Кунашкал ыйту лартсан эсир, ахӑртнех, Чилин ҫурҫӗр енче вырнаҫнӑ Атакама пушхирӗ ҫинчен шухӑшланӑ пулӑттӑр. Ма тесен час-часах ӑна тӗнчери чи типӗ пушхир тесе палӑртаҫҫӗ. Ӑсчахсем ҫирӗплетнӗ тӑрӑх, кунта пӗр тумлам шыв та ӳкмен тапхӑр 400 ҫул тӑсӑлнӑ, 1570 ҫултан пуҫласа 1971 ҫулччен. Атакама пушхирӗ, тен, чи типӗ пушхир те пулӗ, анчах Ҫӗр чӑмӑрне илес пулсан вӑл чи типӗ вырӑн мар.

Планетӑн чи типӗ вырӑнӗ Антарктидӑра, Виктори Ҫӗрӗ районӗнче, ӑна Мак-Мердо айлӑмӗ ят панӑ. Ку лаптӑк 4 800 ҫм² йышӑнать, унта юр ҫук. Улттӑмӗш континентӑн пӗтӗмӗшле лаптӑкне илсен унӑн калӑпӑшӗ 0,03% пулать.

Мӗншӗн-ха кунта юр ҫук, ҫумӑр ҫумасть?

Мак-Мердо айлӑмне ҫӳллӗ тусем хупӑрласа илнӗ, вӗсене пула ку вырӑна Тухӑҫ-Антарктика пӑрлӑхӗ сарӑлаймасть. Антарктика енчен вӗрекен типӗ ҫилсен хӑвӑртлӑхӗ 320 км/сех таран ҫитет, вӗсене пула тусем ҫинчи юр вӗҫсе каять, сывлӑш юхӑмӗсем аяларах аннӑҫемӗн температура хӑпарма пуҫлать те пӗтӗм нӳрӗк пӑсланса пӗтет. Юрпа ҫумӑр ҫӗр лаптӑкӗ ҫине ӳкме ӗлкӗреймест, вӗсем самантрах пӑсланса пӗтеҫҫӗ.

Малалла...

Республика кӑна мар, Мускав та Ҫӗрпӳ районӗнчи Кивӗ Тутайкассинчи икӗ ҫын Ҫӗпӗр мурӗпе чирлени пирки калаҫать. Вӑкӑр хуҫи каланӑ тӑрӑх, вӑл выльӑха пуссан чикансене сутнӑ. Анчах ку верси ҫирӗпленмен.

Следстви комитечӗ палӑртнӑ тӑрӑх, ҫав какая республикӑра пурӑнакан икӗ ҫын туяннӑ. Роспотребнадзор ӗҫченӗсем ӑна туртса илнӗ. Ӑна тӗпченӗ хыҫҫӑн тӗп тӑвӗҫ. Вӑл упраннӑ вырӑнта карантин пулнине йышӑннӑ.

3D-принтерпа пичетленӗ пӗрремӗш ракета тӳпене вӗҫсе хӑпарнӑ, анчах, шел пулин те вӑл орбита таран хӑпарайман.

Юнкун, Мускав вӑхӑчӗпе 06:25 вӑхӑтра, Флорида штатӗнчи Канаверал сӑмсахӗнчен 3D-принтерпа пичетленӗ тӗнчери пӗрремӗш Terran 1 ракета ӑнӑҫлӑ вӗҫсе хӑпарнӑ. Иккӗмӗш ступенӗ уйрӑлнӑ вӑхӑтра, Ҫӗр чӑмӑрӗн аялти орбити патне ҫитеспе, ракетӑпа пӑтӑрмах сиксе тухнӑ.

Космос аппарачӗ орбитӑна тухайман пулин те, юнкун ӑна хута яма май килни, 85 процентне 3D-принтерпа пичетленнӗ ракета кӑткӑс условисене чӑтма, вӑл вӗҫме пултарнине ҫирӗплетсе панӑ.

