ольга Савандееван «Пысӑк чӗпӗ» кӗнеки пичетленсе тухнӑ.

Ҫӗнӗ кӑларӑма кӗҫӗн ҫулхи ачасем валли кӑларнӑ. Редакторӗ – Ольга Федорова, художникӗ – Мария Ермолаева.

Ҫӗнӗ кӗнекене алла илсен ачасем чӗрчунсем ҫинчен ҫырнӑ калавсемпе паллашайӗҫ. Тӗп сӑнарсем — ырӑ кӑмӑллӑ та ӗҫчен ачасем. Вӗсем ашшӗ-амӑшне пулӑшаҫҫӗ, ӑмӑртмалла ӗҫлеҫҫӗ, пушӑ вӑхӑта савӑк та усӑллӑ ирттереҫҫӗ.

21.мвд.рф сӑнӳкерчӗкӗ

Ҫурла уйӑхӗн 18-мӗшӗнче Шупашкарта ҫуран ҫӳрекенсене ятарласа каҫмалли вырӑнсенче икӗ хутчен ҫапса хӑварнӑ.

Кӑнтӑрласенче, 12 сехет те 30 минутра, Элкер урамӗнче «Шевроле-Круз» автомобиль 11-мӗш класс ачи ҫине пырса кӗнӗ. Машина рулӗ умӗнче Мари Элти 53 ҫулти арҫын пулнӑ. Шар курнӑ арҫын ача суранланнӑ, ӑна пульницӑна вырттармах тивмен те, анчах тухтӑр пулӑшӑвӗ кирлӗ пулса тухнӑ.

Трактор тӑвакансен проспектӗнче ирхи 9 сехетре 31 ҫулти хӗрарӑм ҫине машина пырса кӗнӗ. Шар курнӑскере пульницӑна илсе кайнӑ. Тухтӑрсем пулӑшнӑ хыҫҫӑн хӗрарӑма килне янӑ. «Лада-Гранта» автомобиле Шупашкарта пурӑнакан 63 ҫулти арҫын тытса пынӑ.

Пӑтӑрмаха ҫакланнӑ водительсем иккӗшӗ те урах пулнӑ.

digital.cap.ru сӑнӳкерчӗкӗ

Чӑваш Енри ҫамрӑксем, ҫав шутра чӑвашсем те, IT-специалиста вӗренсе тухсан Мускавра ӗҫлеме ӗмӗтленеҫҫӗ. Пурте мар-ха. Кашни тӑваттӑмӗш.

Ыйтӑма шкул ачисем хушшинче ирттернӗ. Яш-кӗрӗмпе хӗр-упраҫ пысӑк тупӑш пирки ӗмӗтленет. Ҫулталӑк каяллахипе танлаштарсан ӳсекен ӑрӑвӑн ҫав енӗпе ыйтӑмӗ 1,5 хут ӳснӗ.

Ачасен шухӑшӗпе «Кейсистемс» компани ҫу уйӑхӗнче кӑсӑкланнӑ. Ыйтӑма вӑл Чӑваш Енри 48 шкулти (ҫав шутра Кӳкеҫри, Муркаш районӗсенчи вӗренӳ учрежденийӗсенче) 8-11 классенче вӗренекенсем хушшинче ирттернӗ. Унта 4 пин те 795 шкул ачи хутшӑннӑ.

Кӑҫал ҫурла уйӑхӗнче тӗлӗнмелле хитре ҫанталӑк тӑрать. Типӗ, ҫумӑр ҫумасть. Кун пекки 2011 ҫултанпа та пулман.

Синоптиксем пӗлтернӗ тӑрӑх, пире тепӗр эрне 30 градуслӑ шӑрӑх кӗтет. Ку – сулхӑнра кӑна-ха. Кӑнтӑрласерен 30-32 градус тӑрӗ, каҫхине – 17-19 градус.

Хальлӗхе ҫулла пирӗнпе сыв пуллашасшӑн мар. Синоптиксем уйӑх вӗҫӗнче кӑна сивӗтессине пӗлтереҫҫӗ.

Шупашкарти Марфа Трубина ячӗллӗ вулавӑша 1970 ҫулсенчех уҫнӑ. 2019 ҫулта тӳре-шара вулавӑшсене оптимизаци тума шутласан вӑл черетри пӗрремӗш пулнӑ. Телее, ӑна хупман. Халӗ ав ҫӗнелнӗ вулавӑш алӑкӗсене уҫнӑ.

Марфа Трубина ячӗллӗ вулавӑш Раҫҫей конкурсне хутшӑнса 15,4 миллион тенкӗ грант ҫӗнсе илнӗ. Ку укҫа ҫурта юсамалли пулнӑ. Вулавӑша чӑваш наци стилӗпе килӗшӳллӗн юсаса ҫӗнетнӗ.

Вулавӑша савӑнӑҫлӑ лару-тӑрура уҫнӑ ҫӗре ЧР Элтеперӗ Олег Николаев тата хула администрацийӗн пуҫлӑхӗ Денис Спирин хутшӑннӑ.