Terran 1 хӑйӗн пӗрремӗш вӗҫевӗ вӑхӑтӗнче нимӗнле усӑллӑ япала илмен, анчах компанире каланӑ тӑрӑх ракета Ҫӗр чӑмӑрӗн аялти орбитине хӑйӗнпе пӗрле 1250 килограмм таран илме пултарать.

Ракета ҫӳллӗшӗ 33,5 метр, диаметрӗ — 2,2 метр.

Ракетӑн 85% пайне 3D-принтерпа металл шӑранчӑкӗсенчен пичетленӗ, ҫав шутра пӗрремӗш ступенӗ ҫинчи тӑхӑр Aeon 1 двигатель тата иккӗмӗшӗнче усӑ куракан пӗр вакуумлӑ Aeon двигатель.

Relativity Space тӗллевӗ – сахалтан та 95% 3D-принтерпа пичетленӗ ракета хатӗрлесси.

Олег Николаев архивӗнчи сӑн

РИА Новости пӗлтернӗ тӑрӑх, ЧР Пуҫлӑхӗ Олег Николаев текех айфонпа усӑ курмасть. Унӑн халӗ Раҫҫей туса кӑларнӑ Ayya смартфон-мӗн.

Агентство хыпарланӑ тӑрӑх, ҫак кунсенче Правительство ҫуртӗнче ӗҫлекенсем Олег Алексеевичӑн аллинче айфон мар, смартфон пулнине асӑрханӑ.

Сӑмах май, ҫулталӑк каялла Элтепер Инстаграмри (Раҫҫейре ӑна экстремистла сайт тесе йышӑннӑ) страницине те хупнӑ.

culture.cap.ru сӑнӳкерчӗкӗ

Ӗнер, пуш уйӑхӗн 23-мӗшӗнче, Чӑваш наци музейӗн директорӗ Ирина Меньшикова 55 ҫул тултарнӑ.

Вӑл 1986 ҫулта Шупашкарти ӳнер училищинчен черченипе рисовани преподавателӗ пулма вӗренсе тухнӑ. Каярах пӗлӗвне И.Н. Ульянов ячӗллӗ Чӑваш патшалӑх университетӗнче туптанӑ, ҫав аслӑ шкулта историк тата истори преподавателӗ пулма вӗреннӗ.

Чӑваш наци музейне Ирина Меньшикова 15 ҫул ӗнтӗ ертсе пырать. Республикӑн Культура министерствинче палӑртнӑ тӑрӑх, Ирина Меньшикова — хӑй ӗҫӗнчи чӑн ӑста, вӑл ертсе пынипе музей ҫӗнӗ шая тухнӑ.

cap.ru сӑнӳкерчӗкӗ

Хӗрлӗ Чутай районӗнчи Утаркасинче пурӑнакан Евдокия Мерзлайкина 100 ҫул тултарнӑ.

Пӗр ӗмӗрхи юбилейпа кинемее

хӗрлӗ чутайсен «Чавал» ентешлӗхӗн ертӳҫи Владимир Савинкин, унӑн ҫумӗ Анатолий Воробьев, Хӗрлӗ Чутай муниципалитет округӗн Пантьӑк территорийӗнчи пуҫлӑхӗ Алексей Порфирьев саламланӑ.

Пӗр ӗмӗрхи кинемее ҫӗршыв Президенчӗ Владимир Путин та открытка ярса парса саламланӑ.

Вӑйпитти ҫулӗсенче хӗрарӑм ял совет секретарӗнче те, ЗАГСра та, колхозра та тӑрӑшнӑ. Упӑшкипе виҫӗ ача ҫуратса ӳстернӗ. Хальхи вӑхӑтра кинемей Ҫӗнӗ Шупашкарта хӗрӗ патӗнче пурӑнать.

cap.ru сӑнӳкерчӗкӗ

Раҫҫейри этнографи музейӗн директорӗ Юлия Купина чӑваш тӗррине тӗрлеме вӗренесшӗн. Ҫакӑн пек каланӑ вӑл республика Элтеперӗпе Олег Николаевпа тӗл пулсан.

Мускавран пирӗн пата килнӗ хӑнапа Олег Николаев «Вышитая Россия» (чӑв. Тӗрленӗ Раҫҫей) пӗтӗм Раҫҫейри фестивале Чӑваш Енре ирттерессине сӳтсе явнӑ. Фестивале пирӗн республикӑра йӗркелеме ҫӗршывӑн культура министрӗ Ольга Любимова кӑҫалхи кӑрлач уйӑхӗнче сӗннӗ.

Аса илтерер: Раҫҫейӗн тӗрленӗ карттине хатӗрлессипе ҫӗршывӑн тӗрлӗ регионӗнчи 260 ӑста ӗҫленӗ. Ӗҫре 50 ытла материалпа усӑ курнӑ.

21.мвд.рф видеовӗнчен илнӗ сӑнӳкерчӗк

Пӗлтӗрхи раштав уйӑхӗн 19-мӗшӗнче Шупашкар хулинче пурӑнакан пӗр хӗрарӑм хӑйӗн йыттине ҫухатнине Чӑваш халӑх сайчӗ пӗлтернӗччӗ.

Аса илтерер: хӗрарӑм хаски йытта хӑй ӗҫлекен кафе умне кӑкарса хунӑ. Кайран пӑхать те — йытӑ ҫук. Хӗрарӑм йытӑ ҫухлани пирки пакунлисене пӗлтерет, лешсем пуҫиле ӗҫ пуҫараҫҫӗ.

Ҫав йытта Трактор тӑвакансен проспектӗнчи полици уйрӑмӗ умӗнче асӑрханӑ, ӑна пакунлисем хӑйсем патне илсе кӗртнӗ.

Кӑкарса хунӑ йытта пӗрле пурӑнакан ҫулланнӑ пӗр хӗрарӑмпа арҫын вӗҫертсе кайнӑ. Киле вӗсем таксипе каяс тенӗ. Машина кӗтсе тӑнӑ хушӑра йытӑ тарса ҫухалнӑ.

Хӗрарӑм судра ӑнлантарса панӑ тӑрӑх, йытта вӑл нушалантараҫҫӗ тесе шухӑшланӑ пулать.

Суд арҫынпа хӗрарӑма 5-шер пин тенкӗ штраф хурса панӑ.

agro.cap.ru сӑнӳкерчӗкӗ

Чӑвашсен ҫакӑрне Раҫҫейре те ҫитекен пулман. «Лучший хлеб России – 2023» (чӑв. Раҫҫейри чи лайӑх ҫӑкӑр — 2023) конкурсра Шупашкарти 2-мӗш ҫӑкӑр завочӗн «Хлебные злаки» тата «Полбяной» ятлӑ ҫӑкӑрӗсем ылтӑн тата бронза медале тивӗҫнӗ.

Чи тутлӑ ҫӑкӑр конкурсне Мускаври Пӗтӗм тӗнчери прмышленность академийӗнче ӗнер, пуш уйӑхӗн 22-мӗшӗнче, пӗтӗмлетнӗ.

Республикӑн Ял хуҫалӑх министерствинче пӗлтернӗ тӑрӑх, ҫӑкӑр завочӗ производство линине ҫӗнетме палӑртса хунӑ. Ку ӗҫе унта 2025 ҫулччен туса пӗтересшӗн.

Телеграмри "Чувашия.Сегодня" каналтан илнӗ сӑнӳкерчӗксем

Етӗрне районӗнчи амӑшӗпе хӗрӗ Раҫҫейри чи маттур дояркӑсен ятне тивӗҫнӗ.

Ҫуллахи тата хӗллехи ял хуҫалӑх ваййисенче пирӗн ҫӗршывра темиҫе ҫул ӗнтӗ вӗсене никам та ҫитеймест.

Кӑҫал вӗсем Дояркӑсен пӗтӗм ҫӗршыври ӑмӑртӑвӗнче кӗмӗл медале ҫӗнсе илнӗ. Амӑшӗ, Надежда Петрова, икӗ хутчен палӑрнӑ. Вӑл уйрӑм зачетра та «кӗмӗле» тивӗҫнӗ. Яштака та ҫӳллӗ мар ҫак хӗрарӑм, сӑмах май каласан, самбо енӗпе спорт мастерӗ!